Ti Pannagna iti Daldalan ni Jehova Mangyeg Kadagiti Nabaknang a Gunggona

NAPADASMO kadin ti nagnagna iti kabambantayan? No napadasmon, nalabit nariknam a kasla addaka iti tapaw ti lubong. Anian a makapabang-ar ti agpariir, maimatangan ti adayo, matannawagan ti kinapintas ti nakaparsuaan! Nalabit malipatam dagiti inaldaw a pakaringgoran a napanawam.

Manmano nga agpasiar iti bantay ti kaaduan a tao, ngem no dedikadoka a Kristiano, nalabit a sinurotmo ti kurso ti panagbiag a mayasping iti pannagna iti kabambantayan. Kas iti salmista idi, awan duadua nga inkararagmo: “Ipakaammom kaniak dagiti bukodmo a dalan, O Jehova; isurom kaniak dagiti bukodmo a dana.” (Salmo 25:4) Malagipmo kadi no kasano ti panagriknam idi damo a simmang-atka iti bantay ti balay ni Jehova ket nangrugika a magna kadagiti nangato a disso? (Mikias 4:2; Habakuk 3:19) Awan duadua a di nagbayag, nabigbigmo a nangyeg kenka iti salaknib ken rag-o ti pannagna kadagitoy natan-ok a dana ti nasin-aw a panagdayaw. Napasaram ti narikna ti salmista: “Naragsak dagiti umili a makaammo iti narag-o a panagdir-i. O Jehova, iti lawag ta rupam magmagnada.”​—Salmo 89:15.

Ngem no dadduma, dagiti agdaldaliasat iti kabambantayan masapul a lasatenda dagiti nawatiwat, nangato a rangkis. Agsakit dagiti sakada, ken mapaksuyanda. Makapasartayo met kadagiti pakarigatan bayat ti panagserbitayo iti Dios. Nalabit nabiit pay a nariknatay a nabannogtayo a magmagna. Kasanotayo a maisubli ti ganaygay ken rag-otayo? Ti umuna nga addang isu ti panangbigbig a ti daldalan ni Jehova ti kasayaatan.

Dagiti Natan-ok a Linteg ni Jehova

Dagiti daldalan ni Jehova ket ‘nangatngato ngem iti daldalan ti tao,’ ken ti panagdayaw kenkuana ‘sititibker a naipasdek iti tapaw ti bambantay ken naipangato iti ngatuen dagiti turod.’ (Isaias 55:9; Mikias 4:1) Ti sirib ni Jehova ket “sirib manipud ngato.” (Santiago 3:17) Natantan-ok dagiti lintegna ngem iti aniaman a linteg. Kas pagarigan, idi a dagiti Canaanita siuulpit nga idatdatonda dagiti ubbing, impaay ni Jehova kadagiti Israelita dagiti linteg a nangato iti moral ken naayat. Kinunana kadakuada: “Dika tratuen ti nanumo buyogen ti panangidumduma, ket dika paboran ti kinatao daydiay naindaklan. . . . Ti ganggannaet nga agnanaed . . . rebbeng nga agbalin kadakayo a kas iti katutuboyo; ket masapul nga ayatem kas iti bagim.”​—Levitico 19:15, 34.

Sangapulo ket lima a siglo kalpasanna, nangipaay ni Jesus iti ad-adu pay a pagarigan ti ‘nadaeg a linteg’ ni Jehova. (Isaias 42:21) Iti Sermon iti Bantay, kinunana kadagiti adalanna: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit.” (Mateo 5:44, 45) “Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada,” innayonna. “Iti kinapudnona, daytoy ti kaipapanan ti Linteg ken dagiti Mammadto.”​—Mateo 7:12.

Dagitoy a natan-ok a linteg adda epektona iti puspuso dagiti mangipangag a tattao, a gutugotenna ida a tumulad iti Dios a daydayawenda. (Efeso 5:1; 1 Tesalonica 2:13) Utobenyo ti panagbalbaliw idi ni Pablo. Iti damo a pannakadakamatna iti Biblia, “an-anamonganna idi ti pannakapapatay” ni Esteban ken nakilangen a ‘siuulpit iti kongregasion.’ Sumagmamano laeng a tawen kalpasanna, siaasi a trinatona dagiti Kristiano idiay Tesalonica kas iti “agtagtagibi nga ina [a] taripatuenna dagiti bukodna nga annak.” Ti pannursuro ti Dios ti namagbalbaliw ken Pablo, a dati a manangidadanes ngem nagbalin a nadungngo a Kristiano. (Aramid 8:1, 3; 1 Tesalonica 2:7) Talaga a nagyaman ta ti personalidadna ket sinukog ti sursuro ni Kristo. (1 Timoteo 1:12, 13) Kasano a ti umasping nga apresasion tulongannatayo nga agtultuloy a magna iti natan-ok a daldalan ti Dios?

