Dagiti Sibibiag a Mosaik Idiay Montreal
BABAEN TI MANNURAT TI AGRIINGKAYO! IDIAY CANADA
NANIPUD Hunio 19 agingga iti Oktubre 9, 2000, ti napintas a siudad ti Montreal, Canada, ti nakaangayan ti Mosaiculture International Montreal 2000 (MIM 2000), ti kaunaan nga internasional a pabuya dagiti masetas a tinubay ti eskultura. Babaen ti tema a “Ti Planeta ket Maysa a Mosaik,” naawis dagiti artist manipud iti 14 a pagilian nga agdisenio ken agaramid iti agarup sangagasut a ladawan a mayeksibit a pakausaran dagiti masetas.
Dagiti dua ti dimensionda a masetas a mosaik—a pakaaramatan dagiti masetas a pangpartuat ti maysa a ladawan—ti mangar-arkos kadagiti pangpubliko a hardin iti adun a siglo. Ngem iti napalabas a 50 a tawen, nakapartuat dagiti hardinero idiay China, Europa, ken dadduma pay a lugar iti tallo ti dimensionna nga eskultura babaen ti panangyabbongda kadagiti siaannad ti pannakapilida a masetas iti adu a metal a balabala. Babaen ti panamagtiponda iti dua ken tallo ti dimensionna a mosaik iti maysa nga eksibit, pinaglatak manen dagiti nangorganisar iti MIM 2000 ti termino a “mosaiculture”—a damo idi a nausar a pangdeskribir kadagiti pagmulaan iti masetas idiay Francia—ket inyaplikarda dayta agpadpada iti dua ken tallo ti dimensionna a masetas a tinubay ti eskultura. Agarup tallo a milion ti dagup dagiti espesial ti pannakapilida a masetas a nausar para iti MIM 2000. Tapno masibugan ken mamantener dagiti sibibiag a mosaiculture, kasapulan dagiti saguday ti 68 a hardinero.
Ti mosaik dagiti Tsino ti nangnangruna a makapasiddaaw, tangay nagusar dagiti nagaramid iti naglalaok a sekka wenno dadamilien a daga, ibleng ti kabalio, ken garami iti metal a balabala ti tallo ti dimensionna nga eskultura. Nagusarda met iti babassit a masetas a babassit ti ramutda nga agkasapulan iti bassit laeng a daga.
Namnamaen idi ti tunggal maysa kadagiti artist a nakipaset iti MIM 2000 a mangabakda iti salip. Ngem kaaduan a sangaili ti kontento lattan a nagbuya kadagiti kabarbaro a disenio ken nangayed a buya ti tunggal mosaik. “Talaga a gapuanan ti arte daytoy,” kinuna ni Lynn Duranceau, ti direktor ti internasional a salip. “Kasla bassit a museo dayta. Talaga a pagpannakkelmi ti resultana.”
[Dagiti ladawan iti panid 24, 25]
Ngato: Natubay a panda, manipud China
Tengnga: Kadaanan a palasio, manipud Thailand, agraman ti kulibangbang, manipud China
Baba: Dagiti itik, manipud Quebec, Canada
[Dagiti ladawan iti panid 25]
Ngato: Dagiti natubay a masetas a kaasping ti ladawan nga impinta ni Vincent van Gogh, manipud Canada; paboreal, manipud Francia