Dagiti Saksi ni Jehova​—Rumangrang-ay Buyogen ti Natibker a Pammati!

Report ti Tinawen a Miting

ITI daytoy panawen ti panagpangadua, agminar dagiti Saksi ni Jehova kas dagiti Kristiano nga addaan iti natibker a pammati. Nabatad daytoy iti tinawen a miting ti Watch Tower Bible and Tract Society of Pennsylvania, a naangay idiay Jersey City, New Jersey, Assembly Hall of Jehovah’s Witnesses idi Sabado, Oktubre 7, 2000.a

Iti panglukat a sasaona kas tserman, kinuna ni John E. Barr, kameng ti Bagi a Manarawidwid dagiti Saksi ni Jehova: “Kadagiti binilion a tattao ditoy daga, ammo ken patientayo a ti dungdunguen nga Anak ni Jehova, ni Kristo Jesus, ket naitronon idiay langit, ket agturturayen iti tengnga dagiti kabusorna.” Ti kasta a natibker a pammati ket naiparangarang kadagiti innem a makapagagar a damag manipud iti nadumaduma a pagilian.

Ti Kinapudno ti Biblia Pinarmekna ti Espiritismo Idiay Haiti

Nasaknap unay ti espiritismo idiay Haiti. Insalaysay ti coordinator ti Branch Committee a ni John Norman: “Kadawyan a makiramraman dagiti tattao iti voodoo tapno masalaknibanda.” Nagduadua ti maysa nga erbolario idi napukawna ti maysa a sakana gapu iti aksidente. Pinampanunotna, ‘Kasano koma a napasamak kaniak daytoy no salsalaknibandak dagiti espiritu?’ Kas iti adu a tattao, naisuro kenkuana ti kinapudno babaen dagiti Saksi ni Jehova ket natulongan a lumapsut iti espiritismo. Manamnama ti panagrang-ay ti Haiti gapu ta idi Abril 19, 2000, uppat a daras a nangatngato ti bilang dagiti timmabuno iti Pananglaglagip iti ipapatay ni Kristo ngem iti bilang dagiti agibumbunannag iti Pagarian iti dayta a pagilian.

Kinaregta iti Nalawa a Teritoria ti Korea

Idiay Korea, 40 porsiento kadagiti Saksi ni Jehova ti agserserbi iti amin a tiempo. Kinuna ti coordinator ti Branch Committee a ni Milton Hamilton: “Gapu iti kaadu dagitoy nga agibumbunannag, maminsan kada bulan a mawanas ti teritoriami nga addaan iti nasurok nga 47 milion a katao.” Nakaskasdaaw met ti panagrang-ay dagiti sign-language a kongregasion. Iti maysa a sign-language a sirkito, 800 a panagadal iti Biblia ti maikonkondukta. Agarup maysa a panagadal iti kada agibumbunannag. Makapaladingit ta maibalbalud pay laeng dagiti agtutubo a kakabsat a lallaki maigapu iti neutral a takderda. Nupay kasta, nasayaat ti panangtrato dagiti autoridad iti pagbaludan kadagitoy a matalek a Kristiano, ken masansan a maited kadagitoy dagiti trabaho nga agkalikagum iti kinamapagpiaran.

Panangtulong iti Panagrang-ay Idiay Mexico

Idiay Mexico, nagreport ti kangatuan a bilang a 533,665 nga agibumbunannag iti Pagarian idi Agosto 2000. Nasurok a mamitlo dayta a bilang ti timmabuno iti Memorial. “Kalatmi ita a tawen ti agibangon iti 240 a Kingdom Hall,” kinuna ni Robert Tracy, coordinator ti Branch Committee. “Kaskasdi,” innayonna, “kasapulanmi ti ad-adu pay.”

Mapagulidanan dagiti agtutubo a Saksi ni Jehova idiay Mexico. Maipapan iti maysa kadagitoy nga agtutubo, kinuna ti maysa a Katoliko a padi: “Kayatko ti maaddaan iti uray maysa laeng a kas kenkuana kadagiti pasurotko. Raemek dagitoy a tattao gapu iti nabileg a determinasionda ken nainsiriban a panagusarda iti Biblia. Dinepensaanda ti Dios, uray pagpeggadan ti biagda.”

