Ifiebosẹ Angọtọlọmọ Wẹrị Dadiye Daatịẹmọ

1-2. (a) Jesus te berifaanye ka kị wó tuuduo-otubo pịrị ma o? (b) Ámịnị tetuu kị duonị Jesus gbẹịnmọ koromọ ma o? (Fotobo kpọ dii.)

“TẸMẸ mị, dịsẹnana wẹrịemi, anịa mẹnị mị suusụọmịnị.”a (Matt. 26:41b) Seibolou kị wo zii wẹrịemi, anịduonị omịnị ye mịẹkiri a paaemi bara Jesus mọ nimi wẹrịemi kị duonị ómịnị mị egberi gbaa mị. Anịa, Jesus gbaa egberimị, berifaanye kọọ paaemi, Omịnị ifiebosẹ angọ nimi wẹrịemi duonị mịẹkirigha fa bara iroro kụmọ. Jesus mị egberi gbaa baị mị, wó tuuduo-otubosẹ agbobutiti wẹrị gbaa Jesus pịrị amọ, paabara paabara ámịnị ụ gbẹịnmọ koromọgha fa. (Matt. 26:35) Ámịnị kịrịịye kị mịẹ dọụmị. Anịa, penimọye anịghakpọ dadiye á laa daba, ámịnị kịalị suusụọmụ bara irorogha wẹrị mị. Anịkị duonị, Jesus mị berifaanye kọn á pịrịmị: “Ifiebosẹ letimi bá pẹlẹgha bara akị tẹẹbịbị mịẹ, anịkị ámịnị laa dadiye a koro sụọgha fa.”—Matt. 26:41a.

² Anịa, Jesus tuuduo-otubo letimi dadiye daatịẹmọgha. Jesus ámọ kẹrị ifiemị, wó tuuduo-otubo ánị gbaa bara mịẹ ma? Anịghakpọ ámịnị ụ gbẹịnmọ koromọ ma o? Ámịnị kirinaatimi legha duonị, ámịnị, ánị benebene mịẹgha fa gbaaye kị mịẹmị—ámịnị Jesus gbẹịnmọ koromọ mị.—Matt. 26:56.

3. (a) Omịnị Jehovah mọ palịtimi dọụmịnịaba, tetuu kị duonị omịnị benebene dadiye a sụọgha fa eti nana agbẹịgha o? (b) Bei egberitịbị bị, omịnị teeki kẹrị ẹrẹtei dọụmịnị a o?

³ Wosẹ, ịmịnị ine mịẹmịnị ye nimi wẹrịemi gbaa inyenrinbụọ duo angọ kekere agbẹị-emi. Gesii bị, omịnị Jehovah dịsẹghaye mịẹ dọụgha. Anịa seibolou kị wo zii wẹrịemi duonị, omịnị dadiyeama a koro sụọmụ yọmị bọụbọụ k’emi. (Rom. 5:12; 7:​21-23) Omịnị vurudu anịghakpọ tọngha bara dadiye a sụọ kpọ paaemi. Omịnị ifiebosẹ Jehovah mọ palịtimi bá Jesus mọ kpọ palịtimi dọụmịnịsẹ, omịnị Jesus gbaaye pei wẹrị ifiebosẹ kirinaa timi dadiye daatịẹmọ wẹrị sei mịẹgha fa. Bei egberitịbị bị baratụa wo pịrịwẹrị bịsẹ bara mịẹ mịnị. Omịnị bọlọụ, wo mịẹ suusụọ a paaemi yeama ditụa mịnị. Bá wo mịẹ Dadiye a sụọ a paaemi yeama daatịẹmọmụ bara kpọ wo mọ ditụa mịnị. Kunumọ yọmị, omịnị baratụa wo pịrịwẹrị ifiebosẹ kirinaa timimụ yeama kpọ ditụa mịnị.

WO MỊẸ SUUSỤỌ A PAAEMI YEAMA LELEIPẸLẸ

4-5. Tetuu kị duonị omịnị kala sei kpọ mịẹ agbẹịgha o?

⁴ Zụa sei-ama kụrọ zụa dẹịn-emi, mọabịkpọ, kala sei kpọ bẹdẹbẹdẹ wo mọ Jehovah mọ ikie seimọ a paaemi. Wo akị ye bẹmọgha seibo kpọ wo mịẹ mú kụrọ sei-ama mịẹ a paaemi.

