Ti Panagpaimbag

KALPASAN ti pannakaatake ti puso, gagangay laeng nga agamak ken maseknan ti maysa a tao. Maatakeakto kadi manen? Agbalinakto kadin a baldado wenno di makatrabaho gapu iti ut-ot ken kinakapuy ken di kinasiglat?

Ni John, a nadakamat iti maikadua nga artikulo, nanginanama a bayat nga aglabas ti tiempo, mapukawton ti inaldaw a di nasayaat a rikrikna ken nasakit a barukongna. Ngem kalpasan ti sumagmamano a bulan, kinunana: “Ngem saanda a napukaw. Agsipud ta saanda a napukaw, ken nalakaak a mabannog ken nakaro ti panaggutok ti pusok, sangkadamagko iti bagik, ‘Dandaniak kadi manen maatake?’”

Inamin ni Jane, a taga Estados Unidos, maysa nga agkabannuag a balo idi tiempo a naatake ti pusona: “Impagarupko a saanakon nga agbiag wenno maatakeakto manen ket matayak. Mariribukanakon, ta adda tallo nga annakko nga aywanak.”

Insalaysay ni Hiroshi, a taga Japan: “Nakigtotak idi naibaga kaniak a saanton a kas idi ti panagandar ti pusok; kimmapuy ti panagbomba ti pusok iti 50 porsiento. Dandani siguradoakon a masapul nga isardengkon ti dadduma nga aktibidadko kas ministro dagiti Saksi ni Jehova, ta diak pay maaramid ti kagudua ti ar-aramidek idi.”

No limitado ti pigsa ti maysa, makarikna iti liday ken kinaawan ti serserbina. Nagsennaay ni Marie, maysa nga 83-edadna a taga Australia a nangipamaysa iti trabaho dagiti Saksi ni Jehova a panangasaba iti amin a tiempo: “Maldaanganak ta saanakon a naalibtak a kas idi. Imbes a tulongak dagiti sabali, kasapulakon ti tulong.” Idiay South Africa, nagkomento ni Harold: “Diak nakapagtrabaho iti tallo a bulan. Ti kaaduan a maaramidko ket magna laeng iti aglawlaw ti hardin. Makapaupay dayta!”

Nasken ti bypass surgery kalpasan ti maikadua a pannakaatake ti puso ni Thomas, a taga Australia. Kinunana: “Diak unay makaandur iti ut-ot, ket nakarigrigat a panunoten ti napaut nga operasion.” Nagkomento ni Jorge a taga Brazil maipapan ti nagbanagan ti operasion ti puso: “Gapu ta napanglawak, maamakak a mapanawak ti asawak nga agsolsolo nga awan ti makatulong. Pagaammok a din agpaut ti biagko.”

Panagimbag

Aniat’ nakatulong iti adu a naimbagan ken natalged manen ti riknada? Kinuna ni Jane: “No mariribukanak, kanayon nga agkararagak ken Jehova ket itaklinko dagiti pakasikorak kenkuana ket baybay-ak idan.” (Salmo 55:22) Ti panagkararag tulonganna ti maysa a makagun-od iti bileg ken talna ti isip a nasken no mapasanguan kadagiti pakasikoran.​—Filipos 4:6, 7.

Nakipaset da John ken ni Hiroshi kadagiti programa iti rehabilitasion. Pinabileg ti nasayaat a taraon ken panagehersisio ti pusoda, isu a nakasublida a dua nga agtrabaho. Ket kunaenda a ti mental ken ti emosional a panagimbagda maigapu iti makasustener a pannakabalin ti espiritu ti Dios.

Babaen iti panangsuporta dagiti Kristiano a kakabsatna, napabileg ni Thomas a mangsaranget iti pannakaoperana. Kinunana: “Sakbay ti operasion, binisitanak ti maysa a manangaywan ket nakipagkararag kaniak. Iti nakapaspasnek a pakaasi, kiniddawna ken Jehova a pabilgennak. Pinampanunotko ti kararagna iti dayta a rabii ket nariknak a nabendisionanak ta adda kas kenkuana a panglakayen a ti pannakipagriknana bayat dagiti emosional a tiempo ket paset a mismo ti panagimbag.”

Napagballigian ni Anna a taga Italia ti panagleddaang iti kastoy a pamay-an: “No maupayak, panunotek dagiti amin a bendision a naawatkon kas maysa kadagiti adipen ti Dios ken dagiti bendision nga umayto iti sidong ti Pagarian ti Dios. Daytoy tulongannak a makagun-od iti kinatalingenngen.”

Agyaman ni Marie iti tulong ni Jehova. Mannakitinnulong ti pamiliana, ket kunana: “Dagiti naespirituan a kakabsatko, a tunggal maysa addaan bukod nga awit nga ibaklay, nangilasinda ti tiempo a bumisita kaniak, awagandak iti telepono, wenno mangipatulod kadagiti kard. Kasano nga aglidayak iti kastoy nga ayat a naipakpakita?”

Awan Naliday a Puspuso

Naipadamag a saan a rumbeng nga agliday ti agpapaimbag a puso. Dakkel, ken nagsayaat ti maitulong ti panangsaranay ti pamilia ken dagiti gagayyem iti panagimbag dagidiay a ti pusoda kasapulan a literal ken piguratibo nga agimbag.

Nagkomento ni Michael, a taga South Africa: “Narigat nga ilawlawag iti sabsabali ti kinaladingit. Ngem no mapanak idiay Kingdom Hall, ti pannakaseknan nga ipakita dagiti kakabsat makapabileg-puso ken mangpasayaat iti riknak.” Ni Henry, a taga Australia, napabileg met babaen iti napasnek nga ayat ken pannakaawat nga inyebkas ti kongregasionna. Kinunana: “Talaga a kasapulak dagidiay a naasi a sasao ti pammaregta.”

