Makidanggaykayo iti Organisasion ni Jehova
“Ti Dios ti talna . . . kabalannakayo koma iti tunggal naimbag a banag tapno aramidenyo ti pagayatanna.”—HEBREO 13:20, 21.
1. Mano ti populasion ti lubong, ket mano ti maibilang a kameng ti nadumaduma a relihion?
ITI tawen 1999, dimmanon ti populasion ti lubong iti innem a bilion! Iti daytoy a bilang, kuna kadatayo ti The World Almanac a 1,165,000,000 ti Muslim; 1,030,000,000 ti Romano Katoliko; 762,000,000 ti Hindu; 354,000,000 ti Budista; 316,000,000 ti Protestante; ken 214,000,000 ti Orthodox.
2. Ania ti maikuna maipapan iti kasasaad dagiti relihion iti kaaldawantayo?
2 Gapu iti panaglalasinlasin ken riribuk a mapaspasamak ita maipuon iti relihion, maitunos ngata iti pagayatan ti Dios ti ar-aramiden dagitoy a minilion a tattao? Saan, “ta ti Dios ket maysa a Dios, saan a ti riribuk, no di ket ti talna.” (1 Corinto 14:33) Iti sabali a bangir, komusta met ngay ti sangalubongan a panagkakabsat dagiti adipen ni Jehova? (1 Pedro 2:17) Ti naannad a panangusig paneknekanna a ‘ti Dios ti talna kabkabalanna ida iti tunggal naimbag a banag tapno aramidenda ti pagayatanna.’—Hebreo 13:20, 21.
3. Ania ti napasamak idiay Jerusalem idi Pentecostes 33 K.P., ken apay?
3 Siempre, saan a ti kaadu dagiti naitimpuyog kadagiti Saksi ni Jehova ti pangibasaran no adda kadakuada ti pabor ti Dios; saan met a dagiti estadistika ti pakaay-aywan ni Jehova. Pinilina dagiti Israelita saan a gapu ta isuda ti “kaaduan” kadagiti nasion. Kinapudnona, isuda ti “kababassitan.” (Deuteronomio 7:7, NW) Ngem gapu ta saan a nagmatalek ti Israel, idi Pentecostes 33 K.P., inyalis ni Jehova ti paborna iti kaipaspasdek a kongregasion a buklen dagiti pasurot ni Jesu-Kristo. Napulotanda iti nasantuan nga espiritu ni Jehova ket sireregta nga impakaammoda kadagiti sabsabali ti kinapudno maipapan iti Dios ken ni Kristo.—Aramid 2:41, 42.
Agtultuloy a Rumangrang-ay
4. Apay a maikunayo a nagtultuloy a rimmang-ay ti nagkauna a kongregasion Kristiano?
4 Idi umuna a siglo, nagtultuloy a rimmang-ay ti kongregasion Kristiano. Naluktan dagiti baro a teritoria, adda dagiti napagbalin nga adalan, ken immuneg ti pannakaawatda iti pangpanggep ti Dios. Nakidanggay dagiti nagkauna a Kristiano iti naespirituan a lawag a naipalgak babaen dagiti impaltiing ti Dios a sursurat. Gapu ta napabilegda kadagiti isasarungkar dagiti apostol ken dadduma pay, naitungpalda ti ministerioda. Nailanad amin dagitoy iti Kristiano a Griego a Kasuratan.—Aramid 10:21, 22; 13:46, 47; 2 Timoteo 1:13; 4:5; Hebreo 6:1-3; 2 Pedro 3:17, 18.
