Kapitulo 14

‘Makitulagakto Kadakayo a Maipaay iti Maysa a Pagarian’

1. Iti rabii sakbay ti ipapatay ni Jesus ania a namnama ti inwayatna iti sanguanan dagiti apostolesna?

RABII idi sakbay ti pannakapapatay ni Jesus nga imbagana kadagiti matalek nga apostolesna: ‘Idiay balay ni Amak adda adu a pagianan. Innak ket isaganaankayto ti pagianan, tapno no adino ti yanko addakay met koma.’ Innayonna pay a kinuna kadakuada: “Mangaramidak ti maysa a tulag kadakayo, kas ti panangaramid ni Amak ti tulag kaniak, a maipaay iti maysa a pagarian.” (Juan 14:2, 3; Luc. 22:29) Anian a makaay-ayo a panginanamaan ti inwayatna kadakuada!

2. Mano dagiti makipaset iti nailangitan a Pagarian ni Kristo?

² Nupay kasta, di kayat a sawen ni Jesus a dagidiay laeng apostolesna ti makipagturay kenkuana iti nailangitan a Pagarianna. Naipakaammo iti kamaudiananna a 144,000 a nasubbot manipud daga ti addaanto iti dayta engrande a pribilehio. (Apoc. 5:9, 10; 14:1, 4) Addada kadi sumagmamano itatta ti gumawgaw-at iti dayta tapno maragpatda dayta?

Panangurnong Kadagiti Makipagtawid iti Pagarian

3. Iti ministeriona iti publiko, inturong ni Jesus ti atension iti ania a gundaway?

³ Kalpasan ti pannakaibalud ni Juan a Mammautisar babaen ken Herodes Antipas, rinugian ni Jesus ti nasged a kampania ti panangasaba iti publiko a sadiay inturongna ti atension iti “pagarian ti langit.” (Mat. 4:12, 17) Impaawatna kadagiti tattao nga addanto gundawayda a makastrek iti dayta a Pagarian, ket sipapasnek a ginaw-at dagiti ad-adalanna dayta a gunggona.​—Mat. 5:3, 10, 20; 7:21; 11:12.

4. (a) Kaano ti pannakapulot dagiti immuna nga adalan ni Jesus iti nasantuan nga espiritu? (b) Aniat’ mangipakpakita a nanipud idin maiturturongen ti atension iti pannakaurnong dagiti agtawid ti Pagarian?

⁴ Idi Pentecostes ti 33 K.P. dagiti immuna kadakuada ti napulotanda iti nasantuan nga espiritu. (Ara. 2:1-4; 2 Cor. 1:21, 22) Ti sagana ti Dios a maipaay iti pannakaisalakan nga agturong iti imortal a nailangitan a biag ti naipakaammo. Inaramat ni Pedro “dagiti tulbek ti pagarian ti langit” tapno ilukat daytoy a pannakaammo​—umuna kadagiti Judio, sumaganad kadagiti Samaritano, ken kalpasanna kadagiti tattao dagiti Gentil a nasnasion. (Mat. 16:19) Ti espesial nga atension ti mait-ited iti panangbukel ti gobierno a mangiturayto ti sangatauan iti 1,000 a tawtawen, ket ngangngani amin dagiti naipaltiing a sursurat iti Kristiano a Griego a Kasuratan ti nangruna a naiturong iti daytoy a grupo dagiti agtawid ti Pagarian​—“dagiti sasanto,” “a mairaman iti pannakaawis a nailangitan.”a

5. Ti kadi pannakaawisda iti nailangitan a biag ket gapu ta nasaysayaatda nga ad-adipen ti Dios ngem kadagidiay nagbiag sakbayda?

⁵ Ti pannakaawisda iti nailangitan a biag ket saan a gapu ta nasaysayaatda ngem amin dagiti ad-adipen ti Dios a natnatay sakbay ti Pentecostes ti 33 K.P. (Mat. 11:11) Imbes ketdi, ita a rinugian ni Jehova ti panangpili kadagidiay makikadua ken Jesu-Kristo nga agturay. Iti agangay a 19 a siglo kalpasan daytoy adda laeng maymaysa a panangawis, daydiay laeng nailangitan. Daytat’ maysa a di kaikarian a kinamanangaasi nga impaay ti Dios iti nakedngan a bilang iti panangitultuloy ti mismo a nainsiriban ken naayat a pangpanggepna.​—Efe. 2:8-10.