Impateg ni George ti pakaseknan nga impakita ti sabsabali babaen ti panangtulongda iti pamiliana iti pinansial agingga a mabaelanna ti agtrabaho. Ni Olga, a taga Sweden, inapresiarna met ti praktikal a tulong nga impaay dagiti naespirituan a kakabsatna kenkuana ken iti pamiliana. Dadduma ti naggatang kadagiti kasapulanna, bayat a dadduma ti nagdalus iti balayna.

Masansan, dagiti pasiente iti puso masapul a limitaranda dagiti aramid a pagay-ayatda. Insalaysay ni Sven, a taga Sweden: “No dadduma masapul a diak makipaset iti ministerio no naangin ken nalamiis unay, ta dayta tignayenna ti panagbetted ti puso. Apresiarek ta maawatandak dagiti padak a Saksi iti daytoy.” Ket no masakit, mangngegan ni Sven dagiti gimong ta siaayat nga irekord dagiti kakabsat. “Kanayon a pakaammuandak maipapan iti mapaspasamak iti kongregasion, ket mariknak a kasla nakipasetak.”

Ni Marie, idi nagsakit, ammona a nabendisionan ta sumarungkar kenkuana dagidiay iyad-adalanna iti Biblia. Gapu itoy maitultuloyna ti mangisalaysay kadagiti nakaskasdaaw a masanguanan a segseggaanna. Agyaman ni Thomas iti pannakaseknan a naipakita kenkuana: “Nakonsiderasion unay dagiti panglakayen ket kinissayanda dagiti rebbengen nga itedda kaniak.”

Masapul Dagiti Pamilia ti Pannaranay

Mabalin a marigatan met dagiti miembro ti pamilia a kas iti biktima. Maipasidongda iti adu a pakarigatan ken panagamak. Kinuna ni Alfred, a taga South Africa, maipapan iti danag ni baketna: “Idi simmangpetak manipud ospital, mamin-adu a riingennak ni baketko iti rabii tapno kitaen no naimbag met laeng ti kasasaadko, ket ipapilitna a bisitaek ti doktor tunggal tallo a bulan tapno agpaeksamen.”

Kuna ti Proverbio 12:25 a “ti bantot ti puso ti maysa a tao mamagdumog kenkuana.” Madlaw ni Carlo, a taga Italia, a nanipud idi pannakaatakena iti puso, “naldaang” ti naayat ken manangsaranay nga asawana. Kinuna ni Lawrence, a taga Australia: “Ti pannakaaywan ti asawayo ti maysa kadagiti banag a masapul a maannadan. Mabalin a marigatan unay ti asawayo.” Gapuna, masapul a pampanunotentayo ti kasapulan ti amin iti pamilia, agraman dagiti ubbing. Ti kasasaad mabalin a makaapekto kadakuada iti emosional ken iti pisikal.

Ni James, a nadakamat iti maikadua nga artikulo, nagbalin a di matagtagari kalpasan ti pannakaatake ti puso ni tatangna. Kinunana: “Maamirisko a saanakon a makapagragsak ta pagarupek a no kasta ti aramidek, adda dakes a mapasamak.” Ti panangyebkasna ti panagamakna ken tatangna ken ti panangikagumaanna a makipatang kadagiti sabali ti nakatulong kenkuana a mangbang-ar iti danagna. Bayat dayta a tiempo adda pay inaramid ni James a dakkel ti epektona iti biagna. Kinunana: “Pinarang-ayko ti personal a panagadalko iti Biblia ken ti panagsaganak kadagiti Nakristianuan a gimong.” Tallo a bulan kalpasanna indedikarnan ti biagna ken Jehova ken insimbolona dayta babaen ti bautismo iti danum. “Nanipud idin,” kinunana, “nakapataudakon iti nakasingsinged a relasion ken Jehova. Talaga nga adu ti pagyamanak kenkuana.”

Kalpasan ti pannakaatake ti puso, ti maysa addaan tiempo a mangusig manen iti biag. Kas pagarigan, nagbaliw ti panangmatmat ni John. Kinunana: “Makitam ti kinaubbaw dagiti nailubongan a gakat ket mabigbigmo ti kinapateg ti ayat ti pamilia ken dagiti gagayyem ken no kasano a nakapatpategtay unay ken Jehova. Talaga nga umun-una itan ti relasionko ken Jehova, iti pamiliak, ken kadagiti naespirituan a kakabsatko.” No pampanunotenna ti rigat a napasaranna, kinunana pay: “Diak pagarupen a mapagballigianmi daytoy no awan ti inanamaenmi a tiempo a makorehirton dagitoy a bambanag. No nalidayak, panunotek ti masanguanan, ket ti mapaspasamak ita awan aniamanna.”

Bayat a mapasaranda dagiti pakaragsakan ken pagdukotan no agpapaimbagda, dagitoy a nakalasat iti pannakaatake ti puso salimetmetanda a sititibker ti namnamada iti Pagarian nga insuro ni Jesu-Kristo nga ikararagtayo. (Mateo 6:9, 10) Ti Pagarian ti Dios iyegnanto ti perpekto a biag nga agnanayon kadagiti tattao iti maysa a paraiso a daga. Iti kasta, ti sakit ti puso ken dagiti dadduma pay nga an-annayen mapukawdanton nga agnanayon. Ti baro a lubong asideg unayen. Kinapudnona, ti kasayaatan a biag umayto pay laeng!​—Job 33:25; Isaias 35:5, 6; Apocalipsis 21:3-5.

[Ladawan iti panid 13]

Ti panangandingay ti pamilia ken gagayyem dakkel ti maitulongna iti panagpaimbag