Agtakder a Naan-anay nga Addaan Natibker a Panamati

“Maysa nga Obra Maestra a Proyekto”

MANIPUD pay iti rugrugi ti moderno-aldaw a pakasaritaanda, napalalo ti panaginteres dagiti Saksi ni Jehova iti maysa kadagiti padto ni Jesu-Kristo: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14) Idi umad-adani ti 1914​—ti pangrugian “ti maudi nga al-aldaw”​—buyogen ti natibker a panamati, nangisayangkat dagiti napasnek nga Estudiante ti Biblia iti awan pay kaaspingna a sangalubongan a panangisuro a naibatay iti Nasantuan a Kasuratan.​—2 Timoteo 3:1.

Tapno maipakaammoda ti naimbag a damag iti intero a lubong, inaramat dagitoy nga adipen ni Jehova ti maysa a baro, natured, ken makaawis a metodo. Tapno ad-adu pay ti maammuan maipapan iti daytoy, subliantayo ti napalabas.

Baro a Pamay-an ti Panangipakaammo iti Naimbag a Damag

Enero 1914 idi. Iladawanyo a maysakayo kadagiti 5,000 a situtugaw iti maysa a nasipnget nga auditorium idiay New York City. Adda iti sanguananyo ti maysa a dakkel a pagbuyaan a tabing. Nagparang iti eksena ti maysa a puraw ti buokna a lalaki a nakaamerikana. Nakabuyakayon kadagiti awan unina a pelikula, ngem iti daytoy a gundaway, mangngegyo ti timek ti lalaki. Addakayo iti damo a pannakaipabuya ti maysa a moderno a pelikula, ken naidumduma ti mensahena. Ni Charles Taze Russell, ti kaunaan a presidente ti Watch Tower Society ti agsasao, ket ti pabuya a pelikula isu ti “Photo-Drama of Creation.”

Nakita ni C. T. Russell ti potensial dagiti pelikula a mangdanon kadagiti tattao. Idi ngarud 1912, inrugina nga insagana ti “Photo-Drama of Creation.” Idi agangay, nagbalin a walo nga oras a pabuya nga slide ken pelikula, a de kolor ken addaan iti timek.

Ti “Photo-Drama,” a buklen ti uppat a paset, ipabuyana ti panamarsua ken ti pakasaritaan ti tao agingga iti pannakatungpal ti panggep ti Dios agpaay iti daga ken sangatauan inton agngudo ti Sangaribu a Tawen a Panagturay ni Kristo. Mabayag pay santo agballigi ti komersial a panangtulad iti umasping a teknolohia. Kaskasdi, minilion ti libre a nakabuya iti “Photo-Drama of Creation”!

Naisagana dagiti napili a nairekord a musika agraman ti 96 a naiplaka a palawag para iti “Photo-Drama.” Naaramid dagiti stereopticon nga slide kadagiti fine art a ladawan a mangyilustrar iti historia ti lubong. Nasken met a maaramid ti ginasut a baro a lamina ken drowing. Sumagmamano kadagiti de kolor nga slide ken film ti siaanus nga impinta ti pintor. Ken naulit-ulit a naaramid daytoy, ta idi agangay, 20 a kopia a sagpapat ti pasetda ti naisagana. Daytoy ti makagapu a maipabuya ti maysa a paset ti “Photo-Drama” iti 80 a nadumaduma a siudad iti aniaman nga aldaw!

Iti Likudan Dagiti Eksena

Ania ti naaramid iti likudan dagiti eksena bayat a maipabpabuya ti “Photo-Drama”? “Mangrugi ti Drama iti pannakaipabuya ni Kabsat Russell,” kinuna ti Estudiante ti Biblia a ni Alice Hoffman. “Apaman nga agparangen iti eksena ken agsao, mapatokar ti ponograpo . . . ket tagiragsakenmi a denggen ti timekna.”

