Sadiay Pagtayaban Dagiti Baka
NAGDINAMAG iti intero a lubong dagiti narungsot nga angin a dimteng idiay Shetland Islands idi Enero 5, 1993. Pinugipogda ti 243 metrot’ kaatiddogna, ken 45,000 toneladat’ kadagsenna a Braer, maysa a barko ti krudo, sada imbarsak iti nabato nga outpost ti makin-amianan nga Scotland. Iti las-ud ti makalawas, pinagkapat a dinadael ti angin ken dagiti allon ti nagdakkelan a barko.
Kadawyanen kadagiti taga Shetland dagiti bumanerber nga alipugpog. Ti adayo a lugar a buklen ti 100 nga isla a 20 laeng ti mapagtataengan ti umuna a makasabet kadagiti bumanerber nga alipugpog nga aggapu iti baybay nga asideg iti Iceland.
Di pakasdaawan a nairuamen dagiti agnanaed sadiay kadagiti nakaam-amak a buya. Kinuna ti maysa a lalaki, a naadaw iti The Wall Street Journal: “Nalabit masapul nga adda plakard kadagiti kalsada ti Shetland nga agkuna: Agannad kadagiti agtaytayab a baka.” Maysa kadagiti baka ti gayyemna ti intayab ti alipugpog manipud iti nakaipastoranna, sumagmamano a tawen itan ti napalabas. Impadamag pay ti maysa a sientista nga agnanaed sadiay a nakitana ti tarakenna a pusa nga “agtaytayab” iti kangato a 5 metro—siempre nagdisso met laeng a di naan-ano. Masansan a mangilugan dagiti driver kadagiti nadagsen a banag, kas iti karbon, tapno saanda a maiyangin no addada iti dalan. Uray tattao ket maitayab a nakatayan ti dadduma. Ti maysa nga alipugpog, a nangpapatay iti maysa a babai, ti di napakpakadaan a nakagteng iti kapegges a 323 kilometro iti kada oras—di napakpakadaan gapu ta ti ninamnamada a kapigsa ti angin ket inartapan dayta nga alipugpog!