Agsalukag ken Situtured nga Umabante!

Report Maipapan Kadagiti Espesial a Miting

SIASINO ti nainkalintegan a makailibak nga agbibiagtayon iti “napeggad a tiempo a narigat a pakilangenan”? Kas Saksi ni Jehova, saantay a maliklikan dagiti pakarigatan iti biag “kadagiti maudi nga aldaw.” (2 Timoteo 3:1-5) Ngem mabigbigtayo a kasapulan dagiti tattao ti tulong. Dida matarusan ti kaipapanan dagiti pasamak iti lubong. Kasapulanda ti liwliwa ken namnama. Ania ti kangrunaan nga akemtayo iti panangtulongtayo iti padatayo a tao?

Adda ti inted-Dios nga annongentayo a mangiranud iti naimbag a damag ti naipasdeken a Pagarian ti Dios. (Mateo 24:14) Masapul a maammuan dagiti tattao a daytoy nailangitan a Pagarian ti kakaisuna a namnama ti sangatauan. Nupay kasta, saan a kanayon nga adda dumngeg iti mensahetayo. Iti dadduma a lugar maiparit ti trabahotayo ken maidaddadanes dagiti kakabsattayo. Ngem ditay sumuko. Buyogen ti naan-anay a panagtalek ken Jehova, determinadotay nga agtalinaed a siririing ken agtultuloy a situtured, nga ipakaammotayo ti naimbag a damag nga awan sardayna.​—Aramid 5:42.

Nabatad dayta natibker a determinasion kadagiti espesial a miting a naaramid idi Oktubre 2001. Idi Sabado, Oktubre 6, naangay ti tinawen a miting ti Watch Tower Bible and Tract Society of Pennsylvania idiay Jersey City, New Jersey, Assembly Hall of Jehovah’s Witnesses idiay Estados Unidos.a Iti simmaruno nga aldaw, adda dagiti kanayonan a miting a naangay iti uppat a lugar, tallo idiay Estados Unidos ken maysa idiay Canada.b

Iti panglukat a sasaona iti tinawen a miting, ti tserman a ni Samuel F. Herd, miembro ti Bagi a Manarawidwid dagiti Saksi ni Jehova, dinakamatna ti Salmo 92:1, 4 ket kalpasanna kinunana: “Kayattay nga ipakita a managyamantayo.” Kinapudnona, naipaay iti lima a report a naggapu iti aglikmut ti lubong dagiti pakaigapuan ti panagyaman.

Dagiti Report a Naggapu Kadagiti Adayo a Lugar

Impadamag ni Kabsat Alfred Kwakye ti panagrang-ay ti trabaho a panangasaba idiay Ghana, dati a pagaammo kas Gold Coast. Naiparit ti trabahotayo iti dayta a pagilian iti adu a tawen. Kuna dagiti tattao: “Apay a maiparit? Ania ti inaramidyo?” Kuna ni Kabsat Kwakye a daytoy ti mangipaay iti gundaway a mangpaneknek. Idi naikkat ti pannakaiparit idi 1991, adda laeng 34,421 a Saksi ni Jehova idiay Ghana. Idi Agosto 2001, ti dagup a bilang ket 68,152​—98 porsiento nga irarang-ay. Madama a maipalplano ti pannakaibangon ti Assembly Hall a makalaon iti 10,000 a tattao. Nalawag a dagiti kakabsattayo iti naespirituan idiay Ghana ap-aprobetsarenda a naimbag ti narelihiosuan a wayawayada.

