Ti Naimpadtuan a Sao ti Dios Mangted Namnama Para iti Masakbayan
GAPU iti Sao ti Dios, ti Nasantuan a Biblia, matmatan dagiti pudno a Kristiano ti masakbayan buyogen ti pammati, namnama, ken optimismo. Tangay natalged ti relasionda ken Jehova a Dios, siinanamada iti masanguanan. Kas nailawlawag iti panglukat a palawag kadagiti “Naimpadtuan a Sao ti Dios” a Distrito a Kombension, adun a tawen a sipapasnek nga ad-adalen dagiti Saksi ni Jehova ti padto ti Biblia. Ania ngarud ti insagana ni Jehova para iti ilina kadagitoy a kombension? Nagagaran amin a dimmar-ay a nangammo babaen ti sidadaan a pananglukibda iti Bibliada. Ti tema ti tunggal aldaw ti kombension ket naurnos kas nabennebenneg a subtema.
UMUNA NGA ALDAW: Pannagna iti Lawag ti Sao ti Dios
Ti palawag nga “Indalannatayo ti Sao ti Dios” inlawlawagna a mayarig ti ili ni Jehova iti maysa a tao a mangrugi nga agdaliasat iti nasipnget a rabii. Makitana dagiti anniniwan bayat a lumgak ti init ngem nalawagen ti makitana no nakatangkayagen ti init. Kas naipadto iti Proverbio 4:18, ti ili ni Jehova nalawag a makitadan ti dalanda babaen ti naraniag a lawag ti kinapudno manipud iti naimpadtuan a sao ti Dios. Saanda a mabaybay-an a maitibkol iti naespirituan a kinasipnget.
Ti panulbek a palawag nga “Ipangagyo ti Naimpadtuan a Sao ti Dios” impalagipna kadagiti agdengdengngeg a dagidiay manginanama ken Jehova saanda a maupay ken mapaay nga isut’ mapasaran dagiti tattao a sumursurot kadagiti saan a pudno a mesias ken saan a pudno a mammadto. Iti nabatad a pannakaigidiatna, aglaplapusanan dagiti pammaneknek ti pudno a Mesias a ni Jesu-Kristo! Kas pagarigan, ti namilagruan a panagbalbaliw ti langa ni Jesus nangipaay iti pakauna maipapan kenkuana kas ti naitronon nga Ari ti Pagarian ti Dios. Nanipud iti kaaddana iti turay ti Pagarian idi 1914, ni Jesus met ti “baggak” a nadakamat iti 2 Pedro 1:19. “Kas Mesianiko a Baggak, iwaragawagna ti baro nga aldaw, wenno panawen, nga agbannawag iti isuamin a natulnog a sangatauan,” kinuna ti nagpalawag.
Kas panglukat ti programa iti malem, ti palawag nga “Agsilsilnag kas Silsilaw” inlawlawagna a naimbag ti Efeso 5:8, a sadiay balakadannatayo ni apostol Pablo nga ‘itultuloytay ti magna kas annak ti lawag.’ Dagiti Kristiano ket silsilaw, saan laeng a babaen ti panangiranudda iti Sao ti Dios iti sabsabali no di pay ket babaen ti panangyaplikarda ti Biblia iti biagda kas panangtulad ken Jesus.
Tapno agbalintayo a kastoy a kita ti silaw, masapul a ‘Pagragsakantayo ti Agbasa iti Sao ti Dios.’ Nailawlawag daytoy a tema iti nagkatlo a simposium. Kalpasan a dinakamat ti nagpalawag ti kinuna ni Abraham Lincoln a ti Biblia “ti kasayaatan a sagut ti Dios iti tao,” sinaludsodan ti immuna a nagpalawag ti tallaong no ania ti ipalgak ti ugalida nga agbasa maipapan iti kauneg ti panangapresiarda iti Sao ni Jehova. Naparegta dagiti agdengdengngeg a basaenda koma a naimbag ti Biblia, sirmataenda dagiti Nainkasuratan a salaysay ken inaigda dagiti baro a punto kadagiti datin nga ammoda.
