Panangmatmat iti Lubong
Damdamo Unay Maipaay kadagiti Saksi!
Dagiti autoridad iti Africano a pagilian iti Tanzania ti naikkam iti pananganamong iti damdamo unay nga agtitipon a siwayawaya a maipaay iti Nakristianuan a panagdayaw. Bayat iti Mayo ken Hunio idi napan a tawen, ti agsasaruno a serie dagiti lima a pansirkito nga asamblea ti sibaballigi a naaramid iti intero a pagilian. Ti nagupgop a timmabuno kadagitoy a panagtitipon ket 5,177, a 124 ti nabautisaran—ti kangatuan a bilang iti bautismo a nairekord iti historia ti trabaho dagiti Saksi idiay Tanzania. Para kadagiti kaaduan a timmabuno, dayta ti damo nga asambleada. Maysa nga asamblea ti naaramid iti kangrunaan nga auditorium iti paraangan iti Unibersidad iti Dar es Salaam.
Nagbaliw a Katoliko
Maysa iti tunggal lima a tattao a napadakkel a maysa a Romano Katoliko “ti saanen a mangibilang iti bagina a sumursurot iti pammati,” kuna ti The New York Times. No idilig iti bilang dagiti tattao a makumkumberte iti Katolicismo, ti bilang ti nagbaliw, ti surbey ipakitana, ti mamitlo a daras nga ad-adu pay. Ti surbey isitarna ti panagtitipon iti pammati kadagiti panagasawa kas ti kangrunaan a banag kadagiti panagbaliw. Agarup kagudua kadagiti dati a Katoliko a napagsaludsodan ti nagkuna a naasawaanda iti saan a Katoliko, ket ti kakapat ti nagkuna a naidiborsioda wenno naidiborsioda idi ket itan naasawaanda manen. Ti promedio nga edad dagidiay immadayu iti iglesia ket 36.
Chiropractor iti Animal
Umad-adu a bilang dagiti chiropractor ti mangag-agas kadagiti an-animal agraman dagiti tattao, kuna ti The Wall Street Journal. “Sumagmamano a chiropractor itan ti agsanay iti amin a tiempo kadagiti animal, agraman ti sumagmamano met a beterenario.” Nupay saan a mabigbigbig, dagiti chiropractor kunaenda a nakagun-odda kadagiti resulta a sadiay ti saan a nagballigian dagiti gagangayen a beterenario. Mairaman kadagiti an-animal a nataming isu dagiti kabayo, llamas, pusa, aso, ken dagiti parakeets. Agsipud ta babassitda wenno, masansan, dadakkel dagiti tulangda, dagiti kabbaro a pamay-an ti masapul a mapataud. “Dadduma a chiropractor ti mangikabil iti naikkan iti kutson a 2-por-4 iti maysa a dakkel a tulang ti animal ket maluen dayta iti maso,” kuna ti Journal.
Mania iti Selio
“Idi 1985 laeng, dagiti pagpagilian iti intero a lubong ti nangpataud iti 9,141 [kabbaro a ruar dagiti] selio ken 915 a babassit nga ikamen iti selio,” kuna ti The New York Times. “Ti laeng pananggatang iti maysa iti tunggal kita ti paggastuanen ti kolektor iti nasurok a $12,000.” Dagiti selio ti maysa kadagiti kapipintasan a tagilako kadagiti adda iti nasnasion iti Sud Pacifico. Ti laeng 20 porsiento kadagiti selio a pinataud ti Tonga, kas pangarigan, ti pudno a mausar iti koreo. Dagiti naisangsangayan a selio ket nagbukel, a kasla itsura ti piña wenno saba, wenno kasla itsura ti pagilian ti alaen a dagus dagiti kolektor. “Ti Pitcairn Islands, a pagtaengan dagiti agarup 50 a tattao, ti mangiruar iti baro a set dagiti selio iti uppat a daras iti makatawen ket di mangilako iti aniaman,” kuna ti Times. Ket ti Tuvalu, a maysa a nasion a 8,000 a populasion, “ti mangiruar iti gagangay a selio iti maysa nga aldaw.”
Positibo nga Addang
Ti inaldaw a pagiwarnak iti Belgium a Le Soir ipadamagna nga innalan ti baro a presidente iti Burundi dagiti positibo nga addang a mangisubli iti relihiuso a wayawaya iti intero a pagilian. Iti 30-minuto a palawag iti nabiit pay sakbay ti coup a nangikkat iti dati a presidente, ti kabbaro a naipatugaw a presidente, ni Major Pierre Buyoya, “pinatalgedanna ti panggep a mangipasdek manen iti wayawaya iti panagdayaw, isu a nangitag-ay iti adu kadagiti makalapped nga addang a naiturong kadagiti Katoliko, ken kasta met dagiti Saksi ni Jehova, Protestante, ken dagiti Muslim,” kuna ti Le Soir. Ni Presidente Buyoya binabalawna “ti umad-adu a bilang dagiti panangbalud a makalapped a nakawatwatiwat, awan nalawag a paglinteganna ken masansan iti sidong ti saan a natauan a kasasaad, ken ti kaawan ti agtutunos a takder a maibusor iti kirminalidad.” Iti panangitandudo iti polisa ti presidente iti kalintegan ti tao, ti baro a gobierno iti Burundi ti nangwayawaya kadagiti naibalud a Saksi ni Jehova.
