No Apay a Saantayo a Makapagtakder iti Bukodtayo
“Ti dua nasaysayaat ngem iti maysa . . . No ti maysa kadakuada matuang, daydiay sabali mabalinna a bangonen ti kaduana.”—Ari Solomon
KINUNA ni Solomon, ti ari ti nagkauna nga Israel: “Ti dua nasaysayaat ngem iti maysa, agsipud ta addaanda ti naimbag a gunggona gapu iti napinget a panagtrabahoda. Ta no ti maysa kadakuada matuang, daydiay sabali mabalinna a bangonen ti kaduana. Ngem kasanonto koma iti agmaymaysa a matuang no awan ti sabali a mangbangon kenkuana?” (Eclesiastes 4:9, 10) Daytoy a masirib a managpaliiw iti kababalin ti tao impaganetgetna ti panagkasapulantayo iti kadua ken napateg ti di panangiputputong iti bagitayo. Ngem saan laeng a kapanunotan ti tao dayta. Dagita a sasao ni Solomon nagtaudda iti sirib ken impaltiing ti Dios.
Saan a nainsiriban nga iputputongtayo ti bagitayo. Kasapulan dagiti tattao ti maysa ken maysa. Kasapulantayo amin ti pigsa ken tulong a mabalintayo a magun-od kadagiti sabsabali. “Ti maysa a mangiputputong iti bagina sapulennanto ti kabukbukodanna nga iniimut a tarigagay,” kuna ti proverbio ti Biblia. “Maibusor iti isuamin a praktikal a kinasirib isu umalsanto.” (Proverbio 18:1) Saan ngarud a nakaskasdaaw a dagiti social scientist paregtaenda dagiti indibidual a makigrupo ken maaddaanda iti interes iti sabsabali.
Maysa kadagiti rekomendasion tapno maisubli ti panagbiag kas maysa a komunidad isu ti dinakamat ni Propesor Robert Putnam a “panangpabileg iti impluensia ti pammati iti Dios.” Naisangsangayan dagiti Saksi ni Jehova iti daytoy a banag agsipud ta masalsalaknibanda kadagiti arig pamilia a kongregasion iti intero a lubong. Maitunos kadagiti sasao ni apostol Pedro, ‘addaanda iti ayat iti intero a timpuyog dagiti kakabsat,’ nga addaan iti nadayaw a ‘panagbuteng iti Dios.’ (1 Pedro 2:17) Liklikan met dagiti Saksi ti panangiputong iti bagida ken dagiti makadangran nga epektona agsipud ta dagiti adu a positibo nga aktibidad a nainaig iti pudno a panagdayaw ti mamagtultuloy kadakuada a tumulong kadagiti kaarrubada a mangadal iti kinapudno a masarakan iti Sao ti Dios, ti Biblia.—2 Timoteo 2:15.
Nabalbaliwan ti Biagda Gapu iti Ayat ken Panagkakadua
Dagiti Saksi ni Jehova ket maysa a komunidad nga addaan panagkaykaysa ken adda napateg a paset ti tunggal kamengna. Kas pagarigan, utobenyo ti kaso da Miguel, Froylán, ken Alma Ruth, tallo a kameng ti pamilia idiay Latin America. Pandekda agsipud ta naipasngayda nga addaan iti sakit iti tulang. Kasapulanda amin ti agusar iti wheelchair. Ania ti epektona iti biagda ti pannakitimpuyog kadagiti Saksi?
Inkomento ni Miguel: “Adda dagiti panawen a nagparikutak, ngem nagbalbaliw ti biagko idi rinugiak ti makitimpuyog iti ili ni Jehova. Nakapegpeggad ti panangiputputong iti bagi. Ti pannakitimpuyogko kadagiti kapammatian kadagiti Nakristianuan a gimong, a nakikadua kadakuada iti kada lawas, dakkel ti naitulongna tapno maaddaanak iti pannakapnek.”
Innayon ni Alma Ruth: “Masansan a nakaro ti panagleddaangko; malidlidayak unay. Ngem idi maammuak ti maipapan ken ni Jehova, nariknak a mabalinko ti maaddaan iti nasinged a relasion kenkuana. Dayta ti minatmatak a kapatgan a banag iti biag. Adu a naespirituan a tulong ti impaay kadakami ti pamiliami, ket dayta ti ad-adda a namagkaykaysa kadakami.”