⁵ Dadiyeama wo kịmịsẹ laamịnị. Anịa kịmị duo mú kịmị laasẹ, ánị suusụọmịnị yọama nana wẹrịemi, anịduonị zụa yeama wo mịẹ dadiye a sụọwẹrị seiye mịẹ kpọ paaemi. Gbaamaba, kẹnị ụbọ angọtụa wẹrị lịkaị-lịkaị zọzọbụnụ inyenrinbụọ kị daatịẹmọ dọụemi. Zịnị kịmị ba tẹịgha inyenrinbụọama kị daatịẹmọ dọụemi, gbaamaba bẹtịbị angọsọnlọ anịghakpọ paatuu vidio bá foto diimụ yọ kị daatịemọ dọụemi. Zịnị ụbọ ba kaanghaba kịmịtọbọụ-esiin, angọserimọ inyenrinbụọ, saramọ bọlọụkọn, anịghakpọ zịnị bụụdọọnyeama daatịẹmọ kị dọụemi. James gbaa bara mị, “kịmị duo mú kịmị laasẹ, ụbọ dịsẹye kị ụ mịẹ mú dadiye a sụọmịnị.”—Jas. 1:14.

6. Omịnị angọ lẹlẹmọgha bara teeki ditụa agbẹị-emi a?

⁶ Ị́mịnị kpọ ị́ mịẹ dadiye a sụọ a paaemi yeama nimi wẹrịemi a? Omịnị tẹmẹ-anga bọọ kụrọemi duonị dadiye a sụọwẹrị sei mịẹgha fa bara iroro daba, omịnị angọ kị lẹlẹmọmịnị. Bịsẹ bara wo mọ iroro daba wo mịẹ akpotu a sụọ mịnị. (1John 1:8) Paul gbaa bara mị “tẹmẹ-anga bọọ kasụọdẹ-otu” kpọ angọ dighaba, dadiye a koro sụọ a paaemi. (Gal. 6:1) Omịnị angọ lẹlẹmọgha bara, ebibara angọ ditụa dá wo mịẹ mú dadiye a sụọmịnị yebo lẹlẹịpẹlẹ.—2Cor. 13:5.

7. Wo mịẹ dadiye a sụọmịnị yebo wo mọ lelei daba, teeki wo mọ mịẹ agbẹị-emi a? Ye akị tọnmọ gbaa.

⁷ Wo mịẹ dadiye a sụọmịnị yebo wo mọ lelei daba, teeki wo mọ mịẹ agbẹị-emi a o? Omịnị angọtụa dá dadiye daatịẹmọmụ bara gbinipẹlẹ! Wo wẹrị akị ye tọnmọ dii, Bible ifiemị, egiren-otu ama duo sụọ dọụ mịnị ifiesẹ, bọlọụ ama kekeremịnị opu ogugobo kị seimọ wẹrị ama duo sụọtimi mị. Anịduonị ama lemịnị otubo, opu ogugobo kị le kụrọmọ dẹịn timi mị. Bịsẹ kpẹkẹnị bara kị, omịnị kpọ wo suusụọmịnị yọbo leleipẹlẹ dá, ifiebosẹ letimi agbẹị-emi, anịkị laa dadiye daatịẹmọ a paadẹ.—1Cor. 9:27.

WO MỊẸ DADIYE A SỤỌ A PAAEMI YEAMA DAATỊẸMỌMỤ BARAMỊ

8-9. Proverbs 7 bọọ gbaa wẹrịemi asịyaịpesi mị teeki mịẹwẹrị laa kụrọ sei mịẹmụ yọmị dẹịnmọmụ timi ma o? (Proverbs 7:​8, 9, 13, 14, 21)

⁸ Omịnị sei mịẹ dọụgha duonị, teeki mịẹ mịnị a o? Wo wẹrị Proverb fun bọọ tịbịyọ 7 bọọ gbaa wẹrịemi asịyaịpesi duo yetolumọ akị. Bịsẹ asịyaịpesi mị amafị erema mọ zọzọ bụnụmị. gooyọ 22 gbaa baramị, ómịnị “vurudu” bara ka kị mú erema laamị. Anịa agọnọ gooyọbo ị́ mọ didaba, ómịnị dọlọ dọlọ zụa mịẹ agbẹịgha yeama mịẹdẹ kị sei mịẹmị.