Iti laksid ti napolitikaan a riribuk idiay Ireland, siaaktibo dagiti kakabsattayo a makiramraman iti ministerio, ken mararaemda unay gapu iti neutral a takderda. Kuna ti Branch Committee coordinator a ni Peter Andrews nga addaan ti Ireland iti 115 a kongregasion iti 6 a sirkito. Dinakamat ni Kabsat Andrews ti maipapan iti kapadasan ni Liam, sangapulo ti tawenna nga ubing a lalaki a situtured a mangaskasaba idiay eskuelaanda. Nakaipaima ni Liam iti Ti Librok Dagiti Estoria ti Biblia, nga impablaak dagiti Saksi ni Jehova, kadagiti 25 a kaeskuelaanna ken kasta met iti maestrana. Kayat ni Liam ti agpabautisaren, ngem adda nagsaludsod no isu ket ubing pay unay. Kuna ni Liam: “Saan a ti edadko ti pangrukodan no di ket ti panagayatko ken Jehova. Ti panagpabautisarko ti mangipakita nga isut’ ay-ayatek unay.” Kalat ni Liam ti agbalin a misionero.

Idi 1968, adda agarup 5,400 nga agibumbunannag iti naimbag a damag idiay Venezuela. Ngem ita, kuna ti Branch Committee coordinator a ni Stefan Johansson nga addan nasurok a 88,000 nga agibumbunannag. Ket posible nga adda pay ti kanayonan nga irarang-ay gapu iti bilang ti timmabuno iti Memorial idi 2001 a nasurok a 296,000. Idi Disiembre 1999, gapu iti bumayakabak a tudo nagayus ti pitak a nangpapatay iti napattapatta a 50,000 a tattao, a pakairamanan ti sumagmamano a Saksi. Napunno iti pitak ti maysa a Kingdom Hall iti agarup kagudua a metro a nganngani dimmanon iti bobida. Idi adda nagkuna a baybay-andan ti pasdek, kinuna dagiti kakabsat: “Saan! Kingdom Hall-mi daytoy, ket dimi kayat a baybay-an.” Rinugianda ti nagtrabaho, nga inikkatda ti tinonelada a pitak, batbato, ken dadduma pay a rugit. Napasayaat ti pasdek, ket kuna dagiti kakabsat a napimpintas pay itan ngem idi sakbay ti didigra!

Adda 87 a lenguahe ken pagsasao a maus-usar iti Pilipinas, kuna ti Branch Committee coordinator a ni Kabsat Denton Hopkinson. Iti napalabas a tawen serbisio, nairuaren ti kompleto a Baro a Lubong a Patarus ti Nasantuan a Kasuratan iti tallo a kangrunaan a pagsasao iti pagilian​—Cebuano, Iloko, ken Tagalog. Dinakamat ni Kabsat Hopkinson ti maysa a kapadasan ti siam ti tawenna nga ubing a lalaki a nangbasa iti libro a Good News​—To Make You Happy, nga impablaak dagiti Saksi ni Jehova. Nangala iti dadduma pay a publikasion iti sanga nga opisina, a binasana met, ngem binusor ti pamiliana. Sumagmamano a tawen idi agad-adalen iti medisina, nakiuman iti sanga nga opisina ket nagkiddaw a mayadalan iti Biblia. Nabautisaran idi 1996 ket kalpasanna simrek iti amin-tiempo a ministerio. Agserserbida itan iti asawana iti sanga nga opisina.

‘Ti Puerto Rico ket adda iti “panagakar dagiti Saksi” iti sabali a pagilian,’ kuna ti Branch Committee coordinator a ni Ronald Parkin. Adda agarup 25,000 nga agibumbunannag iti isla, ket nagtalinaed ti bilang iti panaglabas dagiti tawen. Apay? Bueno, napattapatta nga iti Puerto Rico agarup 1,000 nga agibumbunannag ti immakar iti Estados Unidos, nga adu kadakuada ti umakar gapu iti ekonomia. Dinakamat ni Kabsat Parkin ti naisangsangayan a desision ti korte a mainaig ken Luis, maysa a 17 ti tawenna a Saksi nga addaan iti leukemia. Gapu ta agkedked nga agpayalison iti dara, naipan iti korte ti kasona. Kayat ti hues a personal a makasaritana ni Luis, isu a sinarungkaranna iti ospital. Nagsaludsod ni Luis kenkuana: “Apay a no nakaaramidak iti nadagsen a basol, ukomendak a kas nataengan, ngem no kayatko ti agtulnog iti Dios, tratuendak a kas menor de edad?” Naallukoy ti hues nga isu ket nataenganen a menor de edad ken kabaelannan ti agdesision a bukbukodna.