Babaen ken ni tatangna, siaayat a natulongan ni Miguel nga agbasa ken agsurat. Kalpasanna, insuro met dayta ni Miguel kada Froylán ken Alma Ruth. Napateg dayta iti espiritualidadda. “Dakkel a nakagunggonaanmi ti panagadal nga agbasa agsipud ta mabalinmin ti mataraonan iti naespirituan babaen ti panangbasa iti Biblia ken kadagiti naibatay-Biblia a publikasion,” kuna ni Alma Ruth.
Iti agdama, agserserbi ni Miguel kas Kristiano a panglakayen. Ni Froylán siam a daras a nabasanan ti Biblia. Ni Alma Ruth pinarang-ayna ti serbisiona ken ni Jehova babaen ti panagserbina kas payunir a ministro, wenno amin-tiempo nga agibumbunannag ti Pagarian, sipud 1996. Inkomentona: “Babaen ti bendision ni Jehova, naragpatko daytoy a kalat, agsipud ta tultulongandak dagiti patgek a kakabsat a babbai, a timmulong kaniak saan laeng a mangasaba no di pay ket mangisuro babaen ti panangikondukta iti 11 a panagadal iti Biblia a nabaelak nga inrugi.”
Nasayaat met ti kapadasan ni Emelia, a naaksidente isu a kasapulan nga agusar iti wheelchair gapu ta nadunor dagiti saka ken durina. Dagiti Saksi ni Jehova idiay Mexico City inyadalanda iti Biblia ni Emelia, ket nabautisaran idi 1996. Kuna ni Emelia: “Idi diak pay naammuan ti kinapudno, kayatko idi ti agpakamatay; diakon kayat ti agbiag. Mariknak nga awan pulos kapapay-an ti biagko, nga agsangsangitak iti aldaw ken rabii. Ngem idi naitimpuyogak iti ili ni Jehova, nariknak ti ayat dagiti kakabsat. Naparegtaak gapu iti impakitada a personal nga interes. Maysa kadagiti panglakayen ti nagserbi a kasla kabsat wenno amak. Isu ken sumagmamano a ministerial nga adipen ti mangkadua kaniak kadagiti gimong ken iti panangasaba bayat a nakaluganak iti wheelchair.”
Ni José, a nabautisaran kas maysa a Saksi ni Jehova idi 1992, ket agmaymaysa nga agbibiag. Agtawen ni José iti 70, a retirado iti trabaho sipud idi 1990. Makapaspasar ni José iti panagleddaang, ngem idi kinasabaan ti maysa a Saksi, dagus a rinugianna ti tumabuno kadagiti Nakristianuan a gimong. Magustuanna dagiti nangngeg ken nakitana sadiay. Kas pagarigan, napaliiwna ti panagkakadua dagiti kakabsat ken nariknana ti pannakaseknanda kenkuana kas maysa nga indibidual. Dagiti panglakayen ken ministerial nga adipen iti kongregasion a nakaitimpuyoganna ti mangay-aywan ita kenkuana. (Filipos 1:1; 1 Pedro 5:2) “Makapabileg a tulong” kenkuana dagitoy a kapammatian. (Colosas 4:11) Ipadoktorda, bisitaenda iti pagtaenganna, ken pinarparegtada bayat dagiti uppat a pannakaoperana. Kinunana: “Nangipakitada iti pannakaseknan kaniak. Arigna a kapamiliak ida. Maragsakanak iti pannakikaduada.”
Adda Pudno a Kinaragsak iti Panangted
Idi kinuna ni Ari Solomon a “ti dua nasaysayaat ngem iti maysa,” kadakdakamatna ti maipapan iti kinamaag ti panangbusbos iti amin a pigsa iti pananggun-od kadagiti material a kinabaknang. (Eclesiastes 4:7-9) Dayta ti talaga a sigagagar a pakakumikoman ti adu a tao ita, uray pay kaipapananna dayta ti panangisakripisio iti relasionda iti uneg ken ruar ti pamilia.
