Maymaysa Kadi ti Pudno a Relihion?

Saan a kayat ti dadduma a tattao dayta a saludsod. Tangay nakaad-adu ti relihion iti intero a lubong, ibagada nga akikid ti panagpampanunot wenno natangsit pay ketdi ti aniaman a relihion nga agkuna nga isuda laeng ti pudno. Pagarupenda nga adda naimbag iti amin a relihion wenno iti kaaduan kadagitoy. Kasta met kadi ti pagarupmo?

SIEMPRE, adda dagiti situasion a nainsiriban nga ikabilangan ti nagduduma nga opinion. Kas pagarigan, mabalin a patien ti maysa a tao a ti maysa a kita ti taraon ket makapasalun-at kenkuana. Ngem rumbeng kadi nga ipilitna dayta iti amin, a kasla dayta laeng ti makapasalun-at a taraon? Sigurado a nainsiriban a bay-anna a ti tao ti agpili iti taraon a naimbag wenno nasaysayaat pay ketdi para kenkuana.

Umiso met kadi dayta no maipapan iti relihion? Adda kadi nagduduma a nasayaat a pagpilian, nga agdepende iti pannakapadakkel ken panangmatmat ti maysa? Wenno adda kadi maymaysa a kinapudno maipapan iti relihion nga agpaay iti amin a sangatauan? Kitaentayo no ania ti kuna ti Biblia. Ngem usigentayo nga umuna no talaga nga adda pudno a sursuro. Ta no awan, apay nga agbiroktayo pay laeng iti pudno a relihion?

Adda Kadi Pudno a Sursuro?

Sakbay la unay ti pannakapapatayna, imbaga ni Jesu-Kristo iti agsalsaludsod kenkuana a Gobernador ti Roma a ni Poncio Pilato: “Tunggal maysa nga adda iti dasig ti kinapudno imdenganna ti timekko.” Mabalin nga adda panagduadua ni Pilato idi insaludsodna: “Ania ti kinapudno?” (Juan 18:37, 38) Iti kasumbangirna, sibabatad a nagsao ni Jesus maipapan iti kinapudno. Awan panagduaduana iti dayta. Usigem, kas pagarigan, ti kinuna ni Jesus kadagiti nagduduma a tattao.

“Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.”​—Juan 18:37.

“Siak ti dalan ken ti kinapudno ken ti biag.”​—Juan 14:6.

“Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.”​—Juan 4:23, 24.

“No agtalinaedkayo iti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.”​—Juan 8:31, 32.

Gapu ta sikokompiansa a nagsao ni Jesus maipapan iti kinapudno ken iti pannakagun-od iti dayta, saan kadi a rumbeng nga usigentayo ti posibilidad nga adda pudno a sursuro ken mabalin a masarakan dayta?

Talaga Kadi nga Adda Naan-anay a Kinapudno?

Awan duadua nga umanamongka nga adda bambanag a naan-anay a masiguradom. Siguradoka a sibibiagka ket agpaypayso dagiti bambanag nga adda iti aglawlawmo. Dagiti kayo, bambantay, ulep, ti init, ken ti bulan​—ti lubong—​saan nga arapaap dagitoy. Siempre, adda met latta sumagmamano a pilosopo a mangibaga a mapagduaduaan uray dagitoy a bambanag. Ngem mabalin a dika umanamong iti kasta a di nainkalintegan nga ideya.

Ken adda met dagiti linteg ti nakaparsuaan. Talaga a saanmo a mapagduaduaan dagita. Kas pagarigan, no tumpuakka iti rangkis, matnagka; no dika mangan, mabisinanka; ket no mabayag a dika mangan, matayka. Saanmo a panunoten a dagita a linteg ti nakaparsuaan ket agpaay laeng iti sumagmamano a tattao. Imbes ketdi, agpaayda iti amin a sangatauan iti intero a lubong.

Tukoyen ti Biblia ti maysa kadagita a linteg ti uniberso idi dinamagna: “Mabalin kadi ti maysa a tao ti mangkaraykay a mangurnong iti saklotna iti apuy ket kaskasdi a saan a mapuoran dagiti mismo a kawesna?” Kinapudnona, idi naisurat dayta, pagaammo iti intero a lubong a mauram ti kawes no mayasideg iti apuy. Nupay kasta, iti panangibagana iti kastoy, ti proverbio ti Biblia ipatpatuldona laeng ti napatpateg a banag nga “asinoman a makidenna iti asawa ti padana a tao” sagabaenna dagiti dakes a pagbanaganna.​—Proverbio 6:27, 29.

