Ti Nabingaybingay nga Iglesia—Kasano Kakaro?
“KAS iti maysa a dakkel ken nakigtot a pamilia, nga agnanaed iti marmarba a daan a balay a ti makinsango a didingna ket kellaat a narpuog, kasla adda arimbangaw a mapaspasamak iti dandani amin a siled—nga ik-ikkisan dagiti nagtagipandereta nga annak ni Jesus dagiti elegante nga Anglo-Katoliko a homoseksual a nakakawes iti nangisit a seda.”—The Sunday Times, Londres, Abril 11, 1993.
Daytoy a pamilia isu ti Church of England. Ti pannakaawat dagiti babbai kas papadi ti pagriringgoranda. Agaplikar met iti intero a Kakristianuan ti napatak a panangiladawan iti nakaro a pannakabingaybingay. Buyogen ti panangbabalaw dagiti patriarka ti Orthodox Church ken ti papa iti pangngeddeng a mapalubosan dagiti babbai nga agbalin a papadi, ti pangkaaduan a resultana, sigun iti maysa a report, ket “ad-adda a kumaykayakay ti arapaap maipapan iti pannakikaykaysa manen iti amin a paset ti Kakristianuan.”
Kasano Kakaro ti Pannakabingaybingay ti Iglesia?
Kas mabasatayo iti Mateo 7:21, kinuna ni Jesu-Kristo nga adu ti agkuna a mamatida kenkuana kas Apo ngem saanda nga ‘ar-aramiden ti pagayatan ni Amana.’ Kuna ti magasin a Maclean’s: “Dagiti managbasa iti Mateo nga agtarigagay a maisalakan ket mabalin a palabsen gapu iti pannakariro maipapan iti no ania a talaga ti pagayatan ti Dios, no saan nga agtutunos dagiti Kristiano, ken dagiti iglesiada, iti dayta a banag.” Kalpasan a napagsaludsodan dagiti taga Canada, ingngudo [ti nadakamat a magasin] a “nagadu ti di pagtunosan dagiti Kristiano idiay Canada no maipapan iti patpatien ken kannawidan—iti kinapudnona, ad-adu iti nagbabaetan dagiti kameng ti aniaman a denominasion ngem iti nagbabaetan dagiti denominasion a mismo.”
Sigun iti surbey daytoy, 91 porsiento kadagiti Katoliko ti umanamong iti panangusar iti artipisial a pangtiped iti panaganak nupay kondenaren ti iglesiada dayta; 78 porsiento ti agkuna a rumbeng a mapalubosan dagiti babbai nga agbalin a papadi; ken 41 porsiento ti umanamong iti aborsion “kadagiti dadduma a kasasaad.” Ti di panagtutunos dagiti nadumaduma a denominasion maipapan iti “nakaad-adu a teolohikal a parikut,” kuna ti Maclean’s, “ipaganetgetna dagiti panaglalasin a mamagsisina kadagiti kangrunaan nga iglesia.”
Doble a Pagalagadan
Adda doble a pagalagadan ken agsusupadi a pagalagadan iti moral. Ibagbaga dagiti dadduma nga itantandudoda dagiti prinsipio ti Biblia, ngem saan nga ikankano dagiti dadduma dagitoy. Kas pagarigan, maitunos aya iti pagayatan ti Dios a “kasaren” ti dua a Tomboy iti Metropolitan Church ti Toronto? Nalawag a kasta ti pagarupen dagiti maseknan. “Kayatmi a rambakan ti ayan-ayatmi iti imatang dagiti tao ken ti Dios,” kinunada.
Sinaludsod ti maysa a kolumnista no apay nga “inyakar ti maysa nga arsobispo a Katoliko a naidarum iti namin-adu a daras, dagiti papadi a manggunggundaway kadagiti ubbing iti sabali a simbaan a pakasarakanda iti ad-adu a sakristan.” Pinattapatta ti maysa a padi a ni Andrew Greeley nga ag-2,000 agingga iti 4,000 a papadi ti mabalin a nangabuso iti 100,000 a menor de edad a biktima, a masansan a di unay maikankano.
Ti di nagkaykaysa nga iglesia mangpataud kadagiti di nagkaykaysa a tattao. Iti Balkans, agpada a patien dagiti “Kristiano” a Serbian ken Croat nga adda kadakuada ni Kristo iti “nainkalintegan” a gubatda. Adu ti agar-aruat iti krusipiho iti dangadang; sigun iti report, “kanayon a nakaabbal [ti maysa] iti krusipiho no kasta a nabara ti ranget.”
“Awan Koma Dagiti Panaglalasin Kadakayo”
Pudno, ipabiang ti Biblia dagiti dadduma a banag iti konsiensia, ngem saan a daytoy ti pakaigapuan ti kasta a panaglalasin. Silalawag a kuna ni apostol Pablo: ‘Rebbeng nga agsao [ken agtignaykayo] amin a sangsangkatunos, ket awan koma dagiti panaglalasin kadakayo.’—1 Corinto 1:10; Efeso 4:15, 16.
Ti napudno a panangusig iti “Kinakristiano” agarup dua ribu a tawen kalpasan nga insurat ni apostol Pablo dagidiay a sasao mangpataud iti sumagmamano a nagpateg a salsaludsod. Apay a nakaro ti pannakabingaybingay “dagiti Kristiano”? Agpaut aya ti kasta a nabingaybingay nga iglesia? Addanto aya nagkaykaysa a Kakristianuan? Usigen ti sumaganad nga artikulo dagitoy a saludsod.
[Ladawan iti panid 3]
Demostrasion nga inwayat dagiti papadi maibusor iti aborsion
[Credit Line]
Akkub ken ladawan iti ngato: Eleftherios/Sipa Press