Agnanayon a Kinaragsak​—Idiay Langit Wenno Ditoy Daga?

NANGNANGRUNA kadi nga agpannuray ti ragsakyo iti lugar a pagnanaedanyo? Patien ti adu a tattao nga ad-adda nga agpannuray ti kinaragsak kadagiti banag a kas iti nasayaat a salun-at, panggep ti biag, ken nasayaat a relasion iti sabsabali. Kastoy ti kuna ti proberbio iti Biblia: “Nasaysayaat ti pangaldaw a natnateng, nga addaan ayat, ngem ti napalukmeg a baka ket gura ti kakuyogna.”​—Proverbio 15:17.

Nupay kasta, nakalkaldaang ta nabayagen nga agraraira ti gura, kinaranggas, ken dadduma pay a kita ti kinadakes iti daga a pagnanaedantayo. Ngem komusta met idiay langit, wenno ti lugar dagiti espiritu, a namnamaen ti adu a tattao a papanan inton matayda? Kanayon kadi a lugar dayta ti nagloriaan a talna ken kinatalinaay, nga awan ti aniaman a riribuk, kas patien ti kaaduan?

Isursuro ti Biblia nga agnanaed ti Dios idiay langit agraman ti minilion nga espiritu a parsua a maawagan kas anghel. (Mateo 18:10; Apocalipsis 5:11) Nadeskribir dagitoy kas espiritu nga “annak a lallaki ti Dios.” (Job 38:4, 7) Kas iti tattao, nawaya nga agdesision dagiti anghel; saanda a robot. No kasta, adda met kadakuada no pilienda ti agaramid iti umiso wenno di umiso. Mabalin kadi a pilien dagiti anghel ti agaramid iti dakes? Mabalin a maklaat ti dadduma no maammuanda a rinibu a tawenen ti naglabas, adu nga anghel, kinapudnona, ti nagbasol iti Dios​—nagrebeldeda kenkuana!​—Judas 6.

Dagiti Rebelde Idiay Langit

Timmaud ti basol iti naespirituan a disso idi nagrebelde ti maysa nga anghel, a naawagan idi agangay a Satanas (Bumusbusor) ken Diablo (Manangpardaya). Sipapakinakem a nagsukir daytoy dati a natulnog nga anghel. Idi agangay, sinugsoganna ti dadduma nga espiritu a parsua, isu nga idi panawen ni Noe sakbay ti Layus, adu nga anghel ti nakikadua ken Satanas a nagrebelde iti Dios.​—Genesis 6:2, footnote iti New World Translation of the Holy Scriptures With References; 2 Pedro 2:4.

Saan nga insigida a napagtalaw idiay langit dagitoy nagbasol nga anghel. Imbes ketdi, napalubosanda idiay langit iti rinibu a tawen nupay agparang nga adda limitasionna.a Nupay kasta, idi nagpatinggan ti pammalubos ti Dios kadagitoy a managdakdakes, “naitapuak[da]” manipud langit, sa madadaeldanto inton kamaudiananna. Iti kasta, kinuna ti maysa a timek sadi langit: “Gapu itoy agragsakkayo, dakayo a langlangit ken dakayo nga agnaed kadakuada!” (Apocalipsis 12:7-12) Nalawag a kasta unay ti ragsak dagiti matalek nga anghel agsipud ta naikkat met laengen idiay langit dagitoy nagdakes a manangriribuk!

Maibatay kadagitoy di unay pagaammo nga impormasion, agparang nga awan ti pudno a talna no salungasingen dagiti nasaririt a parsua dagiti linteg ken prinsipio ti Dios. (Isaias 57:20, 21; Jeremias 14:19, 20) Iti sabali a bangir, agraraira ti talna ken kinatalinaay no tungpalen dagiti amin a tao ti linteg ti Dios. (Salmo 119:165; Isaias 48:17, 18) No kasta, saan kadi a pudno a makaay-ayo ken makaparagsak a pagnaedan ti daga no amin a tattao ayaten ken pagtulnoganda ti Dios ken agiinnayatda? Umanamong ti Biblia!

Ngem komusta met dagidiay sitatangsit nga agkedked a mangbalbaliw kadagiti dakes nga aramidda? Agnanayonto kadi a riribukenda dagidiay pudpudno nga agtarigagay a mangtungpal iti pagayatan ti Dios? Saan, nagtignay ti Dios maibusor kadagiti dakes nga anghel idiay langit, ket agtignayto met maibusor kadagiti nadangkes a tao ditoy daga.