5. Apay a rumangrang-ay ita ti organisasion ti Dios, ket apay a rumbeng a makidanggaytayo iti dayta?
5 Kas kadagiti nagkauna a Kristiano, immadun ti dati a bassit a bilang dagiti Saksi ni Jehova iti moderno a panawen. (Zacarias 4:8-10) Manipud iti arinunos ti maika-19 a siglo, nalawag ti ebidensia nga adda ti espiritu ti Dios iti organisasionna. Gapu ta nagpannuraytayo, saan nga iti bileg ti tao, no di ket iti panangiwanwan ti nasantuan nga espiritu, nagtultuloy a rimmang-ay ti pannakaawattayo iti Kasuratan ken ti panangitungpaltayo iti pagayatan ti Dios. (Zacarias 4:6) Ita ta addatayon iti “maudi nga al-aldaw,” nasken a makidanggaytayo iti progresibo nga organisasion ni Jehova. (2 Timoteo 3:1-5) No aramidentay dayta, agtalinaed a nabiag ti namnamatayo ken maikasabatayo ti naipasdeken a Pagarian ti Dios sakbay a manungpal ti agdama a sistema dagiti bambanag.—Mateo 24:3-14.
6, 7. Ania dagiti tallo a benneg a rimmang-ayan ti organisasion ni Jehova nga intay usigen?
6 Kaduatayo dagiti nakitimpuyog iti organisasion ni Jehova sipud pay idi dekada 1920, 1930, ken 1940. Kadagidi a tawtawen, asino kadatayo ti mangipagarup a dumakkel iti kasta unay ken rumang-ay ti organisasion agingga kadagitoy a tiempo? Panunotenyo dagiti napateg a pasamak iti moderno-aldaw a pakasaritaantayo! Pudno a makagunggona iti naespirituan no utobentayo dagiti nagapuanan ni Jehova babaen ti teokratiko nga organisasionna.
7 Natukay unay ti rikna ni David idi inutobna dagiti nakaskasdaaw nga aramid ni Jehova. Kinunana: “No palawagek ket sawek koma ida, ad-aduda ngem ti mabalin a bilangen.” (Salmo 40:5) Maikunatayo met ti kinuna ni David, a ditay kabaelan a saritaen dagiti adu a nakaskasdaaw ken agkakaimbag nga aramid ni Jehova iti kaaldawantayo. Nupay kasta, usigentayo ti tallo a benneg a rimmang-ayan ti organisasion ni Jehova: (1) ti lumawlawag a pannakaawat, (2) ti napasayaat ken limmawa a ministerio, ken (3) dagiti naintiempuan a panagbalbaliw kadagiti urnos ti organisasion.
Agyamantayo Gapu iti Lumawlawag a Pannakaawat
8. Maitunos iti Proverbio 4:18, ania ti naawatantayo maipapan iti Pagarian gapu iti limmawag a pannakaawattayo?
8 No maipapan iti lumawlawag a pannakaawat, napaneknekan a pudno ti kuna ti Proverbio 4:18: “Ti dana ti nalinteg kas iti anaraar ti agsapa, a rumaniag a rumaniag agingga iti napaypayso nga aldaw.” Anian a yamantayo gapu iti lumawlawag a pannakaawattayo! Iti kombension a naangay idi 1919, idiay Cedar Point, Ohio, naitampok ti Pagarian ti Dios. Daytoy a Pagarian ti aramaten ni Jehova a mangsantipikar iti naganna ken mangalangon iti kinasoberanona. Kinapudnona, gapu ta nalawlawagantayo iti naespirituan, naawatantayo manipud iti Genesis agingga iti Apocalipsis a ti Biblia pasingkedanna ti panggep ni Jehova a mangsantipikar iti naganna babaen ti Pagarian nga iturayan ti Anakna. Naisaad dita ti nadayag a namnama dagiti amin a mangipatpateg iti kinalinteg.—Mateo 12:18, 21.
9, 10. Idi dekada 1920, ania ti naammuan maipapan iti Pagarian ken iti dua nga agbimbinnusor nga organisasion, ket kasano a nakatulong daytoy?
