Rebbeng Aya nga Agbalin a Ministro Amin a Pudno a Kristiano?
“Dagiti isuamin a banag agtaudda iti Dios, isu a nangikappia kadatayo kenkuana met laeng gapu ken Kristo ket inikkannatayo ti ministerio ti pannakikappia.”—2 CORINTO 5:18.
1. Ania iti situasion maipapan iti klase klero iti kongregasion idi kaaldawan ni Pablo?
AWAN ti panaglalasin [idi kaaldawan ni apostol Pablo] ti klero ken laigo ta awan ti klero.” Dayta ti nakaskasdaaw a sasao, a nagparang iti London Times, a nangiyebkas iti pamunganayan a kinapudno maipapan iti immuna a Kinakristiano. Awan panagbingay ti klero-laigo. Kaipapanan kadi dayta a ti kongregasion Kristiano awan makitkita a pannakaidaulona? Ket awan kadi iti ministro iti aniaman a kaipapanan?
2. Ania a kita ti panangidaulo ti adda idi iti immuna a kongregasion? (Filipos 1:1)
2 Kalpasan ti Pentecostes, 33 K.P., idi a ti bilang dagiti napulotan a Kristiano dimmakkel iti rinibo, nesesita iti panangdutok kadagiti kualipikado a lallaki iti tunggal kongregasion nga agserbi kas manangaywan ken kas ministerial nga ad-adipen. Ngem isuda ti di nangbukel ti klase klero. Ti pannakadutokda ket di nagpannuray iti maysa a karera iti unibersidad wenno seminario. Saanda nga umaw-awat ti sueldo a maipaay iti serbisioda. Lallakida a napakumbaba nga addaan naespirituan a kualipikasion, a dinutokan ti nasantuan nga espiritu a mangaywan iti arban. Ngem, isuda aya laeng ti mangikaskasaba ti ‘naimbag a damag ti Pagarian’? Isuda aya laeng dagiti ministro iti kongregasion?—Mateo 24:14; Aramid 20:17, 28; 1 Pedro 5:1-3; 1 Timoteo 3:1-10.
3, 4. Sigun ken Pablo, siasino ti addaan paset iti Nakristianuan a ministerio?
3 Dagitoy a salsaludsod nasungbatanda babaen iti balakad ni Pablo iti sursuratna kadagiti Kristiano idiay Corinto. Kitaenyo ti introduksionna iti maikadua a suratna: “Ni Pablo . . . iti kongregasion ti Dios nga adda idiay Corinto, ken kadagiti isuamin a sasanto nga adda iti amin nga Achaia.” Awan duadua iti dayta—isut’ nagsurat iti intero a bagi dagiti napulotan a Kristiano idiay Corinto ken Achaia, saan laeng a kadagidiay mangidadaulo. Gapuna ti komentona iti Nakristianuan a ministerio ti pertinente unay “kadagiti isuamin a sasanto.” Maibatay iti ar-aramidna ken kasta met ken Timoteo, inrasonna: “Gapuna idinto ta adda kadakami daytoy a ministerio kas iti pannakagun-odmi iti asi, saankam nga agkapuy.” “Ket dagiti isuamin a banag agtaudda iti Dios, isu a nangikappia kadatayo kenkuana met laeng gapu ken Kristo ket intalekna kadakami ti ministerio iti pannakikappia . . . dakami ngarud dagiti embahador a maisuno ken Kristo, a kasla agdawdawat ti Dios kadakayo gapu kadakami.” Intuloyna: “A dikam mangted ti pakaikulboan iti uray aniaman, tapno saan a mababalaw ti ministeriomi; no di ket, iti isuamin italekmi ti bagimi a kakasla mimministro ti Dios, iti adu nga panaganus.”—2 Corinto 1:1; 4:1; 5:18-20; 6:3, 4.
4 Ipasimudaag dagitoy a sasao a tunggal napulotan a Kristiano ti rebbeng nga agbalin a ministro ken embahador a maipaay ken Kristo. Iti ania a rason? Agsipud ta ti lubong, babaen iti basolna, “naiyadayoda iti biang ti Dios” ket kasapulanda iti ministerio ti pannakikappia tapno dagiti natulnog ken nasungdo a tattao manipud amin a nasnasion maaddaanda iti pannakirelasion ken Soberano nga Apo Jehova baeten ken Kristo.—Efeso 4:18; Roma 5:1, 2.