Ti Nadalusan a Daga

“Ti langit isu ti tronok, ket ti daga isu ti pagbatayan dagiti saksakak,” kinuna ti Dios. (Isaias 66:1) Kas personipikasion a mismo ti kinasanto, saan nga ipalubos ti Dios nga agnanayon a mulitan ti kinadakes ti ‘pagbatayan ti saksakana.’ (Isaias 6:1-3; Apocalipsis 4:8) No kasano nga inikkatna dagiti dakes nga espiritu idiay langit, ikkatennanto met dagiti nadangkes a tattao ditoy daga, kas ipakita dagiti sumaganad a teksto ti Biblia:

“Dagiti agaramid iti dakes magessatdanto; ngem dagidiay nga agpannuray ken Jehova, tawidendanto ti daga.”​—Salmo 37:9.

“Ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes magudasdanto ditoy daga, ket dagiti nagulib maparutdanto kenkuana.”​—Proverbio 2:21, 22.

“Nalinteg iti biang ti Dios a supapakan iti rigat dagidiay mamarigat kadakayo, ngem, kadakayo nga agsagaba iti rigat, gin-awa a mairaman kadakami inton pannakaipanayag ni Apo Jesus manipud langit a kadua dagiti mannakabalin nga anghelna iti dumardarang nga apuy, bayat nga iyegna ti pammales kadagidiay di makaammo iti Dios ken kadagidiay di agtulnog iti naimbag a damag maipapan ken Apotayo a Jesus. Dagitoy a mismo agpasardanto iti pannakaukom a dusa nga agnanayon a pannakadadael manipud iti sanguanan ti Apo ken manipud iti dayag ti pigsana.”​—2 Tesalonica 1:6-9.

“Ti lubong [ti nadangkes a sangatauan] aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.”​—1 Juan 2:17.

Agtalinaedto Aya a Natalna ti Daga?

Nupay nalawag nga ipakita ti Kasuratan nga adda pagpatinggaan ti pammalubos ti Dios iti kinadakes, kasanotay a masigurado a dinto agraira manen ti kinadakes kalpasan a mapukaw dayta? Ngamin, di nagbayag kalpasan ti Layus idi kaaldawan ni Noe, nagraira manen ti kinadakes, isut’ gapuna a masapul a tungdayen ti Dios dagiti dakes a gakat ti sangatauan babaen ti panangriribukna iti pagsasaoda.​—Genesis 11:1-8.

Makapagtalektayo a saanto a rumsua manen ti kinadakes gapu ta saan a kas iti napasamak kalpasan ti Layus, saanton a tao ti mangituray iti daga. Imbes ketdi, iturayanto dayta ti Pagarian ti Dios. Manipud langit, daytoy laeng a Pagarian ti agturayto ditoy daga. (Daniel 2:44; 7:13, 14) Agtignayto a dagus maibusor kadagidiay agpanggep a mangisayangkat manen iti kinadakes. (Isaias 65:20) Kinapudnona, dadaelennanto ti ramut ti kinadakes​—ni Satanas a Diablo​—agraman dagiti demonio, dagiti dakes nga anghel a kimmanunong kenkuana.​—Roma 16:20.

Kanayonanna, saanto a parikut ti sangatauan ti taraon, kawes, pagtaengan, ken panggedan​—bambanag a no awan ita, iduronna ti dadduma nga agbalin a kriminal. Wen, agbalinto a nabunga a paraiso ti intero a daga ket aglaplapusananto ti bambanag para iti isuamin.​—Isaias 65:21-23; Lucas 23:43.

Napatpateg pay, sursuruanto ti Pagarian dagiti iturayanna no kasano ti agbiag a natalna ken isublinanto ti sangatauan iti naan-anay a kinaperpekto. (Juan 17:3; Roma 8:21) Kalpasanna, awanton dagiti pagkapuyan wenno pagannayasan nga agbasol a masapul a parmeken ti sangatauan, a mamagbalin a posible ken makaparagsak ti naan-anay a panagtulnog iti Dios, kas idi perpekto pay la a tao ni Jesus. (Isaias 11:3) Kinapudnona, nagtalinaed ni Jesus a nasungdo iti Dios iti laksid ti nakaro a suot ken rigat​—bambanag nga awanto idiay Paraiso.​—Hebreo 7:26.

No Apay nga Adda Dagiti Mapan Idiay Langit

Nupay kasta, adu nga agbasbasa iti Biblia ti makaammo iti kinuna ni Jesus: “Idiay balay ni Amak adu dagiti pagyanan. . . . Mapanak tapno isaganak ti maysa a lugar a maipaay kadakayo.” (Juan 14:2, 3) Saan ngata a maikontra daytoy iti sursuro a biag nga agnanayon iti paraiso a daga?

