Naragsak Dagidiay Managtungpal iti Sao ti Dios

“Bigbigentayo a daytoy a kombension ket maysa kadagiti probision ni Jehova a mangisagana kadatayo para iti ad-adu pay a trabaho mainaig iti Pagarian,” kinuna ti maysa kadagiti ispiker iti kallabes a “Managtungpal iti Sao ti Dios” a Kombension Distrito dagiti Saksi ni Jehova. Kinunana pay: “Insaganatayo ti bagbagitayo tapno paisuro no kasano ti agbiag kas naragsak a pamilia, tapno maparegta nga agtalinaed iti organisasion ni Jehova, tapno matignay nga agtalinaed a naregta iti panagserbi iti Pagarian, ken tapno mapalagipan iti kinapateg ti panagtalinaed a nasalukag.”

NANIPUD arinunos ti Mayo 2000, minilion a managtungpal iti sao ti Dios ken dagiti gagayyemda ti nagtataripnong iti rinibu a lugar iti intero a lubong tapno awatenda dagiti napateg a sursuro ti Biblia. Ania dagiti naadalda bayat ti tallo nga aldaw a kombension?

Umuna nga Aldaw​—Diyo Lipaten Dagiti Aramid ni Jehova

Iti panglukat a palawag, inyawis ti tserman kadagiti agdengdengngeg a sagrapenda dagiti bendision nga aggubbuay iti nagkaykaysa a panagdayaw ken Jehova babaen ti kombension. Naipasigurado kadagiti amin a nagdengngeg a rumang-ay ti pammatida ken mapabileg ti personal a relasionda ken Jehova.

Ammo ”ti naragsak a Dios” no ania ti makaipaay iti ragsak kadatayo. (1 Timoteo 1:11) Gapuna, iti palawag a “Ti Panagaramid iti Pagayatan ti Dios Mangyeg iti Ragsak” naipaganetget nga iti Biblia a Sao ni Jehova ti pakasarakan ti kasayaatan a wagas ti panagbiag. (Juan 13:17) Sigun kadagiti nainterbiu a nabayagen a Saksi ni Jehova, naragragsak ti biagtayo no aramidentayo ti pagayatan ti Dios iti aniaman a kasasaad. Iti simmaruno a palawag nga “Agragsakkayo Gapu iti Kinaimbag ni Jehova,” impaganetgetna a kas “tumutulad iti Dios,” kayat dagiti Kristiano a patanoren ti “tunggal kita ti kinaimbag” iti biagda. (Efeso 5:1, 9) Ad-adda a maaramidtayo daytoy no ikasabatayo ti naimbag a damag ken agaramid kadagiti adalan.​—Salmo 145:7.

Iti diskusion nga “Agtultuloykayo a Natibker a Kasla Kitkitaenyo Daydiay Di Makita,” impakitana no kasano a ti natibker a pammati tulongannatayo a “kumita” iti di makita a Dios. Inlawlawag ti ispiker no kasano a dagiti naespirituan ti panagpampanunotda ammoda dagiti kababalin ti Dios, agraman ti abilidadna a mangammo uray iti pampanunotentayo. (Proverbio 5:21) Imbinsabinsa dagiti nainterbiu dagiti addang nga inaramidda tapno mapabileg ti pammatida ken mayun-una iti biagda ti naespirituan a bambanag.

Nagngudo ti sesion iti bigat babaen ti pannakatema a palawag nga “Idaydayawyo ni Jehova​—Ti Mangar-aramid Kadagiti Nakaskasdaaw a Banag.” Tinulonganna dagiti agdengdengngeg a mangapresiar a: bayat nga umad-adu ti maad-adaltayo maipapan ken Jehova, umad-adu met ti panggapuantayo a mangidayaw kenkuana kas Managaramid iti nakaskasdaaw a bambanag. Kinuna ti nagpalawag: “Bayat nga ut-utobentayo dagiti makapasiddaaw a parsua ti Dios agraman dagiti nakaskasdaaw nga ipapaayna kadatayo ita, tignayennatayo ti naimpusuan nga apresasion a mangidayaw kenkuana. Bayat a mennamennaentayo dagiti namilagruan a bambanag nga inaramidna para iti ilina idi un-unana, matignaytayo a mangidayaw kenkuana. Ken bayat nga ut-utobentayo dagiti nakaskasdaaw a karina nga ibanagnanto pay, sapsapulentay met dagiti pamay-an tapno ipakitatay ti apresasiontayo.”