⁹ Te yeama kị ụ mịẹ mú sei mịẹ ma o? Bọlọụ yemị, ómịnị buburu ifie ka, “[amafị erema] warịmọ naịn ụwọụ duo wẹnịmị.” Bịsẹ yọ bụọdẹ mị ómịnị waị amafị erema warị kị wẹnịmọ mị. (Proverbs 7:​8, 9 goo.) Ómịnị erema ẹrị ifiemị, wẹnị serigha. Ómịnị á bụọmọ wẹrị wó ụtụtụ, bá ámịnị ánị kụndẹ ịkịanbo gbaatimi ifie kpọ, ómịnị timi á peitimi mị. Kaanghaba ámịnị wó tọrụyọ bọọ angọ akị ebiere mịẹ dọụtimi kị duonị ánị kụndẹ ịkịanbo gbaa ụ pịrị mị. (Proverbs 7:​13, 14, 21 goo.) Asịyaịpesi mị, ụ mịẹ bịsẹ dadiye bọọ sụọ yebo daatịẹmọ wẹrị a, ómịnị laa dadiye daatịẹmọ timi mị.

10. Jehovah karịmịnị kịmị tebara kị mịẹtimi Proverbs fun bọọ gbaa wẹrịemi asịyaịpesi bara mịẹgha fa o?

¹⁰ Bei egberi mị, Jehovah karịmịnị kịmị paamọ a paaemi yeama kị mịẹdịa wẹrịemi. Jehovah karịmịnị kịmị kụrọ sei mịẹ daba, yemị “vurudu” bara kị paamị ụ mọ gbaa kpọ paaemi. Anịa, ụbọ mị ebibara paaye kẹrị iroro daba, ụbọ mị kịlịkịlịgha bara zụa mịẹ agbẹịgha yeama mịẹdẹ kị bịsẹ kụrọ sei mịẹ bara akị angọ a nimi mịnị. Kaanghaba ụbọ bị, sei ikie-ama kẹrị, agbẹịgha angọ mịẹ ganagana yeama akị angọ kamaị, Christtuuduo kịmị sụọ agbẹịgha yọama duo sụọ— kaanghaba internet kpọ duo Christtuuduo kịmị duo sụọ agbẹịgha yọama a sụọmịnị. Kaanghaba ụbọ mị ba tẹẹbịbị kpọ mịẹgha, Bible kpọ googha, yetolumọyọ kpọ a múgha bá egberigbaa yọ kpọ a múgha. Anịduonị, Proverbs fun bọọ gbaa wẹrịemi asịyaịpesi bara mị, Jehovah karịmịnị kịmị, biin dẹịn ifieama vurudu ka mú sei mịẹmịnị bara paagha. Anịa ụbọ mị zụa kịrịịgha yeama mịẹdẹ kị mú kụrọ sei mịẹ mị.

11. Omịnị teeki mịẹwẹrị sei mịẹgha fa o?

¹¹ Bei yebị te ka kị wo tolumọ wẹrịemi a o? Omịnị sei bẹtịbị golukụmọ, wo mịẹ mú sei mịẹmụ yebo kpọ golu. Solomon, asịyaịpesi mọ amafị erema mọ egberi bị gbaa siindẹ bị, omịnị bịsẹ egberi bọọ emi tolumọye bị mịẹgaan paamọ mị. Erema gbelemọ yọbị Solomon gbaa mị: “Ánị ụwọụbo duo sụọkụmọ.” (Prov. 7:25) Solomon mọkpọ gbaa mị: Á mọ mọ́ “Saịntimi; ánị warị mọ kpọ naịnkụmọ.” (Prov. 5:​3, 8) Kọkọye, sei wo mọ mịẹ dọụghaba, omịnị sei golu bá wo mịẹ mú sei mịẹmụ yebo kpọ golu.b Gbaamịnị baramị, zụa yeama seigha kị gbaa kpọ, wo mịẹ mú dadiye a sụọwẹrị sei mịẹmụ bara kị paaemi ifiesẹ, omịnị bịsẹ yebo golu.—Matt. 5:​29, 30.

