Jehovah Iné Youbeniyaịbo Ẹrị Wẹrịemi

1-2. Te yeama kị wo mịẹ you a paaemi a o?

WO KỊMỊSẸ youdẹ ifieama paadẹ. Zụa ifieama bolouịmbẹlẹmịnị ifie kpọ youbeniyaị wo tọrụbo duo koromịnị. Yelaa ye iné ụndụ bọọ paa ifie kpọ youbeni iné tọrụbo duo koromịnị—gbaamaba, iné tọbọụ zii ifie mọ, paabụọmọdẹ ebiye ukie ifie mọ, anịghakpọ naa ẹrịghatimi kụraịama baịdẹ ikie-ụbọ iné warị a bodaba ị́mịnị pọwẹịtimi youbeni iné tọrụbo duo koro kpọ paaemi.

² Bịsẹ bara kị gbaa kpọ, biin ifieama, wo adụdụ dọọnmịnị yebo kị duonị omịnị youmịnị. Gbaamaba, kịmị gbaa pẹlẹwẹrị ye mịẹbeinmọgha ifie. Angọ dọọn-yọama anịghakpọ wo tarị wẹrịemi kịmị fịịdaba omịnị youmịnị. Bịsẹ bara paadaba, omịnị bo bụrụowei Jeremiah Babylon otu Jerusalem gbein-gọgọlọ ifie bọọ youtimi bara kị dei-mịnị. Jeremiah gbaamị: “Youbeniyaịbo iné tọrụbo duo pẹlẹgha . . . bara kị koromị.”—Lam. 3:​48, 49.

3. Wo fịmịnị ụyabo tebara ka kị Jehovah gbelemịnị a o? (Isaiah 63:9)

³ Omịnị bụụdọọnyeama duonị youdẹ ifiebo Jehovah mọ nimi wẹrịemi. Bible gbaa amọ Jehovah wo ụyafịmịnị ifiebo nimi wẹrịemi, bá baratụapịrịye biimịnị ifie kpọ naamịnị. (Ps. 34:15) Anịa Jehovah wo fịmịnị ụyabo ẹrị bá wo tẹẹbịbịbo naayọ kị bụọmọ kpọ tarị nana wẹrịemi daụ bara, wó awọụbo youmịnị yọmị ụ gbelemịnị, ómịnị baratụa á pịrị dọụmịnị.—Isaiah 63:9 goo.

4. Omịnị te Bible kịmịama kị ditụa dọụmịnị a o?

⁴ Jehovah, wó odubo otubo youmịnị ifiesẹ ómịnị ẹrị wẹrịemi bá baratụa á pịrị dọụmịnị bara kọn Bible duo mịẹgaan wẹrịemị. Ómịnị baratụa Hannah, David, bá Pẹrẹowei Hezekiah mọ pịrị baramị ebi mịẹdịaye ka paa wo pịrịemi. Teeki á mịẹ yọụbeniyaị tọrụ duo koro ma o? Jehovah ba tebara ka kị baratụa á pịrị ma? Omịnị eneni kẹrịmịnị ifie, wo tarị wẹrịemi kịmị agbẹịgha bara kọn wo mịẹdaba, anịghakpọ ukiemọye ba fa bara iroromịnị aba, mị kịmịbo paamọyẹ mị tebara ka kị wo kụrọmọ a paaemi a o?

ENENI KẸRỊ YOUBENIYAỊ

5. Hannah paamọ yẹbị tebara ka kị á gbele kụrọmọ ma o?

⁵ Biin bụụdọọnyeama kị Hannah mịẹ eneni kẹrịwẹrị youmị. Á yei zịnị ere nana wẹrịemi, Peninnah ka kị bịsẹ erema tịịnmịnị, ámịnị Hannha golu kụrọmọmị. Bịsẹ yọ bụọmọ kpọ, Hannah naa tọbọụ ziigha, anịa Peninnah biin awọụama kị ziidẹ. (1Sam. 1:​1, 2) Hannah naa tọbọụ ziigha duonị Peninnah ifiebosẹ á dẹrịmịnị. Ị́mịnị kị paamọwẹrị a, tebara kị ị́ mọ mịẹmụ timi ma? Hannah bolouịmbẹlẹgha yọ duonị “ámịnị ifiebosẹ youmịnị, ba fịyaị kpọ fịgha,” yebị “á dọọn kụrọmọmị.”—1Sam. 1:​6, 7, 10.

