Agtakder a Naan-anay ken Addaan Natibker a Panamati

Dagiti Kombension​—Naragsak a Pammatalged iti Panagkakabsattayo

NUPAY nakapuy ti salun-atna kalpasan ti nganngani makatawen a di nainkalintegan a pannakaibalud, siraragsak ti 50 anyos a ni Joseph F. Rutherford a nagserbi iti hotel. Sipipinget a binitbitna dagiti bagahe ken tinulonganna dagiti kapammatianna a mapan kadagiti siledda iti hotel. Dua kadagiti sigud a kakaduana a balud, a padana nga Estudiante ti Biblia, ti nangiwardas no aniada a siled ti pagyanan ti adu a tattao nga agur-uray iti pagdagusanda. Naagawa ti panangasikaso agingga iti nalabesen a tengnga ti rabii. Magagaran ti amin. Ania ti okasion?

Tawen 1919 idi, ket agpapaungar dagiti Estudiante ti Biblia (pagaammo ita kas dagiti Saksi ni Jehova) kalpasan ti nadamsak a pannakaidadanesda. Tapno mapabileg ti panagkakabsatda, nangangayda iti maysa a kombension idiay Cedar Point, Ohio, E.U.A., manipud Setiembre 1 agingga iti 8, 1919. Iti maudi nga aldaw ti kombension, sigagagar a dimngeg ti 7,000 a tattao bayat a parparegtaen ni Kabsat Rutherford ti tunggal kombensionista babaen kadagitoy a sasao: “Dakayo dagiti embahador ti Ari dagiti ar-ari ken Apo dagiti apo, a mangibumbunannag kadagiti tattao . . . ti maipapan iti nadayag a pagarian ti Apotayo.”

Kadagiti tattao ni Jehova, maang-angay dagiti kombension idi pay panawen ti nagkauna nga Israel. (Exodo 23:14-17; Lucas 2:41-43) Naragsak nga okasion ti kakasta a panagtitipon, a tulonganna dagiti amin a presente a mangipamaysa iti panunotda iti Sao ti Dios. Kasta met, dagiti kombension dagiti Saksi ni Jehova ita ket naipamaysa kadagiti naespirituan a bambanag. Para kadagiti napasnek a makaim-imatang, mangipaay ti kakasta a naragsak a panagtitipon iti di mailibak a pammaneknek a dagiti Saksi ket pinagkaykaysa ti nabileg a singgalut ti Nakristianuan a panagkakabsat.

Dagiti Panangikagumaan a Tumabuno

Mabigbig dagiti moderno-aldaw a Kristiano a dagiti kombensionda ket panawen ti naespirituan a pannakapabang-ar ken panagsursuro iti Sao ti Dios. Para kadakuada, nasken dagitoy a dadakkel a panagtitipon tapno matulonganda a ‘makapagtakder a naan-anay ken addaan iti natibker a panamati iti isuamin a pagayatan ti Dios.’ (Colosas 4:12) Gapuna, dagitoy a panagtitipon ket naimpusuan a suportaran dagiti Saksi, a napalalo ti panangikagumaanda a tumabuno kadagitoy.

Kadagiti dadduma, kasapulan ti pammati ken panangparmek kadagiti arig-bantay a tubeng tapno makatabunoda kadagiti kombension. Kas pagarigan, utobenyo ti kapadasan ti maysa a baketen a Saksi idiay Austria. Nupay agsagsagaba iti diabetes ken kasapulan a maineksionan iti insulin iti kada aldaw, pinagreggetanna a matabunuan amin nga aldaw ti kombension distrito iti pagilianna. Idiay India, maysa a dakkel a pamilia dagiti Saksi a nakaro ti kinakurapayda ti marigatan a talaga a tumabuno iti kombension. Timmulong ti maysa a kameng ti pamilia. Kinunana: “Gapu ta saanmi a kayat a liwayan ti okasion, inlakok dagiti balitok nga aritosko tapno adda gastosenmi nga agbiahe. Saankami a mailalaan iti panagsakripisiomi, yantangay ti pannakitimpuyog ken dagiti kapadasan pinabilegda ti pammatimi.”

Idiay Papua New Guinea, determinado ti maysa a grupo dagiti interesado a tattao a tumabuno iti kombension distrito iti kabesera. Iti purokda, immasidegda iti maysa a lalaki nga akinkukua iti pangpubliko a lugan ket dinamagda no mano ti pagpleteda a mapan iti kombension. Yantangay awan ti umanay a pagpleteda, intulagda nga agtrabahoda iti pagtaengan ti lalaki, a ritubarenda ti kosinana. Nakapanda ngarud iti kombension distrito ket nagunggonaanda iti itatabunoda iti intero a programa.

Saan a lapped kadagiti Saksi ni Jehova ti kinaadayo ti pagkombensionanda. Idi 1978, innem nga aldaw a dinaliasat ti maysa nga agtutubo a delegado a taga Poland ti 1,200 a kilometro babaen ti bisikleta tapno makatabuno iti kombension idiay Lille, Francia. Bayat ti kalgaw idi 1997, dua a Saksi idiay Mongolia ti nagdaliasat iti 1,200 a kilometro tapno tabunuanda ti Nakristianuan a panagtataripnong idiay Irkutsk, Russia.

Ti Panagtignay ti Pudno a Panagkakabsat

Dagiti nainkalintegan a managpaliiw nalawag a makitada ti panagkaykaysa ken panagkakabsat nga iparparangarang dagiti Saksi kadagiti kombensionda. Adu dagiti masdaaw ta awan ti panangidumduma dagiti kombensionista ken adda ti pudno a kinabara uray kadagiti damoda ti agiinnammo.

Kabayatan ti nabiit pay nga internasional a kombension idiay Australia, maysa nga agipaspasiar a makalawas a nangkadua kadagiti bimmisita a delegado ti kombension ti nagtarigagay a makikuyog kadakuada iti napapaut pay bassit tapno tagiragsakenna ti pannakikaduana kadakuada. Gapu ta masdaaw iti ayat ken panagkaykaysada, saanna a patien a makapaglalangenda a naimbag, yantangay saan nga agaammo ti kaaduan kadakuada. Nagpakada idi pumanawen. Inawaganna ida iti “kakabsat” ngem saanna a naileppas ti panangyebkasna iti panagyaman gapu ta naibuyog ti riknana nga uray la a nakalua.

Idi 1997, nalawa nga estadium ti nakaangayan ti damo a kombension distrito iti tallo a pagsasao idiay Sri Lanka. Naggigiddan a naiparang ti intero a programa iti Ingles, Sinhalese, ken Tamil. Iti lubong nga umir-irteng dagiti tension iti nagbabaetan dagiti grupo etniko, nakadkadlaw ti kasta a panagtitipon ti tallo a grupo a nagduduma ti pagsasaoda. Insaludsod ti maysa a polis iti maysa a kabsat: “Siasino ti mangiturturong iti daytoy a kombension​—dagiti Sinhalese, Tamil, wenno Ingles?” Insungbat ti kabsat: “Awan ti grupo a mangiturturong iti kombension. Sangsangkamaysakami amin a mangar-aramid iti daytoy.” Saan a patien daytoy ti polis. Idi timmakder dagitoy tallo a grupo para iti pangserra a kararag ket immaweng ti nagkaykaysa nga “Amen” iti intero nga estadium, natignay dagiti kombensionista nga agpalakpak iti napigsa. Naglua ti nganngani amin a timmabuno. Wen, dagiti kombension ket talaga a naragsak a pammatalged iti panagkakabsattayo.​—Salmo 133:1.a

[Footnote]