Saan nga agsupadi dagitoy a sursuro. Kinapudnona, agtunosda. Umuna, kuna ti Biblia a nakedngan ti bilang dagiti matalek a Kristiano a mapagungar iti naespirituan a biag idiay langit​—144,000. Apay a naited kadakuada daytoy naisangsangayan a gunggona? Agsipud ta isuda ti mangbukel iti grupo a nakita ni Juan iti sirmata, a ‘nagbiag ket nakipagturay ken Kristo kas ar-ari iti sangaribu a tawen.’ (Apocalipsis 14:1, 3; 20:4-6) Pudno a “bassit nga ipastoran” ti 144,000 no idilig iti binilion a tattao ditoy daga. (Lucas 12:32) Maysa pay, gapu ta napasaranda dagiti parikut a gagangay iti sangatauan, kas ken Jesus kabaelandanto ti “makipagrikna kadagiti kinakapuytayo” bayat nga imatonanda ti panangpabaro iti sangatauan ken iti daga.​—Hebreo 4:15.

Ti Daga​—Agnanayon a Pagtaengan ti Sangatauan

Babaen ti panangipaayna iti daton a pangsubbot ni Jesu-Kristo, rinugian ti Dios nga inurnong ti 144,000 agarup 2,000 a tawenen ti napalabas, ket adda dagiti mangipamatmat a nakompleton daytoy a grupo. (Aramid 2:1-4; Galacia 4:4-7) Nupay kasta, saan laeng nga agpaay ti daton ni Jesus kadagiti basol ti 144,000, “no di ket maipaay met iti intero a lubong.” (1 Juan 2:2) Iti kasta, amin a mangipakita iti pammati ken Jesus adda namnamada nga agbiag nga agnanayon. (Juan 3:16) Dagiti naginana iti tanem nga adda iti lagip ti Dios mapagungardanto, saan nga idiay langit, no di ket biag iti nadalusan a daga. (Eclesiastes 9:5; Juan 11:11-13, 25; Aramid 24:15) Ania ti agur-uray kadakuada sadiay?

Kastoy ti sungbat ti Apocalipsis 21:1-4: “Adtoy! Ti tolda ti Dios adda iti sangatauan . . . Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.” Panunotenyo​—naluk-atanton dagiti tattao iti ipapatay, ket awanton iti agnanayon ti ut-ot ken ladingit nga itden daytoy! Kamaudiananna, sidadayag a matungpalton ti orihinal a panggep ni Jehova agpaay iti daga ken iti sangatauan.​—Genesis 1:27, 28.

Agpilitayo​—Biag Wenno Patay

Pulos a di naipanamnama kada Adan ken Eva a mapanda idiay langit. Dua la ti pagpilianda: agtulnogda iti Dios ket agbiagda nga agnanayon iti paraiso a daga wenno agsukirda ket matayda. Nakalkaldaang ta pinilida ti nagsukir isu a nagsublida iti “tapok” ti daga. (Genesis 2:16, 17; 3:2-5, 19) Di pulos pinanggep ti Dios a matay ti tattao sada agnaed idiay langit. Linaklaksa dagiti anghel a pinarsua ti Dios nga agnaed idiay langit; dagitoy nga espiritu a parsua ket saan a tattao a natay sa napagungar iti nailangitan a biag.​—Salmo 104:1, 4; Daniel 7:10.

Ania ti rumbeng nga aramidentayo tapno masagraptayo ti bendision a biag nga agnanayon iti Paraiso a daga? Ti umuna nga addang isu ti panagadal iti Sao ti Dios, ti Nasantuan a Biblia. Iti kararag ni Jesus, kinunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Masapul met nga iyaplikartayo dayta a pannakaammo tapno masagraptayo ti agnanayon a ragsak idiay Paraiso. (Santiago 1:22-24) Manamnama dagidiay agbibiag mayannurot iti Sao ti Dios a makitadanto a mismo ti kaitungpalan dagiti makapagagar a padto a kas ti nailanad iti Isaias 11:9, a kunana: “[Dagiti tao] didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova, a kas la kadagiti dandanum saknapanda ti baybay.”

[Footnote]

[Dagiti Ladawan iti panid 7]

“Ti sililinteg tawidennanto ti daga, ket agtaengto kenkuana nga agnanayon.”​—Salmo 37:29