Ti simmaganad a paset ti simposium impaganetgetna ti kinapateg ti panagadal, saan a ti paspasaray a panagbasa, tapno maipaunegtayo ti “nakired a taraon.” (Hebreo 5:13, 14) Ad-adda a makapabileg ti panagadal, kinuna ti nagpalawag, no ‘ipapusotayo,’ kas iti inaramid idi ti Israelita a padi a ni Esdras. (Esdras 7:10) Ngem apay a nakapatpateg ti panagadal? Agsipud ta direkta a maapektaranna ti relasiontayo ken Jehova. Gapuna, napateg, makaparagsak, ken makaliwliwa koma ti panagadal iti Biblia, nupay kalikagumanna ti panangdisiplina iti panunot ken panagregget. Kasanotay a maiwayaan ti napasnek a panagadal? Babaen ti ‘pananggatangtayo iti nainggundawayan a tiempo’ manipud kadagiti di unay napateg nga aramid, kinuna ti naudi a nagpalawag iti simposium. (Efeso 5:16) Wen, ti tulbek ti panangiwaya isut’ kasayaatan a panangusar iti adda a tiempotayo.
Ti palawag a “Ti Dios Pabilgenna ti Nabannogan” impabigbigna nga adu a tattao ti nabannogan kadagitoy a panawen. Tapno mabalintay ti maaddaan iti “pannakabalin a nalablabes ngem ti gagangay” para iti Nakristianuan a ministerio, masapul nga agpannuraytayo ken Jehova, a “mangpapigsa iti nakapuy.” (2 Corinto 4:7; Isaias 40:29) Dagiti makapabileg a tulong iramanna ti Sao ti Dios, kararag, ti kongregasion Kristiano, regular a pannakipaset iti ministerio, dagiti Kristiano a manangaywan, ken ti matalek nga ulidan ti sabsabali. Ti tema a “Mannursurokayo Koman Gapu iti Panawen” inggunamgunamna a rebbeng a mannursuro ken manangaskasaba koma dagiti Kristiano ken ikagumaanda a parang-ayen ti “arte ti panangisuro.”—2 Timoteo 4:2.
Ti maudi a palawag iti dayta nga aldaw, “Saanto nga Agballigi Dagiti Bumusbusor iti Dios,” dinakamatna dagiti nabiit pay a di umiso a panagregget iti dadduma a pagilian a nangpanagan kadagiti Saksi ni Jehova kas maysa a napeggad a kulto. Ngem masapul a ditay agbuteng ta kuna ti Isaias 54:17: “Awan ti igam a naaramid a maibusor kenka a rumang-ayto; ken tunggal dila a bumusorto kenka iti panangukom kondenaremto. Isu daytoy ti tawid dagiti adipen ni Jehova, ken ti kinalintegda nga aggapu kaniak, kuna ni Jehova.”
MAIKADUA NGA ALDAW:Dagiti Banag a Naipakaammo Babaen Kadagiti Naimpadtuan a Kasuratan
Kalpasan ti pannakasalaysay ti teksto ti Biblia iti dayta nga aldaw, tinagiragsak dagiti nakiasamblea ti maikadua a simposium ti kombension a napauluan, “Kas Agaw-awit iti Lawag, Itan-oktayo ni Jehova.” Ti immuna a palawag impatuldona a ti kalat ti maysa a Kristiano isut’ panangidaydayaw ken Jehova babaen ti panangasaba iti amin a lugar. Ti simmaganad a paset dinakamatna ti kinapateg ti panangiturong kadagiti baro nga iyad-adalan iti organisasion ti Dios. Kasano? Babaen ti panangyurnos iti lima wenno sangapulo a minuto, sakbay wenno kalpasan ti kada panagadal iti Biblia iti pagtaengan, a panangilawlawag no kasano ti panagandar ti organisasion ti Dios. Ti maikatlo a palawag iti daytoy a simposium inyunay-unayna ti kinapateg ti panangidaydayaw iti Dios babaen ti nasayaat nga ar-aramid.
Ti palawag nga “Ayatenyo iti Kasta Unay Dagiti Pammalagip ni Jehova” sinaklawna dagiti napili a bersikulo iti Salmo 119. Talaga a kasapulantayo ti pammalagip, ta adda pagannayasantayo amin a makalipat. Anian a nagpateg ngarud a patanorentayo ti panagayat kadagiti pammalagip ni Jehova, kas inaramid idi ti salmista!
