Ị́ Kpọ Gesii Nimi Wẹrịemi A O?

1. Ị́ tebara ka kị gesii dimọ wẹrịemi a o?

JEHOVAH kịmịbo Bible bọọ emi gesii egberibo tarị wẹrịemi. Wo nana wẹrịemi peibolou mị Bible kị duo boemi. (Rom. 10:17) Jehovah itu mịẹpaamọ wẹrị “zigeigha bara akị gesii kekeremịnị” bara wo mọ biberin wẹrịemi. (1Tim. 3:15) Itu bọọ “bọlọụdámịnị otubo” Bible gesii mọ bá Jehovah dọụbara mịẹmụ bara mọ akị wo tolumọmịnị. Wosẹ pọwẹịtimi angọ-iyerimọ bei kịmịbo pịrịmịnị.—Heb. 13:17.

2. James 5:19 gbaa bara didaba, omịnị gesii nimidẹ kị gbaa kpọ teeki wo paamọ a paaemi a o?

² Anịa, omịnị gesii kẹrịakị wẹrị Jehovah ogbo gbaa bara kị diwẹnị agbẹị-emi bara nimi wẹrịemi kpọ, omịnị kịmịama pịrị lẹlẹmọ a paaemi. (James 5:19 goo.) Omịnị akị Bible mọ bá Ọkpọnanaowei ogbo mọ duo bomịnị tolumọyebo a nana wẹrịemi eti kị Satan mọ seimọ dọụmịnị.—Eph. 4:14.

3. Tetuu kị duonị omịnị gesii kẹrịkụrọmọ agbẹị-emi a o? (Ephesians 6:​13, 14)

³ Ephesians 6:​13, 14 goo. Alaghatimi Satan kụrọ ikpe egberiama kọn ibebo lẹlẹmọwẹrị tọrụwaị Jehovah kịmịbo dịamịnị. (Rev. 16:​13, 14) Satan mọkpọ angọtụa Jehovah Iseriotu ikịọụbo seimọ dọụmịnị bara kpọ wo mọ nimi wẹrịemi. (Rev. 12:9) Anịduonị, wosẹ ebibara gesii mọ ikpe egberibo mọ bẹbẹ paaemi bara leleipẹlẹ wẹrị ifiebosẹ gesii bọọ timi wẹnịmụ yọkị yelaa dẹịn-emi. (Rom. 6:17; 1Pet. 1:22) Opu akpotuu ladaba gesii bọọ timi wẹnịmịnị yọkị wo ụndụbo zụọbụọmọ mịnị!

4. Bei egberitịbị bị teeki wo mọ kẹrị ẹrẹtei dọụmịnị a?

⁴ Mị egberitịbị mị, omịnị baratụa wo pịrịwẹrị gesii nimi bá Jehovah ogbo gbaa bara diwẹnịmụ maa yelaa inyenrinbụọama tolumọ mịnị. Bịsẹ yọ ụọ daba, omịnị mọkpọ baratụa wo pịrịwẹrị gesii kẹrịkụrọmọmụ tara yeama kẹrị ẹrẹtei mịnị.

BARATỤA WO PỊRỊWẸRỊ GESII LELEIPẸLẸMỤ INYENRINBỤỌAMA

5. Jehovah esiin yọmị tebara ka kị baratụa wo pịrịwẹrị gesii kẹrịkụrọmọ mịnị a o?

⁵ Jehovah esiinmịnị yọmị. Omịnị agbẹịbara akị Jehovah esiinmịnị ifiesẹ, omịnị Jehovah dịsẹgha ye mịẹgha fa. Omịnị Jehovah tarịemi duonị omịnị angọtụa kịrịị bá kịrịịgha ye, gesii bá ikpe egberiama nimiwẹrị Jehovah mịẹ pọwẹịmọ dọụmịnị. (Prov. 2:​3-6; Heb. 5:14) Biin ifieama Jehovah dịsẹgha yebo kị kịmịawọụ dịsẹmịnị duonị, omịnị benebene kịmịawọụ esiinmụ yọ bụọmọ dụba akị Jehovah tarịmụ yọ dẹịnkụmọ.