9 Iti kombension a naangay idiay Cedar Point idi 1922, ti kangrunaan a nagpalawag, a ni J. F. Rutherford, indagadagna kadagiti adipen ti Dios nga ‘ipablaak, ipablaak, ipablaakda, ti Ari ken ti pagarianna.’ Iti artikulo a “Pannakaipasngay ti Nasion,” a naipablaak iti Marso 1, 1925, a ruar ti The Watch Tower, naiturong ti atension iti naespirituan a lawag maipapan kadagiti padto a nangipatuldo iti pannakaipasdek ti Pagarian ti Dios idi 1914. Nailawlawag met idi dekada 1920 nga adda dua nga agbimbinnusor nga organisasion—ti organisasion ni Jehova ken ti organisasion ni Satanas. Agtultuloy ti panagdangadang dagitoy nga organisasion, ket agballigitayo no la ket ta makidanggaytayo iti organisasion ni Jehova.
10 Kasano a nakatulong kadatayo ti kasta a limmawag a pannakaawat? Yantangay ti Pagarian ti Dios ken ti Ari a ni Jesu-Kristo ket saan a paset ti lubong, saantay met koma nga agbalin a paset daytoy. Babaen ti agtultuloy nga iyaadayo iti lubong, ipakpakitatayo nga addatayo iti dasig ti kinapudno. (Juan 17:16; 18:37) No mapaliiwtayo dagiti narikut a problema a mangparparigat iti daytoy dakes a sistema, anian a yamantayo ta saantayo a paset ti organisasion ni Satanas! Ken pudno a naparaburantayo ta natalgedtayo iti naespirituan iti uneg ti organisasion ni Jehova!
11. Ania a Nainkasuratan a nagan ti inawat ti ili ti Dios idi 1931?
11 Iti kombension a naangay idiay Columbus, Ohio, idi 1931, nailawlawag ti umiso nga aplikasion ti Isaias 43:10-12. Inawat dagiti Estudiante ti Biblia ti nagan a pakabigbiganda—Saksi ni Jehova. Anian a naindaklan a pribilehio ti panangipakaammo iti nagan ti Dios tapno dagiti dadduma umawagda met iti naganna ket iti kasta maisalakanda!—Salmo 83:18; Roma 10:13.
12. Ania ti nailawlawag idi 1935 maipapan iti dakkel a bunggoy?
12 Sakbay ti dekada 1930, saan a masierto ti adu kadagiti adipen ti Dios no ania ti namnamada iti masakbayan. Adda dagidiay mangpampanunot iti biag idiay langit ngem maay-ayatanda iti isursuro ti Biblia maipapan iti paraiso a daga. Iti kombension a naangay idiay Washington, D.C., idi 1935, makapagagar a maammuan a ti dakkel nga umariwekwek, wenno dakkel a bunggoy, a nadakamat iti Apocalipsis kapitulo 7 ket buklen ti maysa a grupo a mangnamnama iti biag ditoy daga. Manipud idin, maur-urnong ti dakkel a bunggoy a buyogen ti kinaganat. Saantay kadi nga agyaman ta saan a misterio kadatayo no siasino ti dakkel a bunggoy? Gapu ta maur-urnongen ti adu a tattao a naggapu iti amin a nasion, tribu, ken pagsasao matignaytayo nga umagawa iti trabahotayo bayat a makidangdanggaytayo iti organisasion ni Jehova.
13. Ania a nagpateg nga isyu ti naitampok iti kombension a naangay idiay St. Louis idi 1941?
13 Iti kombension a naangay idi 1941, idiay St. Louis, Missouri, naitampok ti kapatgan nga isyu a rumbeng a pakaseknan dagiti tattao. Ti isyu ket maipapan iti sapasap a kinaturay, wenno kinasoberano. Dayta ti isyu a nasken a marisut iti saanen a mabayag, ket nakaparpartak ti iyaay ti dakkel ken nakabutbuteng nga aldaw a pannakaibanagna! Napagminar met idi 1941 ti nainaig nga isyu maipapan iti kinatarnaw, a mangted gundaway iti tunggal maysa kadatayo a mangipakita no ayantayo a dasig mainaig iti kinasoberano ti Dios.
14. Iti internasional a kombension idi 1950, ania ti nailawlawag maipapan kadagiti prinsipe a nadakamat iti Isaias 32:1, 2?