Kalpasanna, dimteng ti maysa nga espesial a paset—ti palawag ti bautismo a napauluan “Ti Panangipangag iti Naimpadtuan a Sao Mangitunda iti Bautismo.” Naipalagip kadagiti kandidato iti bautismo a tuladenda ni Kristo saan laeng a babaen ti panagbautisarda no di pay ket babaen ti panangsurotda a naimbag iti addangna. (1 Pedro 2:21) Anian a pribilehio dagitoy a kabbaro a makipaset iti kaitungpalan ti Juan 10:16, a sadiay impadto ni Jesus nga urnongenna ti “sabsabali a karnero” tapno agserbi a kadua dagiti napulotan-espiritu nga adalanna!
Iti panangrugi ti programa iti malem, ti palawag a “Denggenyo ti Kunaen ti Espiritu” inlawlawagna nga agsasao ti espiritu ni Jehova kadatayo babaen ti Biblia, “ti matalek ken masirib nga adipen,” ken ti sinanay ti Biblia a konsiensiatayo. (Mateo 24:45) Gapuna, saan a kasapulan a mangngeg dagiti Kristiano ti literal a timek nga aggapu iti langit tapno maammuanda no kasano a maparagsakda ti Dios. Ti simmaruno a palawag a napauluan, “Itandudotayo a Sititibker ti Sursuro a Maitunos iti Nadiosan a Debosion,” binagbagaanna dagiti Kristiano a dida koma aginteres kadagiti makadadael a kapanunotan nga agraraira iti daytoy a lubong. Kinapudnona, maisarangtayo kadagiti makadangran nga impormasion nga immula dagiti apostata ken ti dadduma pay nga ahente ni Satanas no nalabes ti kinausiosotayo. Anian a nasaysayaat nga amang no regular a basaentayo ti Biblia ken dagiti amin nga artikulo iti Pagwanawanan ken Agriingkayo!
Ti simmaganad a palawag a natemaan iti “Itultuloyyo a Salimetmetan ti Pagtuladan iti Makapasalun-at a Sasao,” impaganetgetna ti kinapateg ti naan-aanay a panangadaltayo iti Nainkasuratan a “pagtuladan,” wenno balabala, ti kinapudno. (2 Timoteo 1:13) Ti panangsurot iti daytoy a pagtuladan saan laeng nga isut’ tulbek iti nadiosan a debosion no di pay ket iti panangilasin iti saan a maitunos iti kinapudno.
Iladawanyo ti agbalin a maysa kadagiti ibilang ni Jehova a napateg. Anian a pakaidayawan! Ti naibasar iti padto ni Haggeo a palawag a “‘Dagiti Napateg a Gameng’ Puspusekenda ti Balay ni Jehova” ket makaparegta unay agsipud ta impasiguradona kadagiti agdengdengngeg a pudno a napateg ken Jehova ti tunggal kameng ti “dakkel a bunggoy.” (Apocalipsis 7:9) Isu nga isalakanto ida ni Jehova inton kamaudianan a ‘panamagkintayegna’ kadagiti nasion kabayatan ti sumungsungad a “dakkel a rigat.” (Haggeo 2:7, 21, 22; Mateo 24:21) Kabayatanna, nupay kasta, masapul nga agsalukag ti ili ni Jehova iti naespirituan, kas nailawlawag iti paset a “Pagsalukagennatayo Dagiti Naimpadtuan a Kasuratan.” Inadaw ti nagpalawag ti sasao ni Jesus: “Agtultuloykayo nga agbantay, ngarud, agsipud ta dikay ammo no iti ania nga aldaw nga umay ti Apoyo.” (Mateo 24:42) Kasanotayo a makapagtalinaed a nasalukag iti naespirituan? Babaen ti panagbalin a naagawa iti panagserbi ken Jehova, kanayon a panagkararag, ken ti agtultuloy a panangsegga iti dakkel nga aldaw ni Jehova.
Ti maudi a palawag iti dayta nga aldaw ket napauluan “Ti Naimpadtuan a Sao iti Tiempo ti Panungpalan.” Malaglagipto dayta iti masungad nga adu a tawen. Apay? Agsipud ta inyanunsio ti nagpalawag ti pannakairuar ti baro a libro—Ipangagyo ti Padto ni Daniel! “Daytoy napintas ti pannakailadawanna a 320-panid a publikasion saklawenna amin a paset ti libro ni Daniel,” kinuna ti nagpalawag. Anian a makapabileg-pammati a pammaneknek nga ibukbuksilan ni Jehova ti naimpadtuan a Saona!