6. Hannah teeki mịẹwẹrị kụrọmọye nana ma o?

⁶ Hannah tebara ka kị kụrọmọye nana ma o? Baratụa á pịrị yebị, ámịnị ifiebosẹ karịwarị amú Jehovah karị bá tẹẹ ụ pịrịmịnị. Kaanghaba, ámịnị karịwạrị ogugo mọ naịn-emi yọ ka timi “you bá tẹẹ Jehovah pịrịtimimị.” Ámịnị Jehovah tẹẹmị: “Tọrụtụa iné odubo-araụma paamọmịnị ye diidá ine ukie.” (1Sam. 1:10b, 11) Hannah anị adụdụ ma emi yebosẹ gbaa Jehovah pịrịmị. Jehovah Hannah tarị wẹrịemi duonị, ámịnị yọumịnị bara ụ mọ ẹrị yobị ụ gbele kụrọmọ wẹrịemi bara wo mọ nimi wẹrịemi!

7. Hannah ánị adụdụ bọọ emi yebosẹ gbaa Jehovah pịrịbị te kụrọmọye kị á laa ma o?

⁷ Hannah ánị adụdụ duo tẹẹ Jehovah pịrịsiindẹ ifiebị, Tịbị Ịkịankụn Owei Eli kpọ Jehovah ánị tẹẹbịbị parụmịnị bara gbaa á pịrịmị, Hannah bo tebara kị paa ma o? Bible gbaa amọ: “Erema warị a mú bá fịyaị fịmị, ánị korobị ba eneni kẹrịmịnị bara fa.” (1Sam. 1:​17, 18) Ánị bụụdọọnyebo mọkpọ emi kị gbaa kpọ, Hannah dọọ adụdụ nanamị. Ámịnị ánị sibewẹrị bụụdọọnye bụọmọ Jehovah pịrịdẹ. Jehovah ánị bụụdọọnyebo nimi wẹrịemi bá ánị you naamị. Ómịnị baratụa á pịrịwẹrị awọụama ziimị.—1Sam. 1:​19, 20; 2:21.

8-9. Hebrews 10:​24, 25 kikoromọye diidaba, tetuu kị duonị omịnị angọtụa yetolumọyọ a mú agbẹị-emi a o? (Foto kpọ dii.)

⁸ Wo laaemi tolumọyebo. Ị́ kpọ ị́ paamọmịnị bụụdọọnyemọ duonị eneni kẹrịwẹrị youmịnị a? Kaanghaba iné warị kịmị anịghakpọ ikieiụbọ fịịdẹ yọ kị ị́ mịẹ enenị kẹrịmịnị. Bịsẹ bara paadaba, ị́mịnị bẹtịbị kị timi ba zịniotu mọ ẹrẹtei dougha kpọ paaemi. Anịa Hannah wẹnị karịwarị bọọ mú ifiebi, Jehovah kụrọmọye kọn á pịrị baramị ukie. Ị́mịnị angọ dẹịn-emi anịghakpọ eneni kẹrịmịnị kị gbaa kpọ yetolumọyọ amúdaba, Jehovah kụrọmọye akị ị́ kpọ pịrịmịnị. (Hebrews 10:​24, 25 goo.) Omịnị yetolumọyọ a múwẹrị Bible duo kịmị kụrọmọ egberiama naamịnị yọbị, Jehovah bịsẹ yọ kọn baratụa wo pịrịwẹrị wo adụdụ bọọ emi sei iroroyebo kọnsiinwẹrị ebi yeama kẹrị iroro a paaemi. Bisẹ bara paadaba, wo mịẹ angọ kẹrị a paadẹ bá tịẹkirimị bụụdọọnyebo emi kị gbaa kpọ, omịnị laa pọwẹị nanamịnị.