Dayta nga espiritu ti kinaagum ken kinamanagimbubukodan ti nangiturong iti adu a tao a mangiputputong iti bagida. Saan a nangyeg dayta iti kinaragsak wenno pannakapnek iti biag, agsipud ta ti pannakapaay ken kinaawan namnama ket gagangay kadagidiay ringringbawan ti kasta a rikna. Maisupadi iti dayta, dagiti naisalaysay a kapadasan ipakitada dagiti nasayaat a resulta ti pannakitimpuyog kadagidiay agserserbi ken ni Jehova ken matigtignay gapu iti panagayat kenkuana ken kadagiti kaarrubada. Ti regular nga itatabuno kadagiti Nakristianuan a gimong, ti tulong ken pannakaseknan dagiti pada a Kristiano, ken ti naregta a pannakipaset iti ministerio ket makatulong unay kadagiti indibidual tapno maparmekda dagiti negatibo a rikna a maigapu iti panangiputong iti bagi.—Proverbio 17:17; Hebreo 10:24, 25.
Yantangay agpannuraytayo iti maysa ken maysa, natural a mamataud iti pannakapnek ti panagaramid iti bambanag maipaay iti sabsabali. Ni Albert Einstein, a ti trabahona ket nakagunggonaan ti sabsabali, kinunana: “Ti pateg ti maysa a tao . . . ket rumbeng a makita babaen kadagiti ipapaayna, saan ket a kadagiti maaw-awatna.” Maitunos dayta kadagitoy a sasao ni Apotayo a Jesu-Kristo: “Ad-adu ti kinaragsak iti panangted ngem iti panangawat.” (Aramid 20:35) No kasta, nupay nasayaat ti umawat iti pammateg, makagunggona met ti panangipakita iti pammateg iti sabsabali.
Maysa nga agdaldaliasat a manangaywan nga adun a tawen a timmulong iti naespirituan kadagiti kongregasion a binisitana ken timmulong a nangbangon kadagiti paggigimongan dagiti nanumo a Kristiano ti nangyebkas iti riknana. Kunana: “Matignayak a kanayon nga agsapul kadagiti gundaway nga agserbi kadagiti kakabsat gapu ta pakaragsakak dayta ken makitkitak ti apresasionda. Sigun iti kapadasak, tulbek ti kinaragsak ti panangipakita iti personal nga interes kadagiti sabsabali. Ken ammok a kas papanglakayen, masapul nga agbalintayo a ‘kas paglemmengan a lugar manipud iti angin . . . , kas barbaresbes ti danum iti awanan danum a pagilian, kas salinong ti maysa a nadagsen a napasdok a bato iti napaksuyan a daga.’”—Isaias 32:2.
Anian a Makaay-ayo ti Agkakadua a Sangsangkatunos!
Sigurado nga adda dakkel a gunggona ken pudno a kinaragsak iti panangtulong iti sabsabali ken pannakikadua kadagidiay agserserbi ken ni Jehova. “Adtoy!” kinuna ti salmista. “Anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” (Salmo 133:1) Ti panagkaykaysa ti pamilia ket maysa a napateg a banag iti panagtitinnulong, kas ipakita ti kaso ni Miguel, Froylán, ken Alma Ruth. Ken anian a bendision ti maikaykaysa kadagiti sabsabali maipaay iti pudno a panagdayaw! Kalpasan ti panangbalakadna kadagiti Kristiano nga assawa a lallaki ken babbai, insurat ni apostol Pedro: “Kamaudiananna, agkakapanunotankay koma amin, a mangipakitakayo iti pannakipagmaymaysa ti rikna, addaan iti nainkabsatan a panagayat, nadungngo a mannakipagrikna, napakumbaba iti panagpampanunot.”—1 Pedro 3:8.
Ti pudno a panagkakadua mangyeg kadagiti naisangsangayan nga emosional ken naespirituan a gunggona. Iti panangbalakadna kadagiti kapammatianna, kuna ni apostol Pablo: “Agsaokayo iti makaliwliwa kadagiti malmaldaangan a kararua, saranayenyo dagiti nakapuy, maaddaankayo iti mabayag a panagitured iti isuamin. . . . Kankanayon a surotenyo ti naimbag maipaay iti maysa ken maysa ken iti amin a sabsabali pay.”—1 Tesalonica 5:14, 15.
