Ania a Nagan ti Ar-aramidem?
NAKABASAKA kadin iti obituario iti lokal a periodiko wenno salaysay maipapan iti biag ken dagiti gapuanan ti maysa a pimmusay a tao? Inyimtuodmo kadi iti bagim, ‘Anianto ngata ti ibaga dagiti tattao maipapan kaniak?’ Kasano ngata kaadu ti mangpampanunot no ania ti ibatida a pakasarsaritaan kadakuada inton matayda? Gapuna, usigenyo dagitoy a prangka a saludsod: Ania ngata ti ibagbaga ita dagiti tattao maipapan kenka no pimmusayka idi kalman? Ania a kita ti nagan ti ar-aramidem? Ania ti kayatmo a malaglagipto ti Dios ken dagidiay makaam-ammo kenka?
Ti masirib a mannurat ti libro ti Biblia nga Eclesiastes kinunana: “Ti nagan nasaysayaat ngem iti naimbag a lana, ken ti aldaw ti ipapatay ngem iti aldaw ti pannakayanak ti maysa.” (Eclesiastes 7:1) Apay a ti aldaw nga ipapatay ti maysa nasaysayaat ngem iti aldaw a pannakayanakna? Ngamin idi maipasngay ti maysa a tao, awan pay ti naibangonna a reputasion. Pulos nga awan pay ti nagapuananna. Saan a masinunuo no nasayaat wenno dakes ti pagbalinannanto. Iti dayta nga anag, para kadagidiay nakaipasdek iti naimbag a nagan iti adu a tawen, ti aldaw nga ipapatay ket talaga a nasaysayaat ngem iti aldaw ti pannakaipasngay.
Isu nga adda pagpiliantayo. Iti kinapudnona, inaldaw nga adu ti pagpiliantayo a mangsukog iti reputasiontayo inton mataytayo, nangruna no anianto ti malaglagip kadatayo ti Dios. Gapuna, insurat ti isu met laeng a masirib a Hebreo: “Ti pakalaglagipan daydiay nalinteg maiparbeng iti bendision, ngem ti mismo a nagan dagidiay nadangkes agrunotto.” (Proverbio 10:7) Anian a pribilehio a laglagipennatayo ti Dios tapno bendisionannatayo!
No masiribtayo, ti kalattayo isu ti panangay-ayo iti Dios babaen ti panagbiag a maitunos kadagiti pagalagadanna. Kaipapanan dayta a surotentayo dagiti pamunganayan a prinsipio nga imbaga ni Kristo: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’ Kadagitoy dua a bilin nga agpannuray ti intero a Linteg, ken dagiti Mammadto.”—Mateo 22:37-40.
Adda dagiti malaglagip kas pilantropo, promotor dagiti sibil a kalintegan, wenno malaglagip gapu kadagiti gapuananda iti negosio, siensia, medisina, wenno dadduma pay nga aktibidad. Ngem ania ti kayatmo a pakasarsaritaam?
Ti mannaniw a taga Scotland a ni Robert Burns (1759-96) inyebkasna ti tarigagayna nga adda koma Dios a mangted kadatayo iti sagut tapno kabaelantayo a matmatan ti bagitayo a kas iti panangmatmat kadatayo dagiti sabsabali. Mabalinmo kadi a matmatan a natimbeng ti bagim ket maibagam a nasayaat ti reputasionmo kadagiti dadduma a tattao ken iti Dios? Ti relasiontayo kadagiti sabsabali sigurado a napatpategto ngem kadagiti aniaman a magapuanantayo iti ababa a tiempo iti tay-ak ti isport wenno negosio. Isu a ti saludsod: Ania ti epektona kadagiti sabsabali ti pannakilangentayo kadakuada—ti pannakipatang, kababalin, ken tigtignaytayo? Matmatandatayo kadi a kas mannakigayyem wenno narigat a maasitgan? Naanus wenno nagubsang? Mannakibagay wenno istrikto? Nabara ken mannakipagrikna wenno awanan iti pannakaseknan? Makapaupay a kritiko wenno makapabileg a mammagbaga? Usigentayo ti dadduma a pagarigan iti naglabas ken iti agdama tapno makitatayo no ania ti masursurotayo.
[Ladawan iti panid 3]
Tinarigagayan ni Robert Burns nga adda koma Dios a mangted kadatayo iti sagut tapno kabaelantayo a matmatan ti bagitayo a kas iti panangmatmat kadatayo dagiti sabsabali
[Credit Line]
Manipud iti libro nga A History of England