Zadok Boloukụrọ Inyenrinbụọ Dimịẹ

1-2. Zadok ba te paa kịmị a o? (1Chronicles 12:​22, 26-28)

PAAYEMỊ iroro dii. 340,000 dẹịn-emi owei kịmịama David akị Israel pẹrẹ atụamụ yọ duonị kẹnịyọ a bẹnịị-emi. Hebron mọ naịn-emi yọbị biin ọdọụama emi, ámịnị tara dein a bịsẹ yọ bọọ timi dẹrị, ẹrẹtei, bolouịmbẹlẹ bara duma tuun bá pọwẹị pọwẹị zorutei mị. (1Chron. 12:39) Zadok, kpọ bịsẹyọ bọọ timi mị, anịa omịnị asịyaịpesi duonị biin kịmịama ụ nimigha kpọ paaemi. Anịa, Jehovah ụ nimi wẹrịemi, bá omịnị kpọ Zadok bịsẹyọ bọọ timi bara nimi kị Jehovah mọ dọụ wẹrịemi. (1Chronicles 12:​22, 26-28 goo.) Zadok ba te paa kịmị a o?

² Zadok ịkịankụn-owei. Ómịnị Tịbị Ịkịankụn-owei Abiathar mọ kị fịrịwẹnịtimi mị. Jehovah ye lelei-pẹlẹ bá ebibara wó egberibo a sụọtuu nimimụ kụrọ akị Zadok pịrị mị. (2Sam. 15:27) Kịmịotu Zadok kị dọụbo wẹrị, ebi tolumọbịbị-ama akị timi mị. Zadok boloukụrọ bá ye kpọ esingha owei. Mị egberitịbị mị omịnị Zadok nana boloukụrọ inyenrinbụọ kị tolumọ mịnị.

3. (a) Tetuu kị duonị Jehovah karịmịnị otubosẹ boloukụrọ inyenrinbụọ nana agbẹị-emi a o? (b) Teeki wo mọ kẹrị ẹrẹtei dọụmịnị a?

³ Mị kunumọ ereinbo, Satan bẹbẹ ụwọụama ka wo nana wẹrịemi peibolou seimọ dọụmịnị. (1Pet. 5:8) Omịnị, Jehovah Satan mọ bá wó sei akpo mọ kọnsiinmụ ifie kọrụmịnị bị, boloukụrọtimi kị dọụ wẹrịemi. (Ps. 31:24) Wo wẹrị Zadok dimịẹmụ tara ụwọụama ditụa.

FỊRỊWẸNỊ ỌKPỌNANAOWEI DAABỤỌ PỊRỊ

4. Tetuu kị duonị Daabụọ fịrịwẹnịmụ yọbị boloukụrọ inyenrinbụọ dọụ wẹrịemi a o? (Foto kpọ dii.)

⁴ Omịnị Jehovah kịmịama, anịduonị wo adụdụsẹ ka kị fịrịwẹnị Okpọnanaowei Daabụọ pịrịmịnị, anịa biin ifieama omịnị boloukụrọ inyenrinbụọ dọụ wẹrịemi. (Matt. 6:33) Gbaamaba, bei sei akpọmị, omịnị Jehovah dọụbara mịẹ bá Daabụọ ebiegberi gbaamụ yọbị boloukụrọ inyenrinbụọ dọụ wẹrịemi. (1Thess. 2:2) Politics duonị, akpọmị dịẹdịẹ bọlọụ bọlọụ ka múmịnị, anịa omịnị kẹnị-anga kpọ a sụọgha bara timi dọụmịnịsẹ boloukụrọ inyenrinbụọ dọu wẹrịemi. (John 18:36) Biin Jehovah Iseriotuama Politics anịghakpọ sụụyọ a múgha duonị sịlị gbelemọ bụụdọọnyeama nanadẹ, á pịrị ụyamọmịnị, anịghakpọ ikoliwarị k’emi.

5. Tetuu kị duonị Zadok baratụa David pịrịmụ yọbị boloukụrọ inyenrinbụọ dọụ ma o?

⁵ David akị pẹrẹ a tụa ifiemị, Zadok kpọ ogetei yọ á múmị. Anịa, Zadok ogetei yọ bẹtịbị ka kị ịkịọụ a tụawẹrị múgha. Zadok sụụ kị paa kpọ sụụ mịnị bara ka kị angọtọlọmọ wẹrị múmị. (1Chron. 12:38) Zadok angọtọlọmọ wẹrị David mọ Israel otubo mọ barịị ṣụụwẹrị egiren-otubo dẹịnmọmụ bara mịẹ mị. Zadok nimi ebibara sụụgha kị gbaa kpọ, ómịnị boloukụrọ inyenrinbụọ nana mị.