Kalpasan dagiti report a naggapu kadagiti adayo a pagilian, ininterbiu ni Harold Corkern, a kameng ti Branch Committee iti E.U., ti uppat a nabayagen nga adipen ni Jehova. Agdagupen iti 51 a tawen nga agserserbi ni Arthur Bonno iti amin a tiempo, ken agserserbi itan kas kameng ti Branch Committee idiay Ecuador. Limapulo ket siam a tawenen nga adda ni Angelo Catanzaro iti amin-tiempo a serbisio, a kaaduan kadagitoy ket kas agdaldaliasat a manangaywan. Nagturpos ni Richard Abrahamson iti Gilead School idi 1953, ken naaddaan iti pribilehio a mangimaton iti trabaho idiay Denmark iti 26 a tawen sakbay a nagsubli iti Brooklyn Bethel. Kamaudiananna, naragsakan ti amin a makangngeg ken ni Carey W. Barber a 96 ti tawenna, a nabautisaran idi 1921. Pitopulo ket walo a tawenen nga adda ni Kabsat Barber iti amin-tiempo a ministerio ken agserserbi a miembro ti Bagi a Manarawidwid sipud pay idi 1978.

Dagiti Makagutugot a Palawag

Nairaman iti tinawen a miting dagiti agsasaruno a mamagpanunot a palawag. Nagpalawag ni Kabsat Robert W. Wallen iti tema a “Maysa nga Ili Maipaay iti Naganna.” Datayo ti ili a maipaay iti nagan ti Dios, ken masarakandatayo iti nasurok a 230 a pagilian. Impaayannatayo ni Jehova iti “maysa a masanguanan ken maysa a namnama.” (Jeremias 29:11) Masapul nga itultuloytay nga itandudo ti Pagarian ti Dios, nga iranudtayo ti nagsayaat a makaliwliwa ken makapabang-ar a mensahe. (Isaias 61:1) Inngudo ni Kabsat Wallen a “sapay koma ta iti inaldaw, itultuloytayo ti agbiag a maitunos iti nagan a nakaawagantayo, dagiti Saksi ni Jehova.”​—Isaias 43:10.

Ti maudi a paset ti programa ket maysa a simposium ti tallo a miembro ti Bagi a Manarawidwid. Napauluan dayta iti “Itan ti Tiempo nga Agtalinaed a Siririing, Agtakder a Sititibker, ken Bumileg.”​—1 Corinto 16:13.

Umuna, impalawag ni Kabsat Stephen Lett ti tema nga “Agtalinaed a Siririing iti Daytoy Maudin nga Oras.” Inlawlawag ni Kabsat Lett a ti pannaturog ket maysa a sagut. Pabaruenna ti pigsatayo. Nupay kasta, pulos nga awan pagimbagan ti pannaturog iti naespirituan. (1 Tesalonica 5:6) No kasta, kasanotay a makapagtalinaed a siririing iti naespirituan? Dinakamat ni Kabsat Lett ti tallo a naespirituan a “tableta”: (1) Aduankayo ti aramiden iti trabaho ti Apo. (1 Corinto 15:58) (2) Sipapanunotkay koma iti naespirituan a kasapulanyo. (Mateo 5:3) (3) Agtulnogkayo iti naibatay-Biblia a pammatigmaan tapno makapagtignay a nainsiriban.​—Proverbio 13:20.

