Kapitulo 15

Kasano ti Panangiturong ni Jehova iti Organisasionna?

1. Ania nga impormasion maipapan ti organisasion ni Jehova ti ipampanayag ti Biblia, ket apay a daytat’ importante kadatayo?

BABAEN iti naipaltiing a Kasuratan, pinasiripnatayo ni Jehova iti nakaskasdaaw a nailangitan nga organisasionna. (Isa. 6:2, 3; Ezeq. 1:1, 4-28; Dan. 7:9, 10, 13, 14) Nupay ditay makita dagiti espiritu a parparsua, pinagbalinnatayo a siririing kadagiti pamay-an a dagiti ar-aramid dagiti nasantuan nga angheles apektaranna met dagiti pudno a managdaydayaw ditoy daga. (Gen. 28:12, 13; 2 Ar. 6:15-17; Sal. 34:7; Mat. 13:41, 42; 25:31, 32) Salaysayen met ti Biblia ti makitkita a paset ti organisasion ni Jehova ken tulongannatayo a mangtarus no kasanot’ panangiturturongna iti dayta. No pudno met laeng nga addaantayo ti naespirituan a pannakaawat kadagitoy a bambanag, daytoy ti mangtulong kadatayo a “magna a maikari ken Jehova a maipaay iti amin a pakaay-aywanna.”​—Col. 1:9, 10.

Panangilasin iti Makitkita a Paset

2. Nanipud idi Pentecostes ti 33 K.P. ania idin ti kongregasion ti Dios?

² Iti 1,545 a tawtawen ti nasion ti Israel ti kongregasion ti Dios. Ngem saanda a sinalimetmetan ti Linteg ti tulag ken linaksidda ti mismo nga Anak ti Dios. Gapuna pinataud ni Jehova ti baro a kongregasion, a nangaramidanna met ti maysa a baro a tulag. Daytoy a kongregasion ti impabigbig dagiti Kasuratan kas ti “nobia” ni Kristo, a buklen dagiti 144,000 a pinili ti Dios a maitiponda a kadua ti Anakna idiay langit. (Efe. 5:22-32; Apoc. 14:1; 21:9, 10) Dagiti immuna ti napulotan ti nasantuan nga espiritu idi Pentecostes, 33 K.P. Babaen iti nasantuan nga espiritu nangted ni Jehova ti di agbiddut nga ebidensia nga itan isu daytoyen ti kongregasion nga usarenna a mangitungpal ti panggepna.​—Heb. 2:2-4.

3. Asino itatta ti mangbukel ti makitkita nga organisasion ni Jehova?

³ Itatta adda laengen bassit a natda kadagiti 144,000 ti adda ditoy daga. Ngem, kas kaitungpalan ti padto ti Biblia, maysa a dakkel a bunggoy dagiti “sabsabali a karnero” ti naiyeg iti aktibo a pannakitimtimpuyog kadakuada. Ni Jesu-Kristo, ti Naimbag a Pastor, ti namagtipon kadagitoy “sabsabali a karnero” kadagidiay natda ti naiyanak iti espiritu a paspasurotna tapno buklenda ti “maymaysa nga arban” iti sidongna kas ti “maymaysa a pastorda.” (Juan 10:11, 16; Apoc. 7:9, 10) Amin dagitoy buklenda ti maysa a nagkaykaysa nga organisasion, ti makitkita nga organisasion ni Jehova itatta.

Nateokratikuan Pannakasangalna

4. Asino ti mangiturturong ti organisasion, ken kasano?

⁴ Ti Nainkasuratan a sasao a “kongregasion ti Dios a sibibiag” pagbalinenna a nalawag no asino ti mangiturturong iti dayta. Ti organisasion ti nateokratikuan, wenno iturturayan ti Dios. Mangmangted ni Jehova ti bilin agpaay iti ilina babaen iti daydiay dinutokanna nga agbalin a di makita nga ulo ti kongregasion, ni Apo Jesu-Kristo, ken babaen iti mismo a naipaltiing a Saona, ti Biblia.​—1 Tim. 3:14, 15; Efe. 1:22, 23; 2 Tim. 3:16, 17.

