Kasanoyo a Masalakniban Dagiti Annakyo?

KALPASAN ti adu a tawen a panagadalna iti eskuelaan idiay purokda, nangrugi a nag-advanced studies ni Wernera a kaduana ti agarup 3,000 a sabsabali pay nga agtutubo idiay São Paulo, Brazil. Iti damo a gundaway, napaliiwna nga aglaklako ken agus-usar iti maiparit a droga dagiti kaeskuelaanna. Tangay bassit ti pammagina, isut’ nagbalin a biktima ti makapadakes ken napeggad nga inisasion dagiti in-inauna nga estudiante.

Addada met parikut ni Eva a kabsat a babai ni Werner. Tangay kayatna nga aramiden amin a kabaelanna, inggaedna unay ti nagadal ket iti kasta nagsagaba iti pannakapaksuy ken mental a pannakaburibor. Kas kadagiti dadduma nga agtutubo, agpada a kasapulan da Werner ken Eva ti pisikal ken emosional a pannalaknib. Ania a kita ti tulong ti kasapulan dagiti annakyo? Kasanoyo ida a maisagana iti adulto a panagbiag? Wen, ania ti kayatyo a masakbayan dagiti annakyo?

Saan La a Taraon ti Kasapulanda

Panunotenyo apagbiit ti karit a sangsanguen dagiti nagannak a mangsalaknib kadagiti annakda itatta. Gapu iti bumabbaba a kalidad ti biag iti pamilia ken ikakaro ti kinapanglaw, kadagiti adu a pagilian, umad-adu dagiti ubbing nga agbibiag kadagiti lansangan. Ti panangged dagiti ubbing ket resulta ti pannakapaay a mangsalaknib kadagiti ubbing manipud pannakaabuso. Ti panangabuso iti droga dadaelenna met dagiti adu nga ubbing. Kas pagarigan, idi nagbalin nga adikto iti droga ti maysa nga agtutubo a taga Brazil, naawan ti talna iti pagtaenganda. Malaksid iti panagkonsumision dagiti nagannak kenkuana, parikut pay ti gastuen iti panagpaimbagna, ken dagiti awanan-asi nga agtagtagilako iti maiparit a droga a mapan agsingir idiay balayda.

Nupay kasta, iti baet dagiti pakarigatan iti biag, adu a nagannak ti mangikagkagumaan a mangipaay kadagiti annakda saan laeng a taraon, kawes, ken pagtaengan no di pay ket salaknib manipud kinaranggas, panangabuso iti droga, ken dadduma pay a parikut. Nasayaat daytoy a panangikagumaan, ngem umdas kadi dayta? Ti ngay pannalaknib manipud emosional ken naespirituan a pannakadangran? Maamiris ti adu a ti naballigi a panangpadakkel kadagiti annak ramanenna ti panangtaming kadagiti karit maipapan iti panangpili dagiti annak kadagiti gagayyem ken paglinglingayanda. Ngem, kasano a maliklikan dagiti nagannak ti agbalin a nalabes a mannalaknib wenno napanuynoy unay? Maawiskayo a mangusig kadagiti sungbat a masarakan iti sumaganad nga artikulo.

[Footnote]