Mapalawayo Kadi ti Ayatyo?

TI KAWAR a mangtengtengngel iti angkla masapul a maanduranna dagiti puersa tapno saan a mayanud ti barko. Ngem makaandur laeng daytoy no natibker dagiti kalangkang ti kawar. No saan, mapugsat daytoy.

Kasta met laeng ti kongregasion Kristiano. Tapno natibker ken nasalun-at ti kongregasion, masapul nga agkaykaysa dagiti kameng ti kongregasion. Ania ti mamagkaykaysa kadakuada? Ti ayat, a kabilgan a singgalut ti panagkaykaysa. Dayta ti makagapu nga imbaga ni Jesu-Kristo kadagiti adalanna: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” Wen, ti panagiinnayat dagiti pudno a Kristiano ket saan laeng a kas aggagayyem ken saan laeng a maigapu iti panagraem iti maysa ken maysa. Addaanda iti managsakripisio nga ayat.​—Juan 13:34, 35.

Panangipateg Kadagiti Kapammatiantayo

Adu a kongregasion ti buklen ti tattao a nagduduma ti edad, puli, pagilian, kultura, lenguahe, ken kaugalianda. Agduduma dagiti namnama, pagamkan, kayat ken di kayat ti tunggal maysa, ken gagangay nga agduduma ti parikut ti tunggal maysa​—mabalin a salun-at wenno pinansial a pakarigatan. Mabalin a narigat nga agkaykaysa dagiti Kristiano gapu iti kastoy a panagduduma. Ania ngarud ti makatulong kadatayo a lumawa iti ayat tapno agkaykaysatayo iti laksid ti panagduduma? Ad-adda a rumayray ti panagayattayo iti maysa ken maysa no adda pudno a panangipategtayo iti amin a kameng ti kongregasion.

Ngem kasano a maipategtayo ti maysa a tao? Maipategtayo dagiti kapammatiantayo no ikabilangantayo dagiti kasapulanda, naan-anay a raementay ida, bigbigentayo ti kinapategda, ken agyamantayo a kaduatay ida iti panagdayaw. Kas resultana, rumayray ti panagayattayo kadakuada. Babaen ti ababa a panangusig iti insurat ni apostol Pablo kadagiti Kristiano idiay Corinto idi umuna a siglo, maawatantayo no kasano nga ipakita a naan-anay ti Nakristianuan nga ayat.

‘Nailetan’ Dagiti Taga-Corinto

Insurat ni Pablo ti umuna a suratna kadagiti taga-Corinto idi 55 K.P., ket ti maikadua a suratna iti dayta met la a tawen. Ipasimudaag ti suratna a dadduma a kakabsat iti kongregasion ti Corinto ti saan a mangipatpateg kadagiti kapammatianda. Kastoy ti panangiladawan ni Pablo iti kasasaad: “Dagiti ngiwatmi naluktan kadakayo, taga Corinto, ti pusomi napalawa. Saankayo a nailetan kadakami, ngem nailetankayo kadagiti bukodyo a kinalailo.” (2 Corinto 6:11, 12) Ania ti kayat a sawen ni Pablo idi kinunana a ‘nailetanda’?

Ibagbagana a nailem ken awan panagayatda. Kuna ti maysa nga eskolar iti Biblia a ti panagayat dagiti taga-Corinto ken ni Pablo ket “nabangenan iti awan nakaibasaranna a panagil-ilem . . . ken nasair nga amor propio.”

Imutektekanyo ti imbalakad ni Pablo: “Kas panangsubad​—agsaoak a kas agpaay iti annak​—dakayo, met, lumawakayo.” (2 Corinto 6:13) Imparegta ni Pablo a palawaen dagiti taga-Corinto ti panagayatda kadagiti kapammatianda. Kaipapananna daytoy a saanda koma a nailem wenno nasintir no di ket agtalek ken agbalinda a naayat.

Panangpalawa iti Panagayat Ita

Makaparagsak a makita nga ikagkagumaan dagiti pudno nga agdaydayaw iti Dios a palawaen ti panagayatda iti maysa ken maysa. Ngem saan nga umdas a basta ammotayo a masapul a palawaen ti ayattayo no di ket agkalikagum daytoy iti panagregget. Ti panangpalawa kalikagumanna a ditay tultuladen ti panagtigtignay dagidiay di mangan-annurot kadagiti pannursuro ti Biblia. Masansan a dida ammo nga ipateg ti sabali a tattao. Mabalin a dida mangikabkabilangan, di managraem, ken mananglaisda pay ketdi. Ngarud, ditay koma tultuladen dagitoy a kababalin. Nakalkaldaang no ditay palawaen ti ayattayo gapu iti panagil-ilem, kas kadagiti taga-Corinto. Mabalin a mapasamak dayta no nalaingtayo a mangdillaw kadagiti biddut ti kabsattayo a Kristiano ngem ditay met ammo ti mangapresiar kadagiti paglainganna. Mapasamak met dayta no saantay a nasinged iti maysa gapu ta sabali ti kulturana.

