Kapitulo 17

Dagiti Kumbension​—Ebidensia ti Panagkakabsattayo

DAGITI kumbension nagbalindan a regular a paset ti moderno nga aldaw nga organisasion dagiti Saksi ni Jehova. Ngem dagiti nasional ken internasional a taripnong dagiti agdaydayaw ken Jehova nabayagdan a naangay sakbay pay ti maika-20 siglo.

Kinalikaguman ni Jehova nga amin a lallaki iti Israel idi ugma maummongda sadi Jerusalem para kadagiti tallo [a seasonal] a piesta kada tawen. Dadduma kadagiti lallaki intugotdat’ intero a pamiliada. Kinapudnona, ti Mosaico a Linteg kinalikagumanna nga isuamin a miembro ti pamilia​—lallaki, babbai, ken ubbing​—adda dagiti okasion a presenteda koma. (Ex. 23:14-17; Deut. 31:10-13; Luc. 2:41-43) Idi damo, ti timmabuno isu dagidiay agnanaed iti las-ud dagiti beddeng ti Israel. Idin, gapu ta nagadayon ti nagsaknapan dagiti Judio, dagiti timmabuno naggapudat’ adu a nasion. (Ara. 2:1, 5-11) Nagutugotda nga agtataripnong saan la a gapu ta ammada da Israel ken ni Abraham no di ket gapu ta binigbigda ni Jehova kas naindaklan a nailangitan nga Amada. (Isa. 63:16) Naragsak nga okasion dagidi a piesta. Nakatulong met dagitoy kadagidiay presente a mangisentrot’ isipda iti sao ti Dios tapno dida maigamer kadagiti inaldaw a ganuat ti biag di la ket ta malipatanda dagiti napatpateg a naespirituan a banag.

Iti kasta a wagas, dagiti kumbension dagiti Saksi ni Jehova iti moderno a panawen naisentro kadagiti naespirituan nga interes. Kadagiti napasnek a managpaliiw kadagitoy a kumbension imbungadat’ di mailibak nga ebidensia a dagiti Saksi nagkaykaysada gaput’ nalagda a singgalut ti Nakristianuan a panagkakabsat.

Nagkakauna a Kumbension Dagiti Estudiante ti Biblia

Nagin-inut a timmanor dagiti urnos a panagtataripnong dagiti Estudiante ti Biblia a naggaput’ nagduduma a siudad ken dagdaga. Saan a kas kadagiti kadaanan a grupo dagiti relihion, dagiti Estudiante ti Biblia, gapu kadagiti kumbensionda, sidadaras a naam-ammoda dagiti kapammatianda kadagiti dadduma a lugar. Idi damo, naangay dagitoy a kumbension sadi Allegheny, Pennsylvania, a nainaig iti tinawen a pananglaglagip iti ipapatay ti Apo. Idi 1891 espesipiko a naipakaammo nga adda maangay a “kumbension para iti panagadal iti Biblia ken pannakarambak ti Panglaglagip a Pangrabii ti Apo.” Iti sumuno a tawen, impablaak ti Watch Tower ti napatak a paulo a nangiyanunsio ti “KUMBENSION DAGITI MANAMATI, IDIAY ALLEGHENY, PA., . . . ABRIL 7 INGGAT’ 14, 1892.”

Saan pay a maiyaw-awis iti publiko dagidi nagkauna a kumbension. Ngem, idi 1892, adda presente nga 400 a tattao a pinaneknekandat’ pammatida iti subbot ken ti napasnek nga interesda iti trabaho ti Apo. Ti programa sinaklawnat’ lima nga aldaw a nabagas a panangadal iti Biblia ken dua pay a sabali nga aldaw a pammalakad a nakatulong kadagiti colporteur.

Kastoy ti kinunat’ maysa kadagidi damo unay a timmabuno kadagita a taripnong: “Adun a Kumbension ti natabunuak, ngem awan pay kas iti daytoy, a ti pagayatan ken plano ti Dios is-isu laeng ken naynay a topiko manipud agsapa aginggat’ rabii; idiay balay, idiay lansangan, iti gimong, iti pangaldaw ken isuamin a lugar.” No maipapan iti espiritu nga imparangarang dagiti delegado, kastoy ti insurat ti maysa a lalaki a taga Wisconsin, E.U.A.: “Nagustuak unay ti espiritu ti ayat ken nainkabsatan nga asi a kankanayon a naiparangarang.”

Adda nagbaliwan dagiti urnos ti tinawen a kumbension idi 1893. Tapno maaprobetsarda ti nalaka a pasahe ti tren idi naangay ti Columbian Exposition iti daydi a kalgaw, nagtataripnong dagiti Estudiante ti Biblia idiay Chicago, Illinois, nanipud Agosto 20 inggat’ 24. Daytoy ti immuna a kumbensionda iti ruar ti Pittsburgh. Nupay kasta, tapno maaramat ti tiempo ken kuarta iti kasayaatan a wagas para iti trabaho ti Apo, awanen naangay a dadakkel a kumbension iti sumagmamano a tawen.

Ngem, nanipud 1898, dagiti Estudiante ti Biblia kadagiti nagduduma a disso isudan ti nangiyusuat kadagiti lokal nga urnos para kadagiti asamblea, a tabunuan laeng dagiti agkakabangibang a lugar. Idi 1900 naangay ti 3 a dadakkel a kumbension nga inorganisar ti Sosiedad; ngem adda met 13 a lokal nga asamblea sadi Estados Unidos ken Canada a kaaduanna ket maysa la nga aldaw ken ad-adda a nainaig iti ibibisitat’ maysa kadagiti pilgrim. Idin immadut’ dagup dagita. Idi 1909 adda di kumurang 45 a lokal nga asamblea sadi Norte America malaksid kadagiti kumbension a nagserbian ni Kabsat Russell kadagiti espesial a tour a naangay kadagiti nagduduma a paset ti kontinente. Adda espesial a paset ti programa kadagiti saggaysa nga aldaw nga asamblea a nairanta a manggutugot a nangnangruna iti interes ti publiko. Addada timmabuno nga agsangagasut aginggat’ sumagmamano a ribo.

Iti kasumbangirna, dagidi dadakkel a kumbension, a naisangrat nga ad-adda kadagiti Estudiante ti Biblia, inggunamgunamda ti instruksion kadagidiay medio nataenganen iti dalan ti kinapudno. Para kadagidi a kumbension, dagiti naabangan a tren a napnot’ delegado naggapuda kadagiti dadakkel a siudad. No dadduma, dumanon iti 4,000 dagiti timmabuno, agraman sumagmamano a delegado iti Europa. Tiempo dagidit’ napudno a naespirituan a pannakapabang-ar a nagresultat’ narayrayray a regta ken ayat iti biang ti ili ni Jehova. Kinunat’ maysa a kabsat idi nagngudo ti kasta a kumbension idi 1903: “Diak isukat ti sangaribo a doliar iti imbag a nasagrapko ditoy a Kumbension;​—nupay kasanot’ panglawko.”

Dagiti pilgrim a kakabsat a naiparna dita a lugar nagdiskursoda kadagiti asamblea. Inkagumaan met ni Kabsat Russell nga atenderan ken agserbi iti programa dagiti lokal nga asamblea agraman daddadakkel a kumbension idiay Estados Unidos ken masansan iti Canada. Nawatiwat a panagbiahe dagidi. Kaaduan a biahe naangay idi iti ngudot’ lawas. Ngem idi 1909, maysa a kabsat a taga Chicago ti nagarkila ti sumagmamano a kotse ti tren a pagluganan dagidiay simmurot ken Kabsat Russell kadagiti nadumaduma a kumbension. Idi 1911 ken 1913, inarkila ti isu met la a kabsat ti isuamin a kotse ti tren a pagluganan dagiti ginasut a delegado kadagiti convention tours nga agpaut ti makabulan wenno nasursurok pay a pasiarenda ti makinlaud nga Estados Unidos ken Canada.

Di malipatan a kapadasan ti panagbiahe iti kasta a tren ti kumbension. Idi 1913, ni Malinda Keefer naglugan sadi Chicago, Illinois. Tawtawen kalpasanna, kinunana: “Nabigbigmi a dagus a maymaysakami a dakkel a pamilia . . . ket ti tren isut’ nagtaenganmi iti nakabulan.” Idi a ti tren panawannan ti estasion, dagidiay nabati kinantada ti “God Be With You Till We Meet Again,” nga ipaypayapaydat’ kallugong ken panioda agingga a didan makita ti tren. Innayon ni Sister Keefer: “Tunggal agsardengkami adda maang-angay a kumbension​—kaaduan ket agtallo nga aldaw, ket timmabunokamit’ maysa nga aldaw iti kada kumbension. Kada panagsardeng nangted ni Kabsat Russell ti dua a diskurso, maysa para kadagiti kakabsat no iti malem, sa maysanto pay para iti publiko no iti rabii iti tema nga ‘Iti Labes ti Tanem.’”

Kadagiti dadduma met a daga umad-adu idit’ bilang dagiti asamblea. Masansan a bassitda laeng. Agarup 15 ti timmabuno iti damo sadi Norway, idi 1905; ngem punganayna daydin. Innem a tawen kalpasanna, idi binisitan Kabsat Russell ti Norway, inkagumaanda unay nga awisen ti publiko, ket napattapatta a 1,200 ti timmabuno iti dayta. Idi 1909, idi nakikumbension sadi Scotland, agarup 2,000 ti diniskursuanna sadi Glasgow sa adda pay 2,500 sadi Edinburgh iti makaallukoy a tema a “Ti Mannanakaw Idiay Paraiso, ti Baknang Idiay Impierno, ken ni Lazaro iti Barukong ni Abraham.”

No agngudo dagidi nagkauna a kumbension, naangay kadagiti kakabsat ti makunkuna a pagdadayaan iti ayat, nga ipariknada ti Nakristianuan a panagkakabsat. Aniat’ nairaman kadagitoy a “pagdadayaan iti ayat”? Kas ehemplo, aglinea dagiti nagdiskurso a siiggem kadagiti naipinggan a nagergerret a tinapay, santo agpila dagiti timmabuno, mangandat’ tinapay, agaalamanoda, sada kantaen ti “Blest Be the Tie That Binds Our Hearts in Christian Love.” Masansan nga agluluadat’ rag-o bayat nga agkankantada. Idin, gapu ta umaduda, inikkatdan ti panagaalamano ken pannangan ti tinapay ngem rikepandat’ kanta ken kararag ken, masansan, naunday a panagpalakpak a pangyebkasdat’ apresasionda.