5. (a) Kasano ti pannakaiparangarang ti nailangitan a panangiturong iti kongregasion idi umuna a siglo? (b) Aniat’ mangipakpakita a ni Jesus pay met laeng ti ulo ti kongregasion?

⁵ Nakalawlawag unay dayta a nateokratikuan a panangiwanwan idi dagiti immuna a kamkameng ti kongregasion ti tinignay ti nasantuan nga espiritu idi Pentecostes ti 33 K.P. (Ara. 2:1-4, 32, 33) Daytat’ naiparangarang idi ti anghel ni Jehova ti nangiturong kadagiti bambanag nga isut’ nakaisaknapan ti naimbag a damag agingga idiay Africa. (Ara. 8:26-39) Kasta met, idi ti timek ni Jesus ti nangibilin ti pannakakumberte ni Saulo ti Tarso ken kasta met idi narugian ti trabaho a panagmisionero kadagiti Gentil. (Ara. 9:3-7, 10-17; 10:9-16, 19-23; 11:12) Ngem ti kasapulan a panangiwanwan ti saan a kanayon a maipapaay kadagiti kakasta a naisalsalumina a pamay-an. Idi agangay awanen dagiti timek a mangmangngegan manipud langit, awanen dagiti anghel nga agparparang kadagiti tattao ken awanen dagiti namilagruan a sagsagut ti espiritu. Kaskasdi inkari ni Jesus kadagiti matalek a paspasurotna: “Ket adtoy! Addaak kadakayo nga agnanayon agingga iti panungpalan ti sistema dagiti bambanag,” ket ipakita dagiti kinapudno a kasta nga agpayso. (Mat. 28:20; 1 Cor. 13:8) Saan laeng a bigbigbigen dagiti Saksi ni Jehova ti kinaulona, ngem nalawag nga imposible koma ti panangitultuloyda a mangiwarwaragawag ti mensahe ti Pagarian iti imatang ti nabara unay nga ibubusor no awan ti tulongna.

6. (a) Asino ti mangbukel ti “matalek ken naannad nga adipen,” ken apay? (b) Ania a trabaho ti intedna iti dayta nga “adipen”?

⁶ Kasakbayan ti ipapatay ni Jesus isut’ nagsao kadagiti adalanna maipapan iti maysa a “matalek ken naannad nga adipen” nga isu kas Apo ti pangitalkanna iti espesial a responsabilidad. Dayta nga “adipen,” sigun iti panangisalaysay ni Jesus, ti addanton inton ti Apo pumanawton nga agturong idiay langit ken daytanto pay ti sibibiag inton panagsubli ni Kristo. Ti kasta a panangiladawan ti saan a maibagay iti indibidual a tao. Ngem maibagay dayta iti matalek a napulotan a kongregasion ni Kristo no mamatmatan nga interamente. Ammo ni Jesus a gatangenna ida babaen ti mismo a darana, gapuna maiyanatup ti panangawagna kadakuada a sangsangkamaysa kas ti “adipenna.” Inikkanna ida ti trabaho, a binilinna ida amin nga agaramidda kadagiti ad-adalan ken progresibo a pakanenda dagitoy ti naespirituan, nga ipaayanda ida ti “[naespirituan] a taraonda iti umiso a tiempo.” Ti pannakadutokda ti pinatalgedan ti nasantuan nga espiritu idi Pentecostes ti 33 K.P.​—Mat. 24:45-47; 28:19, 20; 1 Cor. 6:19, 20; idiligyo iti Isaias 43:10.

7. (a) Ania a napadakkel a responsabilidad ti adda itan iti “adipen”? (b) Apay a ti panagtignaytayo kadagiti bilbilin babaen iti daytoy a kalasugan ti importante?