Sigurado kadi a naan-anay a kinapudno dagita a sasao? Mabalin nga ibaga ti dadduma a saan. Kunaenda nga agduduma ti personal a pagalagadan ti tunggal maysa, a ti moral nga alagaden ti maysa a tao agpannuray iti naisuro kenkuana, patpatienna, ken ti kasasaadna. Ngem usigem ti sumagmamano a moral a paglintegan ti Dios a masarakan iti Biblia. Iti intero a lubong, saan kadi a maibilang dagitoy a kinapudno?

Ti Biblia kondenarenna ti pannakikamalala. (1 Corinto 6:9, 10) Saan nga akseptaren ti dadduma a tattao a kinapudno daytoy a paglintegan ti Biblia, isu a makikamalalada. Ngem kaaduanna, isuda a mismo sagabaenda dagiti dakes a resultana, a masansan a pakairamanan ti nariribuk a konsiensia, diborsio, ken nakaro a sakit ti nakem dagiti naapektaran.

Ti Dios kondenarenna met ti panagbartek. (Proverbio 23:20; Efeso 5:18) Ania ti mapasamak no agbalin a mammartek dagiti tattao? Kaaduanna, maikkatda iti trabahoda, madadael ti salun-atda, masinasina ti pamiliada, ken masaktan met ti riknada. (Proverbio 23:29-35) Dagita a pagbanagan ket sagabaen met dagiti saan a mamati a dakes ti panagbartek. Maibagatayo kadi a ti resulta ti pananglabsing kadagita a moral a paglintegan ket agpannuray laeng iti patpatien wenno panangmatmat ti tunggal tao?

Adda met dagiti bilin ti Biblia kadatayo a kas iti panagayat iti asawa, panagraem iti asawa, ken panagaramid iti naimbag kadagiti sabsabali. (Mateo 7:12; Efeso 5:33) Makagunggona ti panangtungpal kadagitoy. Ikalintegam kadi a dagita a moral a balakad ket pagimbagan laeng ti dadduma a tao?

Matungpal man dagiti moral a pagalagadan ti Biblia wenno saan, adda epekto dayta kadagiti tattao. Gapuna, saan nga umiso a kunaen nga agdepende dagita a linteg iti panangmatmat ti indibidual. Imbes ketdi, talaga a pudno dagita. Ipakita dagiti pammaneknek a pakagunggonaan ti panangannurot kadagiti moral a paglintegan ti Biblia, ngem pagdaksan no saanda a masurot.

Isu a panunotem: No agaplikar dagiti moral a pagalagadan ti Biblia iti amin a sangatauan, dagiti ngay pagalagadan ti Sao ti Dios maipapan iti panagdayaw? Komusta dagiti komentona maipapan iti mapasamak no mataytayo ken iti namnama a mabalintayo ti agbiag nga agnanayon? Nainkalintegan ngarud a patien a kinapudno dagitoy a pannursuro ti Biblia, nga agpaay iti amin a sangatauan. Dagiti gunggona ti panangsurot ken pagdaksan ti di panangsurot kadagitoy ket saan laeng nga agpaay kadagiti tattao a mamati kadagitoy a linteg.

Mabalin a magun-odan ti kinapudno. Imbaga ni Jesus a ti Sao ti Dios, ti Biblia, ket kinapudno. (Juan 17:17) Ngem kasla saan pay laeng a magun-odan ti kinapudno. Apay? Agsipud ta adu a nagduduma a relihion ti mangibagbaga nga isursuroda ti ibagbaga ti Biblia. Ania a relihion ti mangisursuro iti kinapudno manipud iti Sao ti Dios? Maymaysa laeng kadi a relihion ti mangisursuro iti kinapudno? Saan kadi a masarakan ti kinapudno wenno ti sumagmamano a kinapudno iti adu a relihion?

[Blurb iti panid 4]

Kasano a ti pananglabsing kadagiti linteg ti Dios ket mayarig iti pannakauram a resulta ti pannakayasideg iti apuy?