Nangrugi ti sesion iti malem babaen ti palawag a “Dikay Sumuko iti Panagaramid ti Nasayaat,” a nangipalagip kadagiti amin nga agdengdengngeg a dagiti pakarigatan iti daytoy a lubong ket pammatalged nga asidegen ti panungpalan. (2 Timoteo 3:1) Nupay kasta, ipakita ti ditay isusuko a datayo “ti kita nga addaan pammati nga agturong iti pannakataginayon a sibibiag ti kararua.”​—Hebreo 10:39.

Ania a balakad iti Biblia ti naipaay para iti pamilia? Ti immuna a simposium iti kombension nga​—“Agtulnogkayo iti Sao ti Dios”​—ket nangrugi iti paset nga “Iti Panangpili iti Pakiasawaan.” Ti panagpili iti pakiasawaan ket maysa kadagiti kadagsenan a desision nga aramiden dagiti tattao. Gapuna, kayat dagiti Kristiano ti aguray a makiasawa inton madanonda ti husto nga edad, ken makiasawada maiyalubog ‘laeng iti Apo.’ (1 Corinto 7:39) Inlawlawag ti simmaruno a paset ti simposium ti maipapan iti tarigagay ni Jehova nga agballigi amin a Kristiano a pamilia kas natibker a naespirituan a grupo, ken nangipaay kadagiti praktikal a pamay-an tapno maibanag daytoy. Ti maudi a paset impalagipna kadagiti nagannak a maisuroda kadagiti annakda ti panagayat ken Jehova no dagiti nagannak a mismo ay-ayatenda ti Dios.

Dagiti punto a naidatag iti palawag nga “Agannad Kadagiti Sayangguseng ken Tsismis” tinulonganna ti amin a makaamiris a nupay adda dagiti nakaskasdaaw a banag a mapaspasamak agbalintayo a masirib, saan a nalaka a mamatpati no adda dagiti makapagagar a damag a mangngegtayo. Nasaysayaat ketdi no isarita dagiti Kristiano ti ammoda a kinapudno​—ti naimbag a damag ti Pagarian. Naliwliwa ken napabileg unay ti adu iti simmaruno a palawag a ti “Panangdaer iti ‘Siit ti Lasag.’” Daytoy ti nakatulong kadakuada a nangbigbig a nupay masusuottayo ita, mapabilegnatayo ni Jehova babaen ti nasantuan nga espirituna, ti Saona, ken ti Nakristianuan a panagkakabsattayo. Makapabileg unay dagiti kapadasan ni apostol Pablo mainaig iti daytoy a banag.​—2 Corinto 12:7-10; Filipos 4:11, 13.

Nagngudo ti umuna nga aldaw iti palawag a “Pannakidanggay iti Organisasion ni Jehova.” Nausig ti tallo a benneg a rimmang-ayan ti organisasion ti Dios: (1) ti lumawlawag a pannakaawat iti naespirituan a lawag nga aggapu ken Jehova, (2) ti ministerio nga intalek ti Dios kadatayo, ken (3) ti naintiempuan a panagbalbaliw dagiti urnos ti organisasion. Kalpasanna, sitatalek a kinuna ti nagpalawag: “Segseggaantayo dagiti mapasamak iti masanguanan.” Insaludsodna: “Saan aya a natalged dagiti rason tapno salimetmetantayo ti natibker a panagtalek nga adda kadatayo nanipud idi damo agingga iti panungpalan?” (Hebreo 3:14) Positibo ti sungbat. Dayta ti nangiruangan iti pannakairuar ti baro a broshur a napauluan iti Mabalinyo ti Makigayyem iti Dios! Agserbi daytoy kas nabileg nga alikamen a pangisuro kadagiti tattao a limitado ti adalna wenno di unay makabasa tapno makasursuro maipapan ken Jehova.