6. Boloukụrọ gbelemọ yọmị, David tebara ka kị ebi mịẹdịaye a paa Zadok pịrị ma o? (Psalm 138:3)

⁶ Ịkịankụn-owei Zadok teyọ kọọ boloukụrọ inyenrinbụọ nanamụ bara tolumọ ma o? Ómịnị kụrọnana bá boloukụrọ emi otuama mọ kị inyenrintimi mị. Kọkọ Zadok mị kịmịbo duo biin yeama kị tolumọmị. David boloukụrọ bara akị Israel sụụ-bọlọụ datimi duonị, Israel-otubosẹ wó akị pẹrẹ atụa mụ bara gbinipẹlẹ mị. (1Chron. 11:​1, 2) David wó egiren-otubo mọ sụụmịnị ifiesẹ, ómịnị Jehovah ka sẹsẹrẹtimi mị. (Ps. 28:7; Psalm 138:3 goo.) Zadok zịnị otuama kpọ duo tolumọye akị mị,—gbaamaba Jehoiada mọ wó tọbọụ Benaiah mọ bá 22 Israel ziitu tịbị-otuama nẹ baratụa David pịrị otu kpọ. (1Chron. 11:​22-25; 12:​26-28) Bei kịmịbosẹ David Israel pẹrẹ ghọ sụọmụ yọbị barapou mị.

7. (a) Mị tịẹkiri mị, te mịẹdịayeama kị baratụa wo pịrịwẹrị boloukụrọ inyenrinbụọ mịẹdịa mịnị a o? (b) Vidio mị bịnaowei Nsilu paamọye bị te ka kị wo tolumọ ma o?

⁷ Malafagha bara Jehovah Daabụọ anga bọọ tịẹkụrọemi otubo wo mọ kẹrị ukiemịnị yọbị baratụa wo pịrịwẹrị boloukụrọ inyenrinbụọ nana mịnị. Wo Pẹrẹ, Jesus Christ, Satan akpọ bọọ politics asụọmụ dadiye nana kpọ, ómịnị bịsẹ dadiye datịẹmọ mị. (Matt. 4:​8-11; John 6:​14, 15) Jesus ifiebosẹ Jehovah ka sẹsẹrẹ wẹrị boloukụrọ inyenrinbụọ nana mị. Wo ifie kpọ biin asịyaịpesiama malafagha bara politics a sụọgha fa anịghakpọ sụụyọ a múgha fa bara gbaapaamọ mịnị. Ị́mịnị laa jw.org duosụọ wẹrị bịsẹ asịyaịpesibo gbelemọ egberiama goo a paaemi.a

BARATỤA INÉ BỊNAOTUBO PỊRỊ

8. Itu-kosuotu te ifie kị boloukụrọ inyenrinbụọ dọụ wẹrịemi a o?

⁸ Jehovah kịmịbo ifiebosẹ pọwẹịtimi baratụa zọzọ pịrịmịnị. (2Cor. 8:4) Anịa, zụa ifieama, bịsẹ bara mịẹmụ yọmị boloukụrọ inyenrinbụọ kị dọụ wẹrịemi. Gbaamaba, sụụ iné emiyọ bọọ paadaba, itu-kosuotubo, tẹmẹ-anga fịyaịama, mẹnị-anga fịyaịama, bá bịdẹ-ama mịẹpaamọ bịnaotubo pịrịmịnị. Itu-kosuotubo bịnaotubo tarị wẹrịemi duonị, mị fịyaịbo saị bịnaotubo yarịmịnị mị, biin ifieama akpotu bolou kpọ a sụọmịnị. (John 15:​12, 13) Itu-kosuotu bịsẹ wẹnịmịnị fịrịmị, Zadok boloukụrọ inyenrinbụọ kị dimịẹmịnị.

9. 2Samuel 15:​27-29 gbaa bara mị, David te fịrị ka kị Zadok fịrịmọ ma o? (Foto kpọ dii.)

