Manipud Kadagiti Agbasbasa
Gladiola Kayatkayo a komendaran iti artikulo a “Ti Gladiola—Naisangsangayan a Sabong a Nalami ti Kinapintasna.” (Pebrero 22, 2000) Maragragsakanak no sarungkarandak dagiti karelihionanyo, uray no diak sigurado no agbalinakto a maysa kadakuada. Nupay kasta, ti artikulo ket insurat ti maysa nga agpayso a makaammo iti maipapan kadagiti gladiola. Iti daytoy a nariribuk a lubong, nagsayaat a pangparelaks ken pangtagiragsak iti biag ti panagmula kadagiti gladiola.
C. M., Estados Unidos
Panagpakamatay Ti serye a “Panagpakamatay—Siasino ti Kangrunaan a Mangar-aramid?” (Pebrero 22, 2000) ti eksakto a kasapulanmi. Walo a bulan ti napalabasen kalpasan ti kellaat nga ipapatay ni nanangko. Idi natay ni nanang, adayo ti ayan ni tatang isu a makonkonsiensia. Ibagbagana a dinan kayat ti agbiag pay. Dakkel ngarud ti naitulong dagiti artikulo kadakami ken ni tatangko.
R. Z., Alemania
Nagpakamatay ni lolok dua a tawenen ti napalabas. Kalpasan ti ipapatay ni baketna, nadadael ti panunotna. Tinulongannak dagiti artikuloyo a mangtarus no apay a nagpakamatay.
A. M., Estados Unidos
Idi Enero, nagpakamatay ti 48 ti tawenna a manongko. Kabigatanna, kalpasan ti pumpon, ni tatangko, a di Saksi ni Jehova, nakitana daytoy a ruar ti Agriingkayo! iti mailbox-mi. Di agun-uni ken agsangsangit idi impakitana dayta kadakami. Nagsangit gapu iti rag-o ken agyaman ti pamiliak gapu iti daytoy a makaliwliwa a serye.
B. J., Estados Unidos
Iti eskuelaan ti distritomi, innem nga ubbing ti nagpakamatay iti las-ud ti napalabas a tawen. Dakkel a pakaseknan dayta isu nga indeklara ti eskuelaan ti distritomi a kanayon a siputanmi dagiti posible nga agpakamatay iti uneg ti eskuelaan. Intukonmi daytoy a ruar kadagiti tattao iti luglugar a masansan a di umawat iti mensahemi. No dadduma, innala payen dagiti tattao ti magasin sakbay a malpaskami nga agsao!
C. C., Estados Unidos
Idi tin-edyerak pay laeng, namindua a pinadasko ti agpakamatay kalpasan a natay ni tatangko. Ti mismo a sao a “panagpakamatay” ket ibilang ti dadduma a nakababain ken saan a rumbeng a pagsasaritaan. Pagyamanan ta pinagbalinyo dayta nga akkub ti Agriingkayo! Napaneknekak a prangka, realistiko, ken mannakaawat unay dagitoy nga artikulo.
M. G., Francia
Problema iti Panaggayyem Tinulongannak ti artikulo nga “Agimtuod Dagiti Agtutubo . . . Apay a Sinairnak ti Gayyemko.” (Pebrero 22, 2000) Sinairnak unay ti kadekketan a gayyemko iti innem ket kagudua a tawen. Babaen ti panangyaplikar kadagiti singasing iti artikulo, sitatanang ken sitatalna a nagtungtonganmi nga aggayyem dagiti bambanag. Nagbanaganna, nasingsingedkami itan ngem idi.
M. L., Estados Unidos
Baldado a Manangaskasaba Talaga a pinaregtanak ti artikulo a “Naragsak a Panangmatmat iti Laksid Dagiti An-annayen.” (Pebrero 22, 2000) Ubingak pay, ket no dadduma, kasla agtutupatop dagiti problemak. Makaparegta unay ti pakasaritaan ni Konstantin Morozov. Apresiarek ti imbagana: “Kayatko ti agtultuloy nga agserbi [ken Jehova] bayat nga agpitpitik pay laeng ti pusok.”
L. C., Italia
Tallo ti annakko, ket agsipud ta diak kapammatian ni lakayko, masapul a siak ti mangisuro kadakuada kadagiti naespirituan a banag. Masapul a manggedak met ken agtagibalay, ket no dadduma, kasla awanen ti nabati pay a pigsak. Nakaskasdaaw ti positibo a kababalin ni Konstantin! Pagyamanan iti panangipablaakyo iti pakasaritaanna.
O. K., Russia