6. (a) Apay a dumtengto ti tiempo nga agserranto met laeng ti nailangitan a pannakaawis? (b) Asino ti mangiturong kadagiti bambanag tapno ti padto maipapan iti “dakkel a bunggoy” ti matungpalto met, ket aniat’ aktual a napasamaken?

⁶ Idi agangay ti naikeddeng ngem limitado a bilang ti 144,000 ti mapunnonton. Ti maudi a panangselio kadagitoy naespirituan nga Israelitas kas naanamongan ti asidegen. (Apoc. 7:1-8) Kalpasanna, ni Jehova, babaen iti espirituna ken ti pannakaawat iti Saona a pinagbalinna a posible para iti makitkita nga organisasionna, ti mangiturong kadagiti bambanag tapno matungpal ti sabali pay a paset ti panggepna, kas naisalaysay idiay Apocalipsis 7:9-17. Maysa a “dakkel a bunggoy” manipud amin a nasnasion ti naurnongto, nga addaan ti nakaragragsak a namnama a makalasat iti dakkel a rigat ken agbiag nga agnanayon iti kinaperpekto idiay naindagaan a Paraiso. No usigentayo ti aktual a napasamak, kasla nalawag a ti nailangitan a panangawis ti nakumpleto nga en heneral agarup idi tawen 1935 K.P., idi ti naindagaan a namnama ti “dakkel a bunggoy” ti naawatan metten a naan-anay. Nanipud idin adda a naitimpuyogen a kadua dagiti sumagmamano a ribo ti kaiyariganna kadagiti natda ti nailangitan a klase dagiti minilmilion a managdaydayaw ken Jehova a sipapasnek a mangin-inanama nga agbiag nga agnanayon ditoy mismo daga.

7. Posible kadi nga uray itatta dadduma ti umawat pay ti nailangitan a pannakaawis, ken apay a kasta ti sungbatyo?

⁷ Kayat kadi a sawen daytoy nga awanen dagiti aw-awagan itatta ti Dios a maipaay iti nailangitan a biag? Agingga a malpas ti maudi a panangselio, posible nga adda pay met sumagmamano nga addaan iti dayta a namnama ti agbalin a di matalek, ket mapili ti dadduma a mangala ti lugarda. Ngem kasla rasonable a daytoy ket natakkon a mapasamak.

Naespirituan nga Annak​—Kasanoda nga Ammo?

8. Ania a panangilawlawag ti inted ni Pablo a mangipakpakita a dagidiay napulotan ti nasantuan nga espiritu ammoda dayta a banag?

⁸ Ti espiritu ti Dios ti mangted ti positibo a pammasiguro ti panangibilang kas naespirituan nga annak kadagiti nabautisaranen a Kristiano nga umawat ti nailangitan a pannakaawis. Impakita ni apostol Pablo daytoy idi nagsurat kadagiti “sasanto” idiay Roma, nga isalaysay no ania idi ti situasion kadagiti amin a pudno a Kristiano. Kunana: “Ta dagup amin nga idalan ti espiritu ti Dios, isuda dagiti annak ti Dios. Ta saanyo nga inawat ti espiritu ti pannakaadipen manen tapno agbutengkayo, ngem inawatyo ti espiritu ti pannakaibilang nga annak, gapuna umawagtayo: ‘Abba, Ama!’ Ti espiritu met laeng paneknekanna kadagiti espiritutayo, a datayo annaknatayo iti Dios. Ket no annak, agtawid met: agtawid iti Dios, ken makipagtawid ken Kristo, no kasta makipagsagabatayo kenkuana, tapno maitan-oktayo met kenkuana.”​—Roma 1:7; 8:​14-17.