Panangiyusuat ti Sangalubongan a Panangiwaragawag iti Pagarian

Ti immuna a dakkel a kumbension kalpasan ti Gubat Sangalubongan I naangay sadi Cedar Point, Ohio (idiay Lake Erie, 96 kilometro iti laud ti Cleveland), nanipud Setiembre 1 inggat’ 8 idi 1919. Idi natay ni Kabsat Russell, adda dagidi prominente a kameng ti organisasion nga immikay. Grabet’ pannakasuot dagiti kakabsat. Nasapsapa idi 1919, naluk-atan ti presidente ti Sosiedad ken dagiti kakaduana manipud sinasaur a pannakaibaludda. Gapuna narayray ti panagsegseggada. Nupay medio bassit ti timmabuno iti umuna nga aldaw, adu pay a delegado ti simmangpet a naglugan kadagiti naabangan a tren iti malem. Nasnasdaaw dagidi hotel a nangitukon ti pagdagusan dagiti delegado. Nagboluntario da R. J. Martin ken A. H. Macmillan (agpada a kalukluk-at iti pagbaludan). Timmulongda a nagituding kadagiti kuarto inggat’ labes ti ngalay ti rabii, ket da Kabsat Rutherford ken dadduma pay naragsakanda a timmulong, a para awit kadagiti maleta ken nangiturong kadagiti kakabsat kadagiti kuartoda. Makatignay idit’ espiritu ti kinarayray kadakuada amin.

Adda 2,500 a ninamnamada a tumabuno. Nupay kasta, ti kumbension linab-awanna amin a sineggaanda. Idi maikadua nga aldaw, napuseken ti auditorium ket nausar dagiti kanayonan a kuarto. Idi kaskasdi a kurang, naangayen dagiti sesion idiay ruar iti sirok dagiti narangpaya a kaykayo. Agarup 6,000 nga Estudiante ti Biblia ti adda idi a naggaput’ Estados Unidos ken Canada.

Para iti kangrunaan a palawag iti Domingo, di kumurang 1,000 ti taga ruar nga immay, a nangpaadut’ timmabuno nga agdagup 7,000, a diniskursuan ti nagpalawag idiay ruar nga awan mikropono wenno amplifier. Iti dayta a palawag, a “Ti Namnama ti Masmasnaayan a Sangatauan,” inlawlawag ni J. F. Rutherford a ti Mesianiko a Pagarian ti Dios isut’ mangrisut kadagiti problema ti sangatauan, ket impakitana pay a ti Liga de Naciones (a maipaspasngay idi ken inanamonganen dagiti klero) saan a pulos nga isut’ napolitikaan nga ebkas ti Pagarian ti Dios. Ti Sandusky Register (lokal a diario) linaonnat’ atiddog a report ti miting publiko, agraman gupgop ti aktibidad dagiti Estudiante ti Biblia. Naipaw-it dagiti kopia dayta a diario kadagiti periodiko ti intero nga Estados Unidos ken Canada. Ngem ad-adu pay a nasken a banag ti nagresulta itoy a kumbension ngem iti naipablaak.

Ti talaga a tampok ti intero a kumbension isut’ diskurso ni Kabsat Rutherford a “Palawag Kadagiti Kadua a Trabahador,” nga idi agangay naipablaak babaen iti tema a “Panangibunannag iti Pagarian.” Naiturong kadagiti mismo nga Estudiante ti Biblia daytoy. Iti dayta a diskurso nailawlawag ti kayulogan dagiti letra a G A a nagparang iti programa ti kumbension ken kadagiti nadumaduma a disso sadiay pagkumbensionan. Nayanunsio ti pannakaipablaak ti baro a magasin, ti The Golden Age, nga usaren a mangiturong iti atension dagiti tattao iti Mesianiko a Pagarian. Kalpasan a binalabalana ti pannakayusuat dayta a trabaho, kinuna ni Kabsat Rutherford kadagiti dimngeg: “Malukluktan kadakayo ti ridaw ti oportunidad. Serkenyo a dagus dayta. Laglagipenyo a bayat nga ar-aramidenyo daytoy, saankayo nga ahente ti magasin nga agdawdawat laeng iti kontribusion, no di ket embahadorkayo ti Ari dagiti ar-ari ken Apo dagiti appo, nga ibumbunannagyo kadagiti tattao iti nadayaw a wagas daytoy um-umay a Nabalitokan a Periodo, ti nadayag a pagarian ti Apo ken Maestrotayo, nga isut’ nangnamnamaan ken inkarkararag dagiti pudno a Kristiano iti adun a siglo.” (Kitaenyo ti Apocalipsis 3:8.) Idi inimtuod ti nagdiskurso no mano ti mayat a makiraman itoy a trabaho, makapabileg ti nabuya a reaksionda. Dagiti 6,000 a timmabuno, naggigiddanda a timmakder. Iti sumuno a tawen, nasurok 10,000 ti agserserbin iti tay-ak. Ti intero a kumbension pinagkaykaysa ken pinasalibukagna dagiti timmabuno.

Tallo a tawen kalpasanna, idi 1922, sabali pay a di malipatan a kumbension ti naangay sadi Cedar Point. Siam nga aldaw a programa daydi, nanipud Setiembre 5 inggat’ 13. Malaksid kadagiti delegado ti Estados Unidos ken Canada, adda dagiti naggaput’ Europa. Sangapulo a pagsasao ti nausar kadagiti gimong. Agarup 10,000 ti promedio ti inaldaw a timmabuno; ket no iti palawag a “Minilion nga Agbibiag Itan Didanto Pulos Matayen,” nagadu a taga ruar ti immay ket dandani nagdoble ti dagup dagiti timmabuno.

Dagidi Estudiante ti Biblia saanda a timmabuno iti kumbension a sipapanunot iti inda panagtrabaho ditoy daga iti unos ti adu a dekada iti masanguanan. Kinapudnona, impagarupda a daydin ti maudi a dakkel a kumbension sakbay “ti pannakaispal ti iglesia . . . nga agturong iti nailangitan a paset ti pagarian ti Dios, ket kinapudnona iti daydiay aktual ken mismo a saklang ti Apotayo ken ti Diostayo.” Ngem uray pay kasanot’ kaababa ti tiempo, ti panangaramid iti pagayatan ti Dios isut’ kangrunaan a nakaseknanda. Gapu ta sipapanunotda iti dayta, iti Biernes, Setiembre 8, indiskurso ni Kabsat Rutherford ti nakalalagip a palawag a “Ti Pagarian.”

Sakbay daytoy, adda dadakkel a wagayway a nakaisuratan dagiti letra nga ADV a nagduduma a lugar ti nakaibitinanda. Idi madamat’ palawag bimmatad ti kayulogan dagita a letra idi indagadag ti nagdiskurso: “Agbalinkayo a matalek ken pudno a sasaksi ti Apo. Umabantekayo iti dangadang agingga nga aglangalang ti amin a ramramit ti Babilonia. Ipaduyakyakyo ti mensahe iti nakasaksaknap. Masapul a maammuan ti lubong a ni Jehova ket Dios ken ni Jesu-Kristo ti Ari dagiti ar-ari ken Apo dagiti appo. Daytoyen ti aldaw kadagiti isuamin nga aldaw. Adtoy, agturturayen ti Ari! Dakayo dagiti agipablaak nga instrumentona. Gapuna ipablaakyo, ipablaakyo, ipablaakyo, ti Ari ken ti pagarianna.” Iti dayta a kanito adda dakkel a wagayway, 36 a pie ti kaatiddogna, a naiyukrad iti sanguanan dagiti timmabuno. Naisurat ti makatukay a replan nga “Ipablaak “[iti Ingles: “Advertise,” nga inrepresenta ti ADV”] ti Ari ken ti Pagarian.” Dramatiko a kanito daydi. Nakapigpigsat’ palakpak dagiti timmabuno. Ni lumakayen a Kabsat Pfannebecker, a miembro ti orkestra ti asamblea, intayagna ti biolinna sana impukkaw iti nakamimminar a bengngat ti Aleman: “Ay ket wen ah! Aramidentay dayta itan, di ngamin?” Ket kastat’ inaramidda.

Uppat nga aldaw kalpasanna, madama pay lat’ kumbension, personal a nakiraman ni Kabsat Rutherford a kaduana dagiti dadduma a delegado a nangiwaragawag iti Pagarian iti binalaybalay a sinaknapandat’ 72 kilometro iti aglawlaw ti nagkumbensionan. Saan a ditat’ nagpatinggaanna. Ti trabaho a panangiwaragawag ti Pagarian nabileg ti panagdur-asna a dimmanon iti intero a globo. Daydi a tawen nasurok 17,000 a naregta a trabahador iti 58 a daga ti rimmaman iti panangasaba. Adu a dekada kalpasanna, ni George Gangas, a presente iti daydi a kumbension ken idi agangay nagbalin a kameng ti Bagi a Manarawidwid, kinunana maipapan iti dayta a programa sadi Cedar Point: “Naimaldit a permanente dayta iti isip ken pusok, a diakto pulos malipatan iti unos ti panagbiagko.”

Dagiti Napateg a Pasamak iti Naespirituan nga Irarang-ay

Isuamin dagidi a kumbension nangteddat’ bang-ar ken instruksion iti Sao ti Dios. Ngem dadduma kadagitat’ nalaglagip iti adu a dekada gapu ta nagbalinda a napateg a pasamak iti naespirituan.

Pito kadagitoy ti naangay, nagsasagadsad a tinawen, nanipud 1922 inggat’ 1928, sadi Estados Unidos, Canada, ken Britania. Ti maysa a makagaput’ kinapateg dagitoy a kumbension isu dagidiay nabileg a resolusion a naanamongan, ket amin dagitoy a pito nailistada iti kahon iti sumaganad a panid. Nupay mammano pay ti Saksi idi, nakaiwarasdat’ 45 milion a kopia ti maysa kadagitoy a resolusion, ken 50 a milion met iti sabali, kadagiti adu a pagsasao iti intero a lubong. Dadduma dagiti naibrodkas iti internasional a hookup ti radio. Iti kasta karkarnat’ naited a panangasaba.

