Manipud Kadagiti Agbasbasa
Panangkidnap Nagsuratak tapno iyebkasko ti kasta unay a panagyaman iti serye a “Panangkidnap—No Apay a Sangalubongan a Pangta.” (Disiembre 22, 1999) Itay napan a bulan, sinerrek dagiti agtatakaw ti supermarket a pagtartrabahuak. Dua a nakaabbungot a lallaki ti simrek. Impaturong ti maysa ti paltogna. Agsipud ta inlawlawag dagiti artikulo a masapul a tungpalen dagiti makidnap ti maibilin nga aramidenda, diak limmaban idi ginalutanda iti tape dagiti ima ken sakak sadak piniringan ken pinagtugaw iti suelo. Tinakawda ti 9,500,000 a yen (agarup $90,000 E.U.). Ngem nagtalinaedak a kalmado isu a didak dinangran. Dimteng ti artikulo iti umiso a tiempo!
S. H., Japan
Magusgustuanna ti Agriingkayo! Ti panagbalinko a miembro ti relihion nga Assembly of God ket saan a manglapped iti panagbasak iti Agriingkayo! Awan pay ti nabasak a de kalidad a magasin a kas iti dayta ken addaan iti nadumaduma a tema. Awan telebisionko iti pagtaengan, ngem masansan nga adu a kabaruan a tema ti mairanudko iti gagayyemko agsipud ta nabasakon ti maipapan kadagitoy iti magasinyo.
A.B.A., Brazil
Nadalus a Panagibarbas Dimteng kaniak ti artikulo a “Nadalus a Panagibarbas” (Enero 22, 2000) iti umiso a tiempo. Kasapulan itan ni lakayko ti naynay a panangasikaso ken din makaibarbas a bukodna. Dakkel ti naitulong ti uppat a singasing maipapan iti panagibarbas. Ita, kayatna nga ibarbasak iti kada aldaw!
L. D., Alemania
Panagulbod Mamagpanunot ti artikulo a “Ti Panangmatmat ti Biblia: Panagulbod—Maikalintegan Aya?” (Pebrero 8, 2000). Ngem babaen ti aniaman a nainkalintegan a depinasion, saan kadi a kondenaren ti Biblia ti amin a panangallilaw?
D. S., Estados Unidos
Iti Biblia, ti panagulbod gagangay a ramanenna ti panangibaga iti di umiso iti maysa a tao a maikari a mangammo iti agpayso ket panggep ti panangaramid iti kasta nga allilawen wenno dangran dayta a tao wenno ti sabali a tao. Dagiti managbuteng iti Dios a tattao a kas kada Abraham, Isaac, Rahab, ken David ket nangaramid kadagiti kita ti panangallilaw ngem saanda a nakondenar kas managulbod. Siempre, inaramidda dagita kadagiti naisangsangayan a kasasaad. Dagiti inaramidda ket saan ngarud a mabalin a mausar kas pagpambar kadagiti di kasapulan a panangallilaw. Kas pagarigan, no insapata ti maysa a Kristiano nga ibagana ti agpayso iti maysa a korte, masapul ngarud nga ibagana ti agpayso wenno agulimek latta.—ED.
Awanan Amma a Pampamilia Ti Pebrero 8, 2000 a ruar salaysayenna ti pannakaulit-ulit ti itatanor dagiti awanan amma nga annak. (“Awanan Amma a Pampamilia—Panangpasardeng iti Pannakaulitna”) Diak mayebkas no kasano a nadismaya ken nakapungtotak kalpasan a nabasak daytoy. Inanamonganyo ti kababalin dagiti pimmanaw nga amma babaen ti panangisalaysayyo iti nadumaduma a pakaseknanda kas kadagiti kalinteganda a sumarungkar ken ti pinansial a kasasaadda. Ayanna ti panangbabalaw? Ayanna ti panangparegta kadagiti lallaki nga ilintegda dagiti kamalida?
S. L., Estados Unidos
Maawatanmi unay no kasano kasaem para iti dadduma ti mangutob iti kasta a material, nangnangruna no napasarandan ti pannakabaybay-a. Ngem saan a nairanta ti artikulo a mangbabalaw kadagiti lallaki. Imbes ketdi, inkagumaanmi nga itandudo ti pannakaawat iti agsumbangir a dasig dagiti narikut nga isyu a nairaman. Nangipaaykami met kadagiti praktikal a pammagbaga kadagiti nabaybay-an. Makapainteres ta ti konklusion ti artikulo nga, “Awanan Amma a Pampamilia—Panangpasardeng iti Pannakaulitna” ket: “Mapasardeng laeng dagiti agdama a kasasaad iti pamilia no situtulok dagiti tattao a mangbalbaliw a mamimpinsan iti panagpampanunot, kababalin, ugali, ken moralidadda.”—ED.
Nagsangitak idi nakitak ti akkub nga addaan iti retrato ti maysa nga ubing a babai a kadua ni tatangna. Kanayon idi a kayatko a kasta met koma ti relasionmi ken ni tatangko. Ti artikulo ket nakatulong kaniak a mangikagumaan a mangtarus no apay a napasamak dagiti bambanag a kas iti napasamak iti pamiliak. Kas man la silnag ti init dayta a nangsarut iti nasipnget a napalabasko ken nangsungbat kadagiti narikut a saludsod a kanayon idi nga ut-utobek iti nagadun a tawen.
M. M., Estados Unidos