Minilion ti Dumar-ay—Dumar-aykayto Aya?
NASUROK a walo a milion a tattao iti intero a lubong ti tumabuno kadagiti tinawen a kombension distrito dagiti Saksi ni Jehova iti kada tawen. Kabayatan ti Disiembre 1999 ken Enero 2000, 52 a tallo-aldaw a “Naimpadtuan a Sao ti Dios” a Kombension Distrito ti nayeskediul ditoy Pilipinas. Mabalin a maangay ti maysa iti lugar nga asideg iti pagnanaedanyo. Paregtaendakayo nga addakayto koman inton mangrugi ti programa babaen ti musika iti alas 8:30 t.b. ti Biernes.
Ti programa iti agsapa iramanna ti pangabrasa a palawag agraman ti pannulbek a palawag nga “Ipangagyo ti Naimpadtuan a Sao ti Dios.” Iti malem, ti simposium a “Pagragsakanyo ti Agbasa iti Sao ti Dios” ket mangipaay kadagiti praktikal a singasing no kasano a pagbalinen a makagunggona ken makaparagsak ti agbasa iti Biblia. Ti pangserra a palawag iti dayta nga aldaw a “Saanto nga Agballigi Dagiti Bumusbusor iti Dios,” ti mangrepaso kadagiti naaramid a panangbusor kadagiti moderno a panawen a manangiwaragawag iti Pagarian ti Dios.
Itampok ti programa iti agsapa ti Sabado ti palawag para iti bautismo, ket dagidiay kualipikado adda gundawayda a mabautisaran. Iti malem, maiparang dagiti makaparegta a damag maipapan iti nakaskasdaaw a panagtignay dagiti tattao iti kinapudno ti Biblia kadagiti sumagmamano a pagilian idiay Latin America, Africa, ken Makindaya nga Europa, agraman iti nagdakkel a pagilian iti Asia nga isu ti Kazakhstan. Ti paset ket napauluan “‘Dagiti Napateg a Gameng’ Puspusekenda ti Balay ni Jehova.” Agngudo ti programa iti Sabado babaen ti dua a palawag, “Pagsalukagennatayo Dagiti Naimpadtuan a Kasuratan” ken “Ti Naimpadtuan a Sao iti Tiempo ti Panungpalan.” Ti maudi ket maipamaysa iti libro ti Biblia a Daniel ken mangted kadagiti rason nga ipangagtayo ti padtona.
Iti agsapa ti Domingo, ti nagkatlo, maysa nga oras a simposium a napauluan “Naimpadtuan a Sasao nga Agpaay iti Naituding a Tiempo” ti mangisalaysay iti padto ni Habacuc. Maawatanyonto nga anian a makaparegta daytoy bassit a libro ti Biblia kadagiti Kristiano kadagitoy a panawen. Kalpasanna, maysa a full-costume drama a mangitampok iti salaysay ti Biblia maipapan kada Jacob ken Esau ti mangipaganetget iti tema a “Panangapresiar iti Naespirituan a Tawidtayo.” Ti programa iti agsapa iti Domingo ti agngudo babaen iti makaparegta a palawag nga “Aniat’ Kaipapananna Kadakayo ti Napateg a Tawidtayo?” Ket iti malem, tagiragsakenyonto ti palawag publiko a “Panangpabaro iti Isuamin a Bambanag—Kas Naipadto.”
Iplanoyo itan ti tumabuno. Tapno maammuanyo ti lugar a kaasitgan iti pagtaenganyo, makiumankayo iti kaasitgan a Kingdom Hall dagiti Saksi ni Jehova iti lugaryo wenno agsuratkayo kadagiti manangipablaak iti daytoy a magasin.