Kaskasdi adda sabali a historiko a kumbension a naangay sadi Columbus, Ohio, idi 1931. Iti Domingo, Hulio 26, kalpasan a nangngegandat’ Nainkasuratan a salaysay, inanamongan dagiti Estudiante ti Biblia ti baro a nagan​—dagiti Saksi ni Jehova. Anian a maikanatad! Adtoy ti nagan nga iturongnat’ kangrunaan nga atension iti mismo a Namarsua ket sibabatad nga itudona ti responsabilidad dagidiay agdaydayaw kenkuana. (Isa. 43:10-12) Ti inda pananganamong iti dayta a nagan isut’ nangrubrob nga ad-adda manen ngem idi iti kinaregta dagiti kakabsat a mangiwaragawag iti nagan ti Dios ken ti Pagarianna. Kas inyebkas ti surat ti maysa a Saksi a Danes iti daydi a tawen: “Ah, anian a nagdayag a nagan, dagiti Saksi ni Jehova, wen, sapay koma ta agbalintay amin a kasta.”

Idi 1935 sabali manen a nakalalagip a kumbension ti naangay, sadi Washington, D.C. Iti maikadua nga aldaw dayta a kumbension, Biernes, Mayo 31, insalaysay ni Kabsat Rutherford ti dakkel nga umariwekwek, wenno dakkel a bunggoy, a tinukoy ti Apocalipsis 7:9-17. Iti nasurok a kaguduat’ siglo, pinadas dagiti Estudiante ti Biblia nga itudo a siuumiso no asino dayta a grupo ngem dida nagballigi. Itan, ta dimtengen ti tiempo ni Jehova, sigun iti lawag dagiti mapaspasamak idin, nailawlawag a dagitoy ket tattao a mangnamnama nga agbiag nga agnanayon ditoy daga a mismo. Daytoy a pannakatarus nangted iti baro a kinapateg ti trabaho a panagebanghelio ket Nainkasuratan ti panangilawlawagna iti dakkel a panagbalbaliw a mangrugrugi idin a maangay no iti porma ti moderno nga aldaw nga organisasion dagiti Saksi ni Jehova.

Daydi kumbension sadi St. Louis, Missouri, idi 1941 malaglagip dagiti adu a presente iti panglukat a palawag a napauluan “Kinatarnaw,” nga intampok ni Kabsat Rutherford ti dakkel nga isyu a sarsarangten amin nga intelihente a parsua. Nanipud iti daydi palawag nga “Agturay Kadagiti Umili,” idi 1928, dagiti isyu a pinarnuay ti yaalsa ni Satanas naulit-ulitda a naitampok. Ngem itan nailawlawag a “ti kangrunaan nga isyu a pinataud ti natangsit a karit ni Satanas isu idi ken isu ita ti SAPASAP A PANANGITURAY.” Ti panangapresiarda iti dayta nga isyu ken ti kinapateg ti panangtaginayon iti kinatarnawda ken Jehova kas Sapasap a Soberano isut’ nabileg a nanggutugot iti kabibiag dagiti adipen ni Jehova.

Idi ngalay ti Gubat Sangalubongan II, idi 1942, idi nga impato dagiti dadduma a malmalpasen ti trabaho a panangaskasaba, indiskurso ni N. H. Knorr, kabbaro a nadesignaran a presidente ti Watch Tower Society, ti palawag publiko iti kumbension, a “Talna​—Agpaut Kadi?” Ti nailawlawag iti dayta a diskurso maipapan iti “kolor eskarlata nga atap nga animal” iti Apocalipsis kapitulo 17 linuktanna ti panangmatmat dagiti Saksi ni Jehova iti periodo kalpasan ti Gubat Sangalubongan II a maaddat’ oportunidad a mangiturong ti ad-adu pay a tattao iti Pagarian ti Dios. Daytoy ti nangpagagar iti sangalubongan a kampania a kalpasan dagiti tawen dimmanon itan iti 235 a daga ket kaskasdi a di pay la nalpas.

Sabali pay a napateg a pasamak ti naragpat iti daydi kumbension sadi Yankee Stadium ti Nueva York idi Agosto 2, 1950. Idi nga okasion dagiti nasdaaw ken naragsakan a timmabuno isudat’ damo nga immawat iti New World Translation of the Christian Greek Scriptures. Dagiti dadduma a paset ti New World Translation nairuarda a pasempaset bayat ti simmaruno a dekada. Daytoy moderno a pagsasao ti pannakaiyulog ti Sagrado a Kasuratan insublina ti personal a nagan ti Dios iti nainkalintegan a lugar iti Saona. Ti kinasungdona kadagiti linaon dagiti orihinal a pagsasao ti Biblia dakkel ti naibadangna iti mismo a panagadal dagiti Saksi ni Jehova iti Kasuratan agraman iti trabahoda a panagebanghelio.

Iti aldaw sakbay ti maudi nga aldaw dayta a kumbension, ni F. W. Franz, a bise presidente idit’ Watch Tower Society, diniskursuanna dagiti timmabuno maipapan iti “Baro a Sistema Dagiti Bambanag.” Iti adun a tawtawen namati dagiti Saksi ni Jehova nga uray pay kasakbayan ti Armagedon dadduma kadagiti adipen ni Jehova sakbay ni Kristo mapagungardanto kadagiti natay kas piprinsipe ti baro a lubong, a kaitungpalan ti Salmo 45:16. Agasenyo, ngarud, ti epektona kadagiti nagadu a dimngeg idi kinuna ti nagbitla: “Maragsakan kadi daytoy nga internasional nga asamblea a mangammo a ditoy, ita a rabii, iti nagtetengngaantayo, adda dagiti adu a manamnama a prinsipe ti baro a daga?” Naaddat’ natbag ken napaut a panagpalpalakpak a buyogen ti naragsak a panagiikkis. Idin impakita ti nagbitla a ti termino ti Biblia a naipatarus kas “prinsipe” agraman ti rekord ti kinamatalek dagiti adu a kameng ti “sabsabali a karnero” iti moderno a tiempo palubosannat’ panamatitayo nga adda dagiti agbibiag itan a piliento ni Jesu-Kristo nga agserbi kas piprinsipe. Inlawlawagna met, nupay kasta, a dinanto kayat a sawen daytoy ti pannakaipatay ti titulo kadagidiay agserbi a kasta. Idi nagngudon ti diskursona, indagadagna: “Umabantetay, ngarud, a sangsangkamaysa a di maisin, kas maysa a Baro a Lubong a sosiedad!”

Aduda pay dagiti nakapatpateg a diskurso kadagiti kumbension dagiti Saksi ni Jehova: Idi 1953, ti “Baro a Lubong a Sosiedad Maraut Manipud Adayo nga Amianan” isut’ makapainteres a pannakasalaysay ti kayulogan ti iraraut ni Gog ti Magog a dineskribir ti Ezequiel kapitulo 38 ken 39. Iti dayta met la a tawen, ti diskurso a “Panangpunno ti Balay iti Dayag” pinennekna dagidi dimngeg bayat a naimatanganda ti makitkita nga ebidensia ti kaitungpalan ti kari ni Jehova, idiay Haggeo 2:7, a dagiti napateg a banag, dagiti makaay-ayo a banag, manipud kadagiti amin a nasion yegna ida iti balay ni Jehova.

Ti nagpaiduma unay a kumbension iti moderno a tiempo, nupay kasta, ket naangay sadi Nueva York idi 1958, idi a nasurok nga apagkapat ti milion a tattao ti nangpusek kadagiti kadakkelan nga estadium a dimngeg iti diskurso nga “Agturayen ti Pagarian ti Dios​—Asidegen Aya ti Panungpalan ti Lubong?” Dagiti delegado naggapudat’ 123 a daga, ket dagiti report nga impadamagda timmulong kadagiti kumbensionista a mangpalagda kadagiti singgalut ti internasional a panagkakabsat. Tapno matulongan ti naespirituan nga irarang-ay dagidi timmabuno ken adda mausarda a mangisuro kadagiti sabali, 54 a pagsasao dagiti publikasion a nairuar iti dayta nagpaiduma a kumbension.

Idi 1962, ti serye dagiti palawag iti tema a “Panagpasakop Kadagiti Nangatngato a Turay” kinorehirna ti pannakatarus dagiti Saksi idi no iti kaipapanan ti Roma 13:1-7. Idi 1964, ti “Ilalabas Manipud Patay Agturong iti Biag” ken “Rummuar Kadagiti Tanem Tapno Agungar” pinalawadat’ pannakaawatda iti dakkel nga asi ni Jehova kas naiparangarang iti probision a panagungar. Ket adu, nakaad-adu pay ti kasta a tampok ti kumbension a naisitar.

Tinawen addada pinullo ribo, wen, ginasgasut a ribo a kabbaro a tumabuno kadagiti kumbension. Nupay dagiti impormasion a maidatag saan a kanayon a kabbaro kadagiti kaaduan a kameng ti organisasion, kadarato luktanna kadagiti kabbaro a timmabuno ti pannakatarusda iti nadibinuan a pagayatan a talaga a pakaragsakanda. Makita ken matignayda a mangikut kadagiti oportunidad ti panagserbi a mangbalbaliw iti intero a kabibiagda.

Kadagiti adu a kumbension naisentrot’ atension iti kayulogan dagiti sumagmamano a libro ti Biblia. Kas pangarigan, idi 1958 ken idi manen 1977, nairuar dagiti libro a nairanta a mangisalaysay kadagiti padto nga inrekord ni propeta Daniel maipapan iti panggep ti Dios a maaddaan maymaysa a sangalubongan a gobierno a ni Kristo kas Ari. Idi 1971, naasikaso ti libro ni Ezequiel, a naigunamgunam ti nadibinuan a deklarasion a, “Dagiti nasion maammuandanto a siak ni Jehova.” (Ezeq. 36:23) Idi 1972, detaliado a naamiris dagiti padto nga inrekord da Zacarias ken Haggeo. Idi 1963, 1969, ken 1988, nawatiwat ti pannakasalaysay dagiti nakaay-ayat a padto ti Apocalipsis, a sipapatak nga impakaunana ti pannakatnag ti Babilonia a Dakkel ken ti um-umay a nadayag a baro a langlangit ken baro a daga a kukua ti Dios.

Nagduduma a tema ti intampok dagiti kumbension​—Irarang-ay ti Teokrasia, Nadalus a Panagdaydayaw, Nagkaykaysa a Managdaydayaw, Nabibileg a Ministro, Bungbunga ti Espiritu, Panagaramid iti Adalan, Naimbag a Damag Para Kadagiti Amin a Nasion, Nadibinuan a Nagan, Nadibinuan a Kinasoberano, Sagrado a Serbisio, Naballigi a Pammati, Kinasungdo iti Pagarian, Manangsalimetmet iti Kinatarnaw, Agtalek ken Jehova, Nadiosan a Debosion, Managawit iti Lawag, ken adu pay. Tunggal maysa kadagitoy timmulongdat’ naespirituan nga irarang-ay ti organisasion ken dagidiay kamengna.