9. Kasano a ‘ti espiritu met laeng paneknekanna’ a kadua ti espiritu dagidiay pudpudno nga annak ti Dios?

⁹ Ti dua nga usar ti sao nga “espiritu” ti naiyeg ditoy iti atensiontayo: “ti espiritu met laeng” ken ti “espiritutayo.” Ti umuna ket isu ti di makita nga aktibo a puersa ti Dios. Daytat’ mangipaltiing kadagiti naespirituan nga annakna ti rikna ti pannakaibilangda kas annak ti Dios a siwayawaya. Dayta nga espiritu ti mangpaneknek met babaen iti naipaltiing a Sao ti Dios, ti Biblia, a kasla maysa a personal a surat kadagiti naespirituan nga annakna. (1 Ped. 1:10-12) No dagidiay naiyanak iti nasantuan nga espiritu basaenda ti kunaen ti Kasuratan kadagidiay naespirituan nga annak ti Dios, insigida a sumungbatda: ‘Agaplikar kaniak dayta.’ Gapuna ti mismo nga aktibo a puersa ti Dios ti mangpaneknek iti nadumaduma a pamay-an iti espirituda, ti mangtignay a puersa iti mismo nga isip ken pusoda, nga isuda ket annak ida ti Dios. Maitunos ngarud iti ipamatmat ti espiritu ti Dios, ti is-isip ken puspusoda ti maipamaysan iti namnamada kas dagiti makipagtawid ken Kristo, ket akseptarenda dagiti responsabilidad kas naespirituan nga annak ti Dios.​—Fil. 3:13, 14.

10. (a) Ania a bambanag ti dida ipakaammo mismo a ti maysa ket napulotan a Kristiano? (b) Ania a panangmatmat ti al-alaen dagiti “sabsabali a karnero” maipapan ti lugarda iti panggep ti Dios?

¹⁰ Pudno aya dayta kadakayo? No wen, addaankay ti nakaskasdaaw a pribilehio. Nupay kasta, maysa a biddut ti panangipato ti asinoman a gapu laeng ta ti maysa a tao ket addaan panangapresiar kadagiti nauneg a naespirituan a bambanag wenno nakaregregta iti ministerio iti tay-ak wenno addaan nasged nga ayat kadagiti kakabsatna ket isut’ maysan a napulotan ti espiritu a Kristiano. Dagita a bambanag ket adda met kadagiti adu kadagiti “sabsabali a karnero.” Uray met dagiti pusoda ti natignay iti nabasada iti Kasuratan maipapan kadagiti makipagtawid ken Kristo, ngem saanda a pagtangsit nga alaen para iti bagida ti maysa a banag a saan met nga inkeddeng ti Dios para kadakuada. (Idiligyo iti Numeros 16:1-40.) Nailasinda ti orihinal a panggep ti Dios para iti daga ken addaan panangapresiar nga itartrabahoda ti pannakipasetda iti dayta.

Ti Pannakiraman a Maikari

11. Asino dagiti tumabuno iti tinawen a panangrambak ti ipapatay ni Jesus, ken apay?

¹¹ Kada tawen, iti Nisan 14, kalpasan ti ilelennek ti init, dagiti napulotan a paspasurot ni Jesu-Kristo iti amin a paset ti daga ti manglaglagip iti ipapatayna, maitunos iti bilbilin nga intedna kadagiti apostolesna. (Luc. 22:19, 20) Dagiti “sabsabali a karnero” ti tumabunoda met, saan a kas makiraman iti tinapay ken arak, no di ket kas dagiti nadayaw a managpaliiw.

12. Kasano a dadduma kadagiti immuna a Kristiano idiay Corinto saanda impakita ti umiso a panangapresiar iti Pangmalem ti Apo?

¹² Saan a maysa daytoy nga ongaong a narelihiusuan a seremonia a napnuan ti napigsa a kaiyuloganna. Kadagiti Kristiano idi umuna a siglo idiay Corinto, Grecia, a dadduma ti saan a nangipakita ti umiso a panangapresiar iti okasion, nagsurat ni apostol Pablo ti nainget a pammalakad, a kunkunana: “Gapuna siasinoman a manganto iti tinapay wenno uminumto iti kopa ti Apo a saan a maikari makabasolto iti maipapan iti bagi ken dara ti Apo.” Aniat’ namagbalin kadakuada a ‘di maikari’ a mannakipaset? Saan nga umiso ti panangisaganada ti puso ken isipda. Addada idi panagsisinasina iti kongregasion. Dagiti met dadduma ti agsobsobra ti pannangan ken panaginumda sakbay ti gimong. Aleng-aleng ti panangtratoda iti Pangmalem ti Apo. Awanda iti kondision a mangtarus iti nauneg a kaipapanan ti tinapay ken ti arak.​—1 Cor. 11:17-34.