5, 6. Kasano a pinatalgedan ni Pablo daytoy a panangmatmat iti suratna kadagiti taga Roma?
5 Iti kongregasion idiay Roma, nagsurat ni Pablo: “Ngem ania ti kunana [ti Sao ti Dios]? ‘Ti sao adda iti asideg kenka, iti ngiwatmo ken iti pusom’; kayatna a sawen, ‘ti sao’ ti pammati, nga ikaskasabatayo. Agsipud ta no ipaduyakyakmo iti publiko dayta ‘a sao iti ngiwatmo,’ a ni Jesus isu ti Apo, ket patiem iti pusom a ti Dios pinagungarna kadagiti natay, maisalakankanto. Ta buyogen ti puso no mamati ti tao tapno makagun-od iti kinalinteg, ket iti ngiwat iti panangaramid iti panangipaduyakyak a publiko maipaay iti pannakaisalakan.”—Roma 10:8-10.
6 Inturong aya ni Pablo dagidiay a sasao iti sumagmamano laeng a napili? Ti introduksionna ti mangipakita iti sabali, ta isu nagsurat: “Kadakayo amin nga adda dita Roma nga ay-ayaten ti Dios.” Innayonna pay: “Agyamanak iti Diosko gapu ken Jesu-Kristo maipuon kadakayo amin, agsipud ta ti pammatiyo naipaduyakyaken iti amin a lubong.” Nalawag, inturong ni Pablo ti balakad ken pammaregtana agraman Ro kapitulo 10, iti intero a kongregasion. Ti pribilehio a panangaramid ti publiko a panangipaduyakyak silulukat kadagiti isuamin. Kinapudnona, pinapigsana ti argumentona babaen ti pananginayonna: “Kasanonto ngarud, ti panangawagda iti daydiay dida pinati? Ket kasano ti panamatidanto iti daydiay dida nangnangngeg? Ket kasanonto ti pannakangngegda, no awan ti mangaskasaba? Ket kasano ti panangikaskasabadanto, no saandanto a naibaon? Kas adda a naisurat: ‘Nagsayaat ketdin dagiti saksaka dagiti mangyeg kadagiti naragsak a damdamag dagiti naimbag a bambanag!’”—Roma 1:7, 8; 10:14, 15.
7. Kasano a ti pudpudno a Kinakristiano naigiddiat manipud kadagiti dadduma a relihion? (Lucas 19:36-40)
7 Anian a makaparegta dayta para iti tunggal napulotan a Kristiano! Kaipapananna aminda rebbeng a maaddaan rag-o ti panangisaknap ti mensahe ti pannakaisalakan ti pagarian kadagiti dadduma. Wen, iti panangmatmat ti Dios, ti saksakada mabalin ken rebbeng nga agbalin a “napintas” iti piguratibo a kaiyuloganna. Apay a kasta? Agsipud ta ti pudno a Kinakristiano saan a napaidam a relihion a mangiturong iti kabukbukodan a pannakapnek laeng, ti panagpuppupok ken karkari iti kinaulimek. Iti kasumbabangirna, dayta ti mangitantandudo iti aktibo a Kristiano a ministerio a naiyebkas iti sasao ken ar-aramid! No kasano iti pananglaglagip ni Pablo iti dayta makita babaen iti panangidir-ina: “Ay-ayak pay no diakto ikaskasaba ti naimbag a damag!”—1 Corinto 9:16; Isaias 52:7.
8. Ania a nasken a salsaludsod ita ti mangapektar iti adu?
8 Ngem kasanon ngay ti minilmilion kadagiti pudno a Kristiano a dida met napulotan iti nasantuan nga espiritu ta ti namnamada isut’ biag nga agnanayon ditoy daga, saan nga idiay langit? Rebbeng aya nga agbalinda met a ministro?—Salmo 37:29; 2 Pedro 3:13.
Ministros met Aya ti Adda iti “Dakkel a Bunggoy”?