⁹ Wo yetolumọyọbo, bịnaotubo kụrọmọye kọn wo pịrịmịnị, ámịnị wo tarị wẹrịemi bara mịẹdịamịnị yọmị wo mịẹ pọwẹị nanamịnị. (1Thess. 5:​11, 14) Wo wẹrị kẹnị taa fịịdẹ special pioneer owei paamọye naá. Ụ gbaamị: “Ịmịnị ị taa tarị kụrọmọemi yọ duonị ị́mịnị mọkpọ youmịmị. Zụa ifieama ịmịnị kịmị fa yọ a mú youmịnị. Anịa wo yetolumọyọbo ebibara ka kị ị kụrọmọmịnị. Ine bịnaotubo gbaa ị pịrịmịnị egberibo mọ ba biibịbị parụmịnị ifiebị anị gbaamịnị egberibo kpọ ebibara ka kị ị kụrọmọmịnị. Bụụdọọnyeama kị ị mịẹ kpekekpeke kpọ, ịmịnị yetolumọyọ laadaba pọwẹị nanamịnị.” Omịnị yetolumọyọ a múdẹ ifiesẹ, Jehovah wo bịnaotubo kọn baratụa wo pịrịmịnị.

10. Omịnị eneni kẹrịmịnị ifiesẹ tebara ka kị Hannah dimịẹmịnị?

¹⁰ Hannah anị adụdụsẹ gbaa Jehovah pịrị yọ kpọ duo kụrọmọye nanamị. Ị́mịnị kpọ “iné bụụdọọnyebosẹ gbaa [Jehovah] pịrịdaba,” Ómịnị iné tẹẹbịbịbo peiwẹrị baratụa ị́ pịrịmụ eti nana. (1Pet. 5:7) Kẹnị bịnaraụ yei furuotu kị pịrị tein baamị, á gbaamị: “Paayemị ine adụdụ gbele kụrọmọ duonị ịmịnị ba benebene bolouịmbẹlẹgha fa bara kị iroromị. Ịmịnị tẹẹ ị Daụ Jehovah pịrịmịnị yọ kị duo kụrọmọye mọ dọọ mọ nanamị. Zụa ifieama, ịmịnị akị ine bụụdọọnye gbaamụ bara kị nimigha kpọ, Jehovah ine dọụmịnị ye nimi wẹrịemi. Ịmịnị eneni kẹrị kụrọmọmịnị ifiemị, dọọ akị ị pịrị bara ị mọ tẹẹdaba, bịsẹ tịẹkirimị, ine adụdụsẹ bọ dọọ kị paamịnị, anịduonị ịmịnị pọwẹị nanawẹrị inyenrin bọlọụ a múmịnị.” Ị́ mịẹ eneni kẹrịmịnị yebosẹ ị́ mọ gbaa Jehovah pịrịmịnịsẹ, Jehovah iné youbeniyaịbo ẹrị wẹrịemi, bá iné adụdụbị emi barasẹ kpọ nimi wẹrịemi. Bụụdọọnyemị mọkpọ emi kị gbaa kpọ, Jehovah baratụa ị́ pịrịwẹrị dọọ adụdụ nanamịnị. (Ps. 94:19; Phil. 4:​6, 7) Íné ye-inemịnị yọbị ómịnị tarịama akị ị́ pịrịmịnị.—Heb. 11:6.

