ACZIB

[Makaallilaw a Disso]. Ti nagan ti dua a siudad.

1. Siudad iti makin-abagatan a paset ti Naikari a Daga, iti teritoria ti Juda. (Jos 15:44) Maikunkuna nga isu met laeng ti “Kezib” (Ge 38:5, KJ), ti nakayanakan ni Sela nga anak ni Juda. Ipakita ti Josue 15:33 nga adda dayta iti katurturodan ti Sefela, ket nupay di sigurado, naikuna nga isu dayta ti Tell el-Beida (Horvat Lavnin) 5 km (3 mi) iti laud nga abagatan-a-laud ti Adullam. Ti Laquis, Moreset-gat, ken Maresah (nadakamat a kadua ti Aczib iti Mik 1:13-15) addada amin iti dayta a lugar. Ti Cozeba, iti 1 Cronicas 4:22, ket gagangay a naibilang nga isu met laeng ti Aczib.

2. Siudad iti igid ti baybay ti Fenicia iti teritoria ti tribu ni Aser. (Jos 19:29) Nupay kasta, ti Aser saanna a pulos naparmek ti Aczib, uray pay ti napatpateg a siudad ti Acco (Acre) iti abagatan, nalabit maigapu iti pananglapped ti bunggoy dagiti barko ti Fenicia. (Uk 1:31, 32) Ni Senaquerib ti Asiria pinarmekna dayta idi tiempo ni Ari Ezekias ket dakamatenna dayta iti rekord dagiti pakasaritaanna, a dakamatenna dayta babaen ti nagan nga Akzibi. Kadagidi tiempo dagiti Griego ken Romano naawagan dayta iti Ecdippa. Naikuna nga isu dayta ti ez-Zib (Tel Akhziv), agarup 14 km (9 mi) iti amianan ti Acco iti wangawangan ti Wadi Qarn (Nahal Keziv).