9. Ania nga aramid iti pakiramramanan dagidiay adda iti “dakkel a bunggoy”?
9 Ti libro nga Apocalipsis mangted kappaset ti sungbat kadagidiay a saludsod. Kas pangarigan, kalpasan pannakakitana iti sirmata ti napulotan a kongregasion ti 144,000, kuna ni Juan: “Kalpasan dagitoy, kimmitaak, ket adtoy! ti dakkel a bunggoy, nga awan ti nakabalin a bumilang, a naggapuda kadagiti isuamin a nasion ken tribo ken il-ili ken pagsasao, nga agtaktakderda iti sanguanan di trono ken iti sanguanan daydi Kordero, a nagkawesda kadagiti pagan-anay a puraw; ket adda palpalma kadagiti im-imada. Ket agpukpukkawda iti dakkel a timek, a kunkunada: ‘Ti pannakaisalakan nagtaud iti Diostayo, nga agtugtugaw iti trono, ken iti Kordero.’” Kaawatan a dagitoy, a maur-urnongda itan tapno makalasatda iti dakkel a rigat, saanda nga ilemlemmeng iti Nakristianuan a pakabigbiganda. Iwarwaragawagda iti “dakkel a timek” ti pagtataudan ti pannakaisalakanda. Kasano ti panangar-aramidda iti dayta itatta? Maysa, isut’ panangtulongda iti bassit a natda dagiti napulotan iti pannakaitungpal ti dadduma a nasken a ministerioda a padpadto ken bilbilin.—Apocalipsis 7:9, 10, 14.
10, 11. (a) Ania a bilin ti inted ni Jesus kadagiti paspasurotna sakbay ti iyuulina idiay langit? (b) Ania a padto ti matungpal iti panawentayo?
10 Kas pangarigan, toy awan bilangna a bunggoy iti mangar-aramid iti maysa a nasken a trabaho iti panangitungtungpal ti bilin ni Jesus a mangasaba ken mangisuro, nga isut’ intedna kadagiti matalek nga ad-adalanna idiay Galilea. Iti dayta nga okasion, kuna ni Jesus: “Isuamin a pannakabalin naited kaniak idiay langit ken iti rabaw ti daga. Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo.” Naited dayta a bilin kadagiti amin a Kristiano, saan nga iti napili a klase klero.—Mateo 28:18-20; 1 Corinto 15:6.
11 Ti bilin ni Jesus nainaig met iti padto nga intedna maipapan “ti panungpalan ti sistema dagiti bambanag.” Kunana: “Daytoy naimbag a damag ti pagarian maikaskasabanto iti amin a mapagnaedan a daga kas maysa a pammaneknek kadagiti isuamin a nasion; ket iti kasta umayton ti panungpalan.” Kasano iti pannakaitungpal daytoy a karit iti panangikasaba iti mensahe ti Pagarian ti intero a lubong iti maysa laeng a kaputotan? Nalawag a ti bumasbassit a rinibo kadagiti napulotan a Kristiano saanda koma a naaramidan a bukbukod daytoy trabaho a panangispal biag. Maysa koma dayta nga imposible a trabaho!—Mateo 24:3, 14; Lucas 21:32.
12. Ania ti siraragsak a bigbigbigen ita ti napulotan?
12 Dagiti napulotan a “kadua a makipagtawid ni Kristo” siraragsakda a mangbigbig ti paset nga ar-aramiden ti nasurok ngem dua milion a ministro ti “dakkel a bunggoy” a nangisaknapen iti mensahe ti Pagarian ti intero a lubong iti nakaab-ababa a panawen no iyar-arig. Uray pay idi 1930’s, adu kadagiti pudno a Kristiano ti nangakseptar iti responsabilidad ti ministerio iti dadduma a dagdaga ket intukonda iti panagserbida idiay dakdakkel ti pakasapulan. Pagyamanan iti managsakripisio nga ulidan dagitoy a kakabsat a lallaki ken babbai, naibilangda man kadagiti napulotan wenno iti klase “sabsabali a karnero,” ti trabaho ti Pagarian rimmamut a sipipigsa iti adu a pagilian ti Europa, Africa, Asia ken kadagiti Americas.—Roma 8:17.
13. (a) Kasano a pinapartak ni Jehova ti trabahona nanipud 1943? (Isaias 60:22) (b) Aniat’ paset nga inaramid dagidiay adda iti “dakkel a bunggoy” iti trabaho a kinamisionero?