Mangpagagar iti Trabaho a Panagebanghelio

Dagiti dadakkel a kumbension, agraman babassit nga asamblea ket gubuayan ti napalalo a pammaregta iti pannakaikasabat’ naimbag a damag. Dagiti diskurso ken demostrasion impaaydat’ praktikal nga instruksion. Dagiti kapadasan a tinagiragsakda iti ministerio idiay tay-ak agraman dagiti impadamag dagiti kabbaro unay a natulongan a nangammo iti kinapudno ti Biblia naynay nga adda iti programa. Sa, ti aktual a panagserbit’ tay-ak a nayurnos bayat dagiti kumbension iti adu a tawen nakagungguna unay. Dakkel a panangsaksi ti intedna iti siudad a pagkumbensionan ken gubuayan ti napalalo a pammaregta kadagiti Saksi a mismo.

Ti panagserbit’ tay-ak nagbalin a paset ti nayeskediol nga aktibidad ti kumbension sadi Winnipeg, Manitoba, Canada, idi Enero 1922. Nagbalin met a paset dayta ti dakkel a kumbension a naangay sadi Cedar Point, Ohio, idi tartaraudi dayta a tawen. Kalpasan daydi, naiyugalin nga adda aldaw, wenno paset ti aldaw wenno paset ti sumagmamano nga aldaw, a dagiti delegado makiramanda nga agkakadua iti panangasaba idiay mismo a siudad ti kumbension wenno iti kabangibangna. Kadagiti dadakkel a metropolitan, impaayna kadagiti umili a mammano a makasarita dagiti Saksi ti oportunidad a dumngeg iti naimbag a damag maipapan iti panggep ti Dios a mangted iti agnanayon a biag kadagiti managayat iti kinalinteg.

Idiay Denmark ti damo a kasta nga aldaw a panagserbi no tiempo ti kumbension nayurnos idi 1925, idi nga 400 inggat’ 500 ti nagtataripnong sadi Nørrevold. Kaaduan kadagidi 275 a rimmaman iti panagserbit’ tay-ak dita a kumbension, damoda unay. Agam-amak idi dagiti dadduma. Ngem idi napadasandan, nagbalinda metten a narayray nga ebanghelisador idiay teritoriada. Kalpasan daydi a kumbension agingga a nalpas ti Gubat Sangalubongan II, adut’ naangay idiay Denmark a maysa nga aldaw nga asamblea a panagserbi, ket naawis dagiti kakabsat manipud kabangibang nga il-ili. Nakabatbatad ti rimmubrob a regtada bayat a nakiramanda a nagkaykaysa iti ministerio sada nagtataripnong a dimngeg kadagiti palawag. Dagiti umarngi nga asamblea a panagserbi​—ngem dua nga aldaw ti kapautda​—naangayda sadi Britania ken Estados Unidos.

Kadagiti daddadakkel a kumbension masansan a dakkel ti saknapan ti panagserbi dagiti delegado idiay tay-ak. Nangrugi idi 1936, naiyawis dagiti palawag publiko ti kumbension babaen ti naurnos a panagparada dagiti Saksi nga addaan kadagiti plakard sada nangiwaras kadagiti handbill. (Dagidiay a plakard maaw-awaganda idit’ “sandwich signs” ngamin adda plakard iti sango ken likud dagiti agibumbunannag.) Adda tiempo a sangaribu wenno ad-adu pay a Saksi ti nakiraman iti kasta a parada ti tunggal kumbension. Dagiti met dadduma nakiramanda a nagbalaybalay, nga inawisda dagiti isuamin nga umay dumngeg iti programa. Makaparegta unay kadagiti indibidual a Saksi ti makipagtrabaho kadagiti sabali ken iti pannakakitada kadagiti ginasut, rinibo pay ketdi, a dadduma a Saksi a makiraman kadakuada iti ministerio. Maigiddato, dagiti umili nga agnanaed iti nalawa a kaparanget a lugar nadamagda nga adda dagiti Saksi ni Jehova a bimmisita dita nga ili; ket nagundawayan dagiti umili a denggen a mismo no aniat’ isursuro dagiti Saksi ken napaliiwda a mismo ti konduktada.

Ad-adu nga amang ti nakangngeg kadagiti palawag iti kumbension ngem dagidiay makitkita a timmabuno. Idi a ni Kabsat Rutherford, idiay kumbension ti Toronto, Canada, idi 1927, indiskursona ti palawag a “Wayawaya Kadagiti Inilin-ili,” imbrodkas ti nangaramid-historia a konektado a 53 nga estasion a dimmanon iti nalawa nga internasional a dagup dagiti dumdumngeg kadagiti radio. Iti sumuno a tawen, nanipud Detroit, Michigan (E.U.A.), ti palawag nga “Agturay Kadagiti Umili” imbrodkas ti doblet’ kaaduna nga estasion, ket ti radio a shortwave indanonna dayta kadagiti dumdumngeg sadi Australia, New Zealand, ken Sud Africa.

Idi 1931, dagiti dadakkel a network ti radio dida kayat ti makibinnadang iti plano a panangibrodkas iti diskurso ni Kabsat Rutherford iti kumbension; gapuna ti Watch Tower Society, babaen iti tulong ti American Telephone and Telegraph Company, pinormana ti bukodna a network dagiti 163 nga estasion, agraman ti kadakkelan a konektadot’ telepono a network a naibrodkas idi a tiempo, tapno ipangngegna ti mensahe a “Ti Pagarian, ti Namnama ti Lubong.” Sa, nasurok 300 a sabali pay nga estasion iti adu a paset ti lubong ti nangibrodkas iti programa babaen kadagiti plaka.

Iti daydi kumbension sadi Washington, D.C., idi 1935, indiskurso ni Kabsat Rutherford ti tema a “Gobierno,” a sibibileg nga inlawlawagna a ti Pagarian ni Jehova iti sidong ni Kristo dandaninan suktan amin a natauan a gobierno. Nasurok 20,000 idiay Washington Auditorium ti dimngeg. Imbrodkas met ti radio ken lineat’ telepono dayta a diskurso iti intero a globo, a dimmanon sadi Central ken Sud America, Europa, Sud Africa, dagiti isla ti Pacifico, ken dagdaga ti Oriente. Dagidiay nakangngeg itoy a palawag iti kastoy a pamay-an mabalin a minilion. Adda dua a nalatak a diario ti Washington a tinallikudandat’ kontratada a mangipablaak iti diskurso. Ngem nagusar dagiti kakabsat kadagiti lugan nga addaan kadagiti loudspeaker a nagwaras kadagiti 3 a deppaar ti siudad ken 40 pay a lugar iti likmut ti Washington, ket kadagita naibrodkas iti napattapatta a 120,000.

Ket, idi 1938, nanipud Royal Albert Hall, sadi Londres, Inglaterra, ti napranka a diskurso a “Sanguen Dagiti Kinapudno” nangngegan kadagiti 50 a siudad a pagkumbensionan iti intero a globo, nga agarup 200,000 ti dagup dagiti timmabuno. Sa, nagadu pay ti nakangngeg iti diskurso babaen iti radio.

Gapuna, nupay mammanot’ Saksi ni Jehova idi, dakkel ti nagapuanan dagiti kumbensionda no iti pannakaiwaragawag ti mensahe ti Pagarian.

Dagiti Kumbension ti Europa Kalpasan ti Gubat

Kadagidi timmabuno, adda dagiti kumbension a naisangayan kadakuada no maidilig kadagiti sabali. Kastat’ kasasaad dagiti naangay sadi Europa apagleppas ti Gubat Sangalubongan II.

Maysa kadagita a kumbension ti naangay sadi Amsterdam, Netherlands, idi Agosto 5, 1945, awan pay uppat a bulan kalpasan a naluk-atan dagiti Saksi manipud kampo konsentrasion dagiti Aleman. Ninamnamadat’ 2,500 a delegado; 2,000 kadagitoy ti makasapul iti pagdagusan. Tapno adda lugar a pagturoganda, dagiti lokal a Saksi nagiyap-apdat’ garami iti suelo dagiti balayda. Dagiti delegado nagdudumat’ naggapuanda ket nagsasabalit’ naglugananda​—bapor, trak, bisikleta, ket dagiti dadduma nakiluganda.

Iti dayta a kumbension nagkakatawa ken nagsasangitda, nagkanta, ken nagyamandat’ kinaimbag ni Jehova. Kas kinuna ti maysa a timmabuno: “Nariknadat’ di maartapan a rag-o ti teokratiko nga organisasion a kalukluk-at kadagiti kawarna!” Sakbay ti gubat, kumurang a 500 dagiti Saksi sadi Netherlands. Adda 426 a naaresto ken naibalud; kadagitoy, 117 ti natay gaput’ pannakaidadanes. Anian a rag-o ta idi asamblea adda dagidiay nakabiruk kadagiti ay-ayatenda nga impatoda a natayen! Daddumat’ nagarubos ti luada gapu ta awan mabirukanda. Dayta a rabii 4,000 dagiti immimdeng a sititingrat’ lapayagda iti miting publiko a nangilawlawag no apay a napalalo idit’ pannakaidadanes dagiti Saksi ni Jehova. Nupay kastat’ sinagabada, naorganisarda manen tapno iyabanteda ti trabaho nga inted ti Dios kadakuada.

Ti sumuno a tawen, 1946, inyurnos dagiti kakabsat sadi Alemania ti kumbension idiay Nuremberg. Naipalubos nga usarenda ti Zeppelinwiese, ti dati a pagmarmartsaan ni Hitler. Idi maikadua nga aldaw ti kumbension, ni Erich Frost, a personal a napasaranna ti kinauyong dagiti Gestapo ken adu a tawen a nagsagaba iti kampo konsentrasion dagiti Nazi, indiskursona ti palawag a “Dagiti Kristiano a Nasusuot.” Dagiti 6,000 a Saksi a timmabuno kinaduat’ 3,000 a naawis nga umili ti Nuremberg iti dayta nga okasion.