⁹ David ụndụ bị akpotu bolou a sụọmị. Wó tọbọụ Absalom ụ baá wẹrị pẹrẹ ịkasị mị akị dọụtimi mị. (2Sam. 15:​12, 13) David ifie famọgha bara Jerusalem duo baịn seridọụ mị! Ómịnị gbaa wó odubo-otubo pịrị mị: “Seritịẹ dá, wo baịn ama duo serii, Absalom wosẹ baasiin mịnị!” (2Sam. 15:14) Odubo otubo serimịnị ifiemị, David kẹnị ụbọ Jerusalem a timi Absalom mịẹ dọụmịnị yebo gbaa ụ pịrịmụ iroro tọnmị. David, Zadok mọ zịnị ịkịan-kụn otuama mọ kị fịrịmọ mú bịsẹ fịrị wẹnịmị. (2Samuel 15:​27-29 goo.) Ámịnị kịlịkịlị bara ka kị bei fịrị wẹnị agbẹị-emi. David akị á pịrị wẹrịemi fịrịmị kụrọ fịrị, ánị ụndụbo kpọ gbele a paaemi. Absalom angọ serimọ bá akpotu mịẹpaamọmịnị kịmị. Absalom bá ụ daụ kpọ yẹrịpaamọ mị. Anịduonị Absalom, Zadok mọ bá zịnị ịkịan-kụn otubo mọ fịrịwẹnị David kị pịrịmịnị bara nimi daba, ómịnị á baá kpọ paaemi!

10. Zadok bá zịnị otuama mọ tebara ka kị David ụndụ zụọ ma o?

¹⁰ David wó ikieowei Hushai bá Zadok mọ tịịnwẹrị bo ụ sụọmọ iroro tọn mị. (2Sam. 15:​32-37) Ánị tọnpẹlẹdẹ iroro duonị, Hushai aritụa Absalom anga ka emibara mịẹmị, bá akị pẹrẹowei David mọ sụụmụ bara kpọ gbaa akị Absalom pịrị mị. Anịa Hushai, Absalom mọ iroro tọnsin daba, ómịnị waị mú gbaa akị Zadok mọ Abiathar mọ pịrịmịnị. (2Sam. 17:​8-16) Bei maa kịmịbo ba mú gbaa David pịrịmịnị. (2Sam. 17:17) Jehovah baratụa yọ duonị, Zadok mọ ịkịan-kụn otubo mọ ebibara David ụndụ kekere mị.—2Sam. 17:​21, 22.

11. Omịnị baratụa wo bịnaotubo pịrịmịnị ifiemị, tebara ka kị Zadok boloukụrọ inyenrinbụọ dimịẹ a paaemi a o?

¹¹ Omịnị baratụa akpotu bolou-emi bịnaotu pịrị dọụmịnịsẹ, tebara ka kị Zadok dimịẹ a paaemi a o? (1) Gbaa bara dimịẹ. Vurudu akpotu paadaba, omịnị gbaa bara dimịẹmụ yọbị yelaaemi. Bịsẹyọ kị baratụa wo pịrịwẹrị zọzọnaa bara inyenrinmịnị. Branch office gbaa bara kị diwẹnị. (Heb. 13:17) Itu-kosuotubo ifiebosẹ vurudu akpotu gbelemọ yọmị akị angọtọlọmọ a paaemi letterbo mọ bá funbo mọ goo angọ pịrị. (1Cor. 14:​33, 40) (2) Boloukụrọ, anịa kịlịkịlị. (Prov. 22:3) Ebibara akị ye irorodẹ kị yemịẹ, agbẹịgha bara angọ akị akpotu atụa kụmọ. (3) Jehovah ka sẹsẹrei. Ị́ mọ iné bịnaotubo mọ akpotuu a sụọ Jehovah mọ dọụgha. Jehovah baratụa ị́ pịrịwẹrị laa iné bịnaotubo barịmịnị.

12-13. Viktor mọ Vitalii mọ paamọye bị te ka ki ị́ tolumọ ma o? (Foto kpọ dii.)