14 Idi 1950, iti internasional a kombension idiay New York City, siuumiso a nailawlawag no siasino dagiti prinsipe a nadakamat iti Isaias 32:1, 2. Pudno a makapagagar idi inlawlawag ni Kabsat Frederick Franz nga adda iti nagbabaetantayo dagiti agbalinto a piprinsipe iti baro a daga. Iti dayta a kombension ken kadagiti simmarsaruno, adu dagiti simmilnag a naespirituan a lawag. (Salmo 97:11) Anian a yamantayo ta mayarig ti danatayo “iti anaraar ti agsapa, a rumaniag a rumaniag”!
Irarang-ay ti Ministeriotayo
15, 16. (a) Kasano a rimmang-ay ti ministeriotayo idi dekada 1920 ken 1930? (b) Ania dagiti publikasion a nangparang-ay iti Nakristianuan a ministerio kadagiti napalabas a dekada?
15 Ti maikadua a benneg a rimmang-ayan ti organisasion ni Jehova ket mainaig iti kangrunaan a trabahotayo—ti panangikasaba iti Pagarian ken panangaramid kadagiti adalan. (Mateo 28:19, 20; Marcos 13:10) Tapno maibanag daytoy a trabaho, agtultuloy nga ipagpaganetget ti organisasion ti kinapateg ti panangpalawa iti ministeriotayo. Idi 1922, naidagadag a makiraman dagiti amin a Kristiano iti trabaho a panangasaba. Rebbeng a pagsilnagen ti tunggal maysa ti lawagna ket iti kasta adda pasetna a mangpaneknek iti kinapudno. (Mateo 5:14-16) Idi 1927, nayurnos ti Domingo a kas aldaw a panagserbi idiay tay-ak. Nangrugi idi Pebrero 1940, gagangayen nga adda dagiti Saksi a mangituktukon iti The Watchtower ken Consolation (Agriingkayo! itan) kadagiti lansangan dagiti lugar ti negosio.
16 Idi 1937, nairuar ti bokleta a Model Study, a nangipaganetget iti kinapateg ti panagsarungkar tapno masursuruan dagiti dadduma maipapan iti kinapudno a masarakan iti Biblia. Kadagiti simmaganad a tawen, nayunay-unay ti panangyadal iti Biblia. Naikkan iti atension daytoy a benneg ti ministerio idi naipablaak ti libro a “Let God Be True” (“Mapapati Coma ti Dios”) idi 1946 ken The Truth That Leads to Eternal Life (Ti Kinapudno a Mangiturong iti Biag nga Awan Inggana) idi 1968. Iti agdama, us-usarentayo ti libro a Pannakaammo a Mangiturong iti Biag nga Agnanayon. Ti panangadal kadagita a material ipasdekna ti natibker a Nainkasuratan a pundasion iti panangaramid kadagiti adalan.
Pannakidanggay Kadagiti Panagbalbaliw iti Organisasion
17. Maitunos iti Isaias 60:17, kasano a rimmang-ay ti organisasion ni Jehova?
17 Ti maikatlo a benneg a rimmang-ayan ti organisasion ni Jehova ket mainaig kadagiti panagbalbaliw iti urnos ti organisasion. Sigun iti Isaias 60:17, inkari ni Jehova: “Iti lugar ti suer mangyegakto ti balitok, ket iti landok mangyegakto ti pirak, ket iti kayo ti suer, ken iti batbato ti landok. Ket aramidekto met dagiti pagturayem a talna, ken dagiti agsingsingir ti buis a nalinteg.” Maitunos iti daytoy a padto, adda dagiti naaramid a panagbalbaliw tapno mapasayaat ti pannakaimaton ti trabaho a panangikasaba iti Pagarian ken ti pannakaaywan ti arban.
18, 19. Ania dagiti panagbalbaliw a naaramid iti uneg ti organisasion iti panaglabas dagiti tawen?