Maipapan iti time-lapse photography, kastoy ti nalagip ni Zola Hoffman: “Nagtugawak a nakamulagat gapu iti siddaawko idi buybuyaenmi ti pannakailadawan dagiti aldaw ti panamarsua. Naimatanganmi dagiti sabong ti lirio nga in-inut nga aguk-ukrad.”

Kuna pay ti naayat iti musika a kameng ti Bagi a Manarawidwid dagiti Saksi ni Jehova a ni Karl F. Klein: “Maigiddan a matokar ti nagimnas a musika bayat a maipabpabuya dagitoy a ladawan, kas kadagiti paborito a Narcissus ken Humoreske.”

Addada sabali pay a malaglagip a pasamak. “Maaramid no dadduma dagiti makapakatawa a panagkamali,” kinuna ni Clayton J. Woodworth, Jr. “Idi naminsan a maipatpatokar ti ‘Flee as a Bird to Your Mountain,’ nagparang iti eksena ti ladawan ti maysa a higante a gigantosaurus, ti nakadakdakkel nga animal kasakbayan ti Layus”!

Malaksid iti regular a “Photo-Drama of Creation,” di nagbayag naadda dagiti paset ti “Eureka Drama.” (Kitaenyo ti kahon.) Maysa ti naglaon kadagiti naiplaka a bitla, agraman musika. Naglaon ti sabali agpadpada kadagiti plaka ken slide. Nupay awanan ti “Eureka Drama” kadagiti motion picture, sibaballigi a naiparang dayta kadagiti lugar a narasay ti populasionna.

Nabileg nga Alikamen iti Panangasaba

Idi arinunos ti 1914, naipabuyan ti “Photo-Drama” iti nasurok a 9,000,000 a tattao idiay North America, Europa, ken Australia. Nupay manmano dagiti Estudiante ti Biblia, addaanda iti natibker a panamati a kasapulan tapno maiwaragawag ti naimbag a damag babaen iti daytoy baro a pamay-an. Naragsakda a nagkontribusion tapno adda pondo a pagabang kadagiti nasayaat a lugar a pagpabuyaanda. Gapuna, dakkel ti naitulong ti “Photo-Drama of Creation” a nangipakaammo kadagiti nagbuya iti Sao ti Dios ken dagiti panggepna.

Adda maysa a nagsurat ken C. T. Russell: “Ti damo nga idadar-ayko iti Dramayo ti nangbalbaliw iti biagko; wenno, kayatko a sawen, nangbalbaliw iti pannakaammok iti Biblia.” Kinuna pay ti sabali: “Gistay nadadael idin ti pammatik ket mariknak a naispalak gapu iti ‘Photo-Drama of Creation’ a naipabuya ditoy idi kallabes a kalgaw. . . . Nasagrapkon ti talna a di maipaay ti lubong ket diak isukat dayta iti amin a kinabaknangna.”

Kinuna ni Demetrius Papageorge, nabayagen a trabahador iti hedkuarter ti Sosiedad: “No panunotentayo ti adda a kabassit dagiti Estudiante ti Biblia ken ti kalkalainganna a pondoda, ti ‘Photo-Drama’ ket maysa nga obra maestra a proyekto. Adda a talaga ti espiritu ni Jehova iti dayta!”

[Kahon/Dagiti Ladawan iti panid 8, 9]

Ti “Eureka Drama”

Walo a bulan kalpasan ti damo a pannakaipabuya ti “Photo-Drama,” nakita ti Sosiedad a masapul a maaramid ti sabali a bersionna a naawagan iti “Eureka Drama.” Bayat a maipabpabuya ti kompleto a “Photo-Drama” iti dadakkel a siudad, naipabuya kadagiti paset ti “Eureka” ti isu met la a kangrunaan a mensahe kadagiti purok ken aw-away. Nadeskribir a ti maysa a bersion ti “Eureka Drama” ti nangted “iti naisalsalumina a gundaway dagiti kakabsat a babbai” a mangasaba. Kasano a kasta? Gapu ta ti kahonna a pagikargaan kadagiti plaka ket agdagsen laeng iti 14 kilo. Siempre, masapul met a maitugot ti ponograpo iti panagpabuya.