Maisupadi iti dayta, ti adipen ti Dios a mangpalawa iti panagayatna pudno nga ipatpategna dagiti kapammatianna. Adda panagraemna kadakuada, ikabilanganna ti dayawda, ken maawatanna dagiti kasapulanda. Uray pay no adda kalinteganna nga agreklamo, sisasagana a mamakawan ken di agim-impen iti sakit ti nakem. Saan ngarud a dagus nga agsuspetsa maibusor kadagiti kapammatianna. Ti naimpusuan a panagayat makatulong kenkuana a mangipakita iti kita ti ayat a pampanunoten ni Jesus idi impakpakaunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:35.

Makigayyemka Kadagiti Dadduma

Ti nasged nga ayat tulongannatayo a makigayyem ken makilangen uray kadagidiay saantayo a kasinged iti kongregasion. Siasino dagitoy? Dadduma a kakabsattayo ti managbabain wenno, gapu iti nadumaduma a rason, manmano ti gagayyemda. Mabalin nga iti damo, mariknatayo a kalanglangentayo ida gapu laeng ta kapammatiantayo ida. Ngem saan kadi a dadduma kadagiti kasingedan a panaggayyem a nailanad iti Biblia ket napatanor iti nagbaetan dagiti tattao a nagbassit ti pagpapadaanda?

Kas pagarigan, da Ruth ken Noemi dakkel ti baet ti edadda, nagduma ti pagilian ken kulturada, ken uray pay ti lenguaheda. Ngem saan a dagita a nagdumaan ti nanglapped iti panaggayyemda. Dimmakkel ni Jonathan kas prinsipe, ket ni David kas maysa a pastor. Dakkel ti baet ti edadda, ngem ti panaggayyemda ti maysa kadagiti kasingedan a panaggayyem a nadakamat iti Nasantuan a Kasuratan. Dagitoy a panaggayyem ket nagbalin a gubuayan ti ragsak ken naespirituan a saranay kadagiti tattao a maseknan.​—Ruth 1:16; 4:15; 1 Samuel 18:3; 2 Samuel 1:26.

Uray ita, nagbalin met a nasinged nga aggayyem dagiti pudno a Kristiano a dakkel ti nagbaetan ti edadda wenno nagduma ti kasasaadda iti biag. Kas pagarigan, ni Regina ket maysa nga agsolsolo nga ina nga addaan iti dua nga agtutubo nga annak.a Okupado unay ket awan ti tiempona a makipulapol. Retirado nga agassawa da Harald ken Ute ngem awan anakda. No matmatam, kasla awan ti pagpadaan dagitoy a pamilia. Ngem inyaplikar da Harald ken Ute ti balakad ti Biblia a lumawa iti panagayatda. Isu nga inramanda ni Regina ken dagiti annakna kadagiti adu nga aktibidadda. Agkakaduada iti panangasaba ken iti panaglinglingay.

Mabalin kadi a makigayyemtayo kadagiti dadduma a saantayo pay a gagayyem? Apay a dikay padasen ti makigayyem kadagiti kapammatian a sabali ti puli, kultura, wenno edadda?

Tumulong a Mangipaay iti Kasapulan ti Sabsabali

Ti kinamanagayat tignayennatayo a mangikabilangan iti kasapulan ti sabsabali. Ania dagita? Paliiwem dagiti kakongregasionmo. Masapul dagiti agtutubo ti panangiwanwan. Dagiti lallakay ken babbaket kasapulanda ti pammaregta. Dagiti amin-tiempo a ministro kasapulanda ti komendasion ken tulong, ken dagiti maup-upay a kapammatian kasapulanda ti pangipeksaanda kadagiti anek-ekda. Adda kasapulan ti tunggal maysa. Kayattayo nga ipaay ti kasapulanda agingga iti kabaelantayo.

Tapno lumawatayo masapul met a maawatantayo dagidiay addaan iti naisangsangayan a kasapulan. Adda kadi am-ammom nga addaan iti nakaro a sakit wenno mangib-ibtur iti dadduma a pakasuotan iti biag? No palawaem ti panagayat ken patanorem ti kinamanangngaasi, tumulong dagitoy tapno agbalinka a mannakaawat ken manangsaranay kadagiti agkasapulan.

Inton matungpal dagiti padto ti Biblia iti masanguanan, napatpategton ti nagkaykaysa a kinasinged ti kongregasion ngem dagiti sanikua, abilidad, wenno nagapuanan. (1 Pedro 4:7, 8) Tunggal maysa kadatayo mapabilegna ti panagkaykaysa iti kongregasion a nakaitimpuyoganna babaen ti panangpalawa iti panagayat kadagiti kapammatianna. Masiguradotayo a sibabaknang a bendisionannatayo ni Jehova gapu iti panangaramidtayo iti kinuna ti Anakna a ni Jesu-Kristo: “Daytoy ti bilinko, nga ayatenyo ti maysa ken maysa kas iti panagayatko kadakayo.”​—Juan 15:12.

[Footnote]

[Blurb iti panid 10]

Ti panangipateg kadagiti kakabsattayo kayatna a sawen a raementayo ida, ikabilangantayo ti dayawda, ken maawatantayo dagiti kasapulanda