Maikadua nga Aldaw​—Itultuloyyo nga Isarita Dagiti Nakaskasdaaw nga Ar-aramid ti Dios

Kalpasan a nausig ti teksto iti dayta nga aldaw, nagtultuloy ti maikadua nga aldaw ti kombension babaen ti simposium a “Dagiti Ministro ti Sao ti Dios.” Intampok ti umuna a paset ti maipapan iti agdama a balligi ti sangalubongan a panangasabatayo. Nupay kasta, ti panagandurtayo iti daytoy a trabaho ket kariten ti kaaduan a tattao, dagidiay di mangikankano iti mensahe ti Pagarian. Sumagmamano a nabayagen nga agibumbunannag ti nangilawlawag no kasanoda a nataginayon ti rag-oda iti ministerio babaen ti panangpabileg iti panunot ken pusoda iti laksid ti kinaaleng-aleng wenno ibubusor. Impalagip ti maikadua a paset kadagiti nakikombension nga ikarkarigatan dagiti Saksi ni Jehova a danonen dagiti tao iti sadinoman, iti pormal ken di pormal a pamay-an. Adu ti pamay-an a dinakamat ti maudi a paset tapno mapalawa dagiti Kristiano ti ministerioda. Impaganetget ti nagpalawag a tapno maaramid daytoy, masapul nga iyun-unatayo ti Pagarian ti Dios, uray no agbanag daytoy iti rigat ken panagsakripisiotayo.​—Mateo 6:19-21.

Naintiempuan la unay ti palawag a “Patanorenyo ti Nadiosan a Debosion a Buyogen ti Pannakapnek,” agsipud ta agbibiagtayo iti nagdakes a lubong a napno iti di mapmapnek a panagtarigagay kadagiti material a bambanag. Imbasar ti ispiker iti 1 Timoteo 6:6-10, 18, 19 ti dadduma kadagiti komentona. Impakitana no kasano a ti nadiosan a debosion ket makatulong kadagiti Kristiano a mangliklik iti panagayat iti kuarta, a mabalin a mangiwawa ken mangibunga iti adu a parikut kadakuada. Impaganetgetna nga aniaman ti kasasaad ti panagbiagtayo, agpannuray ti rag-otayo iti relasiontay ken Jehova ken iti nasayaat nga espiritualidadtayo. Adu a puso ti natignay kadagiti nairuar a punto iti palawag a “Ditay Agaramid ti Aniaman a Pakaibabainan ti Dios.” Naipaganetget ti kinapudno a saan a lipaten ni Jehova dagiti matalek a Saksina. Ti di maartapan nga ehemplo ni Jesu-Kristo​—ti “isu met laeng idi kalman ken ita nga aldaw, ken iti agnanayon”​—ti makatulong kadagiti adu tapno agtultuloyda nga agandur nga agtaray iti lumba ti biag.​—Hebreo 13:8.

Nagngudo ti sesion iti bigat babaen ti palawag iti bautismo​—a kanayon a maysa a tampok dagiti dadakkel a panagtataripnong dagiti Saksi ni Jehova. Anian a rag-o ti pannakakita kadagiti baro a nagdedikar a mangsurot iti addang ni Jesus babaen ti bautismo iti danum! (Mateo 3:13-17) Amin a nangaramid iti daytoy nga addang ti adun ti nagapuananda kas managtungpal iti sao ti Dios. Maysa pay, ordinadodan a ministro ti naimbag a damag apaman a nabautisarananda ket dakkel ti rag-oda ta ammoda a makiramramanda iti pannakasantipikar ti nagan ni Jehova.​—Proverbio 27:11.

Nadagsen a pammagbaga ti naipaay iti palawag a “Kasapulan ti Kinanataengan Tapno ‘Mailasin nga Agpadpada ti Umiso ken ti Di Umiso.’” Dagiti nailubongan a pagalagadan iti umiso ken di umiso ket nakataktakkon. Masapul ngarud nga agpannuraytayo kadagiti pagalagadan ni Jehova. (Roma 12:2) Naiparegta iti amin nga ikagumaanda ti gumun-od iti umiso a pannakaawat maipapan iti daldalan ti Dios ken agmataenganda. Kalpasanna, babaen iti panangipakat iti dayta, masanay ti pannakaawattayo a “mangilasin agpadpada iti umiso ken di umiso.”​—Hebreo 5:11-14.