Impaay ni Kabsat Theodore Jaracz ti makagutugot a palawag a napauluan “Agtalinaed a Sititibker iti Sidong ti Pannubok.” Maipapan iti Apocalipsis 3:10, insaludsod ni Kabsat Jaracz: “Ania ti ‘oras ti pannakasubok’?” Dumteng dayta a pannakasubok “iti aldaw ti Apo,” ti aldaw a pagbibiagantayo ita. (Apocalipsis 1:10) Naisentro ti pannubok iti kangrunaan nga isyu​—addatayo kadi iti dasig ti naipasdeken a Pagarian ti Dios wenno iti dakes a sistema ti bambanag ni Satanas? Agingga a di pay nagngudo dayta nga oras ti pannakasubok, dumteng kadatayo dagiti pakasuotan ken pakarigatan. Agtalinaedtayo kadi a nasungdo ken ni Jehova ken iti organisasionna? Kinuna ni Kabsat Jaracz a ‘masapul nga iparangarang ti tunggal maysa kadatayo ti kasta a kinasungdo.’

Kamaudiananna, impaay ni Kabsat John E. Barr ti tema a “Bumilegkayo kas Naespirituan a Tao.” Maipapan iti Lucas 13:23-25, kinunana a masapul nga umagawatayo “a sumrek iti akikid a ruangan.” Adu ti napaay gapu ta saanda nga ikagkagumaan ti bumileg. Tapno agbalin a natataengan a Kristiano, masapul a sursuruentayo nga iyaplikar dagiti prinsipio ti Biblia iti amin a benneg ti biagtayo. Indagadag ni Kabsat Barr: “Siguradoak nga umanamongkayo nga itan ti tiempo a (1) pagtalinaedentayo a ni Jehova ti umuna ken kangrunaan iti amin; (2) bumileg; ken (3) umagawatayo a mangaramid iti pagayatan ni Jehova. Iti kastoy a pamay-an, makastrektayto iti akikid a ruangan nga agturong iti nakaskasdaaw a biag nga awan inggana.”

Idi dandanin agngudo ti tinawen a miting, adda maysa a saludsod a di pay nasungbatan: Ania ti teksto para iti 2002 a tawen serbisio? Nasungbatan dayta a saludsod iti simmaruno nga aldaw.

Kanayonan a Miting

Napalalo ti panangsegsegga iti bigat ti Domingo, idi mangrugin ti programa ti kanayonan a miting. Nangrugi dayta iti sumario ti linawas a panagadal iti Pagwanawanan, a sinaruno ti ababa a panangidatag iti sumagmamano a tampok ti tinawen a miting. Kalpasanna, naragsakan ti amin a dimngeg iti simmaruno a palawag iti teksto para iti tawen 2002: “Umaykayo kaniak, . . . ket pagin-awaenkayto.” (Mateo 11:28) Ti palawag ket naibasar iti mapagadalan nga artikulo a naipablaak idi agangay iti Disiembre 15, 2001, a ruar Ti Pagwanawanan.

Simmaruno iti dayta ti panangiburay dagiti delegado kadagiti kapadasanda iti espesial a kombension a “Dagiti Mannursuro iti Sao ti Dios” idiay Francia ken Italia idi Agosto 2001.c Kamaudiananna, kas tampok ti aldaw ti programa, dua a kangrunaan a palawag ti imparang dagiti bisita nga ispiker a naggapu iti Brooklyn Bethel.

