Addan ti Pornograpia iti Internet
ITI KADA ALDAW, MINILION A TATTAO TI AGUS-USAR ITI Internet iti intero a lubong. Adut’ agusar iti Internet tapno agtrabaho, ammuen ti kabaruan a damdamag iti lubong, ammuen ti paniempo, agadal maipapan iti nadumaduma a pagilian, manggun-od iti impormasion maipapan iti panagbiahe, wenno makikomunikar iti pamilia ken gagayyem iti nadumaduma a paset ti lubong. Ngem dadduma a naasawaan ken agwaywayas nga adulto ken kasta met ti nakaad-adu nga ubbing—agusarda iti Internet gapu iti naidumduma a rason: TAPNO AGBUYA ITI PORNOGRAPIA.
TI PORNOGRAPIA ITI COMPUTER, a maawagan met iti cyberporn, ket nakalatlatak ta nagbalinen a multimilion a doliar a negosio. Kinuna ti The Wall Street Journal: “Mangbirokka iti klase ti Web site a panguartaan [pagganansiaan] ket, sigurado a negosio dayta ken nakalawlawag a naalas [pornograpiko] ti linaonna.”
Inlawlawag pay ti Journal no apay nga agbuya dagiti tattao ti pornograpia iti Internet. “Mabuya dagiti kustomer ti naalas a material uray saandan a mapan iti paglakuan iti nababa ti kalidadna a pagbasaan wenno iti video shop iti sangakaarrubaan. Mabuya dagiti kustomer ti naalas a material iti pagtaengan—wenno opisinada.”
Pornograpia ken Dagiti Ubbing
Nakalkaldaang ta ubbing ti adu kadagiti agbuybuya iti cyberporn. Dagiti ubbing a paritan ti linteg a gumatang kadagiti pornograpiko a pagbasaan wenno mangabang kadagiti pornograpiko a video mabuyadan dagitoy iti pagtaenganda babaen laeng iti sumagmamano a panangitalmeg iti mouse. Nakaad-adu ti pagpilian.
Adu nga ubbing ti kanayon a mangkita kadagiti site ti Internet a di ammo dagiti nagannak kadakuada. Kinapudnona, kuna ti The Detroit News a “nasurok a dua iti kada lima nga ubbing ti agsuskribe iti web site wenno dadduma a serbisio iti Internet uray pay no gistay 85 a porsiento kadagiti nagannak ti mangiparit iti dayta.”
Nupay naannad ti kaaduan nga ubbing—agraman dagiti adulto—a mangilimed nga agbuybuyada iti pornograpia, saan nga ilimlimed ti dadduma. Dadduma ibilangda dayta a saan a dakes a kita ti paglinglingayan. Mabigbig ti dadduma a pagdaksan dagiti ubbing ti pornograpia ngem kunaenda a makaammon dagiti adulto iti aramidenda a pribado.
Iti dadduma a pagilian, ti pornograpia ket naan-anay a mapagsusupiatanen iti politika. Iti maysa a dasig, paboran dagidiay mangitantandudo iti nawaya a panagsao ti pornograpia, ket iti sabali a dasig, dagiti mangitantandudo iti nasayaat a kababalin ti pamilia ikamkampaniada kadagiti autoridad a paritanda ti pornograpia.
Awan ti dasdasigan ti Agriingkayo! a napolitikaan nga isyu. Panggep daytoy a serye a pakaammuan dagiti agbasbasa maipapan kadagiti pagdaksan ti panagbuya iti pornograpia, mangisingasing kadagiti pamay-an a mangsalaknib kadakuada ken kadagiti ay-ayatenda, ken mangipaay kadagiti naibasar iti Biblia a singasing para iti siasinoman a nasiluan iti pornograpia ken mayat a lumapsut.