Simmaruno ti simposium nga “Ikagumaan a Patanoren ti Espiritualidadyo.” Bigbigen dagiti pudno a Kristiano ti kinapateg ti panangpatanor ken panangmantener iti espiritualidad. Iramanna daytoy ti nasaet a panagbasbasa, panagadal, ken panagmennamenna. (Mateo 7:13, 14; Lucas 13:24) Itultuloy met dagiti naespirituan ti panagpampanunotda a tattao “ti amin a langa ti kararag ken araraw.” (Efeso 6:18) Ammotayo a dagiti kararagtayo ipanayagna ti kinapasnek ti pammati ken debosiontayo, no ania ti tukad ti espiritualidadtayo, kasta met iti no ania ti matmatantayo a kas “napatpateg a bambanag.” (Filipos 1:10) Naipaganetget met ti kinapateg ti panangpatanor iti nabara, naayat a relasion ken Jehova a kas iti tagtagiragsaken ti natulnog nga ubing iti naayat nga ama. Saan laeng a basta adda relihiontayo​—nupay isu daytoy ti pudno a relihion​—no di ket kayattayo ti maaddaan iti nabileg a pammati, ‘a kasla kitkitaentayo ti Dios.’​—Hebreo 11:6, 27.

Ti tema maipapan iti naespirituan a panagrang-ay ket ad-adda a naibinsabinsa iti palawag nga “Iparangarangyo ti Panagrang-ayyo.” Nausig ti tallo a benneg ti kasta a panagrang-ay: (1) irarang-ay iti pannakaammo, pannakaawat, ken kinasirib, (2) panangpatanor kadagiti bunga ti espiritu ti Dios, ken (3) ti panangwatwat kadagiti responsibilidad kas miembro ti pamilia.

Iti ngudo ti maudi a palawag a “Pannagna iti Rumangrang-ay a Lawag ti Sao ti Dios,” naragsakan dagiti nakikombension nga immawat iti baro a libro a Ti Padto ni Isaias​—Lawag nga Agpaay iti Sangatauan I. Daytoy ti umuna iti dua a tomo a mangilawlawag iti kada kapitulo ti libro ti Biblia nga Isaias. “Adda mensahe ti libro ni Isaias kadatayo ita,” kinuna ti nagpalawag. Intuloyna: “Wen, adu kadagiti padto a linaonna ti natungpal idi panawen ni Isaias. . . . Nupay kasta, adu kadagiti padto ni Isaias ti agdama a matungtungpal, ket matungpalto pay dagiti dadduma iti naikari a baro a lubong ti Dios.”

Maikatlo nga Aldaw​—Tungpalenyo ti Sao ni Jehova

Nangrugi ti maudi nga aldaw ti kombension babaen ti panangusig iti inaldaw a teksto. Simmaruno ti simposium a: “Ti Napnuan Kaipapanan a Padto ni Sofonias nga Agpaay Kadagiti Mangar-aramid iti Pagayatan ti Dios.” Dagiti tallo a palawag iti daytoy a simposium ipakitana a pagdukotento ni Jehova dagidiay di mangipangag iti pammakdaarna kas iti inaramidna kadagidi aldaw a simiasi ti Juda. Gapu ta nagbasolda iti Dios, magnadanto a kas kadagiti awan gawayna a bulsek a di makasarak iti mangiwanwan kadakuada. Nupay kasta, dagiti pudno a Kristiano itultuloyda a sapulen ni Jehova, ket maitalimengdanto iti aldaw ti pungtot ti Dios. Maysa pay, tagtagiragsakenda ti adu a bendision uray ita. Addaanda iti naparaburan a pribilehio a sawen ti “nasin-aw a pagsasao” ti kinapudno a linaon ti Biblia. (Sofonias 3:9) Kinuna ti nagpalawag: “Ti panangisarita iti nasin-aw a pagsasao ramanenna saan laeng a ti panamati iti kinapudno ken panangisuro iti dayta kadagiti dadduma no di pay ket babaen ti panangitunostayo iti kababalintayo kadagiti linteg ken prinsipio ti Dios.”