6. Kịmị esiin yọmị tebara ka kị oia Israel otubo mịẹwẹrị gesii gbeinmọ koromọ ma o?

⁶ Omịnị kịmị awọụama kị esiin Ọkpọnanaowei dẹịn daba, omịnị laa gesii bọọ tịẹkụrọgha fa. Oi-maamụfeni kịmịbo nẹ mú kikoromọ wẹrịemi ogbo mị emibara diyọ a mú otubo mịẹbara bị wo mọ ditụa daba, oia kịmịsẹ, Canaan otubo kị esiin akị Jehovah tarịyọ dẹịn mị. Ámịnị gbaa Israel otubo pịrịmị: “Kịmịbo kụrọ wo dẹịn-emi duonị omịnị laa ánị kịmịbo mọ sụụgha fa.” (Num. 13:​27-31) Kịmịtọbọụ tọrụyọ mị, Canaan otubo kọkọ kụrọ Israel otubo dẹịn-emi. Anịa ámịnị laa ánị egiren-otubo dẹịnmọgha fa bara kị gbaamịnị Israel ụbọsẹ, Jehovah kụrọ kẹrị irorogha. Bei oia kịmịbo Jehovah akị ánị bara bọọ dọụ wẹrịemi ye kị kẹrị iroro agbẹị timi mị. Bá Jehovah bụọdẹ ifiemị, mịẹ á pịrịdẹ yebo kpọ kẹrị-iroro agbẹị timi mị. Ámịnị bịsẹbara mịẹ wẹrị a, baratụa á pịrịwẹrị Jehovah kị kụrọbosẹ nana wẹrịemi bá Canaan otubo nana wẹrịemi kụrọ mị ye a paagha bara ukie timi mị. Joshua mọ Caleb mọ mị oia kịmịbo mịẹbara mịẹgha, ámịnị Jehovah baratụapịrịye kị bii mị. Ámịnị gbaa mị: “Omịnị kọkọ Jehovah dọụbara mịẹmịnị ifiesẹ, Jehovah wo kekeretimi mú kikoromọ wẹrịemi ogbo bọọ sụọ mịnị.”—Num. 14:​6-9.

7. Omịnị tebara ka kị Jehovah esiinyọ mịẹkụrọmọ mịnị a o? (Foto kpọ dii.)

⁷ Omịnị wo Jehovah esiinmịnị yọ mịẹ kụrọmọ dọụemiaba, omịnị iroro tọn dọụmịnị ifiesẹ, ụ mịẹ pọwẹịmụ yeama kị mịẹ mịnị. (Ps. 16:8) Bible yọ ị́ mọ goomịnị ifiesẹ, angọ bii, ‘Ịmịnị kị paamụ wẹrị a, tebara kị ị mọ mịẹmụ timi ma o?’ Gbaamaba, oia Israel otubo kịmị-suumọ egberi gbaatimi ifiemị ị́ kpọ timi á peitimi bara kẹrị iroro dii. Ị́mịnị kịmịtọbọụ esiinmịnị duonị ánị gbaa egberi kị peimụ timi ma, anịghakpọ Jehovah kụrọ á dẹịn-emi bara kị ị́ mọ mịẹdịamụ timi ma? Biin Israel-otu Joshua mọ Caleb mọ gbaa gesii egberi kẹrịakịgha. Anịduonị, gesii egberi kẹrịakịgha otubo laa kikoromọ wẹrịemi ogbo bọọ sụọgha.—Num. 14:​10, 22, 23.

8. Omịnị angọtụa te inyenrinbụọ kị nana agbẹị-emi a o, bá tetuu a?

⁸ Angọ-iyerimọ. Jehovah, gesii mịẹgaan paamọ angọ-iyerimọmịnị otubo kị pịrịmịnị. (Matt. 11:25) Omịnị angọ-iyerimọmịnị kị duonị gesii tolumọ nimi mị. (Acts 8:​30, 31) Bịsẹ bara kị gbaa kpọ, omịnị angọserimọ inyenrinbụọ golu agbẹị-emi. Omịnị angọ-serimọ daba, wo bẹtịbị iroroyebo kị kịrịị akị Jehovah ogbo duo bomịnị tolumọyebo dẹịn-emi bara iroro kpọ paaemi.