13. Aniat’ kaiyulogan ti tinapay ken arak a naiserbi iti Memorial?

¹³ Ania dayta a kaipapanan? Daytat’ awan iti aniaman a kunada a namilagruan a panagbalbaliw ti tinapay ken arak. Ni Kristo ti saanen a maidaton manen iti kada Memorial. Kuna ti Kasuratan a ni “Kristo ti naidaton a naminsan nga agpaay iti agnanayonen tapno awitenna dagiti basbasol dagiti adu.” (Heb. 9:28; 10:10; Roma 6:9) Ti tinapay nga awan lebadurana ken ti nalabaga nga arak ti emblemada laeng a mangireprepresentar ti literal a bagi nga indaton ni Jesus ken ti literal a dara nga imbuyatna. Ngem anian a nagpateg ti kaiyulogan dagitoy! Naipaay ti awan basolna a natauan a bagi ni Jesus tapno maaddaan ti lubong ti sangatauan ti gundaway nga agbiag nga agnanayon. (Juan 6:51) Ket ti naiparukpok a darana ti adda nagkadua a panggep a sinerbianna​—dalusan manipud basol dagidiay adda iti sangatauan a mamati iti dayta, kasta met tapno pagandarenna ti baro a tulag iti nagbaetan ti Dios ken ti kongregasion ti naespirituan nga Israel, a buklen dagiti napulotan ti espiritu a Kristiano. (1 Juan 1:7; 1 Cor. 11:25; Gal. 6:14-16) Isu dagitoy napapateg a sagana ti mamagbalin a posible ti pannakaibilang a nalinteg dagiti kameng ti “bassit nga ipastoran” iti biang ti Dios, nga aktualmente a naikredito ti natauan a kinaperpekto kadakuada. (Luc. 12:32) Daytoy ti naaramid tapno mapulotanda babaen ti nasantuan nga espiritu kas annak ti Dios, nga addaan panggep a mairaman ken Kristo iti nailangitan a Pagarianna. Kabayatan ti pannakipaspasetda kadagiti emblema ti Memorial kada tawen, a mangpampaneknek ti nailangitan a namnamada, mapabpabaro ken umad-adalem met ti panangipategda iti kaaddada iti uneg ti “baro a tulag” nga imbabaet ni Kristo.​—Heb. 8:6-12.

“Dakami Kumuyogkaminto Kenka”

14. (a) Apay a saan a makipaset dagiti “sabsabali a karnero” kadagiti emblema ti Memorial, ngem aniat’ siraragsak a segseggaanda? (b) Kasanot’ panangmatmatda iti pannakitimtimpuyogda kadagiti natda nga agtawid iti Pagarian?

¹⁴ Nailasin dagiti “sabsabali a karnero” no kasanot’ pannakilangen ni Jehova kadagiti pinulotanna, ket timmiponda kadakuada, a kunkunada: “Dakami kumuyogkaminto kenka, ta nangngegmi a ti Dios adda kenka.” (Zac. 8:20-23) Saanda laeng nga agtataripnong no di ket makikuykuyogda kadakuada iti panangipakpakaammo iti naimbag a damag ti Pagarian iti amin a mapagnaedan a daga. Nupay kasta, saan a naiserrek dagiti “sabsabali a karnero” iti “baro a tulag” a kadua ti naespirituan nga Israel ken saanda met a nairaman iti “tulag . . . ti maysa a pagarian” nga inaramid ni Jesus kadagidiay napili a makiraman kenkuana iti nailangitan a biag, ket gapu itoy, maiyanatup laeng, a saanda ngarud a makipaset kadagiti emblema ti Memorial. (Luc. 22:20, 29) Ngem inton naragpaten ti “baro a tulag” ti panggepna, ti panangurnong kadagiti maudi a kamkameng ti “bassit nga ipastoran” iti nailangitan a Pagarian, mabigbigton ti “sabsabali a karnero” a daytoyen ti mangipamatmat a dagiti bendision nga awatendanto ditoy daga babaen iti dayta a Pagarian ti umas-asidegen. Ibilangda dayta kas maysa a pribilehio, bayat dagiti “maudi nga al-aldaw,” ti makipagserbi a sangsangkamaysa a kadua dagiti nasungdo a natda dagiti makipagtawid iti Pagarian.

[Dagiti Footnote]

Repaso a Pagsasaritaan

● Apay adu unay iti Kristiano a Griego a Kasuratan ti mangiturturong iti atension iti nailangitan a namnama?

● Kasano nga ammo dayta dagidiay napulotan kas annak ti Dios? Aniat’ kaipapanan dagiti emblema ti Memorial a pakipaspasetanda?

● Kasanot’ panangidemostra dagiti “sabsabali a karnero” a pudpudno a nakipagkaykaysada kadagiti adda iti “bassit nga ipastoran”?