Sinegseggaan dagiti nakikombension ti drama a “Dagiti Pasamak a Pakaballaagantayo Itatta.” Impakita daytoy a full-costume a drama no kasano a natay ti rinibu nga Israelita iti beddeng ti Naikari a Daga gapu ta linipatanda ni Jehova ket nakikaidda ken nakiramanda kadagiti pagano a babbai ken iti ulbod a panagdayaw. Maysa ni Jamin kadagiti kangrunaan a karakter. Idi damo, nabingay ti pusona kadagiti pangawis dagiti Moabita a babbai ken iti debosionna ken Jehova. Silalawag a naipakita ti ballikug a panagrasrason ken nasikap a panagpampanunot ni nadangkes a Zimri ken kasta met ti pammati ken debosion ni Finehas. Sipapanayag a nailadawan ti peggad ti pannakikadua kadagiti saan a mangay-ayat ken Jehova.

Dayta a drama ti nangisagana kadagiti panunot dagiti agdengdengngeg para iti simmaganad a palawag a “Saankayo nga Agbalin a Managdengngeg a Makalipat.” Ipakita ti panangusig iti 1 Corinto 10:1-10 a suboken ni Jehova ti kinatulnogtayo tapno kitaenna no maikaritayo nga umawat iti tawid iti baro a lubong. Kadagiti dadduma, leppesen dagiti nainlasagan a tarigagay dagiti naespirituan a kalatda uray ita nga asidegtayon a sumrek iti baro a sistema. Naparegta ti amin a dida sayangen ti pribilehio a ‘sumrek iti panaginana ni Jehova.’​—Hebreo 4:1.

Natemaan ti palawag publiko iti “No Apay nga Imutektekantayo Dagiti Nakaskasdaaw nga Ar-aramid ti Dios.” Ipakita ti “nakaskasdaaw nga ar-aramid” ni Jehova ti sirib ken pannakabalinna kadagiti pisikal a parparsua iti aglawlawtayo. (Job 37:14) Immanayen ti sumagmamano a mamagpanunot a salsaludsod manipud ken Jehova tapno pagsiddaawan ni Job ti bileg ti mannakabalin-amin a Namarsua. Agaramidto pay ni Jehova iti masanguanan iti “nakaskasdaaw nga ar-aramid” maigapu kadagiti nasungdo nga adipenna. Inngudo ti nagpalawag: “Nawadwad ti rason no apay nga ipaayantay iti atension dagiti nakaskasdaaw nga aramid ni Jehova​—no ania ti inaramidna iti naglabas, no ania ti ar-aramidenna kadagiti parsuana ita, ken no ania ti inkarina nga aramiden iti asidegen a masanguanan.”

Kalpasan ti sumario ti artikulo a naadal iti Pagwanawanan iti dayta a lawas, naiparang ti maudi a palawag ti konbension a napauluan iti “Tagipatgenyo Unay ti Pribilehio Kas Managtungpal iti Sao ti Dios.” Impaganetget daytoy makagutugot a palawag a maysa a pribilehio ti agbalin a managtungpal iti sao ti Dios. (Santiago 1:22) Naipalagip kadagiti agdengdengngeg a naisangsangayan ti pribilehiotayo kas managtungpal iti sao ti Dios, ket bayat nga ad-adda nga ar-aramidentayo dayta, ad-adda a maipategtayo. Naparegta ti amin a timmabuno nga iparangarangda ti nagimbagan daytoy a distrito kombension no maipapan iti tarigagayda nga agbalin a managtungpal iti sao ti Dios iti amin a kabaelanda. Dayta ti kakaisuna a pamay-an tapno mapasaran ti kadakkelan a rag-o.

[Kahon/Ladawan iti panid 25]

Mabalinyo ti Makigayyem iti Dios!

Iti malem ti Biernes, nairuar ti baro a broshur a napauluan iti Mabalinyo ti Makigayyem iti Dios! Adda dakkel a panagkasapulan iti napasimple a panangyadal iti Biblia iti intero a lubong, ket daytoy a broshur ti mangpunno iti dayta a pakasapulan. Maysa daytoy a dakkel a bendision kadagiti tattao a limitado ti adalda wenno di unay makabasa.

[Kahon/Dagiti Ladawan iti panid 26]

Ti Padto ni Isaias―Lawag nga Agpaay iti Sangatauan

Naragsakan dagiti kombensionista a nangawat iti Tomo I ti dua-tomo a libro a Ti Padto ni Isaias​—Lawag nga Agpaay iti Sangatauan. Iti daytoy a publikasion, naipaganetget ti praktikal a pateg ti padto ni Isaias iti kaaldawantayo.