INÉ TARỊ WẸRỊEMI KỊMỊ AGBẸỊGHA BARA KỌN Ị́ MỊẸDABA

11. David laa bụụdọọnyebo tebara ka kị ụ gbele ma o?

¹¹ David inyenrintimi ifiemị biin yeama kị wó mịẹ eneni kẹrịwẹrị youmị. Biin kịmịama kị ụ golumị bá ụ mọ mọ́ naịntimi otu kpọ ụ mịẹ eneni kẹrịmị bá ụ baa dọụmị. (1Sam. 19:​10, 11; 2Sam. 15:​10-14, 30) Kẹnị ifie laabị, David gẹẹmị: “eneni ị kẹrị kụrọmọmị; ịmịnị youbeniyaị ka kị deinsẹ ine bụnụyọ bosumọmịnị; youbeniyaị kị ine kasị bosumọdẹ.” Tetuu kị duonị David bịsẹ bara gbaa ma o? ‘Bụụdọọnye mịẹpaamọ ụ pịrịmịnị otubosẹ’ kị duonị ómịnị bịsẹ bara gbaamị. (Ps. 6:​6, 7) Kịmịama agbẹịgha bara akị David mọ inyenrin yọbị, ụ mịẹ eneni kẹrịwẹrị biin ifieama youmị.

12. Psalm 56:8 gbaa bara didaba, David te eti kị nana ma o?

¹² Kụrọ bụụdọọnyeama kị David paamọ kpọ, ómịnị Jehovah ụ tarị wẹriemi eti nanamị. Ụ gẹẹmị: “Jehovah ine you okolo naámịnị.” (Ps. 6:8) Zịnị ifie, David kịmị ango duosụọ egberiama akị Psalm 56:8 bọọ gẹẹmị. (Goo.) Bei gooyọ bị Jehovah olomu tarị nana wẹrịemi bara mịẹdịamị. David, Jehovah wó youbeniyaịbo kọn nama apịran akị mịẹ wẹrịemi ololo atụamịnị anịghakpọ akị fun ghọ gẹẹtụa wẹrịemi bara kị gbaamị. Jehovah ụ mịẹ dọọn naamịnị yebosẹ ẹrị bá ukie wẹrịemi bara David mọ nimi wẹrịemi. David wó agọnọ Daụ bị ụ laamịnị bụụdọọnyebo nimi wẹrịemi bá bụụdọọnyebo ụ mịẹ dọọn naámịnị bara kpọ nimi wẹrịemi bara gbaamị.

13. Wo tarị wẹrịemi kịmị agbẹịgha bara kọn wo mịẹ anịghakpọ wo tọngha bara kị mịẹ kpọ, omịnị te ka kị ango kụrọmọ agbẹị-emi a o? (Foto kpọ dii.)

¹³ Wo laaemi tolumọyebo. Ị́mịnị kpọ ịné tarị wẹrịemi kịmị agbẹịgha bara kọn ị mịẹ anịghakpọ iné tọngha bara mịẹwẹrị, bịsẹ ye duonị ị́mịnị ba pọwẹị nanagha bara paadẹ a? Kaanghaba ị́ nana dọụtimi kịmị ba ị́ nanagha bara gbaadẹ, anịghakpọ iné tarị wẹrịemi kịmị ba Jehovah karịgha. Kẹnị bịnaowei wó taa zịnị kịmị mọ bụnụ bá ụ nanagha bara gbaa ifiebị, ụ gbaamị: “Bei yebị ịmịnị kị paamọ emibara ịmịnị mọ peigha. Ịmịnị eneni kẹrị, boloukọn bá ye a paagha bara kị iroromị.” Iné tarị wẹrịemi kịmị agbẹịgha bara kọn ị́ mịẹ anịghakpọ iné tọngha bara kị mịẹ kpọ, Jehovah ị́ gbein-koromọgha fa bara nimi, bịsẹ yọ kọn angọ kụrọmọ. Bịnaowei bị gbaamị: “Kịmịawọụ mọ nana wẹrịemi ikiebị timi alagha kpọ paaemi, anịa Jehovah mọ nana wẹrịemi ikiebị timi bẹseri bẹseri kị laamịnị. Paabara paabara, Jehovah baratụa wo pịrịmịnị. Ómịnị gbaaye peimịnị otubo gbein-koromọgha fa.” (Ps. 37:28) Ukie, Jehovah wo tarị wẹrịemi barabị olomu akị kịmịawọụ ye dẹịn-emi. Iné tarị wẹrịemi kịmị agbẹịgha bara kọn ị́ mịẹ anịghakpọ iné tọngha bara kị mịẹ kpọ, bịsẹ yọbị benebene Jehovah akị ị́ tarị wẹrịemi bara kọnsiingha fa. (Rom. 8:​38, 39) Wo ukie agbẹị-emi yebị: kịmị otu agbẹịgha bara ka kị wo mọ mọ́ inyenrin kpọ, wo agọnọ Daụ Jehovah wo tarị wẹrịemi.