Daydi ultimo nga aldaw ti kumbension naiparna nga isut’ panangiyanunsioda idiay Nuremberg iti sentensia kadagidi nabista gaput’ krimen a naangay idi gubat. Indeklara dagiti militar nga autoridad a maaddat’ curfew iti dayta nga aldaw, ngem kalpasan ti nabayag a pannakitungtong immanamongda a gaput’ takder dagiti Saksi ni Jehova nupay binusbusor dagiti Nazi ida, di maikanatad a matubenan ti natalna a panagturpos ti kumbensionda. Gapuna, iti maudi nga aldaw, nagtataripnong dagiti kakabsat tapno denggenda ti makagutugot a palawag a “Situtured Nupay Agkukumplot toy Lubong.”

Naimatanganda ti panangiturong ni Jehova iti agdama a situasion. Iti kanito a masensentensiaan dagiti lallaki a nangirepresenta iti rehimen a nagtarigagay a mangikisap kadakuada, dagiti Saksi ni Jehova nagtataripnongda a mangdaydayaw ken Jehova iti disso a nangipabuyaan idin Hitler ti dadduma kadagiti karkarna a pannakabalin dagiti Nazi. Kinuna ti tserman ti kumbension: “Gapu ta napasarantayo daytoy nga aldaw, a pakpakauna laeng ti panagbiktoria ti ili ti Dios maibusor kadagiti kalabanna inton bakal ti Armagedon, nagunggonaan ti siam a tawentayo iti kampo konsentrasion.”

Dadduma Pay a Nakalalagip a Kumbension

Bayat a nagsaknap ti aktibidad dagiti Saksi ni Jehova, naangay met dagiti kumbension iti intero a daga. Isuamin dagita ket adda naisalsalumina nga aspetoda kadagidiay timmabuno.

Idiay Kitwe, Makin-amianan a Rhodesia (Zambia itan), iti sentro ti Copperbelt, nayurnos ti kumbension bayat ti ibibisita ti presidente ti Watch Tower Society idi 1952. Nagtataripnongda iti nalawa a lugar iti ruar ti maysa kadagiti pagminasan, iti disso a maaw-awagan itan ti Chamboli. Pinatagda ti tuktok ti dati a dakkel a bunton sada inikkan ti abung-abong ket nagbalin a plataporma. Nabangon dagiti dadduma pay nga abung-abong a pagturogan, nga addaan nagtutuon a papag, nga agatiddog ti 180 metro manipud pagtutugawan ket naurnosda a kasla rayos ti rueda. Dagiti lallaki naturogda kadagiti dadduma; dagiti met babbai iti sabali. Adda dagiti delegado a dua lawasda a nagbisikleta tapno makatabunoda. Dagiti met dadduma nagnagnada iti adu nga aldaw sada naglugan kadagiti kadaanan a bus tapno makadanonda.

Bayat dagiti sesion nakaat-atentibo dagiti timmabuno, nupay natangken a kawayan ti nagtutugawanda nga awan linongna. Immayda dimngeg ket dida kayat a maikapisda uray maysa la a sao. Ti panagkanta dagiti timmabuno a 20,000 ket makapalua​—nakapimpintas unay. Awan instrumento a nangkompaniar iti kantada, ngem ti panagtutunos ti bosesda nakaim-imnas. Saan laeng a ti panagkantada no di ket amin nga inaramidda, naiparangarang ti panagkaykaysa dagiti Saksi, nupay nagdudumat’ klase ken tribo a naggapuanda.

Ket agasenyo ti rikna dagiti Saksi ni Jehova sadi Portugal kalpasan ti panangilabandat’ wayawaya iti panagdaydayaw iti gistay 50 a tawen, nabigbigen a legal dagiti Saksi idi Disiembre 18, 1974. Agarup 14,000 laeng ti dagupda idi a tiempo. Iti las-ud lat’ sumagmamano nga aldaw, 7,586 kadakuada ti nangpunno iti sports pavilion sadi Porto. Iti sumaruno nga aldaw, adda pay 39,284 a nangpusek iti football stadium sadi Lisbon. Kaduada idi da Kabsat Knorr ken Franz iti dayta nagragsak nga okasion, a dinto pulos malipatan dagiti adu.

Panangorganisar Kadagiti Internasional a Taripnong

Iti nasurok a kaguduat’ siglo, inangay dagiti Saksi ni Jehova dagiti nagbabansag a dadakkel, nagduduma a siudad a kumbension kadagiti adu a daga. Napabileg ti rikna ti internasional a panagkakabsatda kadagitoy nga okasion a nabalinandat’ dimngeg kadagiti kangrunaan a palawag a namunganay iti makinsentro a siudad.

Idi laeng 1946, nupay kasta, a nabaelan ti dakkel a kumbension internasional nga inummong iti maymaysa a siudad dagiti delegado manipud adu a paset ti daga. Naangay daytoy sadi Cleveland, Ohio. Nupay narikut pay idit’ panagbiahe kalpasan ti gubat, adda 80,000 a timmabuno, agraman 302 a delegado kadagiti 32 a pagilian iti ruar ti Estados Unidos. Naangay dagiti sesion iti 20 a pagsasao. Adu a praktikal nga instruksion ti naited tapno mapalawa ti trabaho a panagebanghelio. Maysa kadagiti tampok ti kumbension isut’ palawag ni Kabsat Knorr maipapan kadagiti parikut ti panangpabaro ken panangpalawa. Nagpalakpak a sirarayray dagiti dimngeg idi naammuandat’ plano a pannakapalawa dagiti pagimprentaan ken opisina ti hedkuarter ti Sosiedad, kasta met ti estasion ti radio a maipaay iti pannakaipasdek dagiti sanga nga opisina kadagiti kangrunaan a pagilian ti lubong, agraman panangpalawa iti trabaho a panagmisionero. Kalpasan a dagus dayta a kumbension, naiyurnos dagiti detalye tapno makapagbiahen da Kabsat Knorr ken Henschel iti intero a lubong ket maiyusuaten dagiti napagsasaritaan.

Kadagidi tawen a simmaruno, naangay dagiti pudpudno a historikal a kumbension sadi Yankee Stadium iti Siudad ti Nueva York. Iti daydi immuna kadagitoy, nanipud Hulio 30 inggat’ Agosto 6, 1950, presente dagiti delegado manipud 67 a daga. Nairaman iti programa dagiti ababa a report dagiti adipen ti sanga, misionero, ken dadduma pay a delegado. Nagun-odan dagiti nakikumbension iti nakaay-ayat a pangripiripan iti naregget a trabaho a panagebanghelio a maar-aramid kadagiti daga a naggapuanda. Idi ultimo nga aldaw, 123,707 ti dimngeg iti palawag a “Mabalinyo Kadi ti Agbiag nga Agnanayon iti Kinaragsak Ditoy Daga?” “Irarang-ay ti Teokrasia” ti tema daydi kumbension. Naiturong ti atension iti dakkel nga iyaadu. Kaskasdi, ti tserman, a ni Grant Suiter, impaganetgetna, a saan a naangay daytoy tapno maitan-ok dagiti nasaririt a kameng ti makitkita nga organisasion. Imbes ketdi, imbagana: “Ti kabbaro a bileg ti daguptayo maidedikar iti dayaw ni Jehova. Kasta komat’ rantana, ket ditay tarigagayan ti sabali pay.”

Idi 1953, sabali manen a kumbension ti naangay sadi Yankee Stadium ti Nueva York. Ti kangatuan a dagup ti timmabuno isut’ 165,829. Kas met lat’ napasamak idi immuna a kumbension sadiay, ti programa napnot’ pannakaisalaysay dagiti makaawis a padto ti Biblia, dagiti praktikal a balakad no kasano a mairingpas ti pannakaikasabat’ naimbag a damag, ken report kadagiti adu a daga. Nupay nangrugi dagiti sesion iti alas 9:30 t.b., sada la nagsardeng iti alas 9:00 wenno alas 9:30 t.r. Nagpaut ti kumbension iti walo nga aldaw a naragsak a naespirituan a piesta.

Iti daydi kadakkelan a kumbensionda, sadi Nueva York idi 1958, nesesita nga usaren saan laeng a ti Yankee Stadium no di pay ket ti kaarrubana a Polo Grounds agraman iti ruar dagiti estadium tapno adda pagtugawan dagiti umariwekwek. Iti ultimo nga aldaw, idi napunnon amin a tugaw, naited ti naisangsangayan a pammalubos a mabalin ti agtugaw iti makintengnga nga espasio ti Yankee Stadium, ket anian a nakaay-ayat a buyaen dagiti rinibo, inikkatda dagiti sapatosda sada nagtugaw iti karuruotan! Agdagup 253,922 dagiti dimngeg iti miting publiko. Ti kanayonan nga ebidensia ti pamendision ni Jehova iti ministerio dagiti adipenna isut’ namatmatan idi 7,136 itoy a kumbension ti nangisimbolo ti dedikasionda babaen iti pannakaitaneb iti danum​—nasurok a doble ti dagup dagiti nabautisaran iti daydi historiko nga okasion ti Pentecostes 33 K.P., sigun ti report ti Biblia!​—Ara. 2:41.

Ti intero a panagandar dagitoy a kumbension pinaneknekanna a saan a basta episiente nga organisasion daytoy. Naiparangarang a ti espiritu ti Dios agtigtignay iti ilina. Ti ayat a nainkabsatan a naibatay ti panagayat iti Dios isut’ nakabatbatad. Awan dagiti organisador a nanginat’ sueldoda. Dagiti di natangdanan a boluntario ti nagserbi iti kada departamento. Dagiti Kristiano a kakabsat, masansan pamipamilia, tinamingda dagiti pagrepreskuan. Adda pay dagiti kalluto a makan nga indayada, ket kadagiti nalawa a tolda iti ruar ti estadium, sangaribo a delegado ti sinerbianda kada minuto. Pinullo ribo​—isuda amin nagrag-oandat’ makibulig iti trabaho​—nagserbida kas attendant ken inasikasoda dagiti masapul a mabangon, maluto ken panangipuni kadagiti makan, panagdalus, ken dadduma pay.

Adu pay dagiti boluntario a nangbusbos ti ginasgasut a ribo nga oras tapno makabirukdat’ pagdagusan dagiti delegado. Kadagiti naglabas a tawen, naorganisar dagiti trailer ken tent city para kadagiti dadduma a kumbensionista. Idi 1953 inani dagiti Saksi ti trigo a naimula iti 16 ektaria, nga awan siningirda, para iti makintalon sadi New Jersey a nangipabulod kadakuada ti dagana a pakaiparadaan dagiti trailer a pagdagusan. Naibangon dita dagiti pasilidad para kadagiti kasilias, silaw, pagdigusan, paglabaan, kapeteria, ken tiangge tapno usaren ti nasurok 45,000 a nagdagus. Idi simmangpetdan, maysa a siudad ti bigla a timmaud. Rinibo pay dagiti nagdagus kadagiti hotel ken pribada a balay iti uneg ken kaparanget ti Nueva York. Nakadakdakkel a trabaho daydi. Gaput’ pamendision ni Jehova, nairingpas daytoy a sibaballigi.