9. Te yeama kị baratụa wo pịrị wẹrị ifiebosẹ angọ-iyerimọ inyenrinbụọ nana mịnị a o?

⁹ Ifiebosẹ Jehovah kọkọ dụba wo dẹịn kụrọmọ-emi bara wo mọ kẹrị iroromịnị yọmị, baratụa wo pịrịwẹrị ifiebosẹ angọ-iyerimọ inyenrinbụọ nana mịnị. (Ps. 8:​3, 4) Omịnị mọkpọ Jehovah tẹẹ dá ómịnị baratụa wo pịrịwẹrị angọ-iyerimọdẹịn bá tolumọye kẹrịakịmịnị inyenrinbụọ nana. Jehovah baratụa wo pịrịwẹrị, Bible mọ bá wó ogbo duo bomịnị tolumọyebo didụbamọ wo bẹtịbị nimiye dẹịn. Bẹtịbị Bible goomịnị ifiemị, Jehovah angọ-iyerimọmịnị kịmị tarị, angọ serimọ bá kịmị diseimọmịnị kịmị goluemi bara dọụ ẹrị. Ị́mịnị Jehovah ogbo bọọ wẹnịmịnị fịrị bị ị́ mịẹ Jehovah ogbo bọọ oroupaamịnị aba, ebibara angọ-iyerimọ inyenrinbụọ nana.

OMỊNỊ GESII KẸRỊ KỤRỌMỌTIMI TUULAAMỤ BARA MỊ

10. Jehovah te kịmịama kị duo wo tolumọmịnị a o?

¹⁰ Eti akị Jehovah ogbo gbaamịnị egberibo a tụa. Oruseri Israel ifiemị, Jehovah, Moses mọ bá Joshua mọ ka kị wó olokobo gbaa wó odubo-otubo pịrịtimi mị. (Josh. 1:​16, 17) Israel otubo mị kịmịbo gbaa bara diwẹnị ifiemị, biin tarịama kị nana mị. Biin kụraịama bụọdẹ ifiemị, karị-itu mịẹpaamọ mị, oi-maamụ-fini fịrịmọpaa-otubo kị karị-itu bọọ bọlọụdaá timimị. (Acts 8:​14, 15) Bo kẹnị ifie laa bị, zịnị itu-kosuotuama kpọ Jerusalem bọọ fịrịmopaa-otubo sụọmọ mị. Peibolou nana kịlịkịlị odubo-owei gbaa bara diwẹnị yọbị, “itu nana wẹrịemi peibolou mịẹkụrọmọ mị bá itu kpọ sọụ-bọlọụ a mú kụrọmọ mị.” (Acts 16:​4, 5) Wo ifie kpọ, omịnị Jehovah ogbo duo bomịnị egberibo diwẹnị daba biin tarị kị wo laa mịnị. Omịnị Jehovah ghọ tịbịtịẹmọ wẹrịemi otubo gbaa bara diwẹnị daba tebara ka kị Jehovah gbelemịnị a o? Israel-otubo Kikoromọ Wẹrị Ogbo bọọ mútimi ifiema paaye mị wo mọ ditụa daba baratụa wo pịrịwẹrị mị biibịbị parụmịnị.

