ACCAD

Maysa kadagiti uppat a siudad nga imbangon ni Nimrod a nangbukel iti “nangrugian ti pagarianna.” (Ge 10:10) Ti Accad (Akkad) ket naikuna nga isu ti kadaanan a siudad ti Agade. Saan a masinunuo ti eksakto nga ayanna.

Ti nagan nga Akkad ket agaplikar met iti intero a makin-amianan a rehion ti lugar a naawagan Babilonia idi agangay. Bayat ti panagturay ni Sargon I (saan a ti Sargon iti Isa 20:1), agparang a nagbalin a natan-ok ti Akkad kas kangrunaan wenno naarian a siudad dayta a rehion. Ti makin-abagatan a rehion ti Mesopotamia ket pagaammo kas Sumer. Timmanor ti Babilonia manipud kadagitoy dua a lugar, ket kadagiti Babiloniko a teksto, dagiti agtuturayna naawaganda pay laeng idi iti “ari ti Akkad” agingga iti tiempo a narba ti Babilonia idi 539 K.K.P. Iti Cylinder ni Ciro, ti nangparmek iti Babilonia innalana ti titulo nga “Ari ti Babilonia, ari ti Sumer ken Akkad.”

Agparang a dagiti Akkadiano inartapanda dagiti Sumeriano iti panagkitikit iti napipintas nga eskultura ken iti narikut a panagkurti iti selio. Ita, maar-aramat ti nagan nga Akkadiano (Accadiano) kas pangdeskribir kadagiti kadaanan a pagsasao ti Asiria ken Babilonia.