Dagiti Kumbension nga Umakar-akar

Dagiti miembro daytoy internasional a panagkakabsat interesadoda unay kadagiti padada a Saksi kadagiti dadduma a daga. Kas resultana, ginundawayanda a tinabunuan dagiti kumbension a naangay iti ruar ti bukodda a pagilian.

Idi naangay ti umuna kadagiti serye ti Nadalus a Panagdaydayaw nga Asamblea sadi Wembley Stadium ti Londres, Inglaterra, idi 1951, dagiti Saksi naggapudat’ 40 a daga. Inggunamgunam ti programa maipapan iti praktikal nga aspeto ti pudno a panagdaydayaw ken ti panangaramid iti ministerio kas karera iti biag. Nanipud Inglaterra, adu a Saksi ti nagbiahe idiay Kontinente, a nakaangayan ti siam pay a kumbension iti las-ud ti simmuno a dua bulan. Ti kadaklan kadagitoy isu idiay Frankfurt am Main, Alemania, nga 47,432 ti timmabuno nanipud 24 a daga. Naipakitat’ kinabara dagiti kakabsat idi agngudot’ programa bayat a nagtokar ti orkestra ket nagkanta a sibubulos dagiti kakabsat nga Aleman iti kanta a pammakada nga intaklinda iti Dios dagiti padada a Saksi a naggapu kadagiti sabali a daga a nakitaripnong kadakuada. Inwagaywayda dagiti panio, ket ginasgasut dagiti nagturong iti tengnga ti estadium tapno iyebkasda ti personal nga apresasionda iti daytoy grande a teokratiko a piesta.

Idi 1955, ad-adu pay dagiti Saksi a nangiyurnos iti ibibisitada kadagiti Kristiano a kakabsatda iti ballasiw ti taaw bayat dagiti kumbension. Babaen ti dua a naarkila a barko (700 a pasahero tunggal barko) ken 42 a naarkila nga eroplano, dagiti delegado nanipud Estados Unidos ken Canada napandat’ Europa. Ti Europeano nga edision ti diario a The Stars and Stripes, a naipablaak sadi Alemania, dineskribirna ti isasanglad dagiti Saksi a “nalabit kadakkelan nga aggigiddan nga isasangpet dagiti Americano sadiay Europa nanipud rimmaut dagiti Aliado idi Gubat Sangalubongan II.” Addada delegado a naggaput’ Central ken Sud America, Asia, Africa, ken Australia. Nupay impamuspusan dagiti klero ti Kakristianuan a lapdan ti panagkumbension dagiti Saksi sadi Roma ken Nuremberg, dagitoy a dua agraman innem pay dagiti naangay sadi Europa idi kalgaw. Nagdudumat’ dagup dagiti timmabuno nanipud 4,351 sadi Roma inggat’ 107,423 sadi Nuremberg. Adda pay sabali a grupo ti 17,729 a nagasamblea sadi Waldbühne nga isu idit’ Makinlaud a Berlin, a mabalin a danonen dagiti kakabsat manipud Dumaya a sona a basbassit ti risgoda. Adu kadagitoy ti naggapu ti pagbaludan gaput’ pammatida wenno dagiti miembro ti pamiliada a sibabalud pay laeng, ngem kaskasdi a natibker ti pammatida. Anian a maikanatad ti temat’ kumbension​—“Naballigi a Pagarian”!

Nupay adun ti naangay a kumbension internasional, ti naaramid idi 1963 ket damdamo a kasta. Kumbension daydi nga aglikmut iti lubong. Nangrugi daytoy sadi Milwaukee, Wisconsin, sadi Estados Unidos, sa nagpa-Nueva York; simmaganad, uppat a kangrunaan a siudad ti Europa; sa napan iti Makintengnga a Daya; idi agangay sadi India, Burma (Myanmar itan), Thailand, Hong Kong, Singapore, Filipinas, Indonesia, Australia, Taiwan, Japan, New Zealand, Fiji, ti Republika ti Korea, ken Hawaii; sa met la nagsubli iti kontinente ti Norte America. No gupgopen, presente dagiti delegado ti 161 a daga. Nasurok 580,000 ti dagup dagiti timmabuno. Adda 583, a naggaput’ 20 a daga, a kimmuykuyogda iti kumbension, a nagsasaruno a pagilian ti tinabunuanda, iti intero a globo. Dagiti espesial a tour ti nangipasiar kadakuada kadagiti paginteresan ti relihion, ket nakiramanda met kadagiti kakabsatda iti ministerio ti binalaybalay. Dagitoy a biahero bukoddat’ gastosda.

Dagiti delegado ti Latin America kanayon nga adda representanteda kadagiti kaaduan a kumbension internasional. Ngem idi 1966-67, nabatanganda met a mangsangailit’ kumbension. Dagidiay timmabuno didanto pulos malipatan ti drama a nangbiag iti salaysay ti Biblia maipapan ken Jeremias ken timmulong iti isuamin a mangipateg ti kayuloganna iti kaaldawantayo.a Limmagda dagiti singgalut ti Nakristianuan nga ayat idi a nakita a mismo dagiti sangaili ti maar-aramid a nagdakkel a kampaniat’ edukasion iti Biblia a maang-angay sadi Latin America. Natignayda unay gaput’ napigsa a pammati dagiti kapammatianda, nga adu kadakuadat’ nangparmek kadagiti arig-bantay a tuben​—ibubusor ti pamilia, laylayus, pannakapukaw dagiti sanikua​—ayatda laeng a makatabuno. Naparegtada unay kadagiti kapadasan a kas ti sinarita ti narapis a babai nga espesial payunir ti Uruguay a kinatungtongda iti plataporma a kaduanat’ adu kadagiti 80 a tattao a tinulonganna aginggat’ Nakristianuan a bautismo! (Idi 1992, 105 a tattao ti natulongannan a nagpabautisar. Kaskasdi nga isut’ narapis ken espesial payunir pay laeng!) Anian a makaparagsak, met, a naam-ammoda dagiti misionero a kameng dagidi nagkakauna a klase ti Gilead nga agserserbi pay laeng kadagiti nakaitudinganda! Dagita a kumbension nagsayaat a pammaregta iti trabaho a mairingringpas iti dayta a paset ti lubong. Kadagiti adu a paset dagita a dagdaga, addan 10, 15, wenno 20 pay ketdi a daras ti immaduanen dagiti agdaydayaw ken Jehova no maidilig idi.

Sumagmamano a tawen kalpasanna, idi 1970-71, nabalinan dagiti Saksi iti ballasiw ti taaw ti nakikadua kadagiti kakabsatda kadagiti kumbension internasional a naangay sadi Africa. Ti kadakkelan kadagitoy a kumbension naaramid sadi Lagos, Nigeria, a sadiay amin a pasilidad kasapulan a bangonenda. Tapno adda linong dagiti delegado manipud napudot nga init, nabangon dagiti kawayan a patakder​—pagtugawan, pagturogan, kapeteria, ken dadduma pay a departamento. Nakausardat’ 100,000 a kawayan ken 36,000 a dadakkel nga ikamen​—a puro kakabsat ti nangisagana kadagita. Nagbabansag a nangngegan ti programa iti 17 a pagsasao. Adda 121,128 a timmabuno, ket 3,775 ti nabautisaran a kabbaro a Saksi. Adu dagiti tribo a nairepresenta, ket adu kadagitoy ti dati nga aggiginnubat. Ngem itan, anian a rag-o nga imatangan ti panagkaykaysada iti singgalut ti pudpudno a Nakristianuan a panagkakabsat!

Kalpasan ti kumbension, adda dagiti baniaga a delegado a naglugan iti bus a nagpasiar iti yan dagiti Igbo tapno makitadat’ lugar a naapektaran unay iti kalkalpas a gierra sibil. Dakkel a siddaaw ti napataud bayat a dagiti bisita ket kinomusta ken inabrasa dagiti lokal a Saksi iti tunggal ili a napananda. Nagaaripuno dagiti umili a nagbuya idiay kalsada. Dida pay pulos nakakitkita idit’ kasta a pannakaiparangarang ti ayat ken panagkaykaysa dagiti nangisit ken puraw.

Kadagiti dadduma a daga, saan a makapagtataripnong dagiti Saksi ni Jehova iti maymaysa a lugar gaput’ kaaduda. Nupay kasta, no dadduma, aggigiddan a maangay dagiti sumagmamano a dadakkel a kumbension, santo sarunuen dagiti ad-adu pay, iti agsasagadsad a lawlawas. Idi 1969, ti panagkaykaysa a nariknada kadagiti kumbension a kastoy pannakayurnosda ad-adda a naigunamgunam idi a dagiti kangrunaan nga agpalawag naisublisublida kadagiti kumbension babaen kadagiti eroplano, iti kasta naserbianda amin. Idi 1983 ken 1988, nariknada manen ti kasta met la a panagkaykaysa idi a dagiti adu a dadakkel a kumbension nga agus-usar ti maymaysa a pagsasao naikonektarda, internasional pay ketdi, babaen iti telepono ket nangngegda dagiti kangrunaan a diskurso dagiti miembro ti Bagi a Manarawidwid. Ngem, ti pudpudno a pundasion ti panagkaykaysa dagiti Saksi ni Jehova isut’ panagdaydayawda amin ken Jehova kas maymaysa a pudno a Dios, isuda amin salimetmetandat’ Biblia kas giyada, mabenepisiaranda amin iti maymaysa a programa ti naespirituan a pannakataraon, bigbigenda amin a ni Jesu-Kristo isut’ Liderda, ikagumaananda amin nga iparangarang dagiti bunga ti espiritu ti Dios iti kabibiagda, agtalekda amin iti Pagarian ti Dios, ken makiramanda amin a mangiburay kadagiti sabali iti naimbag a damag ti Pagarian.

