2000—Naisangsangayan a Tawen?
ADDA kadi naisangsangayan iti tawen 2000? Matmatan dayta dagiti agnanaed kadagiti pagilian a Lumaud kas umuna a tawen ti maikatlo a milenio. Madama dagiti nagarbo a panagsagana para iti pannakarambakna. Maikabkabit dagiti dadakkel nga elektroniko a pagorasan a pagbilangan kadagiti maudi a segundo agingga a mangrugi ti baro a milenio. Mayur-urnos dagiti Gala New Year’s Eve a pasala. Dagiti T-shirt a namarkaan iti mainaig iti panagngudo ti milenio ket mailaklako kadagiti tiendaan iti babassit nga ili kasta met kadagiti shopping mall iti dadakkel a siudad.
Makiramanto dagiti kameng dagiti dadakkel ken babassit a simbaan iti makatawen a piesta. Apagtapog ti umay a tawen, manamnama a mapan ni Pope John Paul II idiay Israel tapno idauluanna dagiti Romano Katoliko iti naawagan a “jubileo a panagrambak iti milenio ti Iglesia Katolika Romana.” Mapattapatta nga agplamplano a mapan idiay Israel inton umay a tawen ti agarup dua ket kagudua a milion agingga iti innem a milion a turista, debotado man wenno agusioso.
Apay a nagadu ti tao nga agpanggep a mapan idiay Israel? Kastoy ti kinuna ni Roger Cardinal Etchegaray, opisial ti Vatican a pannakangiwat ti papa: “Ti tawen 2000 ket pammadayaw ken Kristo ken iti panagbiagna ditoy a pagilian. Natural laeng ngarud nga umay ditoy ti Papa.” Ania ti pakainaigan ti tawen 2000 ken ni Kristo? Gagangayen a maipagarup a ti tawen 2000 ti mangtanda iti eksakto a 2,000 a tawen nanipud pannakayanak ni Kristo. Ngem kasta kadi? Kitaentayo.
Napatpateg pay ti tawen 2000 kadagiti kameng ti dadduma a relihion. Patienda nga iti umay a tawen wenno iti tawen a sumaruno iti dayta, agsubli ni Jesus iti Bantay Olibo ket mapasamak idiay tanap ti Megiddo ti gubat ti Armagedon, a nadakamat iti libro nga Apocalipsis. (Apocalipsis 16:14-16) Kas panagsagana kadagitoy a mapasamak, ginasut nga agnanaed iti E.U. ti nangilako kadagiti pagtaengan ken kaaduan a sanikuada ket immakarda idiay Israel. Para kadagidiay saanda a mapanawan ti pagtaenganda, naipadamag nga inkari ti maysa a prominente nga ebanghelista iti E.U. nga ipabuyana ti panagsubli ni Jesus iti telebision—iti de kolor!
Kadagiti pagilian iti Lumaud, dumegdegdeg dagiti panagsagana a mangpasangbay iti maikatlo a milenio. Nupay kasta, agtultuloy dagiti normal nga aktibidad dagiti tattao kadagiti dadduma a pagilian. Dagitoy a tattao—a kaaduan iti populasion ti lubong—dida patien a ni Jesus a taga Nazaret ti Mesias. Dida pay awaten ti B.C.-A.D. a pamay-an ti panagpetsa.a Kas pagarigan, adu a Muslim ti mangar-aramat iti bukodda a kalendario a sigun iti dayta, ti umay a tawen ket 1420—saan a 2000. Ti panagbilang dagiti Muslim iti tawen ket mangrugi iti petsa a pimmanaw ni propeta a Muḥammad iti Mecca a napan idiay Medina. No dagupen, agarup 40 a nadumaduma a kalendario ti us-usaren dagiti tattao iti sangalubongan.
Adda kadi kaipapanan ti tawen 2000 kadagiti Kristiano? Naisangsangayan kadi a talaga ti Enero 1, 2000? Masungbatan dagitoy a saludsod iti sumaganad nga artikulo.
[Footnote]
a Iti B.C.-A.D. a sistema ti panagpetsa, agtinnag kadagiti tawen a “B.C.” (before Christ) dagiti pasamak sakbay ti pagaammo a tiempo ti pannakayanak ni Jesus; dagiti pasamak kalpasan dayta ket agtinnag kadagiti tawen nga “A.D.” (Anno Domini—“iti kaaldawan ti Apotayo.”) Nupay kasta, kaykayat nga usaren ti dadduma nga aduan pannakaammo nga eskolar dagiti sekular a panangawag kas “B.C.E.” (before our Common Era) ken “C.E.” (of our Common Era.)