Kayatmo Kadi ti Agsursuro iti Ganggannaet a Pagsasao?

BABAEN TI KORESPONSAL TI AGRIINGKAYO! IDIAY BRITANIA

“Nalaka a sawen ngem narigat nga aramiden!” Adu ti agkuna iti kasta maipapan iti panagsursuro iti ganggannaet a pagsasao, aglalo no pinadasdan. Ibagatayon a talaga a narigat ti agsursuro iti sabali a pagsasao. Ngem kuna dagidiay nakasursuron a makagunggona dayta.

NADUMADUMA dagiti rason iti panagsursuro iti sabali a pagsasao. Kas pagarigan, gapu ta plano idi ni Andrew ti agbakasion idiay Francia, kayatna a makapatangna dagiti tattao sadiay iti bukodda a pagsasao. Nayanak ni Guido idiay Inglatera, ngem Italiano ti pamiliana. “Dialekto laeng ti ammok,” kunana, “isu a kayatko idi ti makasursuro iti husto nga Italiano.” Nabiit pay nga immakar iti sabali a pagilian ti kabsat ni Jonathan ket nangasawa iti maysa nga Española. “Kayatko a makasaritak dagiti baro a kakabagiak iti bukodda a pagsasao idi napanko binisita ni manongko,” kuna ni Jonathan.

Ngem adda dadduma pay a pagimbagan ti panagsursuro iti ganggannaet a pagsasao. “Sinursuruannak nga agbalin a mannakipagrikna,” kuna ni Louise. “Maawatak itan no kasano ti panagrikna dagiti ganggannaet apaman a makasangpetda iti pagilian a sabali a pagsasao ti maar-aramat.” Adda personal a nagimbagan dayta ken ni Pamela. Tangay dimmakkel idiay Inglatera, bassit laeng ti ammona a Tsino​—ti pagsasao ti pamiliana. Saan ngarud a nadekket ni Pamela ken ti inana. “Saankam unay idi nga agtungtungtong,” kuna ni Pamela. “Ngem ita ta makapagsaoakon iti Tsino, nasingsingedkamin ken simmayaaten ti relasionmi.”

Dagiti Katulongan iti Panagsursuro

Ania ti kasapulam tapno makasursuroka iti ganggannaet a pagsasao? Dagitoy ti inyunay-unay dagiti adu a nakasursuro:

● Motibasion. Kasapulam ti insentibo​—no apay a kayatmo ti agsursuro. Kaaduanna, ti kabiitan a makasursuro ket dagidiay addaan napigsa a motibasion.

● Kinapakumbaba. Saanka unay nga agtalek iti abilidadmo​—addanto latta dagiti pagkamaliam, nangruna iti damo. “No katawaandaka dagiti tao, makipagkatawaka!” kuna ni Alison. Umanamong ni Valerie: “Kaska la maysa nga ubing nga agsursuro a magna. Agkaratuangka, ngem nasken a bumangonka ket padasem manen.”

● Anus. “Narigatanak iti umuna a dua a tawen, ket adda idi dagiti kanito a kasla kayatkon ti sumardeng,” inamin ni David. Ngem kinunana: “Saanak itan a marigatan!” Kasta met laeng ti panagrikna ni Jill. “No panunotem ti nagapuanamon, makitam a rumangrang-ayka,” kunana.

● Panagensayo. Agbalinka a nasayud iti pagsasao nga ad-adalem no kanayonmo nga usaren. Inaldaw nga agensayoka, uray no sumagmamano laeng a minuto. Kas kuna ti maysa a libro, “‘ti bassit ken masansan’ ket nasaysayaat ngem ‘ti adu ngem sagpaminsan.’”

Dagiti Katulongan

Nakasaganaka kadin nga agsursuro iti ganggannaet a pagsasao? No kasta, makatulong dagiti sumaganad iti irarang-aymo.

● Flash card. Iti parupa ti kada kard, adda naisurat a sao wenno grupo ti sasao, ket adda iti likud ti patarusna. No awan dagitoy iti pagnanaedam, mabalinmo ti agaramid iti bukodmo, nga usarem dagiti file card.

● Instructional audiocassette ken videocassette. Matulongannaka dagitoy a dumngeg iti umiso a pannakaibalikas ti pagsasao a kayatmo a masursuro. Kas pagarigan, bayat nga agmanmaneho ni David iti kotsena, nakasursuro iti simple a Hapones babaen ti panagdengngegna iti audiocassette ti libro a pagsursuruan kadagiti sao para kadagiti turista.

● Interactive computer program. Iti dadduma kadagitoy, mabalinmo nga irekord ti timekmo ken idilig ti panangibalikasmo iti panangibalikas dagiti tattao a nakaisigudanda ti pagsasao a kayatmo a masursuro.

● Radio ken telebision. No adda dagiti programa iti radio wenno telebision iti lugaryo nga agus-usar iti pagsasao nga ad-adalem, apay a dika dumngeg ket kitaem no kasano kaadu ti maawatam?

● Magasin ken libro. Agbasaka kadagiti magasin ken libro iti pagsasao nga ad-adalem, dagidiay saan a nauneg wenno nakasimsimple ti sasao a naaramat.a

Panagbalin a Nasayud iti Pagsasao nga Ad-adalem

Siempre, addanto gundaway a mapilitanka a makipatang kadagidiay sabali ti pagsasaoda. Di kayat a sawen daytoy a nasken a mapanka iti adayo a pagilian. Iti mismo a pagiliam, mabalinmo ti sumarungkar iti kongregasion dagiti Saksi ni Jehova nga agus-usar iti ganggannaet a pagsasao.

Aniaman ti kasasaad, sursuruem a kabesaduen ti pagsasao nga ad-adalem, imbes nga ipatarusmo laeng dagiti sao wenno grupo ti sasao manipud iti nakaisigudam a pagsasao. Mabalin a makatulong met no ikagumaam nga ammuen dagiti kustombre ken ugali dagiti tattao nga agus-usar iti pagsasao nga ad-adalem. “Dika makasursuro a talaga iti pagsasao no dimo maawatan dagiti kaugalian ken pagalagadan ti kultura a nakaibinggasanna,” kuna ni Robert Lado, maysa nga eksperto iti pagsasao.

Maudi a pammalagip: Dika maupay no kasla nabannayat ti panagprogresom. Total, saan nga agpatpatingga ti panagsursuro iti sabali a pagsasao. “Diak pulos sumarsardeng nga agad-adal,” kuna ni Jill, a nakasursuro iti sign language 20 a tawenen ti napalabas. “Kanayon a rumangrang-ay ti pagsasao.”

No kasta, kayatmo kadi ti agsursuro iti ganggannaet a pagsasao? No wen, agsaganaka a mangirugi iti narigat unay​—ngem makagunggona unay​—a kalat.

[Footnote]

[Dagiti ladawan iti panid 12, 13]

Mapalawam ti bokabulariom babaen . . .

. . . ti panangidiligmo iti nakaisigudam a pagsasao iti daydiay ad-adalem