MAIKATLO NGA ALDAW: Saan Pulos a Matungday ti Naimpadtuan a Sao ti Dios
Nangrugi ti maudi nga aldaw ti kombension babaen ti simposium a “Naimpadtuan a Sasao nga Agpaay iti Naituding a Tiempo.” Imbuksilan ti tallo a paset ti tallo a proklamasion ti panangukom ni Jehova nga inwaragawag ni mammadto a Habacuc. Ti immuna ket maibusor iti nasubeg a Juda ket ti maikadua maibusor iti manangirurumen a Babilonia. Ti maudi, a matungpalto pay laeng, ket agaplikar iti nakaas-asidegen a pannakadadael ti amin a nadangkes a tattao. Maipapan iti Armagedon, ti maudi a nagpalawag iti simposium inabbukayna ti umno a nadiosan a panagbuteng kadagiti agdengdengngeg kenkuana idi kinunana: “Pudno, nakaskasdaawto inton ibulos ni Jehova ti naan-anay a puersa ti naindaklan a pannakabalinna.”
“Panangipateg iti Naespirituan a Tawidtayo” ti tema ti makatukay rikna a drama ti Biblia para iti kombension. Daytoy makasukisok iti kararua a pabuya pinaggidiatna ti panangmatmat da Jacob ken Esau kadagiti naespirituan a banag. Saan a tinagipateg ni Esau ti naespirituan a tawidna, isu a naited ken Jacob, a nangipateg iti dayta. “Ania [a naespirituan a tawid] ti inted ni Jehova kadatayo?” ti nayimtuod kadagiti kombensionista. “Ti kinapudno iti Saona, ti Biblia; ti namnama a biag nga agnanayon; ken ti dayaw a mangibagi kenkuana a kas manangiwaragawag iti naimbag a damag,” insungbat ti nagpalawag.
Ti simmaganad a paset ket natemaan iti “Aniat’ Kaipapananna Kadakayo ti Nagpateg a Tawidtayo?” Maipakitatayo ti umiso a panangmatmat iti naespirituan a tawidtayo babaen ti panangipangpangrunatayo kadagiti naespirituan a pribilehio imbes a dagiti personal wenno namaterialan nga interes. Iti kasta, maipamaysatayo ti biagtayo iti relasiontayo ken Jehova, a dakkel ti nakaidumaanna iti inaramid da Adan, Esau, ken dagiti di matalek nga Israelita.
Ti palawag publiko a “Panangpabaro iti Isuamin a Bambanag—Kas Naipadto,” pinagaallotna ti uppat a kangrunaan a padto maipapan iti “baro a langlangit” ken ti “baro a daga.” (Isaias 65:17-25; 66:22-24; 2 Pedro 3:13; Apocalipsis 21:1, 3-5) Nalawag a pampanunoten ni Jehova ti dakdakkel a kaitungpalan dagitoy a padto ngem iti daydiay padto maipapan iti panagsubli ti ilina idi 537 K.K.P. Wen, pampanunotenna ti gobierno ti Pagarianna (ti “baro a langlangit”) ken dagiti iturayanna ditoy daga (ti “baro a daga”) nga agnaed iti nadayag a sangalubongan a paraiso.
“Dagiti Segseggaantayo Bayat nga Iwanwannatay ti Sao ti Dios” ti palawag a nangyeg iti naragsak ken makaparegta a panagngudo ti kombension. Pinalagipanna ti amin a “ti tiempo a nabati ket napaababa” para iti pannakairingpas ti trabaho a panangiwaragawag iti Pagarian. (1 Corinto 7:29) Wen, asidegen a maimatangantayo ti kaitungpalan ti inkeddeng ni Jehova a maibusor ken ni Satanas ken iti intero a nadangkes a sistemana. Sapay koma ta dagiti kaririknatayo ket kas iti karirikna ti salmista a nangikanta: “Ti kararuatayo nagur-uray ken Jehova: isu ti saranay ken kalasagtayo.” (Salmo 33:20) Anian a nagdayag a namnama ti agur-uray kadagidiay a ti namnamada ket naibasar iti naimpadtuan a sao ti Dios!
[Ladawan iti panid 7]
Ti makagutugot a drama pinarayrayna ti panangapresiar iti naespirituan a tawid dagiti adipen ni Jehova
[Ladawan iti panid 7]
Nabautisaran ti adu a nangipangag iti naimpadtuan a sao ti Dios