11. Jehovah, Moses akị bọlọụdátimi ifiebị, teeki Moses diseimọ otubo paamọ ma o? (Foto kpọ dii.)

¹¹ Israel otubo ogbo-abadi duo wẹnị Kikoromọ Wẹrị Ogbo bọọ mútimi ifiemị, zụa kịmịama Jehovah akị Moses pịrị wẹniṭimi fịrị bị tọrụdọnyọ nana mị. Ámịnị gbaamị: “Israel otubosẹ kị yalịyalị emi [Moses bẹtịbịgha], Jehovah á mọ mọ emi.” (Num. 16:​1-3) Kọkọ Ọkpọnanaowei tọrụyọmị “Israel otubosẹ” yalịyali kị timi mị, anịa Jehovah kị Moses sẹlẹwẹrị Wó kịmịbo daamịnị. (Num. 16:28) Anịduonị mị tịbịkụrọ otubo Moses diseimọ yọmị, ámịnị kọkọ Jehovah kị diseimọ mị. Bịsẹ kịmịbo Jehovah dọụ wẹrịemi yebo kẹrị irorogha; ámịnị ánị dọụmịnị yebo gbaamaba—oroupaa bá daakụrọ nanamụ yọ kị kẹrị iroro mị. Jehovah bịsẹ tịbịkụrọ otubosẹ baá mị. (Num. 16:​30-35, 41, 49) Bei erein kpọ Jehovah wó ogbo duo bomịnị tolumọyebo kẹrịakịgha otubo tarịgha.

12. Omịnị tetuu kị duonị eti akị Jehovah ogbo bọọ tụa agbẹị-emi a o?

¹² Omịnị, wo akị Jehovah ogbo bọọ nana wẹrịemi eti kẹrịkụrọmọ agbẹị-emi. Wo tolumọmịnị yebo deiyọ paa daba, anịghakpọ ogbo mị fịrịwẹnịmịnị bara mị dei agbẹị-emi ye paadẹ ifiesẹ, bọlọụ daamịnị otubo ifie famụgha bara ka kị bịsẹye mịẹmịnị. (Prov. 4:18) Ámịnị Jehovah dọụbara kị mịẹ dọụmịnị kị duonị bịsẹbara mịẹmịnị. Ámịnị iroro tọn dọụmịnị ifiesẹ, Bible gbaa bara kị diwẹrị bịsẹ iroro tọnmịnị, Jehovah karịmịnị otubosẹ bịsẹ Bible gbaa bara kị diwẹnịmịnị.

13. Teeki “kịmị kụrọmọmịnị egberibo” a o, bá omịnị bịsẹ egberibo akị tebara kị mịẹ agbẹị-emi a o?

¹³ “Kịmị kụrọmọmịnị egberibo kẹrịkụrọmọ.” (2Tim. 1:13) Bible bọọ emi egberibo kị, “kịmị kụrọmọmịnị egberibo.” (John 17:17) Wo pei wẹrịemi yebosẹ bịsẹ egberibo ka sẹsẹrẹ emi. Jehovah Ogbomị omịnị mịẹdẹ kị Bible bọọ emi egberibo kẹrị-kụrọmọmụ bara kọn wo tolumọmịnị. Omịnị bịsẹ tolumọye diwẹnị daba, tarịama wosẹ laa mịnị.

14. Zụa Christtuuduo-otuama tebara ka kị “kịmị kụrọmọmịnị egberibo” a barasiin ma o?

¹⁴ Omịnị “kịmị kụrọmọmịnị egberibo” diwẹnịgha ifiesẹ, teeki paa mịnị a o? Kẹnị paaye wo mọ ditụa. Bọlọụ kụraị sọnransi mị, zụa Christtuuduo-otuama Jehovah erein mị bodẹ bara gbaatimi mị, ámịnị bịsẹ ikpe egberi bị, gbaa biin kịmịama pịrị mị. Kaanghaba bịsẹyọ gbelemọ fun ámọ gẹẹ mị, fịrịmọpaaowei Paul kị gẹẹ wẹrịemi bara ámọ gbaa kpọ paaemi. Thessalonica ma emị Christtuduo-otubo ebibara kpọ tuudọụgha timi mị ikpe egberibo pei mị, bá gbaa akị zọzọ kpọ pịrị mị. Ámịnị Paul á mọ mọ́ timi ifiemị gbaa á pịrị egberibo ukie wẹrị a, ámịnị lẹlẹmọye a korogha timi mị. (2Thess. 2:​1-5) Paul gbaa akị bịnaotubo pịrị amọ ámịnị kịmịotu gbaamịnị egberibosẹ pei kụmọ e. Bọlọụ kpọ baratụa bịnaotubo pịrịmụ yọ duonị, Paul gẹẹ akị Thessalonica bịnaotubo pịrị maamụkaramọ fun bị, kunumọ yọbị Paul gbaa mị: “Ịmịnị Paul á kulemịnị, bei ine bẹtịbị bara kị duo bomịnị, ine gẹẹmịnị funbosẹ mị lelei nana wẹrịemi; bei ine gẹẹmịnị bara bị.”—2Thess. 3:17.