14. Psalm 34:18 te kụrọmọye ka kị wo pịrị wẹrịemi a o?

¹⁴ Wo tarị wẹrịemi kịmị agbẹịgha bara kọn wo mịẹ anịghakpọ wo tọngha bara mịẹ gbelemọ yọmị, Omịnị David Psalm 34:18 bọọ gbaa wẹrịemi egberibo duo kụrọmọye nana a paaemi. (Goo.) Kẹnị ye a tuudọụ fun gbaa amọ “suusụọdẹ kịmịbo” anị kịmịama nẹ “ebi bọlọụ emi ukịẹmọye nanagha otuama.” Jehovah tebara ka kị agbẹịgha bara kọn á mịẹdẹ yọ duonị powẹịgha otubo mịẹmịnị a o? Tarịnana daụ bụụdọọnye laaemi tọbọụ kẹrịakị wẹrị ụ kụrọmọmịnị bara kị, Jehovah kpọ wo “mọ mọ́ naịn-emi.” Wo tarị wẹrịemi kịmị wo tọngha bara mịẹ bá wo gbein-koromọ kpọ Jehovah dieneni nana wẹrịemi bá baratụa wo pịrịmịnị. Omịnị suusụọ bá ye a paagha bara kị iroromịnị kpọ Jehovah wo kụrọmọmịnị, Jehovah ifiebosẹ wo kụrọmọ kị dọụmịnị. Ómịnị ebi ukiemọye kpọ mịẹpaamọ wo pịrịdẹ, bịsẹ ukịẹmọye bị baratụa wo pịrịwẹrị wo laamịnị dadiyebo kpọ inetimi tuu laamịnị.—Isa. 65:17.

UKIEMỌYE BA FA BARA PAADABA

15. Tetuu kị duonị Hezekiah you ma o?

¹⁵ Pẹrẹowei Hezekiah Judah daamịnị owei 39 kụraị laa ifiemị, kụrọ dọọn wó angọ ma emibara nimimị. Jehovah bụrụowei Isaiah fịrịmọ mú Pẹrẹowei Hezekiah laawẹrị ómịnị bịsẹ dọọn duo fịịmụ bara gbaa ụ pịrịmị. (2Ki. 20:1) Hezekiah ba ukiemọye nanagha bara kị paadẹ. Hezekịah bei egberi naa ifiebị, eneni kẹrịwẹrị youmị. Ómịnị pẹlẹgha bara Jehovah baratụapịrịye biimị.—2Ki. 20:​2, 3.

16. Jehovah tebara ka kị Hezekiah you naa ma o?

¹⁶ Hezekiah angọ-iyerimọ eneni kẹrịwẹri youmị bá tẹẹ Jehovah pịrịmị. Yebi Jehovah gbelemị, anịduonị Jehovah tarị nana bara akị gbaa ụ pịrịmị: “Ịmịnị iné tẹẹbịbịbo naadẹ. Ịmịnị iné youbeniyaịbo ẹrịdẹ. Ị́mịnị iné dọọn zụọmịnị.” Jehovah, Isaiah duo dieneni nana bara Hezekiah kụraịbo tụa ụ pịrị bá Assyria otu bara duo Jerusalem zụọbụọmọmịnị bara gbaamị.—2Ki. 20:​4-6.