Ti umuna ket napauluan iti “Situtured nga Agtalek ken Jehova Kadagitoy Napeggad a Tiempo.” Inlawlawag ti ispiker dagiti sumaganad a kangrunaan a punto: (1) Napateg a kanayon iti ili ti Dios ti situtured a panagtalek ken Jehova. Naglaon ti Biblia iti adu nga ehemplo maipapan kadagidiay nangiparangarang iti tured ken pammati iti sidong ti ibubusor. (Hebreo 11:1–12:3) (2) Mangipapaay ni Jehova kadatayo iti natibker a pangibatayan nga agtalek kenkuana a naan-anay. Dagiti aramidna ken ti Saona ti mangpatalged a maseknan kadagiti adipenna ken pulos a dinanto lipaten ida. (Hebreo 6:10) (3) Nangnangruna a kasapulan ita ti tured ken panagtalek. Kas impadto ni Jesus, ‘puntiriatayo ti pananggura.’ (Mateo 24:9) Tapno makapagibturtayo, kasapulan nga agpannuraytayo iti Sao ti Dios, agtalek nga adda kadatayo ti espirituna, ken situtured nga itultuloytayo nga iwaragawag ti naimbag a damag. (4) Ipakita dagiti kapadasan a sangsanguentayo ita ti ibubusor. Natignay ti amin bayat nga insalaysay ti ispiker ti panagibtur dagiti kakabsattayo idiay Armenia, Francia, Georgia, Kazakhstan, Russia, ken Turkmenistan. Pudno unay, itan ti tiempo nga ipakitatayo ti tured ken panagtalek ken Jehova!

Ti maudi nga ispiker inlawlawagna ti tema a “Makidanggaykayo nga Umabante iti Organisasion ni Jehova.” Adda sumagmamano a naintiempuan a punto a sinaklaw ti palawag. (1) Adu ti makapalpaliiw iti panagabante ti ili ni Jehova. Maiturturong iti atension ti publiko iti panangasabatayo ken dagiti kombensiontayo. (2) Nangipasdek ni Jehova iti maysa nga organisasion a nagkaykaysa. Idi 29 K.P., napulotan ni Jesus iti nasantuan nga espiritu tapno iyegna “ti amin a bambanag”​—dagidiay addaan iti nailangitan a namnama ken kasta met dagidiay addaan iti naindagaan a namnama​—iti nagkaykaysa a pamilia ti Dios. (Efeso 1:8-10) (3) Dagiti kombension ket naisangsangayan a parangarang ti internasional a panagkaykaysa. Nabatad daytoy kadagiti espesial a kombension a naangay idiay Francia ken Italia idi Agosto. (4) Napatalgedan ti maysa a makagutugot a resolusion idiay Francia ken Italia. Inranud ti ispiker ti sumagmamano a paset ti makagutugot a resolusion. Ti resolusion ket adda iti baba.

Iti ngudo ti maudi a palawag, binasa ti bisita nga ispiker ti makatukay a pakaammo nga insagana ti Bagi a Manarawidwid. Kastoy ti kuna ti dadduma a pasetna: “Itan ti tiempo nga agtalinaed a siririing ken agsalukag, a seggaan no ania ti pagtungpalan dagiti pasamak iti lubong. . . . Kayatmi nga idanon kadakayo ti naayat a pannakaseknan ti Bagi a Manarawidwid kadakayo ken iti intero nga ili ti Dios. Bendisionannakayo koma a sipaparabur iti amin-kararua a panagaramidyo iti pagayatanna.” Determinado ti ili ni Jehova iti sadinoman a lugar nga agtalinaed a siririing iti daytoy napeggad a tiempo ken agtultuloy nga umabante a situtured a kadua ti nagkaykaysa nga organisasion ni Jehova.

[Footnotes]

[Kahon/Dagiti Ladawan iti panid 29-31]

Resolusion

Idi Agosto 2001, naangay idiay Francia ken Italia dagiti espesial a “Dagiti Mannursuro iti Sao ti Dios” a Kombension. Naidatag kadagidiay a kombension ti maysa a makagutugot a resolusion. Kastoy ti linaon dayta a resolusion:

“KAS SAKSI NI JEHOVA, datayo amin a nagtataripnong iti daytoy ‘Dagiti Mannursuro iti Sao ti Dios’ a Kombension ket nakaawat iti pannursuro a makagunggona unay. Silalawag a naipakita ti gubuayan daytoy a pannursuro. Saan a tao ti nagtaudan daytoy a pannursuro. Nagtaud daytoy iti Daydiay dinakamat ti nagkauna a mammadto a ni Isaias kas ti ‘Naindaklan a Manangisuro’ kadatayo. (Isaias 30:20) Imutektekanyo ti pammalagip ni Jehova a nailanad iti Isaias 48:17: ‘Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.’ Kasanona nga ar-aramiden daytoy? Ti kangrunaan a pamay-an ket babaen ti kasaknapan a pannakaipatarus ken pannakaiwarasna a libro iti lubong, ti Biblia, nga iti dayta silalawag a naibaga kadatayo: ‘Amin a Kasuratan impaltiing ti Dios ken makagunggona.’​—2 Timoteo 3:16.

“Agkasapulan unay ita ti sangatauan iti kasta a makagunggona a pannursuro. Apay a maikunatayo ti kastoy? No usigentayo ti agbaliwbaliw ken nariribuk a kasasaad ti lubong, ania ti bigbigen dagiti managpanunot a tattao? Isu daytoy: Nupay minilion ti nasursuruan kadagiti pagadalan ti lubong, adda nakaay-ay-ay a kinakurang dagiti napaypayso a nasayaat a prinsipio ken pannakapaay a mangilasin iti naimbag ken dakes. (Isaias 5:20, 21) Adu ti di makaammo iti linaon ti Biblia. Nupay ipapaay ti teknolohia ti aglaplapusanan nga impormasion babaen dagiti kompiuter, sadino ti ayan ti sungbat dagiti napapateg a saludsod kas iti, Ania ti panggep ti biag? Kasanotayo a tarusan dagiti pasamak iti kaaldawantayo? Adda kadi natalged a namnama iti masanguanan? Pumudnonto met la ngata ti talna ken talged? Kanayonanna, masarakan kadagiti libraria ti nakaad-adu a libro maipapan iti gistay amin a tay-ak ti panagregget ti tao. Kaskasdi, ulit-uliten laeng ti sangatauan dagiti biddut iti napalabas. Kumarkaro ti krimen. Nagsubli dagiti sakit a naipagarup a napukawen, idinto a dagiti dadduma, kas iti AIDS, ket makapadanag ti panagwarasda. Umad-adu dagiti masinasina a pamilia. Madaddadael ti aglawlaw gapu iti polusion. Agpegpeggad ti talna ken talged gapu iti terorismo ken dagiti armas a mangpappapatay iti riniwriw a tattao. Umad-adu dagiti problema nga awan solusionna. Kadagitoy napeggad a tiempo, ania ti rumbeng nga akemtayo iti panangtulong kadagiti padatayo a tattao? Adda kadi pannursuro a makailawlawag iti makagapu ti kasasaad ti sangatauan ken saanna laeng nga ipakita ti dana nga agturong iti nasaysayaat a biag ita no di ket mangipaay pay iti naraniag, natalged a namnama iti masakbayan?

“Ti Nainkasuratan nga annongentayo ket ‘intayo ket mangaramidtayo iti ad-adalan kadagiti tattao iti amin a nasion, nga isurotayo kadakuada a tungpalenda ti amin a bambanag nga imbilin ni Kristo.’ (Mateo 28:19, 20) Imbilin ni Jesu-Kristo daytoy nga annongen kalpasan ti ipapatay ken panagungarna, idi naawatna ti isuamin nga autoridad idiay langit ken ditoy daga. Lab-awanna ti amin nga aramid nga itantandudo dagiti tattao. Iti panangmatmat ti Dios, rumbeng nga ipangpangrunatayo ti annongentayo a naipamaysa kadagiti naespirituan a kasapulan dagidiay mabisin iti kinalinteg. Adda naimbag a Nainkasuratan a rasontayo a sipapasnek a mangitungpal iti annongentayo.