No kasta, agpanunotkayo kadagiti praktikal a pamay-an tapno makaaramidkayo iti naimbag iti sabsabali. “Aramidenyo koma ti naimbag kadagiti amin, ngem nangnangruna kadagidiay nainaig kada[kayo] iti pammati,” agsipud ta daytoy mangnayon iti pudno a kaipapanan ti biagyo ken tumulong a mangyeg iti pannakapnekyo. (Galacia 6:9, 10) Insurat ni Santiago nga adalan ni Jesus: “No ti kabsat a lalaki wenno kabsat a babai a lamolamo ti kasasaadna ket agkurang iti taraon nga umdas a maipaay iti aldaw, ngem ti maysa kadakayo kunaenna kadakuada: ‘Mapankayo a sitatalna, aginudo ken agbussogkayo,’ ngem saanyo nga ited kadakuada dagiti masapsapul a maipaay iti bagida, ania ti pagimbagan dayta?” (Santiago 2:15, 16) Nalawag ti sungbat iti dayta a saludsod. Nasken nga ‘itultuloytayo a kitaen, saan a ti personal a panaginteres iti laeng bukodtayo a bambanag, no di ket kasta met ti personal a panaginteres iti bambanag ti sabsabali.’—Filipos 2:4.
Malaksid iti panangipaay iti material a tulong no adda naganat nga agkasapulan wenno no mapasamak ti didigra, okupado unay dagiti Saksi ni Jehova a tumulong kadagiti padada a tattao iti napateg a pamay-an—babaen ti panangikasaba iti naimbag a damag ti Pagarian ti Dios. (Mateo 24:14) Ti panangiwaragawag ti nasurok nga 6,000,000 a Saksi iti daytoy a mensahe ti namnama ken liwliwa ket pammaneknek ti pudno, naayat nga interesda iti sabsabali. Ngem ti panangtulong babaen ti Nasantuan a Kasuratan tumulong met tapno mapennek ti sabali pay a kasapulan ti tao. Ania dayta?
Panangpennek iti Maysa a Napateg a Kasapulan
Tapno maaddaan iti pudno a kinaragsak, kasapulan a maaddaantayo iti umiso a relasion iti Dios. Naikuna: “Ti kinapudno a ti tao, sadinoman ken kaanoman, manipud punganay agingga iti agdama, matignay nga umawag iti maysa a patienna a natantan-ok ken nabilbileg ngem kenkuana, ipakitana a nainkasigudan ti panagtarigagay a maaddaan iti relihion ken masapul a mabigbig iti nasientipikuan a pamay-an. . . . Rumbeng nga agamanga, agsiddaaw ken pagraemantayo a makita ti sapasap a panangbirok ti tao, ken mamati, iti katan-okan a persona.”—Man Does Not Stand Alone, ni A. Cressy Morrison.
Kinuna ni Jesu-Kristo: “Naragsak dagidiay sipapanunot iti naespirituan a kasapulanda.” (Mateo 5:3) Saan a pagimbagan dagiti tattao ti mabayag a panangiputongda iti bagida manipud iti padada a tattao. Ngem adayo a napegpeggad no adaywantayo ti Namarsua kadatayo. (Apocalipsis 4:11) Ti pananggun-od ken panangyaplikar iti “mismo a pannakaammo iti Dios” nasken nga agbalin a napateg a paset ti biagtayo. (Proverbio 2:1-5) Kinapudnona, masapul a determinadotayo a mangpennek iti naespirituan a kasapulantayo, agsipud ta ditayo makapagtakder iti bukodtayo no naisinatayo iti Dios. Ti naragsak ken pudno a makagunggona a biag ket agpannuray iti nasayaat a relasion ken ni Jehova, “ti Kangatuan iti intero a daga.”—Salmo 83:18.
[Ladawan iti panid 5]
Miguel: “Adda dagiti panawen a nagparikutak, ngem nagbalbaliw ti biagko idi rinugiak ti makitimpuyog iti ili ni Jehova”
[Ladawan iti panid 5]
Alma Ruth: “Idi maammuak ti maipapan ken ni Jehova, nariknak a mabalinko ti maaddaan iti nasinged a relasion kenkuana”
[Ladawan iti panid 6]
Emelia: “Idi diak pay naammuan ti kinapudno, . . . Mariknak nga awan pulos kapapay-an ti biagko”
[Ladawan iti panid 7]
Ti pannakitimpuyog kadagiti pudno nga agdaydayaw tulongannatayo a mangpennek iti naespirituan a kasapulantayo