⁷ Iti panagsubli ti Apo, no simamatalek nga ar-aramiden ti “adipen” ti aramidna, isunto ti mapagtalkan kadagiti daddadakkel a responsabilidad. Dagiti sumaruno a tawtawen isunto ti panawen a maipaay iti sangalubongan a pammaneknek maipapan ti Pagarian, ket maysa a “dakkel a bunggoy” dagiti managdaydayaw ken Jehova ti maurnongto nga addaan panggep ti pannakaispaldanto iti dayta “dakkel a rigat.” (Mat. 24:14; Apoc. 7:9, 10) Uray met dagitoy kasapulanda ti naespirituan a taraon, ket daytat’ ipaay kadakuada ti nagkaykaysa nga “adipen,” dagiti napulotan ti espiritu nga ad-adipen ni Kristo. Tapno maay-ayo ni Jehova, kasapulan ti intay panangakseptar ti bilbilin nga ipapaayna babaen daytoy a kalasugan ken agtignay a maitunos iti dayta.

8, 9. (a) Idi umuna a siglo ania ti urnos idi a maipaay iti panangresolber kadagiti saludsod maipapan ti doktrina ken panangted ti kasapulan a pannakaiwanwan maipapan iti panangikasaba ti naimbag a damag? (b) Ania nga umas-asping nga urnos ti adda met itatta?

⁸ Siempre, no maminsan, dagiti salsaludsod maipapan ti doktrina ken dagiti pamay-an ti tumaudda. Ania ngarud itan? Ti maika-15 a kapitulo Dagiti Aramid ti mangibagbaga no kasano a naresolber ti isyu maipapan kadagiti kasapulan nga alagaden dagiti nakumberte a Gentil. Daytat’ maiyuman kadagiti apostoles ken panglakayen idiay Jerusalem, nga agserserbi idi kas manarawidwid a bagi. Dagidiay a panglakayen ti saanda a tattao a di agbiddut; saanda a tattao a nikaanoman saanda a nagkamkamali a pulos. (Idiligyo iti Galacia 2:11-14.) Ngem inusar ida ti Dios. Inusigda ti kuna ti naipaltiing a Kasuratan iti tema a mapagsasaritaan agraman dagiti ebidensia ti panagtigtignay ti espiritu ti Dios a nangilukat iti tay-ak a Gentil, kalpasanna nangaramidda ti desision. Binendisionan ti Dios dayta nga urnos. (Ara. 15:1-29; 16:4, 5) Manipud iti dayta sentral a bagi, naibaon met dagiti sinaggaysa a tattao a mangisaknap ti panangikaskasaba ti naimbag a damag maitunos iti inautorisaran a mismo ti Apo.​—Ara. 8:14; Gal. 2:9.

⁹ Iti kaaldawantayo ti Bagi a Manarawidwid ti buklen dagiti napulotan ti espiritu a kakabsat a lallaki manipud nadumaduma a dagdaga. Daytat’ masarakan iti sangalubongan a hedkuarters dagiti Saksi ni Jehova. Sisusungdo a daytat’ mangisaksaknap kadagiti intereses ti nadalus a panagdayaw iti sidong ti kinaulo ni Jesu-Kristo. Dagitoy a kakabsat ti addaan ti isu met laeng a panangmatmat kas ken apostol Pablo, idi a nangipatulod ti naespirituan a pammalakad kadagiti padana a Kristiano, insuratna: “Saan a gapu ta iturayanmi ti pammatiyo, no di ket dakami ti tumultulong iti rag-oyo, ta iti pammati addakayo a sititibker.”​—2 Cor. 1:24.

10. (a) Kasano a madeterminar no asino dagiti agbalin a panglakayen wenno ministerial nga ad-adipen? (b) Apay rebbeng a nasinged a makitunostayo kadagidiay nadutokan kadagita a posision?