18 Idi 1919, adda nadutokan a direktor ti serbisio iti kada kongregasion nga agkiddaw a maorganisar para iti panangasaba. Pinarang-ay daytoy ti ministeriotayo iti tay-ak. Naisardeng idi 1932 ti panangibutos kadagiti agbalin a panglakayen ken diakono. Daytoy ti namagpatingga kadagiti demokratiko a pamay-an a sursurotentayo idi. Adda maysa pay a napateg a panagbalbaliw idi 1938 idi a dagiti amin nga adipen iti kongregasion nangrugi a madutokanda nga ad-adda a maitunos kadagiti urnos iti teokratiko a panangdutok a kas iti maar-aramid idi iti nagkauna a kongregasion Kristiano. (Aramid 14:23; 1 Timoteo 4:14) Idi 1972, adda dagiti manangaywan ken ministerial nga adipen a nadutokan nga agserbi, no kasano nga adda met dagiti kasta a lallaki kadagiti nagkauna a Kristiano. Imbes a maysa laeng a lalaki ti agserbi a manangaywan iti kongregasion, ipakita ti Filipos 1:1 ken dadduma pay a teksto a dagidiay makaragpat kadagiti Nainkasuratan a pagannurotan para kadagiti manangaywan buklenda ti bagi dagiti panglakayen.—Aramid 20:28; Efeso 4:11, 12.
19 Idi 1975, naipatungpal ti urnos a dagiti komite ti Bagi a Manarawidwid ti mangaywan iti sangalubongan nga aktibidad ti organisasion ti Dios. Nadutokan dagiti Branch Committee a mangimaton iti trabaho kadagiti lugar nga ayanda. Manipud idin, napasimple ti trabaho iti hedkuarter ken kadagiti sanga nga opisina ti Watch Tower Society tapno ‘masigurado dagiti napatpateg a bambanag.’ (Filipos 1:9, 10) Karaman kadagiti responsabilidad dagiti katulongan a papastor ni Kristo ti panangidaulo iti trabaho a panangasaba, panangisuro iti kongregasion, ken umiso a panangipastor iti arban ti Dios.—1 Timoteo 4:16; Hebreo 13:7, 17; 1 Pedro 5:2, 3.
Aktibo a Panangidaulo ni Jesus
20. Ti pannakidanggay iti organisasion ni Jehova kalikagumanna ti panangbigbigtayo iti ania maipapan iti akem ni Jesus?
20 Ti pannakidanggay iti progresibo nga organisasion ni Jehova kalikagumanna ti panangbigbig iti intuding ti Dios nga akem ni Jesu-Kristo kas “ulo ti kongregasion.” (Efeso 5:22, 23) Imutektekantay met ti nailanad iti Isaias 55:4: “Adtoy, isu ti intedko a maipaay a saksi kadagiti il-ili a mangipangulo ken agturay kadagiti il-ili.” Di pagduaduaan nga ammo ni Jesus no kasano ti mangidaulo. Am-ammona met dagiti karnerona ken ammona dagiti aramidda. Kinapudnona, idi sinukimatna dagiti pito a kongregasion iti Asia Menor, naminlima a kinunana: “Ammok dagiti aramidmo.” (Apocalipsis 2:2, 19; 3:1, 8, 15) Ammo met ni Jesus dagiti kasapulantayo, kas ken Jehova nga Amana. Sakbay nga insurona ti Modelo a Kararag, kinuna ni Jesus: “Ti Dios nga Amayo ammona no ania dagiti bambanag a kasapulanyo sakbay pay a dawatenyo kenkuana.”—Mateo 6:8-13.
21. Kasano ti panangidaulo ni Jesus iti kongregasion Kristiano?
21 Kasano ti panangidaulo ni Jesus? Ti maysa a pamay-an ket babaen dagiti Kristiano a manangaywan, ‘dagiti sagut a tattao.’ (Efeso 4:8) Iti Apocalipsis 1:16, nailadawan nga adda dagiti napulotan a manangaywan iti kannawan nga ima ni Kristo, addada iti babaenna. Iti kaaldawantayo, iturturong ni Jesus ti urnos para kadagiti panglakayen, idiay langit man wenno ditoy daga ti namnamada. Kas nailawlawag iti napalabas nga artikulo, ti nasantuan nga espiritu ti nangdutok kadakuada a maitunos kadagiti Nainkasuratan a pagannurotan. (1 Timoteo 3:1-7; Tito 1:5-9) Idi umuna a siglo, adda maysa a grupo dagiti lallakay idiay Jerusalem a mangbukel iti bagi a manarawidwid a mangimaton kadagiti kongregasion ken iti sapasap a trabaho a panangikasaba iti Pagarian. Daytoy ti padron a maan-annurot ita iti organisasion ni Jehova.
