Itultuloyyo a Parayrayen ti Apresasionyo
“Anian a nagpateg kaniak dagiti panunotmo! O Dios, anian a nagdakkel ti pakadagupan ti intero a pakagupgopanda!”—SALMO 139:17.
1, 2. Apay a nasken nga apresiarentayo ti Sao ti Dios, ken kasano nga inyebkas ti salmista ti apresasionna iti dayta?
NAGSAYAAT dayta a nabirokanda. Bayat a matartarimaan ti templo ni Jehova idiay Jerusalem, nasarakan ti Nangato a Padi a ni Hilkias “ti libro ti linteg ni Jehova babaen ti ima ni Moises,” awan duadua a ti orihinal a kopia ti libro a nakompleto agarup 800 a tawenen ti napalabas! Mapanunotyo kadi no ania ti narikna ti managbuteng iti Dios a ni Ari Josias idi nayawat kenkuana dayta a libro? Sigurado nga impategna ken dagus a sipipigsa nga impabasana dayta iti sekretario a ni Safan.―2 Cronicas 34:14-18.
2 Iti kaaldawantayo, mabalinen a basaen ti binilion a tattao ti kompleto wenno dadduma a paset ti Sao ti Dios. Ngem naksayan kadin ti pateg ti Kasuratan? Pulos a saan! Kinapudnona, naglaonda kadagiti mismo a kapanunotan ti Mannakabalin-amin, a nairekord tapno pakasursuruantayo. (2 Timoteo 3:16) Kastoy ti panangmatmat ni salmista a David iti Sao ti Dios: “Anian a nagpateg kaniak dagiti panunotmo! O Dios, anian a nagdakkel ti pakadagupan ti intero a pakagupgopanda!”—Salmo 139:17.
3. Ania ti mangipakita a nauneg ti pannakaawat ni David kadagiti naespirituan a bambanag?
3 Ni David saan a pulos a nagkupas ti apresasionna ken ni Jehova, iti Saona, ken iti urnosna mainaig iti pudno a panagdayaw. Ipakita ti adu nga agkakapintas a salmo a pinutar ni David no ania ti panagriknana. Kas pagarigan iti Salmo 27:4, insuratna: “Maysa a banag ti kiniddawko ken Jehova—isu dayta ti sapulekto, nga agnaedak koma iti balay ni Jehova iti amin nga al-aldaw ti panagbiagko, tapno kitaek ti kinamakaay-ayo ni Jehova ken tapno imatangak ti templona buyogen ti panangtagipateg.” Iti orihinal a Hebreo, ti ebkas nga ‘imatangan buyogen ti panangtagipateg’ kaipapananna ti panangutob a naimbag, panangsukimat, panangkita buyogen ti ragsak ken panagamanga. Nalawag a nauneg ti naespirituan a pannakaawat ni David ken pudno nga ipatpategna dagiti naespirituan a probision ni Jehova, uray dagiti babassit a naespirituan a kinapudno nga impalgak ti Dios. Maiparbeng laeng a tuladen ti kinamanangapresiarna.—Salmo 19:7-11.
Ipategtayo ti Pribilehio a Naammuantayo ti Kinapudno iti Biblia
4. Apay a ‘naglaplapusanan ti rag-o ni Jesus iti nasantuan nga espiritu’?
4 Ti pananggun-od iti nauneg a pannakaawat iti Sao ti Dios ket saan nga agpannuray iti kinalaing wenno nailubongan nga edukasion, yantangay agturong laeng dagitoy iti kinatangsit. Imbes ketdi, agpannuray dayta iti di kaikarian a kinamanangngaasi ni Jehova, nga iparparangarangna kadagiti napakumbaba, napasnek ti panagpuspusoda a tattao a sipapanunot kadagiti naespirituan a kasapulanda. (Mateo 5:3; 1 Juan 5:20) Idi inutob ni Jesus ti kinapudno nga adda dagiti imperpekto a tattao a nailanad ti naganda idiay langit, “naglaplapusanan ti rag-ona iti nasantuan nga espiritu ket kinunana: ‘Idaydayawka iti publiko, Ama, Apo ti langit ken daga, agsipud ta dagitoy a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga.’”—Lucas 10:17-21.
5. Apay a rumbeng a di tagtagilag-anen dagiti adalan ni Jesus dagiti naipalgak kadakuada a kinapudno maipapan iti Pagarian?