Organisado iti Internasional a Panangidayaw ken Jehova

Immadun ti bilang dagiti Saksi ni Jehova ket ita dakdakkelen ti dagupda ngem ti populasion dagiti pinulpullo nga indibidual a nasion. Tapno agbalin nga epektibo unay dagiti kumbensionda, kasapulan ti adu a naannad a panagplano. Nupay kasta, ti laeng kasapulan no dadduma isut’ panangiyanunsio kadagiti Saksi nga aggaput’ nagduduma a deppaar no adinot’ tabunuanda tapno masigurado nga adda umdas a pagtugawan dagiti isuamin. No maiplano dagiti kumbension internasional, nesesita itan nga amirisen ti Bagi a Manarawidwid, saan laeng a ti bilang dagiti Saksi nga aggaput’ dadduma a pagilian a mayat ken makabael a tumabuno, no di pay ket ti kadakkel dagiti pasilidad nga usaren ti kumbension, ti dagup dagiti lokal a Saksi a tumabuno, ken ti kawadwad ti pagdagusan dagiti delegado; kalpasanna maikeddengen ti kadakkelan a bilang a maituding iti tunggal pagilian. Kastat’ napasamak kadagiti tallo a “Nadiosan a Debosion” a Kumbension sadi Poland idi 1989.

Kadagita a kumbension agarup 90,000 a Saksi ni Jehova ti manamnama nga aggapu iti Poland, malaksid pay kadagiti rinibo a kabbaro nga interesado. Adu pay dagiti naawis nga aggaput’ Britania, Canada, ken ti Estados Unidos. Dadakkel a delegasion ti inabrasada a naggaput’ Italia, Francia, ken Japan. Dadduma dagiti naggaput’ Scandinavia ken Grecia. Di kumurang 37 a daga ti nairepresenta. Iti dadduma a paset ti programa nasken nga ipatarus dagiti Polaco ken Ingles a palawag iti 16 a pagsasao. Adda 166,518 a dagup dagiti timmabuno.

Dadakkel a grupo dagiti Saksi kadagitoy a kumbension ti naggaput’ makunkuna idi nga Union Soviet ken naggaput’ Czechoslovakia; nawadwad met ti grupo dagiti naggapu kadagiti dadduma a pagilian ti Makindaya nga Europa. Saan nga imdas dagiti hotel ken dormitorio ti eskuelaan a pagdagusan. Gapu ta managpasangbayda, linuktan dagiti Polaco a Saksi dagiti puso ken balbalayda, a siraragsakda a nangiraman iti aniaman nga adda kadakuada. Adda kongregasion a 146 ti miembrona a nangipaay iti pagturogan dagiti 1,200 a delegado. Para kadagiti dadduma a timmabuno kadagitoy a kumbension, daydit’ damo unay nga iyaatenderda iti dakkel a taripnong a nasursurok ngem 15 wenno 20 a tattao ni Jehova. Ti pusoda nalapunos ti panangapresiar idi naimatanganda dagiti pinullo ribo nga adda kadagiti estadium, a nakitimpuyogda iti kararag, ken nakikaykaysat’ timekda a nangkansion kadagiti kanta a pangdayaw ken Jehova. Idi nagsasabatda kalpasan ti tunggal sesion, nairut ti panagiinnarakupda, nupay masansan a dida maisao ti ebkas ti pusoda gapu ta nagdudumat’ pagsasaoda.

Idi agturposen ti kumbension, napnot’ puspusoda iti panagyaman ken Jehova, a namagbalin a posible kadagitoy. Sadi Warsaw, kalpasan ti pammakada a komento ti tserman, bigla a nagpalakpak dagiti dumdumngeg ket sa la naguped dayta kalpasan ti sangapulo a minuto. Kalpasan ti ultimo a kanta ken kararag, nagpapalakpakda manen, ket nagtalinaedda pay a nabayag iti yanda. Adu a tawen nga inur-urayda daytoy nga okasion, ket ita didan kayat nga agngudo dayta.

Iti sumuno a tawen, 1990, nakurang a lima a bulan kalpasan a naiwaksi ti 40 a tawen a pannakaipawil kadagiti Saksi ni Jehova iti dati a Daya nga Alemania, sabali manen a nakaay-ayat a kumbension internasional ti naangay, daytoy ket sadi Berlin. Kadagidi 44,532 a presente addada delegadot’ 65 a nagduduma a pagilian. Kadagiti dadduma a daga, sumagmamano laeng ti nakaumay; manipud Poland, adda 4,500. Saan a makaanay ti sao a mangiyebkas ti rikrikna dagidiay damoda unay a mawayawayaan a tumabuno iti kasta a kumbension, ket idi nga amin a timmabuno nagkantadat’ pangdayaw ken Jehova, didan malapdan ti panagarubos ti lua gaput’ ragsakda.

Iti naud-udi a paset dayta a tawen, idi kasta met la a kumbension ti naangay sadi São Paulo, Brazil, dua a dadakkel nga estadium ti kasapulan a manglaon iti internasional a delegasion a 134,406. Sinaruno daytoy ti kumbension sadi Argentina, a sadiay dua nga estadium manen ti nausar a naggiddan tapno maipalaon iti internasional a delegasion. Ket idi nangrugi ti 1991, madama metten dagiti kanayonanna pay a nakaay-ayat a kumbension internasional iti Filipinas, Taiwan, ken Thailand. Nawadwad dagiti naggapu iti adu a nasion ti immay timmabuno iti dayta a tawen kadagiti kumbension idiay Makindaya nga Europa​—sadi Hungary, Czechoslovakia, ken ti Croatia itan. Ket idi 1992, imbilang dagiti delegado manipud 28 a daga a naisangsangayan a pribilehio ti makikadua kadagiti 46,214 idiay St. Petersburg iti umuna a pudno a kumbension internasional dagiti Saksi ni Jehova sadi Russia.

Oportunidad iti Regular a Naespirituan a Pannakabang-ar

Saan nga amin a kumbension dagiti Saksi ni Jehova ket internasional a panagtataripnong. Nupay kasta, iyurnos ti Bagi a Manarawidwid ti kaadda iti dadakkel a kumbension maminsan makatawen. Ket matagiragsak ti agpapada a programa iti sangalubogan iti adu a pagsasao. Dagitoy a kumbension mabalin a talaga a dadakkelda, tapno adda oportunidad ti pannakikadua kadagiti sabali a Saksi manipud adu a luglugar, wenno mabalin a babbabassit dagitoy ken maangay kadagiti adu a siudad, iti kasta nalaklaka a tabunuan dagidiay kabbaro ken tapno maimatangan a nalaing ti publiko kadagiti ginasut a babbabassit a siudad dagiti nagduduma a tattao a nangbukel kadagiti Saksi ni Jehova.

Sa, maminsan makatawen kada sirkito (buklen ti agarup 20 a kongregasion) aguurnongda maipaay iti dua-aldaw a programa ti naespirituan a pammalakad ken pammaregta.b Kasta met, nanipud Setiembre 1987, adda aldaw ti espesial nga asamblea, a makapabileg a maysa-aldaw a programa, a naiyurnos kada sirkito ti maminsan makatawen. No adda pannakabalinna, adda miembro ti hedkuarter ti Sosiedad wenno adda aggaput’ lokal nga opisina ti sanga a maibaon tapno makipaset iti programa. Napalalot’ panangapresiar dagiti Saksi ni Jehova kadagitoy a programa. Kadagiti adu a lugar dayta a pagasambleaan asideg laeng wenno saan a narigat a papanan. Ngem saan a kanayon a kasta. Adda agdaldaliasat a manangaywan a nagestoriat’ maipapan iti agassawa a lakay ken baket a pinagnada ti 76 kilometro nga awit-awitdat’ maleta ken ul-ulesda tapno tabunuanda ti asamblea sirkito sadi Zimbabwe.

Ti panagserbit’ tay-ak kabayatan ti kumbension saanen a paset dagiti amin a kumbension, ngem saan a gapu ta awan unay pategna dayta kadagiti Saksi. Kadagiti kaaduan a kaso dagiti umili nga agnanaed iti dinna ti pagasambleaan ket regularen a bisbisitaen dagiti lokal a Saksi​—no dadduma, kalpasan ti mano la a lawas. Dagiti delegado iti asamblea nagalistoda a nangusar kadagiti gundaway maipaay iti impormal a panangasaba, ket dagiti Nakristianuan a kababalinda mangted ti nabileg a pammaneknek iti sabali a pamay-an.

Ebidensia ti Pudno a Panagkakabsat

Ti panagkakabsat dagiti Saksi a maiparangarang kadagiti kumbensionda agminar unay kadagiti managpaliiw. Mabigbigda nga awan panangidumdumada ket agbatad ti pudpudno a kinabara uray kadagidiay damdamoda unay ti agkikita. Iti daydi Nadiosan a Pagayatan nga Internasional nga Asamblea sadi Nueva York idi 1958, impadamag ti New York Amsterdam News (Agosto 2): “Uray adino a lugar dagiti Negro, puraw ken Oriental, a nagdudumat’ kabibiagda ken naggapuda iti isuamin a paset ti lubong, nagpupulapolda a siraragsak ken awan tuben. . . . Dagiti Saksi nga immay nagdaydayaw manipud 120 a daga nagkakaduada a nagbiag ken nagdaydayaw a sitatalna nga ipakitana kadagiti Americano no kasanot’ kalakana nga aramiden dayta. . . . Ti Asamblea ket napatak nga ehemplo no kasano a dagiti tattao mabalindat’ agtrabaho ken agbiag a sangsangkatunos.”

Di pay unay nagbayag, idi a dagiti Saksi ni Jehova inangayda dagiti agbabansag a kumbension sadi Durban ken Johannesburg, Sud Africa, idi 1985, dagiti delegado naggapuda kadagiti kangrunaan a rasa ken pagsasao ti Sud Africa, agraman representante ti 23 a dadduma pay a dagdaga. Ti nabara a panagkakadua dagiti 77,830 a timmabuno nakapatpatak unay. “Nagmayat daytoyen,” kinuna ti balasang nga Indian. “Ti pannakakitak kadagiti Kayumanggi, Indian, puraw, ken nangisit nga aglalaokda amin isut’ nangbalbaliw ti intero a panangmatmatko iti biag.”