17. Kụrọ dọọn bụụdọọnye wo laadaba Jehovah tebara ka kị baratụa wo pịrịmịnị a o (Psalm 41:3) (Photo kpọ dii.)

¹⁷ Wo laaemi tolumọyebo. Iné angọ ma emi dọọnmị zụọ kpọ ebigha fa bara kị ị mọ iroromịnị aba teeki ị́ mọ mịẹ agbẹị-emi a? Tẹẹ Jehovah yarị, tẹẹbịbị mịẹmịnị bolou kị you kpọ seigha. Bible bị gbaa amọ “olomu dieneni bá kịmị kụrọmọmịnị ụwọubosẹ nimi wẹrịemi Ọkpọnanaowei bị” wo laamịnị dadiyebo duo wo kụrọmọmịnị. (2Cor. 1:​3, 4) Jehovah bei tịẹkiribị wo bụụdọọnyebosẹ konsiinmụ bara omịnị mọ irorogha, anịa ómịnị kụrọmọye akị wo pịrịmịnị bara wo mọ nimi wẹrịemi. (Psalm 41:3 goo.) Jehovah wó yalịyalị tẹmẹ duo, kụrọ, nimiye, bá dọọ adụdụ akị wo pịrịwẹrị inemịnị. (Prov. 18:14; Phil. 4:13) Ómịnị mọkpọ Bible duo ayakpọ laadaba kịmị baa dọọngha fa ukiemọye kọn wo pịrị wẹriemi, bisẹ ụkiemọye bị wo kụrọmọmịnị.—Isa. 33:24.

18. Kụrọ dadiye ị́ laadaba te Bible yo kị ị́ kụrọmọmịnị a o? (“Wo Youmịnị Ifiemị Wo Kụrọmọ A Paaemi Egberi Ụngbọama” ekpedi dii)

¹⁸ Jehovah gbaa egberibo ebibara ka kị Hezekiah kụrọmọmị. Omịnị kpọ Bible goowẹrị Jehovah gbaamịnị yebo peimịnị yọmị kụrọmọye nana a paaemi. Bụụdọọnyeama duonị omịnị suusụọmịnị aba, Jehovah Bible duo wo kụrọmọ bá dọọ adụdụ akị wo pịrị a paaemi eti nana. (Rom. 15:4) Cancer dọọn kẹnị West Africa emi bịnaraụ kẹrịbị, amịnị ifiebosẹ kị you timimị. A gbaamị: “Isaiah 26:3 ebibara ka kị ị kụrọmọmị. Omịnị nimi bẹtịbị wo bụụdọọnyebo kọnsiingha kị gbaa kpọ, anị Bible yọmị Jehovah baratụa wo pịrịwẹrị dọọ adụdụ nana bá dadiye inemụ bara gbaa wẹrịemi.” Ị́ kpọ kụrọ dadiye anịghakpọ kẹnị ukiemọye kpọ ba fa bara iroromịnị ifie laadaba, ị́ kụrọmọ a paaemi Bible yọ dọụ ẹrịdẹ a o?

19. Teeki bọlọụ a timi wo kụrọmịnị a o?

¹⁹ Omịnị kunumọ ereinbo ka timi inyenrinmịnị, anịduonị wo mịẹ youmịnị yebo kụrọ biin dẹịnmịnị. Anịa omịnị Hannah, David, bá Pẹrẹowei Hezekiah mịẹdịaye duo ẹrị baramị, Jehovah wo youbeniyaịbọ ẹrịmịnị yọbị ụ mịẹ pọwẹịgha. Wo youbeniyaịbo wó tọrụyọ bọọ yelaaemi. Anịduonị kụrọ bụụdọọnyeama wo paamọdaba, omịnị wo adụdụ ma emi yebosẹ gbaa Jehovah pịrị agbẹị-emi. Omịnị ifiebosẹ itu bọọ emi bịnaotubo mọ naịntimi bá ifiebosẹ Bible bọọ emi kịmị kụrọmọ egberibo goo angọ kụrọmọ. Omịnị peibolou nana bara wo laamịnị dadiyebo inemịnị ifiesẹ, Jehovah tarịama kọn wo pịrịmịnị. Bịsẹ ifie laadaba Jehovah wo mịẹ eneni kẹrịwẹrị youmịnị yebosẹ kọnsiinmịnị bara gbaa wẹrịemi. (Rev. 21:4) Kikoromọ wẹrịemi yebo paabeindaba, bolouịmbẹlẹ youbeniyaị ki wo tọrụbo duo koromịnị.