5 Kalpasan dayta a naimpusuan a kararag ni Jesus, kinunana kadagiti adalanna: “Naragsak dagiti mata a makakita iti bambanag a makitkitayo. Ta kunak kadakayo, Adu a mammadto ken ar-ari tinarigagayanda a kitaen ti bambanag a makitkitayo ngem saanda a nakita ida, ken denggen ti bambanag a mangmangngegyo ngem saanda a nangngeg ida.” Wen, pinaregta ni Jesus dagiti matalek a pasurotna a dida tagtagilag-anen dagiti naipalgak kadakuada nga agkakapateg a kinapudno maipapan iti Pagarian. Saan a naipalgak dagita a kinapudno kadagiti immun-una a kaputotan dagiti adipen ti Dios, ken sigurado a dida naipalgak “kadagiti mamasirib ken nasasaririt” idi kaaldawan ni Jesus!―Lucas 10:23, 24.
6, 7. (a) Apay a rumbeng nga apresiarentayo dagiti nadibinuan a kinapudno? (b) Ania ti nabatad ita a nagdumaan ti pudno ken palso a relihion?
6 Iti kaaldawantayo, ad-adu pay ti panggapuantayo a mangapresiar kadagiti nadibinuan a kinapudno, yantangay ni Jehova, babaen ti “matalek ken masirib nga adipen,” ipapaayna kadagiti tattao ti naun-uneg a pannakaawat iti Saona. (Mateo 24:45; Daniel 12:10) No maipapan iti tiempo ti panungpalan, insurat ni propeta Daniel: “Adunto ti agdakiwas, ket ti pudno a pannakaammo umadunto.” (Daniel 12:4) Dikay kadi umanamong nga ‘immadu’ ita ti pannakaammo iti Dios ken aglaplapusanan ti naespirituan a taraon dagiti adipen ni Jehova?
7 Makitatayo ti dakkel a nagdumaan ti naespirituan a kinarang-ay ti ili ti Dios ken ti narelihiosuan a pannakariro ti Babilonia a Dakkel! Kas resultana, adu kadagiti nadismaya wenno naupay kadagiti palso a relihion ti nagbaw-ingen iti pudno a panagdayaw. Dagitoy nga arig karnero ‘saanda a kayat ti makiraman iti Babilonia a Dakkel kadagiti basolna wenno umawat iti paset dagiti saplitna.’ Ni Jehova ken dagiti adipenna aw-awisenda ti amin a kasta a tattao a sumrek iti pudno a kongregasion Kristiano.―Apocalipsis 18:2-4; 22:17.
Dagiti Manangapresiar Umad-adanida iti Dios
8, 9. Kasano a matungtungpal ita ti Haggeo 2:7?
8 No maipapan iti naespirituan a balayna a pagdayawan, impakpakauna ni Jehova: “Yugayogekto dagiti amin a nasion, ket umayto dagiti matarigagayan a banag dagiti amin a nasion; ket daytoy a balay punnuekto iti dayag.” (Haggeo 2:7) Idi kaaldawan ni Haggeo, adda kaitungpalan daytoy a nakaskasdaaw a padto, idi a dagiti nagsubli a natda iti ili ti Dios binangonda manen ti templo idiay Jerusalem. Iti kaaldawantayo, adda kaitungpalan ti sasao ni Haggeo no maipapan iti naindaklan a naespirituan a templo ni Jehova.
9 Minilion ita ti agturturong iti piguratibo a templo tapno agdayawda iti Dios “buyogen ti espiritu ken kinapudno,” ket iti kada tawen, ginasut a ribu a “matarigagayan a banag dagiti amin a nasion” ti agtultuloy nga agayus iti dayta. (Juan 4:23, 24) Kas pagarigan, ti sangalubongan a report para iti 2006 a tawen serbisio ipakitana nga adda 248,327 a nabautisaran kas simbolo ti panagdedikarda ken ni Jehova. Ipakita dayta nga adda promedio nga 680 a kabbaro nga agibumbunannag iti kada aldaw! Ti panangipategda iti kinapudno ken ti tarigagayda nga agserbi ken ni Jehova kas manangiwaragawag iti Pagarian paneknekanna a pudno a nayadanida iti Dios.―Juan 6:44, 65.
10, 11. Mangisalaysay iti kapadasan a mangipakita no kasano a nasursuro dagiti tattao nga ipateg ti kinapudno iti Biblia.
10 Adu kadagitoy a napasnek ti panagpuspusoda a tattao ti naallukoy iti kinapudno gapu ta nabigbigda “ti pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.” (Malakias 3:18) Usigenyo ti kapadasan da Wayne ken Virginia, agassawa a Protestante nga aduan kadagiti saludsod a di nasungbatan. Karimonda ti gubat isu a mariro ken mariribukanda no makitada dagiti klero a mangbembendision kadagiti soldado ken armas. Bayat a lumaklakay ken bumakbaketda, mariknada a dadduma kadagiti karelihionanda ti saan a mangikabkabilangan kadakuada, uray no adu a tawen a nangisursuro ni Virginia iti eskuelaan ti simbaanda. “Awan man la ti simmarsarungkar kadakami wenno nangyebkas iti pannakaseknanda iti naespirituan a pagimbaganmi,” kinunada. “Ti relihionmi ket interesado laeng iti kuartami. Nadismayakami.” Ad-adda pay a nadismayada idi pinanuynoyan ti relihionda ti homoseksualidad.