Magmagna a Siyayaman

Dagiti agdaldaliasat maragsakanda kadagiti naisangsangayan a buya no addada iti kabambantayan. Masursuroda met a tagiragsaken ti babassit a banag a malabasanda, kas iti di gagangay a bato, napintas a sabong, wenno maysa nga atap nga animal a masaripatpatanda. Iti naespirituan nga anag, kasapulan nga alistotayo a mangapresiar kadagiti gunggona​—dadakkel ken babassit​—nga iyeg ti pannakipagna iti Dios. Ti panagbalin a sipapanunot iti dayta pabaruenna ti pigsatayo a magna ken pasiglatenna ti makabannog a pannagna. Umanamongtayo iti sasao ni David: “Iti bigat ipangngegmo kaniak ti naayat a kinamanangngaasim, ta kenka inkabilko ti panagtalekko. Ipakaammom kaniak ti dalan a rebbeng a pagnaak.”​—Salmo 143:8.

Ni Mary, nga adu a tawenen a nakipagna iti daldalan ni Jehova, ti nagkuna: “No kumitaak iti parsua ni Jehova, makitak saan laeng a ti narikut a disenio no di pay ket ti naayat a personalidad ti Dios. Animal, tumatayab, wenno insekto man dayta, tunggal maysa ket nagpaiduma, napno iti pagsidsiddaawan. Mangyeg iti isu met laeng a rag-o dagiti naespirituan a kinapudno a limmawag kadagiti naglabas a tawen.”

Kasanotay a mapauneg ti apresasiontayo? Ti maysa ket babaen ti saan a panangtagilag-an kadagiti inaramid ni Jehova kadatayo. “Agkararagkayo a di agressat,” insurat ni Pablo. “Mainaig iti isuamin agyamankayo.”​—1 Tesalonica 5:17, 18; Salmo 119:62.

Ti personal a panagadal tulongannatayo nga agbalin a manangapresiar. Indagadag ni Pablo kadagiti Kristiano idiay Colosas: “Agtultuloykayo a magna a naikaykaysa ken [Kristo Jesus], . . . nga agliplippias iti pammati iti panagyaman.” (Colosas 2:6, 7) Ti panagbasa iti Biblia ken panangmennamenna iti mabasatayo pabilgenna ti pammatitayo ken ad-adda nga iyadaninatayo iti Autor ti Biblia. Naglaon ti amin a panidna kadagiti gameng a makagutugot kadatayo nga ‘aglippias iti panagyaman.’

Nalaklaka ti agserbi ken Jehova no kaduatayo dagiti kakabsattayo. Kinuna ti salmista maipapan iti bagina: “Maysaak a kadua dagidiay amin nga agbuteng kenka.” (Salmo 119:63) Dadduma kadagiti karagsakan a kanito iti biagtayo ket no addatayo kadagiti Nakristianuan nga asamblea wenno kadagiti dadduma nga okasion a kaduatayo dagiti kakabsattayo. Mabigbigtayo a ti nagpateg a sangalubongan a Nakristianuan a pamiliatayo ket maigapu ken Jehova ken kadagiti natan-ok a daldalanna.​—Salmo 144:15b.

Malaksid iti apresasion, ti pannakarikna nga adda responsabilidadtayo pabilgennatay nga agtultuloy a sumurot kadagiti natan-ok a daldalan ni Jehova.

Responsable a Pannagna

Ammo dagiti responsable a managdaliasat a nasken a naannad ti pannagnada tapno saanda a mayaw-awan wenno mayasideg unay kadagiti napeggad a teppang. Kas tattao a nawaya nga agdesision, impaayannatayo ni Jehova iti relatibo a wayawaya ken kalintegan. Ngem dagita a wayawaya kalikagumanna ti panagbalintayo a responsable bayat nga itungpaltayo dagiti Nakristianuan a rebbengentayo.