Daytoy a riknat’ panagkakabsat naun-uneg ngem ti panagiinnisem, panagaalamano, ken panagiinnawag iti “brother” ken “sister.” Kas ehemplo, idi mayur-urnos ti pannakaangay ti “Agnanayon a Naimbag a Damag” nga Asamblea iti intero a lubong idi 1963, naipakaammo kadagiti Saksi ni Jehova a no kayatda a tulongan dagiti sabali iti pinansial tapno makatabunoda iti kumbension, maragsakanto ti Sosiedad a mangtaming kadagita a pundo tapno pakagunggonaan dagiti kakabsat iti isuamin a paset ti daga. Awan naaramid a panagur-or, ket awan nausar dita a pangsueldo kadagiti mangimaneho iti dayta. Intero a pundo ket nausar iti nakaisangratanna. Iti kastoy a pamay-an, 8,179 dagiti natulongan a tumabuno iti kumbension. Dagiti delegado iti tunggal pagilian ti Central ken Sud America nabadanganda, agraman rinibo manipud Africa ken adu a naggaput’ Makintengnga a Daya ken Adayo a Daya. Kaaduan kadagiti natulongan ket kakabsat nga impamaysadat’ adu a tawtawen iti amin a tiempo a panagministro.

Idi arinunos ti 1978, adda kumbension a nakaeskediol sadi Auckland, New Zealand. Dagiti Saksi a taga Cook Islands pagaammoda dayta ket tarigagayanda unay ti tumabuno. Ngem nakurapay ti ekonomia dagita nga isla ket dakkel a kantidad ti pagpasaheda. Nupay kasta, dagiti naayat a naespirituan a kakabsat sadi New Zealand nagkontribusionda para iti pasahe a mapan-agawid ti 60 a taga puro. Anian ti ragsakda a nakiraman iti naespirituan a piesta a kaduada dagiti Maori, taga Samoa, taga Niue, ken dagiti puraw a kakabsatda!

Ti gagangay nga espiritu dagiti Saksi ni Jehova isut’ naimatangan idi agngudo ti “Nadiosan a Hustisia” a Kumbension Distrito sadi Montreal, Canada, idi 1988. Iti las-ud ti uppat nga aldaw dagiti delegado nga Arabe, Español, Griego, Ingles, Italiano, Portugues, ken Pranses, sinagrapda ti agpapada a programa iti bukodda a pagsasao. Ngem, idi ngudon ti ultimo a sesion, isuda amin nga 45,000 nagtitimpuyogda iti dayta Olympic Stadium a nangiparangarang ti makatignay puso a panagkakabsat ken panagtutunos iti panggep. Nagkakaduada a nangkanta, kada grupo iti bukodna a pagsasao, “Bumuyogkay . . . ‘Agarin Jah; agrag-otay.’”

[Dagiti Footnote]

[Blurb iti panid 255]

“Nagustuak unay ti espiritu ti ayat ken nainkabsatan nga asi”

[Blurb iti panid 256]

Dagiti tren ti kumbension​—aglugankayon!

[Blurb iti panid 275]

Saan a nangatot’ sueldoda a manangiwanwan ti kumbension, no di ket awan tangdanda a boluntario

[Blurb iti panid 278]

Panagkaykaysa kadagiti nangisit ken puraw

[Kahon/Ladawan iti panid 261]

Pito nga Agkakapateg a Resolusion ti Kumbension

Idi 1922, ti resolusion a napauluan “Karit Kadagiti Lider toy Lubong” inawisna ida a mangpaneknek no dagiti tattao addaandat’ sirib a mangituray itoy daga ta no saan admitirenda a ti talna, biag, wayawaya, ken agnanayon a ragsak aggapu laeng ken Jehova baeten ken Jesu-Kristo.

Idi 1923, adda “Pakdaar Kadagiti Isuamin a Kristiano” a naganetget ti ipapanawda kadagiti organisasion a sipapalso nga akuenda nga irepresentarda ti Dios ken ni Kristo.

Idi 1924, ti “Mapabasol Dagiti Klero” imbutaktakna dagiti di Nainkasuratan a doktrina ken ar-aramid dagiti klero ti Kakristianuan.

Idi 1925, ti “Mensahe ti Namnama” impakitana no apay a dagidiay agkunkuna a silsilaw a mangigiya iti lubong ket napaayda a mangpennek kadagiti kangrunaan a kasapulan ti tao ken no kasano a ti laeng Pagarian ti Dios ti makabael iti dayta.

Idi 1926, ti “Testimonia Kadagiti Agtuturay toy Lubong” impakaammona kadakuada a ni Jehova isut’ kakaisuna a pudpudno a Dios ket ni Jesu-Kristo agturturayen kas nainkalintegan nga Ari ti daga. Indagadagna kadagiti agtuturay nga usarendat’ impluensiada a mangiturong iti is-isip dagiti umili iti pudpudno a Dios tapno di umapay kadakuada ti didigra.

Idi 1927, ti “Resolusion Kadagiti Umili ti Kakristianuan” imbutaktakna ti pinansial-politikal-relihiuso a panagkukumplot a mangirurumen iti sangatauan. Indagadagna kadagiti umili a panawandan ti Kakristianuan ket agtalekda ken Jehova agraman iti Pagarianna nga addan kadagiti ima ni Kristo.

Idi 1928, ti “Deklarasion Maikontra ken Satanas ken Para ken Jehova” imbatadda a ni Jesu-Kristo, a pinulotan ni Jehova kas Ari, din agbayag ibaludnan ni Satanas ken dadaelennat’ nadangkes nga organisasionna, ket indagadagna kadagiti isuamin nga agayat iti kinalinteg nga agtakderda iti dasig ni Jehova.

[Kahon/Dagiti ladawan iti panid 272, 273]

Kasasaad ti Sumagmamano a Dadakkel a Kumbension

Ginasgasut a nararagsak a delegado ti simmangpet a naglugan iti barko, rinibo ti naglugan ti eroplano, pinullo a ribo ti naglugan iti kotse ken bus

Ti epektibo nga organisasion ken adu a situtulok a trabahador isuda idit’ kasapulan tapno mabirukan ken maituding dagiti umdas a pagdagusan

Bayat dagitoy walo-aldaw a kumbension, dagiti kalluto a taraon​—pinullo a ribo kadagitoy​—ti regular a naidiaya kadagiti delegado

Idi 1953, dagiti trailer ken tent city isudat’ nagturogan ti nasurok nga 45,000 a delegado

Idiay Nueva York, idi 1958, 7,136 ti nabautisaran​—ad-adu ngem iti aniaman a kumbension nanipud Pentecostes ti 33 K.P.

Naipaskil dagiti pangablaaw manipud adu a dagdaga, ket naangay dagiti sesion iti 21 a pagsasao, sadi Nueva York idi 1953

[Ladawan iti panid 256]

Delegado iti kumbension ti IBSA sadi Winnipeg, Man., Canada, idi 1917

[Dagiti ladawan iti panid 258]

Ni J. F. Rutherford nga agdisdiskurso sadi Cedar Point, Ohio, idi 1919. Indagadagna a sireregta koma amin a makiraman a mangibunannag iti Pagarian ti Dios, nga usarenda ti “The Golden Age”

[Ladawan iti panid 259]

Kumbension sadi Cedar Point idi 1922. Kastoy ti naiyanunsio: “Ipablaakyo ti Ari ken Pagarian”

[Ladawan iti panid 260]

Ni George Gangas adda sadi Cedar Point idi 1922. Iti agarup 70 a tawen nanipud idin sireregta nga inwaragawagnat’ Pagarian ti Dios

[Ladawan iti panid 262, 263]

Dagiti delegado iti 1931 kumbension sadi Columbus, Ohio, a sirarayray a nangabrasat’ nagan a Saksi ni Jehova

[Ladawan iti panid 264]

Ti “New World Translation of the Christian Greek Scriptures” nga inruar ni N. H. Knorr idi 1950

[Ladawan iti panid 264]

Dagiti diskurso ni F. W. Franz iti kaitungpalan dagiti padto ti Biblia isudat’ tampok ti kumbension (Nueva York, 1958)

[Dagiti ladawan iti panid 265]

Iti unos ti adu a tawen ti panagserbi idiay tay-ak ket prominente a paset ti tunggal kumbension.

Los Angeles, E.U.A., 1939 (makimbaba); Stockholm, Sweden, 1963 (naisingit)

[Dagiti ladawan iti panid 266]

Idi nagdiskurso ni J. F. Rutherford sadi Washington, D.C., idi 1935, innem a kontinente ti nakaibrodkasanna babaen iti radio ken linea ti telepono

[Dagiti ladawan iti panid 268]

Sadi Nuremberg, Alemania, idi 1946, inted ni Erich Frost ti nakabarbara a palawag a “Dagiti Kristiano a Nasusuot”

[Ladawan iti panid 269]

Awan linongna a kumbension sadi Kitwe, Makin-amianan a Rhodesia, idi bimmisita ni N. H. Knorr idi 1952

[Dagiti ladawan iti panid 270, 271]

Idi 1958 adda 253,922 a timmabuno, a nangpusek ti dua a dadakkel nga estadium sadi Nueva York, a dimngeg iti mensahe nga “Agturayen ti Pagarian ti Dios​—Asidegen Aya ti Panungpalan ti Lubong?”

Polo Grounds

Yankee Stadium

[Ladawan iti panid 274]

Ni Grant Suiter, tserman ti kumbension sadi Yankee Stadium idi 1950

[Ladawan iti panid 274]

Ni John Groh (nakatugaw), a pagsarsaritaanda ken George Couch ti organisasion ti kumbension idi 1958

[Dagiti ladawan iti panid 277]

Naangay idi 1963 ti kumbension a naglikmut iti lubong, buyogen dagiti delegado manipud 20 a daga a kimmuykuyogda a nanglikmut ti globo

Ti Kyoto, Japan (makimbaba a kattigid), isut’ maysa kadagiti 27 a siudad a nagkumbensionan. Nagiinnammo dagiti delegado sadi Republika ti Korea (tengnga). Panangkablaaw dagiti Maori sadi New Zealand (makimbaba a kannawan)

[Dagiti ladawan iti panid 279]

Kumbension nga agbabansag a nagserbi iti 17 a pagsasao, kadagiti patakder a kawayan (Lagos, Nigeria, 1970)

[Dagiti ladawan iti panid 280]

Tallo a dadakkel a kumbension ti naangay sadi Poland idi 1989, a tinabunuan dagiti delegado manipud 37 a dagdaga

Rinibo dagiti nabautisaran sadi Chorzów

Naunday ti palakpak dagiti timmabuno sadi Warsaw

Ni T. Jaracz (iti kannawan) nagpalawag kadagiti delegado sadi Poznan

Dagiti delegado manipud iti dati nga U.S.S.R. (iti baba)

Naipatarus iti 15 a pagsasao dagiti paset ti programa idiay Chorzów