Lalaki a Nangipateg iti Biag ken Kadagiti Tattao
NI Daniel Sydlik, maysa a nabayagen a kameng ti Bagi a Manarawidwid dagiti Saksi ni Jehova, naturposna ti naindagaan a biagna idi Martes, Abril 18, 2006. Agtawen iti 87 ken nakapagserbin iti dandani 60 a tawen kas kameng ti pamilia ti Bethel idiay Brooklyn, New York.
Idi 1946, nagbalin a kameng ti Bethel ni Kabsat Dan, kas nadungngo nga awag dagiti nasinged a gagayyemna. Sakbayna, nagserbi kas special pioneer idiay California ken naibalud met iti sumagmamano a tiempo bayat ti Gubat Sangalubongan II gapu iti neutral a takderna kas Kristiano. Naisalaysay dagiti kapadasanna kadagidi a tiempo iti pakasaritaan ti biag, a nagparang iti Ti Pagwanawanan a Disiembre 1, 1985, babaen ti paulo nga “Anian a Nagsudi ti Pannakigayyemmo, O Dios!”
Pagaammo ni Kabsat Sydlik kas napakumbaba, nalaka nga asitgan a tao. No mangidaulo iti panagdayaw iti agsapa para iti pamilia ti Bethel, masansan nga agminar ti positibo a panangmatmat ken panangipategna iti biag babaen kadagiti panglukat a sasaona: “Nagsayaat ti agbiag tapno agserbi iti pudno ken sibibiag a Dios.” Kas maysa a managpalawag, imparegtana daytoy a panangmatmat kadagiti sabsabali. Impalawagna dagiti tema a kas iti “Naragsak ti Ili a ti Diosna Isu ni Jehova,” “Panangyanninaw iti Rag-o ni Jehova,” “Taginayonen a Sibibiag ti Apuy ti Espiritu ti Dios,” ken “Dumtengto Pay Laeng ti Kasayaatan.”
Idi 1970, ni Kabsat Sydlik inkasarna ni Marina Hodson, manipud England, a dineskribirna kas “katakunaynay a sagut manipud iti Dios.” Nagkaduada a nagserbi ken ni Jehova iti nasurok a 35 a tawen.
Bayat dagiti tawen a kaaddana iti Bethel, nagserbi ni Kabsat Sydlik iti nadumaduma a departamento, a pakairamanan ti panagimprenta ken ti Writing Department (Departamento ti Panagsurat). Nakipagtrabaho met iti estasion ti radio a WBBR. Kalpasanna, idi Nobiembre 1974, nadutokan a kameng ti Bagi a Manarawidwid ken kamaudiananna nakipagtrabaho a kadua ti Personnel ken Writing Committee.
Iti nasurok a 30 a tawen, naiparangarang ti nasged a panagayat ni Kabsat Sydlik kadagiti tattao babaen ti pannakipagtrabahona iti Personnel Committee. Pinaregtana ti adu babaen ti gumgumluong a timekna, a kanayon nga iturongna ti atension iti nagpateg a pribilehiotayo nga agserbi ken ni Jehova. Kanayon nga impaganetgetna a ti pudno a kinaragsak ket saan nga agpannuray kadagiti makinruar a bambanag no di ket iti relasiontayo ken Jehova ken iti panangmatmattayo iti biag.
Nupay kasta unay ti iliw ti pamilia ti Bethel ken ni Kabsat Sydlik, agtultuloy a malaglagip ti ulidanna kas maysa a pudno a mangipatpateg iti biag ken kadagiti tattao. Agtalektayo nga isu ket mairaman kadagidiay naibaga iti Apocalipsis 14:13: “Naragsak dagiti natay a matay a maikaykaysa iti Apo manipuden itoy a tiempo. Wen, kuna ti espiritu, bay-am nga aginanada kadagiti panagbannogda, ta ti bambanag nga inaramidda kumuyog a mismo kadakuada.”