13 Sakbay ti 1943 nakita ti klase “matalek ken masirib nga adipen” dagiti napulotan a Kristiano ti pannakasapul ti panangipasdek iti eskuelaan ti kinamisionero tapno dagiti Kristiano a ministro umawatda iti kanayonan a pannakasanay ken pannakaisagana nga addaan panggep a pananglukat ken panangpapartak iti trabaho a panangaskasaba kadagiti adu pay a dagdaga. Manipud pannakainagurasionna idi 1943 ken agingga iti Marso 4, 1984, dayta a Gilead School (ti “Gilead” iti Hebreo kaipapananna “maysa a bunton ti pammaneknek”) ti nakasanayen iti agangay 6,100 a graduado, kaaduan kadakuada ti naibaon kadagiti destino iti ballasiw-taaw iti intero a lubong. Adda laeng 292 (4.8 porsiento) kadagitoy a graduado ti Gilead ti agkunkuna a kamengda iti klase napulotan, gapuna iti kaaduan kadagitoy espesial ti pannakasanayna a ministros kamengda ti “dakkel a bunggoy.” Kas ti dadduma kadagiti Saksi ni Jehova iti intero a lubong inawatda iti Nakristianuan a ministerio kas nasken a paset iti Nakristianuan a panagbiagda idi inaramidda ti dedikasionda ken Jehova baeten ken Kristo Jesus.—Mateo 24:45-47; Hebreo 10:7.
Bokasion a Naibatay iti Ania?
14, 15. Iti ania ti nakaibatayan ti bokasion Kristiano iti ministerio? (Mateo 22:37-40)
14 Kaipapanan kadi dayta a dagiti Kristiano addaanda iti personal a bokasion, wenno pannakaawis manipud Dios, iti ministerio? Pudno a dadduma iti Kakristianuan iladladawanda ti “bokasionda” kas aglablabes unay nga emosional a kapadasan, a kasla kettay ti Dios ti nangawag a direkta kadakuada iti serbisiona. Ngem ti kadi Nakristianuan a ministerio naibatay kangrunaanna iti maysa a banag kas iti emosion a nalaka laeng nga agpukaw?
15 Idi nagsao ni apostol Pablo maipapan iti sagrado a serbisio iti Dios, aniat’ impakitana kas pakaibatayan dayta? Nagsurat: “Dawatek ngarud kadakayo, kakabsat, gapu kadagiti kaasi ti Dios, nga ipaayyo dagiti bagbagiyo kas daton a sibibiag, nasantuan ken makaay-ayo iti Dios, maysa a sagrado a serbisio a buyogen ti pannakabalin ti panagpanunotyo [“kas maysa nga aramid ti intelihente a panagdayaw,” Phillips; “kas managpanunot a parparsua,” The New English Bible, footnote].” Wen, ti sagrado a serbisio iti Dios naibatay iti panagrason wenno panagpanunot. Kasano a kasta? Agsipud ta iti dedikasion iti maysa ken personal a pannakirelasionna ken Jehova naibatayda iti pannakaammo iti pudno a Dios. Gapuna ti pannakaawis ti Kristiano iti ministerio, nupay dayta a mismo ket naragsak a kapadasan, ket saan laeng a basta resulta iti maysa nga emosional a panagrikna. Daytat’ addaan iti natibker a pannakatignay—ti ayat iti Dios ken ti ayat iti kaarruba.—Roma 12:1; Juan 17:3.
16. Ti kadi panangged iti amin-tiempo ilaksidda ti maysa manipud panagbalinna a ministro? (Aramid 18:1-5)
16 Ngem mabalin a maisaludsodyo, Dagidiay kadi immuna a Kristiano ministrosda met uray pay no manggedda iti amin a tiempoda wenno isuda dagiti bumalay nga assawa a babbai? Wen, ministrosda met. Nalabit a makaipaayda laeng iti bassit a paset ti tiempoda iti Nakristianuan a ministerio, a mangaskasaba ken mangisursuro, ngem isu dayta iti kangrunaan a panggepda iti biag. Ammoda a masapul a ‘paglawagenda ti pagsilawanda’ kas pudno nga ad-adalan ni Kristo. Kaipapananna isuda idi dagiti tumatrabaho-a-ministro nabayagen sakbay a naaddaan ti Kakristianuan iti trabahador-a-padi a movimientona.—Mateo 5:16; 1 Pedro 2:9.
Ti Pammaneknek iti Ministerioda
17, 18. (a) Ania a pangkaaduan a prinsipio ti insaad ni Kristo maipapan kadagiti pudno a Kristiano? (b) Ania ti pudpudno a rekomendasion ti maysa a ministro?
17 Kasano a paneknekan dagiti Saksi ni Jehova a ministroda no awan met diplomada wenno degreeda iti unibersidad? Bueno, kasano nga impasdek dagiti immuna a Kristiano a ministroda? Ni Kristo mismo ti nangted iti daytoy a pannakaawat: “Tunggal kayo a nasayaat mangted bungbunga a nasayaat.” Rebbeng a dagiti Kristiano a ministro mangpataudda koma ti “bungbunga a nasayaat,” a ramanen dayta iti pannakipasetda iti trabaho a panangaramid kadagiti adalan.—Mateo 7:17.