Kinatarnaw Bayat ti Riribuk Idiay Sierra Leone

Sipud Abril 1991, rinibu dagiti napapatay, nadangran, wenno nabaldado gapu iti gerra sibil idiay Sierra Leone. “Nakaro ti pannakaapektar dagiti tattao gapu iti gubat ken rigat,” impadamag ni Bill Cowan, coordinator ti Branch Committee. “Aginteres itan ti adu a dati a mangyaleng-aleng iti mensahetayo. Gagangayen nga umay dagiti tattao iti Kingdom Hall iti umuna a gundaway, uray saanda a naawis. Kadagiti kalsada, masansan nga adda makisarita kadagiti kakabsat tapno agpayadal iti Biblia.” Nupay agtultuloy ti riribuk iti daytoy a pagilian, rumangrang-ay ti trabaho a panangikabasa iti Pagarian idiay Sierra Leone.

Dadakkel a Programa ti Panagibangon Idiay South Africa

Iti agdama, rinibu a Kingdom Hall ti kasapulan iti teritoria a sakup ti sanga nga opisina idiay South Africa. Ginasut ti nabangonen a patakder. “Imbes a kas iti dati nga agtataripnong iti abong-abong wenno iti sirok ti kayo, makapagtitipon met laengen dagiti kakabsattayo iti nasaysayaat a lugar nga addaan iti komportable a pagtugawan,” kinuna ni John Kikot, miembro ti Branch Committee. “Nupay nadisenio a simple ti kaaduan kadagitoy a Kingdom Hall, masansan nga agminar ti pintas dagitoy a patakder iti lugarda. Iti dadduma a lugar, napaliiw a kalpasan ti pannakabangon ti maysa a Kingdom Hall, nasursurok a doble ti kongregasion bayat ti sumaganad a tawen.”

Baro a Kaputotan Dagiti Saksi Idiay Ukraine

Kabayatan ti 2000 a tawen serbisio, naaddaan daytoy a pagilian iti 112,720 a kangatuan a dagup dagiti agibumbunannag. Nasurok a 50,000 kadagitoy ti nakaadal iti kinapudno ti Biblia kadagiti naglabas a lima a tawen. Kinuna ni John Didur, coordinator ti Branch Committee: “Pudno a nangbuangay ni Jehova iti baro, agtutubo a kaputotan dagiti Saksi a mangideklara iti naganna!” Innayonna: “Iti naglabas a dua a tawen, nakaipaimakami iti nasurok a 50 milion a magasin, katupagna ti populasion dayta a pagilian. Kada bulan, makaaw-awatkami iti promedio a sangaribu a surat manipud kadagiti interesado a tattao nga agkidkiddaw iti ad-adu pay nga impormasion.”

Dadduma Pay a Makagutugot a Paset ti Programa

Makagutugot ti palawag ni Daniel Sydlik, miembro ti Bagi a Manarawidwid. Ti artikulo a “Kasano a ti Bagi a Manarawidwid Naiduma iti Legal a Korporasion,” a nagparang iti daytoy a magasin, ket naibasar iti dayta makaisuro a palawag.

Nangipaay ni Theodore Jaracz, kameng ti Bagi a Manarawidwid, iti mamagpanunot a palawag a napauluan iti “Teokratiko ti Pannakadutok Dagiti Manangaywan ken Ministerial nga Adipen.” Naibasar iti dayta a suheto ti maysa kadagiti artikulo a nagparang iti daytoy a magasin.

Nairaman met iti tinawen a miting ti maysa a makagutugot a palawag babaen ken ni David Splane, kameng ti Bagi a Manarawidwid, maipapan iti teksto para iti tawen 2001. Naibasar iti sasao ni apostol Pablo, ti teksto ket: ‘Agtakderkayo a naan-anay ken addaan natibker a panamati iti amin a pagayatan ti Dios.’ (Colosas 4:12) Dagiti Saksi ni Jehova iti intero a lubong determinadoda a mangaramid iti dayta bayat a simamatalek nga ikasabada ti naimbag a damag ti Pagarian ti Dios iti intero a daga.​—Mateo 24:14.

[Footnote]