Daatimi Bẹseri Bẹseri Laamụ Daabụọ

Kẹnị dein, Pẹrẹ Nebuchadnezzar dawaịmị. Dawaị mị wó a bụụdọọn kụrọmọ duonị, ómịnị dein mị laa bụnụgha. Nebuchadnezzar wó bụrụ-otubosẹ, tịịnwẹrị gbaa á pịrịmị: ‘Ine dawaị bọọ tuugbaa ị pịrị.’ Ámịnị gbaa ụ pịrịmị: ‘Pẹrẹ, sisei iné dawaị gbaa wo pịrị.’ Anịa Nebuchadnezzar gbaa á pịrịmị: ‘Ịmịnị dawaị gbaa á pịrịgha fa! Ámịnị dawaị gbaa ị pịrịghaba, ịmịnị á baa mịnị.’ Ámịnị mọkpọ gbaa ụ pịrịmị: ‘Ị́mịnị dawaị gbaa wo pịrịdaba, omịnị dawaị bọọ tuugbaa mịnị.’ Nebuchadnezzar gbaa á pịrịmị: ‘Ámịnị ị lẹịmọ kị dọụmịnị. Ine dawaị gbaa ị pịrị!’ Ámịnị gbaa ụ pịrịmị: ‘Mị kiriogboma laa bịsẹ timitimi ye mịẹmụ ụbọ fa. Ị́mịnị kịmị mịẹ a paagha yekị biimịnị.’

Nebuchadnezzar boloukọn kụrọmọ duonị, Babylon bọọ emi bụrụ-otubosẹ baasin bara gbaamị. Daniel, Shadrach, Meshach, bá Abednego kpọ bịsẹ bolouma sụọ-emi. Anịduonị pẹrẹ bị zụa ifie akị ụ pịrị bara Daniel mọ gbaamị. Bịsẹ yọ bụọmị, Daniel mọ wó ikie-otubo mọ Jehovah baratụa-pịrịye biimị. Jehovah teeki mịẹ ma o?

Jehovah bụnụgha-dawaị duotolu a Nebuchadnezzar dawaị mọ bá dawaị-tuu mọ akị Daniel dịamị. Barịị baịmị, Daniel mú pẹrẹ odubo-owei laawẹrị gbaa ụ pịrịmị: ‘Bụrụ-otubo baa kụmọ. Ịmịnị pẹrẹ dawaị bọọ tuugbaa mịnị.’ Odubo-owei bị, Daniel kọn mú Nebuchadnezzar laawẹrị Daniel gbaa ụ pịrịmị: ‘Ọkpọnanaowei bolouma paamụ yebo mịẹgaan ị́ dịadẹ. Bei iné dawaị bị: Ị́mịnị tẹmẹtịẹmọ-wẹrịemi kịmị ẹrịmị. Tịbị mị gold ka kị tẹmẹ-wẹrịemi, agbobu mọ barabo mọ ba silver, biri mọ atẹnịbo mọ ba copper, bụọbo ba ogu, bụọkiribo bá ogu mọ atọụ anịghakpọ atọkọ mọ gụwaịemi. Bịsẹ yọ bụọmị, okuta kẹnị ogun duo pẹịpaawẹrị mú tẹmẹ-wẹrịemi ye bụọkiribo famụmị. Okuta mị bịsẹ tẹmẹtịẹmọ-wẹrịemi ye famụ purupuru-wẹrị afọrụ mị asẹẹ fọụn tangbeimị. Okuta mị bo dụba ogun ka paamị. Bịsẹ ogun mị kiri-ogbosẹ laa sinmị.’

Daniel dawaị tuu kpọ gbaamị. Ụ gbaamị: ‘Mị dawaị tuumị: Iné daabụọ kị gold akị tẹmẹwẹrịemi tịbị mị. Iné daabụọ bụọdaba laamụ daabụọ kị silver mị. Bịsẹ daabụọ bụọdaba, copper bara-emi daabụọ kiriogbosẹ daamịnị. Bịsẹ ye bụọdaba barịị daabụọ mị ogu bara kị kụrọ mịnị. Fatuumị, kẹnị daabụọ daamịnị. Bịsẹ daabụọ mị maa-anga dịẹmọmịnị. Kẹnị-anga ogu bara kị kụrọmịnị, kọọ anga ba atọụ anịghakpọ atọkọ bara kị bọụmịnị. Dụba bo ogun a paa okuta mị Ọkpọnanaowei Daabụọ ka tịbịtịẹmọ wẹrịemi. Bịsẹ daabụọ mị, kọọ daabụọbosẹ, kọnsinwẹrị daatimi bẹseri bẹseri kị laamịnị.’

Nebuchadnezzar, Daniel tọrụyọma wó tịbị mị oboimọmị, bá gbaa Daniel pịrịmị: ‘Iné Ọkpọnanaowei kị dawaị mịẹgaan ị dịamị. Iné Ọkpọnanaowei tọrụ fa.’ Anịduonị, Nebuchadnezzar, Daniel baagha, ómịnị Daniel akị kịlịkịlị otubosẹ tịbịowei a tụamị. Bá Babylon daamụ kụrọ kpọ akị ụ pịrịmị. Jehovah Daniel tẹẹbịbị parụ bara mị ị́ mọ ẹrị ma?