Asino ti Rumbeng a Mangikeddeng no Ania ti Pudno a Relihion?

NALAWAG nga imbaga ni Jesus a saan a makaay-ayo iti Dios ti dadduma a kita ti panagdayaw. Dinakamatna ti maipapan kadagiti “ulbod a mammadto,” nga indiligna ida iti maysa a kayo a mangpatpataud kadagiti awan pategna a bunga ket “mapukan ken maibelleng iti apuy.” Kinunana pay: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit.”​—Mateo 7:15-22.

Kinapudnona, kinuna ni Jesus maipapan kadagiti dadduma nga agkunkuna a pasurotna: “Ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mateo 7:23) Maysa pay, idi makisarsarita kadagiti pangulo ti relihion idi kaaldawanna, inyaplikar ni Jesus kadakuada dagiti sasao ti Dios iti apostata nga Israel: “Kinaubbaw nga agtultuloyda nga agdaydayaw kaniak, agsipud ta isuroda kas doktrina ti bilbilin dagiti tattao.”​—Marcos 7:6, 7.

Nalawag a saan nga amin a panagdayaw ket anamongan ti Dios wenno ti Anakna. No kasta, saan nga amin a panagdayaw ket pudno a panagdayaw. Kayatna kadi a sawen a maymaysa laeng a relihion ti mangisursuro iti kinapudno? Saan ngata nga adda sumagmamano a relihion nga an-anamongan ti Dios? Wenno, mabalin ngata nga adda dagiti indibidual nga an-anamongan ti Dios uray ania ti relihionda?

Napaltiingan ni apostol Pablo a mangisurat: “Ita bagbagaankayo, kakabsat, babaen ti nagan ni Apotayo a Jesu-Kristo a rebbeng nga agsaokayo amin a sangsangkatunos, ket awan koma dagiti panaglalasin kadakayo, no di ket naan-anay nga agkaykaysakayo koma iti isu met laeng a panunot ken iti isu met laeng a wagas ti panagpampanunot.” (1 Corinto 1:10) Igunamgunam met ti Biblia kadagiti Kristiano ti ‘panagmaymaysada iti panunot ken panagmaymaysada iti ayat, a mapagtitiponda a sangsangkamaysa iti kararua, a salimetmetanda ti maymaysa a panunot iti isip.’​—Filipos 2:2.

No adda kasta a panagkaykaysa, adda ngarud maymaysa a relihion. Maitunos iti dayta, ibaga ti Biblia nga adda “maysa nga Apo, maysa a pammati, maysa a bautismo.”​—Efeso 4:4, 5.

No Ania ti Ipakita ti Biblia

Nalawag nga ipakita ti Biblia a pudno ti immunan a nadakamat. No sukimatentayo ti Biblia, makitatayo a nakilangen ti Dios iti ilina babaen ti maymaysa a kita ti panagdayaw. Idi rugrugi ti pakasaritaan ti tao, inusar ti Dios dagiti patriarka, wenno ulo ti pamilia, kas pannakabagina. Nalatak kadagitoy da Noe, Abram (Abraham), Isaac, ken Jacob.​—Genesis 8:18-20; 12:1-3; 26:1-4; 28:10-15.

Dagiti kaputotan ni Jacob naadipenda idiay Egipto. Siraranggas a naidadanesda ngem immaduda unay idi addada sadiay. Insalakan ida ti Dios manipud iti pannakakautibo, a simimilagro nga imballasiwna ida iti Nalabaga a Baybay. Kalpasanna, pinagbalinna ida kas ilina, nga impaayanna ida kadagiti linteg babaen ti mangibabaet a ni Moises. Nagbalinda a nagkauna a nasion ti Israel, ti nasion ti Dios.​—Exodo 14:21-28; 19:1-6; 20:1-17.

Talaga a saan nga inanamongan ti Dios ti porma ti panagdayaw dagiti tattao iti nasion nga adda iti aglawlaw ti Israel. Kinapudnona, dinusana ti ilina idi linabsingda ti lintegna ken tinuladda dagita a porma ti panagdayaw.​—Levitico 18:21-30; Deuteronomio 18:9-12.

Dagiti met ngay indibidual manipud sabsabali a nasion a mayat nga agdayaw iti pudno a Dios? Masapul a panawanda nga umuna ti dati nga ulbod a panagdayawda ket kalpasanna, makikaduada iti nasion ti Israel tapno agdayawda ken Jehova a Dios. Adu kadakuada ti inanamongan ti Dios ket nagbalinda a nasungdo nga adipenna. Mairaman kadagitoy dagiti babbai a kas ken Rahab a Canaanita ken ni Ruth a Moabita; dagiti lallaki a kas ken Urias a Heteo ken ni Ebed-melec nga Etiope; ken ti grupo dagiti tattao a kas kadagiti Gibeonita. Ti ari ti Israel a ni Solomon sipapasnek a nagkararag maipaay kadagiti amin a makitimpuyog nga agdayaw a kadua ti ili ti Dios.a​—2 Cronicas 6:32, 33.

Kalpasan ti Iyaay ni Jesus Ditoy Daga

Kalpasanna, idi naibaon ni Jesus ditoy daga, naipasdek ti pamay-an ti pudno a panagdayaw maibatay kadagiti pannursurona, ket nagbalin a nakalawlawag dagiti panggep ti Dios. Idi agangay, dagiti pudno nga agdaydayaw naawaganda a “Kristiano.” (Aramid 11:26) Isu a dagiti Judio idi nga agtarigagay iti anamong ti Dios masapul a panawanda ti dati a wagas ti panagdayawda. Masapul nga agpilida no ania a kita ti panagdayaw ti surotenda​—ti panagdayaw dagiti Judio ken ti panagdayaw nga insuro ni Jesus wenno ti personal a panagdayawda. Kas kuna ti Sao ti Dios, dagiti pudno nga agdaydayaw agkaykaysada iti “maysa a pammati.”​—Efeso 4:4, 5.

Iti kaaldawantayo, kagura ti dadduma no ibagam nga adda maymaysa a relihion nga us-usaren ita ti Dios. Ngem dayta ti ibagbaga ti Biblia. Idi napalabas, daytoy a kinapudno ket naawatan ti adu nga indibidual a nagdaydayaw iti bukodda a pamay-an. Nakitimpuyogda kadagiti pudno nga agdaydayaw ken Jehova, ket aniaman a panagduaduada nasukatan iti adu a bendision ken rag-o. Kas pagarigan, ibaga ti Biblia nga idi inawat ti maysa nga Etiope ti Kristianidad ken nagpabautisar, “sirarag-o a nagtultuloy iti dalanna.”​—Aramid 8:39.

Ita, asinoman nga umawat ken makitimpuyog iti pudno a relihion umawatdanto met iti kasta a bendision. Ngem gapu ta nakaad-adu ti relihion a pagpilian, kasanom a mailasin ti maymaysa a pudno a relihion?

[Footnote]

[Ladawan iti panid 5]

Ania ti mapasamak iti relihion nga agpatpataud iti awan pategna a bunga?