¹² Wo wẹrị Viktor mọ Vitalii mọ paamọye ditụa, bei maa itu-kosuotubo beni mọ fịyaị mọ kọn Ukraine bịnaotubo yarịtimi mị. Viktor gbaamị “Omịnị fịyaị dọụ mú yọbosẹ kị laamị.” Viktor mọkpọ gbaamị, “biin ifieama alagba-ama fiyetimi bara kpọ omịnị mọ naátimi mị. Kẹnị bịnaowei wó store kị duo fịyaị akị wo pịrị mị. Bịsẹ otuoyebo bịnaotubo gbalịtimi zụa ifie laamị. Omịnị fịyaịbọ akị motor ma saịmịnị ifiemị, kẹnị bomb fiyemị, bịsẹ bomb fiye yọ duobo wo emiyọ mị 20 meters (66 ft) laaemi. Bịsẹ ereinsẹ, Jehovah baratụa ị pịrịdá ịmịnị boloukụrọtimi bịnaotubo barịmụ bara ị mọ tẹẹ mị.”

¹³ Vitalii gbaamị “Omịnị boloukụrọ inyenrinbụọ dọụ kụrọmọ mị.” Vitalii mọkpọ gbaamị, “Ine bọlọụ mú ifiemị 12 hours ka kị yọụmú yọ laamị. Ịmịnị ụwọụbirisẹ tẹẹ Jehovah pịrịtimi mú yọ laamị.” Vitalii boloukụrọ mị, anịa ómịnị kịlịkịlị mị. Ómịnị mọkpọ gbaamị: “Jehovah kịlịkịlị nimiye akị ị pịrịdá yebosẹ kọn wó dọụbara kị mịẹmụ bara ị mọ tẹẹmị. Ịmịnị Government gbaa wẹrịemị ụwọụ kụmọ duo yọụmị. Bịnaotubo kẹnịsụọmọ wẹnịmịnị yọbị ine peibolou mịẹkụrọmọ mị. Ámịnị ụwọụ bị emi okutabo kọnsiin, fịyaị, arúama, zịnị dọụ wẹrịemi yelaa yeama, bá wo bụnụmụ yọ kpọ mịẹpaamọ mị.”

JEHOVAH MỌ KPẸKPẸRẸẸTIMI

14. Wo tarị wẹrịemi kịmị ba Jehovah karịghasẹ tebara ka kị wo gbele a paaemi a o?

¹⁴ Wo warịbolou kịmị, anịghakpọ wo ikie-ụbọ bá Jehovah karịgha ifiesẹ wo dọọn kụrọmọmịnị bá wo mịẹ suusụọ kpọ paaemi. (Ps. 78:40; Prov. 24:10) Omịnị ụbọ mọ naịn bá ụbọ tarị kụrọmọ wẹrịemisẹ, yemị wo gbele kụrọmọmịnị. Bịsẹ bara ye ị́ paamọ daba, Zadok mịẹdiaye mị baratụa ị́ pịrị mịnị.

15. Tetuu kị duonị Zadok Jehovah mọ kpẹkpẹrẹẹ timimụ yọmị boloukụrọ inyenrinbụọ dọụ ma o? (1Kings 1:​5-8)

¹⁵ Zadok mọ Abiathar mọ ebi ikieotuama. Anịa, Abiathar Jehovah mọ David mọ a barasin ifiebị, Zadok mọkpọ Jehovah mọ kị kpẹkpẹrẹtimi mị. Bei yebị David daabụọ mị kunumọ dọụmịnị ifie kọọ paamị. David uwatimi fịịmọ naịndẹ ifiemị, wó tọbọụ Adonijah Jehovah akị Solomon pịrịdẹ pẹrẹ-ịkasị mị akị dọụmị. (1Chron. 22:​9, 10) Abiathar mú Adonijah anga kọọ sụọmị. (1Kings 1:​5-8 goo.) Bịsẹ ye duonị, Abiathar tịbịkụrọ David mọ Jehovah mọ pịrị mị! Bei yebị kọkọ Zadok dọọn kụrọmọ mị. Ómịnị mọ Abiathar mọ kụraị maasii akị ịkịan-kụn fịrịwẹnị gbeleidẹ. (2Sam. 8:17) Ánị maa kịmị kẹnịsụọmọwẹrị “gesii Ọkpọnanaowei avụọ ekpedi” kpọ kekere mị. (2Sam. 15:29) Bịsẹ yọ bụọmọ kpọ, ánị maá kịmị baratụa pẹrẹowei David kpọ pịrịdẹ bá Jehovah karịmịnị yọmị biin fịrịama kpọ wẹnị gbeleidẹ.—2Sam. 19:​11-14.