“Kalikaguman daytoy a pagtalinaedentayo a kangrunaan iti biagtayo ti kasta a trabaho. Babaen ti pammendision ken tulong ti Dios, maaramidtayo dayta, iti laksid dagiti adu a makasinga nga impluensia, tuben, ken ibubusor nga aggapu kadagiti narelihiosuan ken napolitikaan nga elemento, a nairanta a manglapped iti panagrang-ay daytoy sangalubongan a programa a panangisuro. Makapagtalektayo ken manamnamatayo nga agtultuloyto a rumang-ay daytoy a trabaho ken mairingpas a naan-anay. Apay a makasigurotayo? Agsipud ta inkari ni Apo Jesu-Kristo nga addanto kadatayo iti inted-Dios nga annongentayo agingga iti panungpalan daytoy sistema ti bambanag.

“Asidegen nga agpatingga ti panagsagaba ti sangatauan. Masapul a maitungpal ti agdama nga annongentayo sakbay a dumteng ti panungpalan. Gapuna, datayo, kas Saksi ni Jehova, ikeddengtayo nga:

“Umuna: Kas dedikado a ministro, determinado nga itultuloytayo nga iyun-una dagiti interes ti Pagarian iti biagtayo ken agtultuloy a rumang-ay iti naespirituan. Tapno maaramidtayo dayta, masapul a maitunos dagiti kararagtayo iti sasao ti Salmo 143:10: ‘Isuronak a mangaramid iti pagayatam, ta sika ti Diosko.’ Kalikaguman daytoy ti panagbalin a naanep nga estudiante, nga ikagumaantay a basaen ti Biblia iti inaldaw, maaddaan iti personal a panagadal ken panagsukimat. Tapno makita ti amin a tao ti panagrang-aytayo, aramidentayo ti amin a kabaelantayo nga agsagana ken naan-anay a mabenepisiaran iti nateokratikuan nga edukasion a maipapaay kadagiti gimong ti kongregasion, asamblea sirkito, ken kadagiti distrito, nasional, ken internasional a kombension.​—1 Timoteo 4:15; Hebreo 10:23-25.

“Maikadua: Tapno masursuruannatayo ti Dios, iti laeng lamisaanna ti panganantayo ken ipangagtayo a siaannad ti pakdaar ti Biblia maipapan kadagiti makaallilaw a sursuro dagiti demonio. (1 Corinto 10:21; 1 Timoteo 4:1) Masapul nga agannadtayo tapno maliklikantayo dagiti makadangran a bambanag, a pakairamanan dagiti narelihiosuan a kinaulbod, ubbaw a panagrasrason, narugit a seksual nga ar-aramid, pornograpia, dakes a paglinglingayan, ken aniaman a di ‘mayalubog iti makapasalun-at a sursuro.’ (Roma 1:26, 27; 1 Corinto 3:20; 1 Timoteo 6:3; 2 Timoteo 1:13) Kas panangbigbig kadagiti ‘sagut a tattao,’ a kualipikado a mangisuro iti nasayaat, sipapasnek a raementayo ti panagbannogda ken naimpusuan a makitinnulongtayo kadakuada a mangitandudo kadagiti nadalus ken nalinteg a moral ken naespirituan a pagalagadan iti Sao ti Dios.​—Efeso 4:7, 8, 11, 12; 1 Tesalonica 5:12, 13; Tito 1:9.

“Maikatlo: Kas Kristiano a nagannak, naimpusuan nga ikagumaantayo nga isuro kadagiti annaktayo saan laeng a babaen ti sao no di pay ket babaen ti ulidantayo. Kangrunaan a pakaseknantayo ti panangtulong kadakuada manipud kinamaladagada a ‘mangammo iti nasantuan a sursurat a mamagsirib kadakuada maipaay iti pannakaisalakan.’ (2 Timoteo 3:15) Laglagipentayo a ti panangpadakkel kadakuada iti disiplina ken panangiturong-panunot ni Jehova ti mangipaay kadakuada iti kasayaatan a gundaway tapno mapasaranda ti kari ti Dios a ‘naimbag ti lak-amda ken makapagtalinaedda iti daga iti atiddog a tiempo.’​—Efeso 6:1-4.

