Report Dagiti Manangiwaragawag iti Pagarian
‘Ti Sao ti Dios Adda Bilegna’
IDIAY Jamaica, maysa a nainar nga isla ti Caribe, ti Biblia ket kabesado ti kaaduan a tao. Iti kinapudnona, masarakan ti King James Version iti nganngani amin a pagtaengan, ken adda dagiti tattao a nakapaneknek a “ti sao ti Dios nabiag ken adda bilegna.” (Hebreo 4:12) Daytoy a bileg mabalbaliwanna ti biag dagiti tattao, kas ipakita ti sumaganad a kapadasan.
Maysa a lalaki nga agnagan iti Cleveland ti kaaw-awidna laeng manipud iti pagtrabahuanna idi bisitaen ti maysa kadagiti Saksi ni Jehova. Kalpasan ti panangiranudna iti sumagmamano a punto manipud iti Kasuratan, imbati ti Saksi kenkuana ti katulongan iti panagadal iti Biblia a Pannakaammo a Mangiturong iti Biag nga Agnanayon. Saan nga ammo ni Cleveland no kasano kabileg ti Sao ti Dios iti biagna.
Mamitlo iti kada aldaw ti panagkararag ni Cleveland, nga agpatpatulong iti Dios tapno makapagdayaw Kenkuana iti umiso a pamay-an. Patien ni Cleveland a saan nga umiso ti panagdayaw dagiti nagannak kenkuana, ngem naupay kalpasan a sinukimatna ti dadduma a relihion. Nupay nangnangngegnan ti maipapan kadagiti Saksi ni Jehova, pinagduaduaanna no adda kadakuada ti kinapudno. Iti laksid ti panagduaduana, immanamong ni Cleveland a makipagadal iti Biblia iti Saksi a bimmisita iti pagtaenganna. Apay? Agsipud ta kayatna a paneknekan a saan nga umiso ti relihion dagiti Saksi!
Di nagbayag, naammuan ni Cleveland a di makaay-ayo iti Dios ti imoral a relasionna iti dua a babbai. (1 Corinto 6:9, 10) Kalpasan laeng ti dua a panagadal, naaddaan iti tured a makisina kadagiti babbai. Nangrugi met a tumabuno kadagiti Nakristianuan a gimong iti Kingdom Hall. Ngem maysa met daytoy a suot.
Ni Cleveland ket aktibo a kameng ti soccer team iti komunidadna, ket dagiti ay-ayam ti manglaplapped kenkuana a makigimong. Ania ti inaramidna? Iti laksid ti panangpilit ti bunggoy a nakaitimpuyoganna, ti coach, ken dagiti gagayyemna, inkeddeng ni Cleveland nga umikkat iti soccer team. Wen, sumamsamay idin kenkuana ti bileg ti Sao ti Dios maipaay iti pagimbaganna!
Naiparangarang pay ti bileg ti Sao ti Dios idi rinugian ni Cleveland nga iranud iti sabsabali dagiti naadalna iti Biblia. (Aramid 1:8) Kas resultana, dua kadagiti dati a kabunggoyna ti nangrugi a tumabuno kadagiti gimong dagiti Saksi ni Jehova. Nakualipikar ni Cleveland nga agbalin nga agibumbunannag iti naimbag a damag, ket pagrag-oanna unay ti ministerio, nga us-usarenna ti Sao ti Dios a tumulong iti sabsabali.
Gapu iti agtultuloy a panangtignay kenkuana ti bileg ti Sao ti Dios, insimbolo ni Cleveland ti dedikasionna ken Jehova babaen ti bautismo iti danum ket nagangayanna naipaayan iti pribilehio kas amin-tiempo a ministro ken kas ministerial nga adipen iti kongregasion.
Idiay Jamaica ken iti intero a lubong, rinibu ti nakapaneknek a pudno a “nabiag ken adda bilegna” ti Sao ti Dios.
[Mapa/Ladawan iti panid 8]
(Para iti aktual a pannakaurnosna, kitaem ti publikasion)
JAMAICA
[Credit Line]
Mapa ken globo: Mountain High Maps® Copyright © 1997 Digital Wisdom, Inc.