16. Teeki baratụa Zadok pịrịwẹrị Jehovah a barasingha o?

¹⁶ Abiathar Jehovah a barasin kpọ Zadok Jehovah mọ kpẹkpẹrẹẹtimi mị. David Zadok kpẹkpẹrẹẹ inyenrinbụọ mị tamanaịyọ nanagha. Adonijah mịẹye mị bo gaan paa bị, David mú Zadok, Nathan, bá Benaiah sẹlẹwẹrị Solomon akị pẹrẹ atụamị. (1Ki. 1:​32-34) Zadok biin Jehovah karịmịnị otuama mọ wẹnị gbelei mị, gbaamaba Nathan bá Pẹrẹowei David anga bọọ sụọ otubo kpọ, bịsẹ yọmị ebibara ka kị Zadok kụrọmọmị. (1Ki. 1:​38, 39) Solomon bo pẹrẹ a sụọdẹ ifiebị, ómịnị “tịbị ịkịankụn-owei Zadok akị Abiathar wẹnịtimi fịrị wẹnị mị.”—1Ki. 2:35.

17. Ị́ mọ mọ́ naịn-emi kịmị Jehovah a barasin daba, ị́mịnị tebara ka kị Zadok dimịẹ a paaemi a o?

¹⁷ Ị́mịnị tebara ka kị Zadok dimịẹ mịnị a o? Iné tarị wẹrịemi kịmị Jehovah ghọ barasin daba, ị́mịnị Jehovah mọ kị kpẹkpẹrẹtimi mịnị bara mịẹdịa. (Josh. 24:15) Jehovah kụrọ akị ị́ pịrịwẹrị kịrịịye mịẹ mịnị, bá baratụa ị́ pịrịwẹrị boloukụrọ mịnị. Jehovah ka sẹsẹrẹ, ifiebosẹ tẹẹbịbị mịẹ bá Jehovah mọ kpẹkpẹrẹẹ emi kịmịbo mọ naịntimi. Iné kpẹkpẹrẹẹ inyenrinbụọ mị Jehovah tọrụyọ ma yelaaemi, anịduonị Jehovah tarịama kọn ị́ pịrị mịnị.—2Sam. 22:26.

18. Marco mọ Sidse mọ paamọye mị te ka kị ị́ tolumọ ma o?

¹⁸ Wo wẹrị Marco mọ bá ụ taa, Sidse mo paamọye ditụa, ánị bọlọụ awọụbo gesii bọọ barasin mị. Marcoegbaamị: “Ị́mịnị awọụ zii daba, iné awọụbo tarị kụrọmọmịnị. Ifiebosẹ á kekeremịnị. Anịa bei awọụbo Jehovah a barasin daba, kịmị dọọn kụrọmọmịnị.” Marco mọkpọ gbaamị: “Anịa Jehovah baratụa wo pịrịwẹrị inetimi mịtịẹkiri laadẹ. Jehovah baratụa wo pịrịmịnị duonị ine suusụọemi ifiebị, ị taa kụrọemi, ị taa suusụọemi ifiebị, ịmịnị ba kụrọemi.” Sidse gbaa mị: “Jehovah baratụa wo pịrịgha wẹrị a, omịnị laa ineghamụ timi mị. Ịmịnị kị ine awọụbo mịe Jehovah a barasin bara kị ịmịnị mụ irorotimi mị, anịduonị ịmịnị ine adụdụ duo tẹẹ Jehovah pịrị mị. Alaghatimi, kẹnị bịnaraụ bo ị laamị, wo maa kịmị naa zozo ẹrịgha bị aladẹ, bei bịnaraụma ánị bara kọn ine apelema gbana bá ine koro diwẹrị gbaa ị pịrịmị, ‘Sidse ukie, ị́ duobụọgha!’ Jehovah baratụa ị pịrịmịnị duonị, ịmịnị tịẹkụrọtimi Jehovah karịmịnị.”

19. Ị́mịnị tekẹ gbinipẹlẹdẹ a o?

¹⁹ Jehovah ụ karịmịnị kịmịbosẹ Zadok boloukụrọ inyenrinbụọ dimịẹ kị dọụ wẹrịemi. (2Tim. 1:7) Pebidá omịnị wo bẹtịbị nimiye a sẹsẹrẹ kụmọ, Jehovah ka sẹsẹrẹ. Anịduonị ị́mịnị boloukụrọ inyenrinbụọ nana dọụmịnị ifiesẹ, Jehovah kị dọụ mú. Jehovah boloukụrọ inyenrinbụọ akị Zadok pịrị bara mị, akị ị́ kpọ pịrị mịnị!—1Pet. 5:10.