11 Kabayatanna, nagbalin a Saksi ni Jehova ti apokoda a babai ken kalpasanna ti mismo nga anakda a babai. Nupay saan a nagustuan dayta da Wayne ken Virginia idi damo, nagbaliw ti panunotda ket nagpayadalda iti Biblia. “Iti tallo laeng a bulan,” kinuna ni Wayne, “ad-adu ti naadalmi maipapan iti Biblia ngem iti naadalmi iti naglabas a 70 a tawen! Dimi pulos ammo idi a Jehova ti nagan ti Dios, ken awan a pulos ti ammomi maipapan iti Pagarian ken iti Paraiso a daga.” Di nagbayag, daytoy a napasnek nga agassawa rinugianda ti timmabuno kadagiti Nakristianuan a gimong ken makiraman iti ministerio. “Kayatmi nga isuro kadagiti isuamin ti maipapan iti kinapudno,” kinuna ni Virginia. Nupay agpadada nga agtawen iti nasurok a 80, nabautisaranda idi 2005. “Nakasarakkami iti pudno a gunglo dagiti Kristiano,” kinunada.
Agyamantayo ta ‘Nakabalantayo Maipaay iti Tunggal Naimbag nga Aramid’
12. Ania ti kanayon nga ipapaay ni Jehova kadagiti adipenna, ken ania ti nasken nga aramidentayo tapno magunggonaantayo iti dayta?
12 Kanayon a tultulongan ni Jehova dagiti adipenna tapno maaramidda ti pagayatanna. Kas pagarigan, nakaawat ni Noe kadagiti nalawag ken espesipiko a bilin no kasano ti panangibangonna iti daong―maysa a proyekto a masapul a maaramid nga eksakto maitunos iti bilin! Ket kasta a talaga ti napasamak. Kasano? “Inaramid ni Noe ti maitunos iti isuamin nga imbilin kenkuana ti Dios. Inaramidna ti kasta met laeng.” (Genesis 6:14-22) Uray iti kaaldawantayo, naan-anay a kabalan ni Jehova dagiti adipenna tapno maaramidda ti pagayatanna. Siempre, ti kangrunaan a trabahotayo isu ti panangikasaba iti naimbag a damag maipapan iti naipasdek a Pagarian ti Dios ken ti panangtulong kadagiti maikari tapno agbalinda nga adalan ni Jesu-Kristo. Kas paneknekan ti kapadasan ni Noe, agballigitayo no natulnogtayo. Masapul a surotentayo ti panangiwanwan nga ipapaay ni Jehova babaen ti Sao ken organisasionna.―Mateo 24:14; 28:19, 20.
13. Kadagiti ania a pamay-an a sansanayennatayo ni Jehova?
13 Tapno maibanagtayo dayta a trabaho, masapul a sursuruentayo nga ‘aramaten a siuumiso’ ti kangrunaan nga alikamentayo—ti Sao ti Dios—a “makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” (2 Timoteo 2:15; 3:16, 17) Kas idi umuna a siglo, sansanayennatayo ni Jehova babaen ti kongregasion Kristiano. Kadagiti 99,770 a kongregasion iti intero a lubong ita, linawas a maang-angay ti Teokratiko nga Eskuelaan ti Panagministro ken ti Gimong ti Serbisio tapno tumulong kadatayo iti ministerio. Ipakpakitayo kadi nga ap-apresiarenyo dagitoy nga agkakapateg a gimong babaen ti regular nga itatabunoyo ken babaen ti panangyaplikaryo kadagiti maad-adalyo?―Hebreo 10:24, 25.
14. Kasano nga ipakpakita dagiti adipen ni Jehova nga ipatpategda ti pribilehioda nga agserbi iti Dios? (Komentuanyo ti tsart iti panid 27-30.)
14 Babaen ti kinaregtada iti ministerio, ipakpakita ti minilion nga adipen ti Dios iti intero a lubong nga ipatpategda ti magunggun-odda a pannakasanay. Kas pagarigan, kabayatan ti 2006 a tawen serbisio, adda 6,741,444 nga agibumbunannag iti Pagarian a nangbusbos iti 1,333,966,199 nga oras iti amin nga aspeto dayta a trabaho, agraman ti 6,286,618 a panangyadal iti Biblia. Sumagmamano laeng dagitoy kadagiti makaparegta a detalye a nakalista iti sangalubongan a report. Sukimatenyo koma a naimbag daytoy a report ket kitaenyo no kasanokayo a mapabileg iti dayta. Awan duadua nga uray dagiti kakabsattayo idi umuna a siglo napabilegda met kadagiti damag maipapan iti panagsaknap ti trabaho a panangasaba kadagidi a tiempo.―Aramid 1:15; 2:5-11, 41, 47; 4:4; 6:7.