12. (a) Job teeki gbinipẹlẹ ma o? (b) Bịsẹ gbinipẹlẹ yọmị tebara ka kị baratụa ụ pịrịwẹrị dadiye dẹịnmọ ma o? (Job 31:1)

¹² Omịnị gbinipẹlẹ wẹrị wo mịẹ mú sei a sụọmụ yebo daatịẹmọ agbẹị-emi. Bịsẹ bara mịẹgha ifiesẹ, sei mịẹmụ yọmị kụrọ wo pịrịgha fa. Job wó mịẹmụ ye gbinipẹlẹ mị. Job “[wó] tọrụbo mọ avụọ fịmị,” ómịnị benebene agbẹịgha bara akị zịnị ere diigha fa bara gbinipẹlẹmị. (Job 31:1 goo.) Job tọn angọ pịrị yemị baratụa ụ pịrịwẹrị zịnị ere mọ zọzọ bụnụgha. Omịnị kpọ wo mịẹ dadiye a sụọmụ yeama mọ naịngha fa bara gbinipẹlẹ.

13. Omịnị tetuu kị duonị wo iroromịnị yebo angọdii agbẹị-emi a o? (Fotobo kpọ dii.)

¹³ Omịnị wo ye iroromịnị bara kpọ kekere agbẹị-emi. (Ex. 20:17) Zụa kịmịama, ánị ịkịọụ bọọ sei yeama iroromịnị, ámịnị bịsẹ sei-yebo mịẹ paamọgha duonị, seigha bara kị tọn wẹrịemi. Anịa bịsẹ timitimi iroroye mị kịrịịgha. Seiye kịmị ịkịọụ a sụọwẹrị, ụbọ mị, ifiebosẹ bịsẹ ye kị kẹrị iroromịnịsẹ bịsẹ seiye mịẹmụ yọmị ụbọ dịsẹ kụrọmọ dẹịn mịnị. Gbaamaba, ụbọ mị dadiye mịẹpaamọ angọ pịrị siindẹ kị dadiye daatịẹmọmụ ụwọụ dọụmịnị bara kị paadẹ. Wo nimi wẹrịemi bara mị, zụa ifieama sei yeama wo ịkịọụ duo sụọmịnị. Anịa bịsẹ bara paadaba, yelaa dẹịn yemị, omịnị ifie faamọgha bara, bịsẹ sei iroro yebo kọn wo ịkịọụ duo seri dá ebi yeama kị kẹrị iroro. Bịsẹ bara mịẹmịnị yọmị, baratụa wo pịrịwẹrị agbẹịgha yeama iroro wẹrị kụrọ sei mịẹmụ yọ daatịẹmọ mịnị.—Phil. 4:8; Col. 3:2; Jas. 1:​13-15.

14. Teeki mọkpọ baratụa wo pịrịwẹrị laa dadiye a koro sụọgha fa o?

¹⁴ Omịnị mọkpọ teeki mịẹdẹ kị laa dadiye daatịẹmọ mịnị a o? Omịnị ifiebosẹ Jehovah olokobo kokomịnị yọkị, ebi wo pịrị dẹịn-emi bara gbinipẹlẹ agbẹị-emi. Zụa ifieama, omịnị Jehovah dịsẹ-emi yebo mọ bá ye iroromịnị bara mọ dimịẹmụ yọbị kụrọ wo pịrịmịnị, anịa omịnị angọ kụrọmọwẹrị bịsẹ bara mịẹ daba, omịnị pọwẹị pọwẹị kị timi mịnị.

15. Omịnị ifiebosẹ kịrịị yeama bẹtịbị kị mịẹmụ yọmị a dịsẹnana daba, tebara ka kị baratụa wo pịrịwẹrị laa dadiye dẹịnmọ mịnị a o?

¹⁵ Omịnị angọtụa dá ifiebosẹ kịrịịye mịẹmụ yọ bọọ dịsẹnana. Omịnị angọtụa wẹrị “seiye golu bá ebiye kị tarị” daba, baratụa wo pịrịwẹrị ifiebosẹ gbinipẹlẹ wẹrị wo mịẹ seiye mịẹ a paaemi yeama daatịẹmọ wẹrị kịrịịye kị mịẹ mịnị. (Amos 5:15) Kịrịịye mịẹmụ yọkị ifiebosẹ wo dịsẹ kụrọmọ emisẹ, vurudu dadiye kị bo kpọ, baratụa wo pịrịwẹrị tịẹkụrọtimi dadiye daatịẹmọ mịnị.