Itultuloyyo ti Makidanggay!
22. Ania a tulong ti ipapaay ti Bagi a Manarawidwid?
22 Naitalek ti intereses ti Pagarian ditoy daga iti “matalek ken masirib nga adipen,” nga irepresentar ti Bagi a Manarawidwid dagiti Saksi ni Jehova. (Mateo 24:45-47) Kangrunaan a pakaseknan ti Bagi a Manarawidwid ti panangipaay iti naespirituan a pannursuro ken pannarabay iti kongregasion Kristiano. (Aramid 6:1-6) Nupay kasta, no maapektaran dagiti kakabsat kadagiti natural a didigra, kiddawen ti Bagi a Manarawidwid iti maysa wenno ad-adu pay a legal nga ahensia ti pannakaipatulod dagiti bambanag a pangsaranay wenno ti pannakatarimaan dagiti nadadael a balay ken Kingdom Hall. No adda dagiti Kristiano a mairurumen wenno maidadanes, maaramid dagiti urnos tapno mapabilegda iti naespirituan. Ket “iti nariribuk a panawen,” maipamuspusan ti pannakaitultuloy ti trabaho a panangasaba.—2 Timoteo 4:1, 2.
23, 24. Aniaman ti sumangbay iti ilina, ania ti agtultuloy nga ipaay ni Jehova, ket ania koma ti determinasiontayo?
23 Aniaman ti sumangbay iti ilina, agtultuloy nga ipaayan ida ni Jehova iti naespirituan a taraon ken pannarabay a kasapulanda. Ipaay met ni Jehova ti sirib ken nauneg a pannakaawat kadagiti responsable a kakabsat a lallaki kas panagsagana para iti kanayonan nga irarang-ay ken pannakagugor iti uneg ti teokratiko nga organisasion. (Deuteronomio 34:9; Efeso 1:16, 17) Di bumurong nga ipaay ni Jehova ti kasapulantayo tapno maibanag ti annongentayo a mangaramid kadagiti adalan ken maitungpal a naan-anay ti ministeriotayo iti sangalubongan.—2 Timoteo 4:5.
24 Naan-anay a makapagtalektayo a di pulos baybay-an ni Jehova ti matalek nga ilina; isalakannanto ida iti um-umay a “dakkel a rigat.” (Apocalipsis 7:9-14; Salmo 94:14; 2 Pedro 2:9) Adda naimbag a rasontayo a mangtaginayon iti natibker a panagtalek nga adda kadatayo idi damo agingga iti panungpalan. (Hebreo 3:14) Gapuna, determinadotay koma nga agtultuloy a makidanggay iti organisasion ni Jehova.
Kasanoyo a Sungbatan?
• Apay a maikunatayo nga agtultuloy ti irarang-ay ti organisasion ni Jehova?
• Ania ti mangpaneknek a lumawlawag ti pannakaawat ti ili ti Dios?
• Ania dagiti rimmang-ayan ti Nakristianuan a ministeriotayo?
• Kadagiti adipen ni Jehova, ania dagiti naintiempuan a panagbalbaliw a naaramid mainaig kadagiti urnos ti organisasion?
[Ladawan iti panid 17]
Kas ken David, ditay kabaelan a saritaen dagiti amin a nakaskasdaaw nga aramid ni Jehova
[Ladawan iti panid 18]
Nagunggonaan ti arban ti Dios kadagiti naintiempuan a panagbalbaliw kadagiti urnos ti organisasion