“Maikapat: No maipasangotayo kadagiti pakaringgoran wenno nadagsen a parikut, umuna iti amin, ‘ipakaammotayo dagiti dawattayo iti Dios,’ nga agtalektayo a saluadannatayo ti ‘talna ti Dios a mangringbaw iti isuamin a panunot.’ (Filipos 4:6, 7) Magin-awaantayo iti sidong ti sangol ni Kristo. Gapu ta ammotayo a maseknan ti Dios kadatayo, ditay bumdeng a mangitaklin kenkuana kadagiti pakaringgorantayo.​—Mateo 11:28-30; 1 Pedro 5:6, 7.

“Maikalima: Kas ebkas ti panagyamantayo ken Jehova gapu iti pribilehio a mangisuro iti Saona, pabaruentayo ti panagreggettayo a ‘mangaramat a siuumiso iti sao ti kinapudno’ ken ‘naan-anay a mangitungpal iti ministeriotayo.’ (2 Timoteo 2:15; 4:5) Agsipud ta mabigbigtayo unay no ania ti nairaman, naimpusuan a tarigagayantayo a sapulen dagidiay maikari ken sukayen ti naimula a bin-i. Kanayonanna, pasayaatentayo ti panangisurotayo babaen ti sieepektibo a panangikondukta iti ad-adu pay a panagadal iti Biblia. Pagbalinennatay daytoy nga ad-adda a makapagtignay a maitunos iti pagayatan ti Dios a ‘maisalakan koma dagiti amin a kita ti tattao ken dumtengda iti umiso a pannakaammo iti kinapudno.’​—1 Timoteo 2:3, 4.

“Maikanem: Iti naglabas a siglo ken iti agdama, napasaran dagiti Saksi ni Jehova iti adu a pagilian ti nadumaduma a kita ti ibubusor ken panangidadanes. Ngem adda ni Jehova kadatayo. (Roma 8:31) Ipanamnama kadatayo ti di agbiddut a Saona a dinto agballigi ti ‘aniaman nga igam a mabukel maibusor kadatayo’ a manglapped, mangpabannayat, wenno mangpasardeng iti trabahotayo a panangikasaba iti Pagarian ken panangisuro. (Isaias 54:17) Iti man mainugot wenno iti nariribuk a panawen, ditay sumardeng a mangisao iti kinapudno. Determinadotayo a sigaganetget a mangibanag iti annongentayo a mangasaba ken mangisuro. (2 Timoteo 4:1, 2) Kalattayo nga iranud a naan-anay ti naimbag a damag ti Pagarian ti Dios kadagiti tattao iti amin a nasion. Iti kasta, agtultuloy a maaddaanda iti gundaway a makasursuro maipapan iti parabur a biag nga agnanayon iti nalinteg a baro a lubong. Kas nagkaykaysa a bunggoy dagiti mannursuro iti Sao ti Dios, determinadotayo nga agtultuloy a mangsurot iti ulidan ti Naindaklan a Mannursuro, ni Jesu-Kristo ken mangyanninaw kadagiti nadiosan a kualidadna. Aramidentay amin daytoy a pakaidayawan ken pakaitan-okan ti Naindaklan nga Instruktor ken Gubuayan ti Biagtayo, ni Jehova a Dios.

“Amin dagiti timmabuno iti daytoy a kombension a pabor iti pannakapatalged daytoy a resolusion, pangngaasiyo ta sumungbatkayo iti WEN!”

Idi naiturong ti maudi a saludsod ti resolusion kadagiti 160,000 a nagtataripnong iti tallo a kombension idiay Francia ken kadagiti 289,000 iti siam a kombension idiay Italia, nagallangogan ti sungbat a “Wen” iti adu a pagsasao nga inrepresentar dagiti delegado.