Kasano ti Kalaingmo a Makikomunikar?
“SURAT ti Pammateg ti Agtawen iti 60.” Isu dayta ti tema ti sweepstakes a pasalip ti maysa a bangko idiay Japan sumagmamano a tawen ti napalabasen. Naidagadag kadagiti Hapones nga agtawen iti 50 agingga 60 nga iyebkasda ti “pudno a riknada” kadagiti assawada. Maysa a nakisalip ti nagsurat ken ni baketna: “Katawaannak siguro, ngem pagbabawyak no diak iyebkas ti riknak: Pagyamanan ta sika ti naasawak.”
Iti nagduduma a kultura, agraman ti dadduma iti Oriente, saan a maiparparegta ti nawaya a panangyebkas iti rikna. Kaskasdi, nasurok a 15,000 ti nakipaset iti dayta a pasalip a panagsurat iti ay-ayaten. Limmatak ti pasalip isu a naulit a naiganuat, ken adda dagiti libro a naipablaak maibatay kadagita a surat. Ipamatmat dayta nga iti kaungganda, adu a tattao ti agtarigagay a mangyebkas iti riknada iti dungdungnguenda nga asawa. Dagiti dadduma, nupay kasta, agkedkedda a mangaramid iti dayta. Apay? Nalabit a marigatanda a mangilawlawag iti riknada kadagiti sabsabali—kas koma iti asawada.
Ni Hitoshi Kato, a nangisurat iti maysa a libro maipapan iti panagretiro, kunana a kadagiti natataengan nga agassawa idiay Japan, adu a panagdiborsio ti ingganuat dagiti assawa a babbai gapu iti rimmamut a gura a timmanor iti panaglabas ti tawtawen. “Ngem,” kunana, “resulta met dayta ti saanda a panagsarita no maipasangoda iti pakarigatan.”
Apaman nga agretiro, mabalin a maklaat lattan ti maysa nga asawa a lalaki no ibaga ni baketna nga agdiborsioda. Iti adu a tawen, mabalin a saan a nagsaritaan ti agassawa no ania ti marikriknada iti maysa ken maysa. Nalabit a pinadas ti agassawa nga iyebkas ti riknada ngem saanda a nataginayon a positibo ti komunikasionda. Imbes a pabilgenda ti relasionda, kanayonda nga agsupiat.
Kasano a sitatanang a marisut ti agassawa ti dida panagkinnaawatan ken mayebkasda ti riknada iti nasayaat a pamay-an? Nalabit nga interesadokayo a mangammo a dagiti kasayaatan a singasing ket masarakan, saan nga iti moderno a libro ti maysa a mammagbaga iti panagasawa, no di ket iti kadaanan a libro nga adun a siglo a maipatpateg—ti Biblia.