18 Inlawlawag dayta ni apostol Pablo iti daytoy a pamay-an: “Baliwanmi manen aya nga italek dagiti bagbagimi met laeng? Wenno masapul ngata, a kas kadagiti dadduma dagiti sursurat a panangitalek a maipaay kadakayo wenno iti biangyo? Ti suratmi dakayo met laeng, a naisurat iti pusomi nga ammo ken basaen dagiti isuamin a tattao. Maiparangarang a dakayo ti maysa a surat ni Kristo nga inaywananmi, a nasuratan saan nga iti tinta no di ket iti espiritu ti Dios a sibibiag, saan a kadagiti taptapi a bato, no di ket kadagiti taptapi a puspuso a naglasag.” Kasano ti pannakaaramid dayta a pannakaisurat iti puspuso? Babaen iti panangikaskasaba iti sinan bin-i a sao ti pammati a naimula iti puso. Kalpasanna daytoy a bin-i ti nangtignay iti immawat a mangikasaba met iti dayta met laeng a mensahe ti pannakaisalakan kadagiti dadduma.—2 Corinto 3:1-3.
19. Ania ti natibker a rekomendasion kas ministros ti adda kadagiti Saksi ni Jehova?
19 Adda kadi pammaneknek dagiti Saksi ni Jehova ti ‘maysa a surat ni Kristo nga insuratda kas ministros’? Dagiti kinapudno agsaoda a maipaay iti bagida met laeng. Idi 1931, idi damo nga inakseptarda ti naisangsangayan a naganda, addada idi laeng agangay 50,000 a Saksi a mangaskasaba ti intero a lubong. Ti report iti 1983 ipakitana iti maysa a kangatuan a bilang a nasurok a 2,652,000 a ministro a mangikaskasaba ti naimbag a damag ti Pagarian a naitimpuyog kadagiti 46,235 a kongregasion. Wen, adda itan ngangngani kas kaadu dagiti kongregasion kas iti adda a Saksi idi 1931! Ti kinapudno ti talaga a naisuraten iti minilmilion a puso iti naglabas laeng a sumagmamano pulo a tawtawen—ket isu dayta iti di maitumba a pammaneknek iti ministerio dagiti Saksi ni Jehova.—Isaias 43:10-12.
20. Kas ministro a Kristiano, ania iti kasapulantay itatta? Ania a salsaludsod ti agtalinaed a masungbatan pay?
20 Ti pannakasapul kadagiti Kristiano a ministro itatta ti ad-adda pay a nakagangganat ngem idi. Ti panawen ti nakaab-ababan ket dakkel pay ti anien. Ngarud dayta pay ti ad-adu a rason, ti panagbalintayo koma a kualipikado, makabael a ministro a mangikasaba ken mangisuro iti nabunga a pamay-an. Kasanotay a maaramidan dayta? Kasanotayo nga agbalin a mas epektibo a ministro? Ti kadi ulidan ni Kristo ken dagiti apostolesna addaan praktikal a pateg kadatayo itatta?—Efeso 5:15, 16; Mateo 9:37, 38.
Dagiti Punto Maipaay ti Repaso
◻ Kasanotay nga ammo nga amin dagiti napulotan a paspasurot ni Kristo kasapulan ti panagbalinda a ministro?
◻ Aniat’ akem nga inaramid ti “dakkel a bunggoy” iti moderno-aldaw a ministerio?
◻ Iti ania iti nakaibatayan iti Nakristianuan a bokasion iti ministerio?
◻ Ania a pammaneknek ti ministerioda ti adda kadagiti Saksi ni Jehova?
[Ladawan iti panid 11]
Adda kadi Kristiano a klase klero idi panawen apostoliko?
[Dagiti ladawan iti panid 12]
Idi 1943 nanglukat ti Gilead School idiay South Lansing, Nueva York. Ti eskuelaan ti naiyakar idiay Brooklyn, Nueva York idi 1961
[Dagiti ladawan iti panid 13]
Itan kadagiti baro a pasilidadna asideg idiay Brooklyn Bridge, ti Gilead School agtultuloy a mangisagsagana kadagiti ministro a maipaay ti panagserbi iti ganggannaet a dagdaga