¹⁰ Daytoy nateokratikuan nga urnos ti bigbigbigen dagiti Saksi ni Jehova iti intero a lubong. Amin dagiti lokal a kongregasionda ti sisisinged a makipagtartrabaho iti dayta. Kumitkitada iti Bagi a Manarawidwid a mangdutok kadagiti panglakayen ken ministerial nga ad-adipen a mangaywan tapno nalamuyot ti panagandar dagiti kongregasion. Kadagiti ania ti pakaibatayan ti pannakapili dagita a tattao a maipaay iti pannakadutokda? Dagiti pagannurotan ti sibabatad a naisalaysayda idiay Biblia. Dagiti panglakayen a mangar-aramid kadagiti rekomendasion ken dagidiay autorisado a mangdutok ti agpadpada addaanda ti nainget a responsabilidad iti imatang ti Dios a sumurot kadagitoy. (1 Tim. 3:1-10, 12, 13; 5:22; Tito 1:5-9) Awan ti panagkamkampania kadagiti miembro ti kongregasion wenno aniaman a panagbotosan iti kongregasion. Imbes ketdi, maitunos iti inaramiden dagiti apostoles no maaramid dagiti panangdutok idi umuna a siglo, dagidiay manangaywan a responsable iti panagirekomendar, ken iti kamaudianan dagidiay mangaramid ti panangdutok, ti agkararagda a maipaay iti tulong ti espiritu ti Dios ken sapulenda ti panangiwanwan manipud naipaltiing a Saona. (Ara. 6:2-4, 6; 14:23; idiligyo iti Salmo 75:6, 7.) Babaen ti panagtignaytayo iti bilin nga ipaay dagiti panglakayen, ipakpakitatayo ti panangapresiartayo iti naayat a probision ni Kristo kadagitoy a “sagsagut kadagiti tao” a mangtulong kadatayo amin iti pannakaragpat iti “panagmaymaysa ti pammati.”​—Efe. 4:8, 11-16.

11. (a) Ania a nagpapateg a serbisio ti ar-aramiden dagiti babbai iti las-ud ti nateokratikuan nga urnos? (b) Kaano ti panagusarda ti dalungdong, ken apay?

¹¹ Ibilin dagiti Kasuratan a dagiti posision ti panangaywan iti kongregasion ti aywanan koma laeng dagiti lallaki. Saan a pulos a panangipababa daytoy kadagiti babbai, ta adu kadakuada ti nairaman met kas makipagtawid iti nailangitan a Pagarian. Babaen iti naemma, nadalus a kababalin ken gagetna a mangaywan iti pamiliada, tumultulong met dagiti Kristiano a babbai iti nasayaat a pakasarsaritaan ti kongregasion. (Tito 2:3-5) Masansan dakkel a trabaho ti maar-aramidanda iti panangsapul kadagiti kabbaro nga interesado ken panangiyeg kadakuada iti organisasion. (Sal. 68:11) Ngem ti panangisuro iti uneg ti kongregasion ti aywanan laeng dagiti lallaki a nadutokan. (1 Tim. 2:12, 13) Ket no awan dagiti kualipikado a lallaki iti gimong nga inyurnos ti kongregasion, ngarud maysa a babai ti agdalungdong nga isut’ mangidadaulo wenno mangikarkararag.a Iti kasta ipakpakitana ti panagraemna iti urnos ni Jehova, kas panangipakita ni Jesus ti ulidan nga agpaay iti amin iti panagpasakop ken ni Amana.​—1 Cor. 11:3-16; Juan 8:28, 29.

12. (a) Ania a panangmatmat ti igunamgunam ti Biblia nga alaen dagiti panglakayen maipapan iti posisionda? (b) Iti ania a naisalsalumina a pribilehio ti mabalin a pakipasetantay amin?

¹² Iti lubong ti indibidual nga addaan prominente a posision ti maibilbilang nga importante, ngem iti uneg ti organisasion ti Dios ti pagalagadan ket: “Ta ti kanumuan kadakay amin, isu met laeng ti kangatuan.” (Luc. 9:46-48; 22:24-26) Gapuna ibalakad ti Kasuratan kadagiti panglakayen nga agannadda a saanda koma a kasla agturay kadagidiay impakumit ti Dios kadakuada, no di ket, agbalinda koma kas pagulidanan ti arban. (1 Ped. 5:2, 3) Saan laeng a sumagmamano, no di ket amin dagiti Saksi ni Jehova, lalaki man wenno babai, ti addaan ti naisangsangayan a pribilehio a mangirepresentar iti Soberano ti uniberso, nga agsao a sipapakumbaba iti naganna ken ibaga kadagiti tattao iti uray sadino maipapan iti Pagarianna.

13. Babaen ti panangusar kadagiti naisitar a kasuratan, pagsasaritaan dagiti saludsod a nailista iti murdong daytoy a parapo.