Panangusar ti Microwave iti Gatas
Sigun iti libro a The Canadian Parents’ Sourcebook, ti panangipapudot iti bote ti gatas ti ubing iti hurno a microwave mangipaay iti peggad. Iti maysa a paset iti “Microwave Alert,” dagiti autor namakdaarda a ti ugali “nakapataud iti pannakasinit no di umiso ti pannakaaramidna” agsipud ta ti hurno “saan nga agpapada ti panangpapudotna.” Uray pay no dagiti bote a mismo ti kasla nalamiis, “dagiti nadumaduma a paset ti gatas nagduduma ti temperaturada,” kuna dagiti autor. Dagiti umasping met laeng a pakdaar ti naipaay maipapan iti panangpabara kadagiti garapon ti taraon ti ubing kadagiti hurno a microwave. Kanayon a sukimatenyo ti temperatura iti gatas wenno taraon sakbay iti panangipakanyo iti ubing. Irekomendarda met ti panangibaga kadagiti managaw-awir ken dagiti dadduma pay iti daytoy a panagannad. Ket gapu ta ti “napartak nga a panangipapudot mabalin a pataudenna ti parparikut maipapan kadagiti bakteria,” mamakdaarda iti panagannad maipapan iti panangipapudot iti naipalammiis a gatas ti suso kadagiti hurno a microwave.
Pakdaar iti Talged
Ti kinatalged dagiti nuclear-reactor masapul a maparang-ay, kuna ni Dr. Robert Gale, maysa nga espesialista iti panangimula iti pata ti tulang a nangagas kadagiti biktima iti aksidente iti Chernobyl idiay U.S.S.R. idi napan a tawen. Kunaenna nga adda ti 25-porsiento a gundaway ti kasta met laeng a didigra iti nuklear a planta ti bileg iti sadinoman a lugar iti sumaganad a sangapulo a tawen ken ti 50-porsiento a gundaway a mapasamak dayta idiay Estados Unidos. Ti Aleman a pagiwarnak a Hannoversche Allegemeine napaliiwna a dagiti estadistika a naurnongen ipamatmatna nga “iti sumaganad a 50 a tawtawen ti napattapatta a 60,000 a tattao iti isuamin a lubong ti mabalin a matay iti kanser kas resulta iti pannakatunaw iti re-actor ti Soviet . . . Adda pay ti 5,000 nga agsagaba iti serioso a genetiko a pannakadadael ken agingga iti 1,000 ti agsagaba manipud iti depekto iti salun-at manipud iti pannakaipasngay kas resulta iti Chernobyl.” Ti bileg nga atomika, kuna ni Dr. Gale, mabalin a makagunggona laeng no dayta ti mataming iti umiso a pamay-an.
Dagiti Polis a Seals
Bayat a dagiti kapatadanda iti Florida ken California ti nasanay a mangtimbeng kadagiti bola iti baybay kadagiti agongda ken mangaramid kadagiti dadduma a paglaingan a manglinglingay, dadduma a seals idiay Siudad ti Nueva York ti agdama a masansanay a mangaramid iti trabaho ti polis. Dagiti seals iti baybay masursuruanda a mangsapul kadagiti pistol a maipuruak iti danum. Ti panangsapul kadagiti maibelleng a kontrabando ken dagiti droga, ti panangala kadagiti retrato iti uneg ti danum ken ti panangsapul kadagiti limned a bambanag maus-usig met. Ni Stanley, maysa a dua-tawen a seal iti baybay a makaammon no kasano ti panangsapul kadagiti paltog, nasursuronan ti mangikkat iti buckle kadagiti sintoron iti tugaw kadagiti limned a tattao. Dagita nga abilidad ti mainanama a nausarto iti panangsapul kadagiti bagi dagiti tattao manipud iti maysa a didigra iti baybay.
Historiko a Pannakaipasngay
Idi napalabas nga Oktubre 1, maysa a 48-años a taga Sud Africa ti nangipasngay iti tallo nga apona. Ni Pat Anthony nagserbi a kas kasukat nga ina iti 25-años nga anakna a babai, a naikkat ti aanakanna tallo a tawenen a napalabas. Ni Mrs. Anthony namulaan iti uppat kadagiti pertilisado ti semilia ti manugangna a lalaki iti laboratorio nga itlog ti anakna a babai. Dagiti triplets, dua a lalaki ken maysa a babai, ti naipasngay babaen iti cesarean idiay ospital ti Johannesburg. Daytoy a kaso saanna laeng a rubroban ti moral ken legal a suppiat maipapan iti kasukat nga ina no di ket nagbalin pay a relihiuso a parikut. Agsipud ta ti pamilia ket Romano Katoliko, ket ti Vaticano kondenarenna ti aramid a panagserbi kas kasukat nga ina, palubosan kadi ti polisa ti iglesia a mabautisaran dagiti ubbing?
Pammakawan ti Presidente
Maysa nga opisial a sasao nga inruar ti pagiwarnak manipud iti Embassy iti Republika iti Rwanda idiay Canada ti nangiyanunsio a ti presidente iti Rwanda, ni General Major Juvénal Habyarimana, nangipaay iti “naan-anay a pannakasuspender ti sentensia” dagiti amin a Saksi ni Jehova a naibalud gapu iti relihiuso a rason. Sigun iti sasao ti embassy, daytoy a tignay ti naaramid iti okasion iti maika-25 nga anibersario iti independensia iti Rwanda. Simmaruno iti pannakawayawayada, dagiti Saksi ti napalubosan nga agawid kadagiti pagtaenganda ket ituloyda ti sekular a trabahoda. Naipadamag a dagiti lokal nga opisiales a saan a mangsalimetmet iti pammakawan ti presidente ti babalawen ti sentral a gobierno.