15. Omịnị tebara ka kị gesii mọ lei-emi ikpe egberiama duo angọ kekere mịnị a o? Paaye gbaa. (Fotobo kpọ dii.)

¹⁵ Omịnị te ka kị Paul gẹẹ Thessalonica bịnaotubo pịrị fun duo tolumọ akị ma o? Omịnị Bible mọ kẹnịsụọmọgha tolumọyeama naá daba, anịghakpọ kẹnịbara emi egberiama naá daba, kịlịkịlị bara mịẹ. Soviet Union ifiemị, wo egiren-otubo kẹnị fun gẹẹ mị. Bei fun bị ị́ mọ didaba, bịnaotubo Jehovah ogbo mọ bẹbẹ paaemi ogbo mịẹpaamọmụ bara ka kị á kụrọmọ mị. Anịa bei fun bị ị́ mọ didaba, kọkọ Jehovah ogbo kị duoboemi bara mọ lei mị. Bịsẹ bara kị paa kpọ gesii peibolou nana wẹrịemi bịnaotubo á pịrị lẹlẹmọ koromọgha. Letter bolou bọọ emi yebo mọ bá ánị Bible duo tolumọdẹ yebo mọ kẹnịsụọmọgha bara bị ámọ dọụẹrị mị. Bei ifie kpọ, wo egiren-otubo gesii bị tarịgha duonị, interneti duo ikpe egberiama kọn wo adụdụ mọ, bá wo kẹnịsụọmọ yọ mọ seimọ dọụmịnị. Omịnị “saramọ [wo] biberin wẹrịemi yebo gbeinmọ koromọ” kụmọ. Pebidá omịnị ifiebosẹ wo naá bá goomịnị yebo kọkọ wo Bible duo tolumọdẹ yebo mọ kẹnịsụọmọ emi bara leleipẹlẹ. Bịsẹ yọmị wo barịị angọ kekere mịnị.—2Thess. 2:2; 1John 4:1.

16. Romans 16:​17, 18 gbaa bara didaba, zụa kịmịama gesii duo serii kpọ, omịnị teeki mịẹ agbẹị-emi a o?

¹⁶ Jehovah mọ kpẹkpẹrẹẹ emi otubo mọ kẹnịsụọmọ timi tuu laa. Ọkpọnanaowei omịnị kẹnịsụọmọ timi ụ karị kị dọụ wẹrịemi. Omịnị gesii kẹrị kụrọmọ wẹrịemi ifiesẹ, baratụa wo pịrịwẹrị ifiebosẹ kẹnịsụọmọ inyenrinbụọ nana mịnị. Gesii gbaseimọmịnị kịmịsẹ dịẹịdịẹị inyenrinbụọ ka kị itu bọọ mịẹpaamọ dọụmịnị, Omịnị bịsẹpaa “kịmịbo kịlẹ” kị Ọkpọnanaowei mọ gbaa mị. Omịnị á kịlẹgha ifiesẹ, ámịnị ikpe egberiama akị wo lẹlẹmọ wẹrị gesii duo serii mịnị.—Romans 16:​17, 18 goo.

17. Omịnị gesii nimi bá kẹrịkụrọmọ daba te arere-ama kị wo laa mịnị a o?

¹⁷ Omịnị gesii nimi bá ụ kẹrị kụrọmọ daba, omịnị Jehovah mọ naịnmịnị bá tẹmẹ-anga kpọ a tịẹkụrọtimi mịnị. (Eph. 4:​15, 16) Satan gbaamịnị ikpe egberibo ba wo gbelegha fa, bịsẹ yọ bụọmọ kpọ, opu akpọtu ladaba, Jehovah baratụa wo pịrị bá wo kekere mịnị. Ifiebosẹ gesii kẹrị kụrọmọ, bịsẹ bara mịẹ daba “dọọnana Ọkpọnanaowei mị ị́ mọ mó timi mịnị.”—Phil. 4:​8, 9.