¹³ Nasayaat a maisaludsodtay iti bagbagitayo: “Pudno met laeng aya nga apresiarentayo ti panangiturturong ni Jehova iti makitkita nga organisasionna? Ipakpakita aya dayta ti kababalintayo, ti sasao ken tigtignaytayo?” Ti panangusig kadagiti sumaganad a punto ti makatulong iti tunggal maysa kadatayo a mangaramid ti kasta a panangusig:

No pudpudno met laeng nga agpaspasakoptayo ken Kristo kas ulo ti kongregasion, ngarud, kas ipamatmat dagiti sumaganad a kasuratan, aniat’ ar-aramidentay koma? (Mat. 24:14; 28:19, 20; Luc. 21:34-36; Juan 13:34, 35)

Iti panagreggetda nga agbalin a nabunga a Kristiano, agingga iti ania ti rebbeng a panagrikna amin dagiti paset ti organisasion iti panagpannurayda iti Dios ken ni Kristo? (Juan 15:5; 1 Cor. 3:5-7)

No padpadasen a baliwan dagiti panglakayen ti panagpampanunot dagiti tattao tapno matmatanda dagiti bambanag a maitunos kadagiti dadduma met nga adda iti organisasion, maawatantay koma daytoy kas ti naasi a pannakaseknan ti asino? (Efe. 4:7, 8, 11-13; 2 Cor. 13:11)

No addaan panangipateg nga aw-awatentayo dagiti naespirituan a sagana nga aggapgapu manipud iti klase “adipen” ken ti Manarawidwid a Bagina, mangipakpakitatayo ti panagraem iti siasino? Ngem anian no agsasaotayo a kas manglais kadagitoy? (Luc. 10:16; idiligyo iti 3 Juan 9, 10.)

Apay a ditay koma nalabes a manangbabalaw kadagiti nadutokan a panglakayen? (Ara. 20:28; Roma 12:10)

14. (a) Babaen iti kababalintayo iti teokratiko nga organisasion, aniat’ idemdemostratayo? (b) Gapu itoy, ania dagiti adda a gundaway para kadatayo a pangpaneknek nga ulbod ti Diablo ken mangyeg ragsak iti puso ni Jehova?

¹⁴ Ni Jehova ti makilanglangen kadatayo itatta babaen iti makitkita nga organisasionna iti sidong ni Kristo kas nadutokan nga ulona. Ngarud ti kababalintayo iti daytoy nga organisasion idemostrana met iti praktikal a pamay-an ti takder nga al-alaentayo iti isyu ti kinasoberano. (Heb. 13:17) Kuna ni Satanas a matigtignaytay amin iti tarigagay iti personal a gunggona, a ti kangrunaan a pakaseknantayo ket ti bagitay laeng. Ngem no siraragsaktayo a mangipaay iti bagitayo nga agserbi iti aniaman a pakasapulanna, bayat a likliklikantayo met ti panagsao ken panagaramid kadagiti bambanag a mangiturong ti atension iti bagbagitayo, pampaneknekantayo nga ulbod ti Diablo. No ayaten ken pagraraemantayo dagidiay ‘mangidaldalan kadatayo,’ a tultuladen ti pammatida ngem agkitakit met nga agbalin kas ti kita ti tao a ‘mangpaspasablog kadagiti tattao gapu iti magunggonada,’ mangiyegtayo met ti ragsak iti puso ni Jehova. (Heb. 13:7; Jud. 16) Babaen ti panangpataud ti nadalus a panagraem iti organisasion ni Jehova ken panangaramid iti trabaho nga imbilinna kadatayo iti amin a pusotayo, pampaneknekantayo a ni Jehova ti pudpudno a Diostayo ken datayo ti nagkaykaysa met iti panagdaydayawna.​—1 Cor. 15:58.

[Dagiti Footnote]

Repaso a Pagsasaritaan

● Ania ti makitkita nga organisasion ni Jehova itatta? Aniat’ panggepna?

● Asino ti nadutokan nga ulo ti kongregasion? Babaen iti ania a makitkita nga urnos nga isut’ mangipapaay ti naayat a panangiwanwan para kadatayo?

● Ania a nadalus a kababalin maipaay iti responsabilidad ken kadagiti tattao iti organisasion ti masapul a sukayantayo?