16. Tẹmẹ-anga yeama kẹrị mịẹmịnị yọmị tebara ka kị baratụa wo pịrịwẹrị laa dadiye dẹịnmọ mịnị a o? (Fotobo kpọ dii.)

¹⁶ Omịnị tebara kị mịẹtimi kịrịị yeama mịẹmụ yọ bọọ dịṣenana kụrọmọ mịnị a o? Ifiebosẹ, wo mịẹ Jehovah tarị-dẹịnmụ yeama kị mịẹ. Omịnị yetolumọyọ anịghakpọ egberigbaayọ emi ifiemị, dadiye kịalị bo wo laagha, omịnị bịsẹ ifiemị akị Jehovah kị mịẹ pọwẹịmọmịnị. (Matt. 28:​19, 20; Heb. 10:​24, 25) Omịnị Bible goo, yetolumọ angọ pịrị bá wo goodẹ yebo kẹrị iroromịnịsẹ, baratụa wo pịrịwẹrị ifiebosẹ seiye golu wẹrị ebiye kị tarị mịnị. (Josh. 1:8; Ps. 1:​2, 3; 119:​97, 101) Jesus gbaa wó tuuduo-otubo pịrị egberi kẹrị ukie: “Pẹlẹgha bara akị tẹẹbịbị mịẹ, anịkị ị́mịnị laa dadiye a koro sụọgha fa.” (Matt. 26:41) Omịnị ifie mịẹpaamọ wẹrị tẹẹ Jehovah yarị-mịnịsẹ, omịnị Jehovah baratụapịrịye mị ẹrị mịnị, bá wo kụrọmọ wẹrị ifiebosẹ wo agọnọ Daụ mịẹ bolouịmbẹlẹ mịnị.—Jas. 4:8.

IFIEBOSẸ ANGỌTỌLỌMỌ WẸRỊ LETIMI

17. Peter te suusụọyọ kị nanawẹrị ma o?

¹⁷ Omịnị wo suusụọmịnị yọbo, zụa dẹịnmọ siin a paaemi. Anịa, omịnị zụa mọ andátimi ala ifie kị laa kpọ paaemi. Wẹrị fịrịmọpaa-owei Peter paamọye dii. Peter kịmị tọbọụ esiinmịnị duonị ómịnị tara ifiesẹ ka kị Jesus piimị. (Matt. 26:​69-75) Peter malafagha bara ka kị Sanhedrin-otu bọlọụ bọọ tịẹtimi Jesus ebiegberi gbaa mị. Anịduonị ómịnị ba kịmị esiingha fa bara kị tọn wẹrị kpọ paaemi. (Acts 5:​27-29) Anịa, zụa kụraịama bụọdẹ mị, ómịnị Jew duopaa Christtuuduo-otubo esiinmịnị duonị Jew duopaagha Christtuuduo-otubo mọ gbelei yefị dọụgha. (Gal. 2:​11, 12) Peter suusụọmịnị yọmị waịbo mị. Kaanghaba ómịnị naa wó suusụọmịnị yọ daatịẹmọ siingha.

18. Wo nana wẹrịemi suusụọ yọbo zụa ifieama tebara ka kị wo a bụụdọon a paaemi a o?

¹⁸ Bei timitimiye wo kpọ paamọ a paaemi. Tebara a o? Omịnị laa dẹịnmọdẹ tọn wẹrịemi suusụọyọ waịbo dadiye a paa wo pịrị a paaemi. Kẹnị bịnaowei paamọ ye wo mọ ditụa. Ụ gbaa mị: “Oịa kụraịsẹ ịmịnị paatuu fotobo mọ bá vidiobo mọ digha yọ duonị iné suusụọ yọmị ị́ mọ dẹịnmọdẹ kị ị́ mọ tọn mị. Anịa zụa ifieama waị mọkpọ mị yebo dimụ yọmị ine adụdụ duo sụọmịnị.” Ebiegberi mị, mị bịnaowei mị angọtụa wẹrị mị dadiye dẹịnmọmụ bara mịẹmị. Bịnaowei mị ereinbosẹ ka angọtụawẹrị mị dadiye daatịẹmọ agbẹị-emi bara nimi angọ pịrị mị—kaanghaba ómịnị mị andámị, andátimi wó fịmọ erein kị laa kpọ paaemi bara ụ mọ nimi angọ pịrị mị. Itu-kosuotubo mọ bá ụ taa mọ baratụa ụ pịrịwẹrị, paatuu vidio anịghakpọ paatu foto dimụ yọ daatịẹmọ mị.