Kas pagarigan, agtalek ni Jehova kadagiti adipenna nga itungpalda dagiti annongenda buyogen ti kinaresponsable. Saanna nga ibaga no kasano kaadu nga enerhia ken tiempo ti nasken a busbosen kadagiti Nakristianuan nga aktibidad wenno no kasano kaadu ti maitulongtayo iti pinansial wenno dadduma a pamay-an. Imbes ketdi, agaplikar kadatayo amin dagiti sasao ni Pablo kadagiti taga Corinto: “Tunggal maysa aramidenna koma kas iti inkeddengna iti pusona.”​—2 Corinto 9:7; Hebreo 13:15, 16.

Kadagiti responsable a Kristiano, ti panangted iramanna ti panangiranud iti naimbag a damag iti sabsabali. Maipakitatayo met a responsabletayo babaen ti panangted iti pinansial a tulong maipaay iti sangalubongan a trabaho ti Pagarian. Ni Gerhardt, maysa a panglakayen, inlawlawagna a ninayonanda ken baketna ti itintinnagda a kontribusion kalpasan ti itatabunoda iti maysa nga asamblea idiay Makindaya a Europa. “Nakitami a nanumo dagiti kakabsat sadiay; ngem apresiarenda unay dagiti literaturatayo a naibatay iti Biblia,” kunana, “isu nga inkeddengmi ti mangted iti adu a tulong a kabaelanmi agpaay kadagiti agkasapulan a kakabsat iti sabsabali a pagilian.”

Panangparayray iti Panagibturtayo

Kasapulan ti panagibtur iti pannagna iti kabambantayan. Napateg ti panagwatwat dagiti managdaliasat, ken adu dagiti magna iti pangababaen a distansia tapno maisaganada ti bagbagida iti nawatiwat a panagdaliasat. Umasping iti dayta, inrekomenda ni Pablo nga agtultuloytayo nga okupado kadagiti teokratiko nga aktibidad tapno mataginayon ti naespirituan a salun-attayo. Kinuna ni Pablo a dagiti agtarigagay a ‘magna a maikari ken Jehova’ ken “mapabpabileg,” nasken nga ‘agtultuloy nga agbunga iti tunggal naimbag nga aramid.’​—Colosas 1:10, 11.

Ti pannakatignay tulonganna ti managdaliasat nga agtultuloy nga agibtur. Kasano? Mamagtignay ti panagtalinaed a naipamaysa iti nalawag a kalat, kas iti adayo a bantay. Ket no makagteng ti managdaliasat kadagiti adda pagilasinanna a lugar, makitana no kasano kaadayo pay ti pagnaenna. No taliawenna ti nadaliasatnan, mariknana ti pannakapnek.

Umasping iti dayta, pabilgen ken tignayennatayo ti namnamatayo a biag nga agnanayon. (Roma 12:12) Kabayatanna, bayat a magnatayo iti daldalan ni Jehova, adda magapuanantayo iti panangaramid ken kalpasanna panangragpat kadagiti Nakristianuan a kalat. Ket anian ti rag-otayo no lagipentayo dagiti adu a tawen a matalek a panagserbitayo wenno makakita iti panagbalbaliw a naaramidtayo ti personalidadtayo!​—Salmo 16:11.

Tapno madaliasatda ti nawatiwat a distansia ken saan a maibusan iti pigsa, magna dagiti agdaldaliasat iti di agbaliw a kapartak. Umasping iti dayta, ti nasayaat a rutina a pakairamanan ti regular a pannakigimong ken panangasaba ti tumulong kadatayo nga agtultuloy a sipapasnek a mangragpat iti kalattayo. Gapuna, imparegta ni Pablo kadagiti padana a Kristiano: “Agtultuloytayo koma a magna a siuurnos iti daytoy met laeng a rutina.”​—Filipos 3:16.

Siempre, saantayo a magna nga agmaymaysa iti daldalan ni Jehova. “Panunotentayo koma no kasanotayo a matignay ti maysa ken maysa iti ayat ken nasayaat nga ar-aramid,” insurat ni Pablo. (Hebreo 10:24, New International Version) Ti nasayaat a naespirituan a timpuyog palakaenna ti panangtaginayon iti kapartaktayo bayat a magnatayo a kadua dagiti kapammatiantayo.​—Proverbio 13:20.

Kamaudiananna, ken ti kapatgan, ditay koma pulos liplipatan ti bileg nga ipaay ni Jehova. Dagidiay papigsaen ni Jehova ‘magnada iti rumangrang-ay a kired.’ (Salmo 84:5, 7) Nupay ti kasasaadtayo no dadduma ket kas iti narigat a dalan a masapul a daliasatentayo, maaramidtayo dayta iti tulong ni Jehova.