Report Dagiti Manangiwaragawag iti Pagarian
Tulong Tapno Masalimetmetan ti Kinasagrado ti Dara
ITI intero a daga, impakita dagiti adipen ni Jehova ti kinasungdoda iti Dios mainaig iti kinasagrado ti dara. (Aramid 15:28, 29) Ti klase matalek ken masirib nga adipen ket nangipaay iti tulong kadagiti Kristiano a kakabsat. (Mateo 24:45-47) Kitaentayo no ania dagiti resulta iti Pilipinas.
Ireport ti sanga nga opisina iti Pilipinas: “Idi 1990, napakaammuankami a dagiti pannakabagi manipud Brooklyn Bethel ket mangangay iti seminar iti Pilipinas. Naawis dagiti kakabsat manipud iti sumagmamano a sanga nga opisina iti Asia, agraman ti Korea, Taiwan, ken Hong Kong. Ti panggep ket tapno tumulong a mangbuangay iti Hospital Information Services kadagiti sanga nga opisinada ken mangbukel met kadagiti Hospital Liaison Committee. Iti Pilipinas, dagiti komite ket damo a nabuangay kadagiti uppat a kangrunaan a siudad.” Ikagumaan dagiti komite ti agsapul kadagiti doktor a situtulok a tumulong kadatayo maipapan iti takder ti Kristiano mainaig iti dara. Tulonganda met dagiti kakabsat no tumaud dagiti pakarigatan mainaig iti dara.
Ni Remegio ket napili nga agserbi iti Hospital Liaison Committee idiay Baguio. Bayat ti panaglabas ti tiempo, naammuan dagiti doktor ti aktibidad ti komite. Malagip ni Remegio ti maysa nga okasion a nakimiting ti adu a doktor iti Hospital Liaison Committee. Kayatda a maammuan no kasano a mataming dagiti Saksi a pasiente nga agkedked a mayalisonan iti dara. Kinuna ni Remegio: “Nangrugi nga agimtuod dagiti doktor, ngem naikulengak agsipud ta teknikal unay dagiti saludsod.” Nagkararag ken ni Jehova tapno mapagballigianna daytoy a karit. Intuloy ni Remegio: “Kalpasan ti kada saludsod, ti dadduma a doktor ti simmungbat ket inlawlawagda no kasanoda a napagballigian ti umasping a situasion.” Naragsakan ni Remegio iti tulong, nangruna ta nagpaut iti dua nga oras ti saludsod ken sungbat.
Adda 21 a komite itan iti intero a pagilian, a buklen ti 77 a kakabsat a lallaki. Kuna ni Danilo, maysa a Saksi a doktor: “Naammuan dagiti doktor a dagiti Saksi a pasienteda ket supsuportaran ti maysa nga organisasion a siaayat a mangay-aywan kadakuada.” Maysa a doktor ti bumdeng idi damo a mangopera iti maysa a kabsat a lalaki no saan a mayalisonan iti dara. Ngem natibker ti takder ti kabsat. Naaramid ti operasion ket nagballigi. Ireport ti Hospital Information Services: “Nasdaaw ti doktor iti panagimbag ti pasiente. Kinunana: ‘Gapu iti panagballigi ti operasion, no adda siasinoman a kapammatianyo a kasapulanna ti kastoy a kita ti operasion a di agusar iti dara, maragsakanak a mangaramid iti dayta.’”