19. Omịnị mọkpọ naa wo suusụọmịnị yọbo dẹịnmọghaba, teeki baratụa wo pịrịwẹrị a dẹịnmọmịnị a o?

¹⁹ Teeki baratụa wo pịrịwẹrị wo suusụọmịnị yọbo bụọmọwẹrị wo mịẹ mú dadiye a koro sụọgha fa o? Omịnị Jesus gbaa bara kị dimịẹ mịnị. Omịnị: “Ifiebosẹ letimi” dadiyeama daatịẹmọ. Ị́mịnị tịẹkụrọemi kị gbaa kpọ, ifiebosẹ ị́ mịẹ mú dadiye a sụọmụ yebo mọ naịn kụmọ. (1Cor. 10:12) Ifiebosẹ baratụa ị́ pịrịwẹrị laa dadiye a sụọgha fa yebo kị mịẹ. Proverbs 28:14 gbaa mị, “Pọwẹị ifiebosẹ lemịnị kịmị laa.”—2Pet. 3:14.

IFIEBOSẸ LEMỊNỊ YỌ BỌỌ EMI AREREBO

20-21. (a) Omịnị wo dadiyebo daatịẹmọmịnị ifiesẹ te arereama kị wo laa mịnị a o? (b) Omịnị angọ kụrọmọwẹrị dadiye daatịẹmọ dọụ emiaba Jehovah tebara ka kị baratụa wo pịrịmịnị a o? (2Corinthians 4:7)

²⁰ Omịnị ifiebosẹ letimi dadiye daatịẹmọmịnị yọmị ebi akị wo pịrịdẹịn emi. Sei mịẹmịnị yọ bọọ emi pọwẹị mị, dụba akị Jehovah dọụbara mịẹmịnị yọ bọọ emi pọwẹị laagha. Jehovah dọụbara mịẹmịnị yọ kị wo mịẹ wẹrị ifiebosẹ pọwẹịtimi mịnị. (Heb. 11:25; Ps. 19:8) Tuumị, Jehovah, omịnị wó dọụbara mịẹmụ bara ka kị wo tẹmẹwẹrịemi. (Gen. 1:27) Omịnị Jehovah dọụbara mịẹ daba, wo sei mọ ebi mọ iroro ịkịọụ mị pereé kị timi mịnị, bá wosẹ laa fagha fagha ụndụ nanamụ ụwọụ bọọ wẹnịtimi mú tuula mịnị.—1Tim. 6:12; 2Tim. 1:3; Jude 20, 21.

²¹ Gbẹsị mị, “mẹnị mị suusụọmịnị.” Anịa, mẹnị mị suusụọmịnị bara kị paa kpọ, omịnị baratụapịrịye nana wẹrịemi. Jehovah kụrọ akị wo pịrịwẹrị dadiye daatịẹmọ mịnị. (2Corinthians 4:7 goo.) Anịa, nimi, Ọkpọnanaowei kịmịawọụ kụrọbosẹ dẹịn-emi kụrọ ka kị wo pịrịmịnị. Wo kpọ ereinbosẹ angọtụa wẹrị wo mịẹ dadiye a sụọmụ yebo daatịẹmọmịnị. Bịsẹ kụrọmị wo bara k’emi. Omịnị ifiebosẹ wo kụrọyọsẹ mịẹmịnịaba, Jehovah wo tẹẹbịbị naawẹrị kụrọ kọn wo pịrị mịnị. (1Cor. 10:13) Iin, Jehovah kọkọ baratụa wo pịrịwẹrị omịnị ifiebosẹ kirinaatimi wo laamịnị dadiyebo daatịẹmọ minị.