15. Apay a ditay rumbeng a mapaay no amin-kararua nga agserserbitayo ken ni Jehova?
15 Ti agkallangugan a panangidayaw iti Dios iti kada tawen ket pammaneknek nga apresiaren unay dagiti adipen ni Jehova ti pribilehio a naam-ammoda ni Jehova ken ikaskasabada ti maipapan kenkuana. (Isaias 43:10) Pudno, mabalintayo nga idilig iti sensilio ti balo dagiti sakripisio ti panangidayaw a magapgapuanan ti dadduma a masakit, lallakay ken babbaket, wenno addaan iti an-annayen a kakabsattayo. Ngem ditay liplipatan a ni Jehova ken ti Anakna pudno nga ipatpategda dagiti mangikagkagumaan a mangipaay iti amin-kararua a panagserbi iti Dios.―Lucas 21:1-4; Galacia 6:4.
16. Ania dagiti alikamen iti panangisuro a nabiit pay nga impaay ti Dios?
16 Malaksid iti panangsanayna kadatayo iti ministerio, kabalannatayo ni Jehova kadagiti nagsasayaat nga alikamen iti panangisuro babaen ti organisasionna. Kadagiti kallabes a dekada, karaman kadagita dagiti libro a Ti Kinapudno a Mangiturong iti Biag nga Awan Inggana, Mabalinyo ti Agbiag nga Agnanayon iti Paraiso a Daga, Pannakaammo a Mangiturong iti Biag nga Agnanayon, ken ti agdama nga Ania a Talaga ti Isursuro ti Biblia? Dagidiay pudno a mangipatpateg kadagitoy a probision usarenda dagitoy a naimbag iti ministerio.
Usarenyo a Naimbag ti Libro nga Isursuro ti Biblia
17, 18. (a) Ania dagiti paset ti libro nga Isursuro ti Biblia ti kayatyo nga usaren iti ministerioyo? (b) Ania ti napaliiw ti maysa a manangaywan iti sirkito maipapan iti libro nga Isursuro ti Biblia?
17 Ti libro nga Ania a Talaga ti Isursuro ti Biblia ket addaan iti 19 a kapitulo, detalyado nga apendise, ken nangaramat iti nalawag ken simple a sasao. Gapuna, pudno a katulongan daytoy iti ministerio. Kas pagarigan, ilawlawag ti kapitulo 12 ti suheto a “Panagbiag iti Wagas a Makaay-ayo iti Dios.” Daytoy a kapitulo ilawlawagna iti estudiante no kasano nga agbalin a gayyem ti Dios, banag a saan a pulos a pampanunoten ti adu a tattao wenno ibilangda nga imposible. (Santiago 2:23) Ania ti reaksion dagiti tattao maipapan iti daytoy a libro?
18 Sigun iti maysa a manangaywan iti sirkito idiay Australia, ti libro nga Isursuro ti Biblia ket “dagus a makaallukoy kadagiti bumalay tapno makipatangda.” Innayonna a naglaka nga usaren dayta isu nga “adu nga agibumbunannag iti Pagarian ti naaddaan manen iti kompiansa ken rag-o iti ministerio. Saan a pakasdaawan a ti dadduma ibilangda dayta a libro kas napateg a gameng!”
19-21. Mangisalaysay iti sumagmamano a kapadasan a mangitampok iti pateg ti libro nga Isursuro ti Biblia.
19 “Imbaonnaka ti Dios,” kinuna ti babai idiay Guyana iti maysa a payunir a simmarungkar iti pagtaenganna. Isu ken ti dua nga ubbing nga annakna ti nabiit pay a pinanawan ti lalaki a kabkabbalayna. Inukag ti payunir ti kapitulo 1 ti libro nga Isursuro ti Biblia ket imbasana ti parapo 11, iti sidong ti subtitulo nga “Ania ti Rikna ti Dios Maipapan iti Kinaawan ti Hustisia?” “Natukay ti rikna ti babai kadagita a punto,” kinuna ti payunir. “Kinapudnona, napan iti likudan ti lugar ti negosiona ket naganug-og.” Maysa a kabsat a babai ti regular a nangyadal kenkuana iti Biblia ket nagtultuloy a rimmang-ay.
20 Ni José a taga-Espania ket nabalo gapu iti aksidente ti lugan. Liniwliwana ti bagina babaen ti droga, ken immuman pay iti maysa a sikologo. Ngem saan a nasungbatan ti sikologo ti saludsod a kangrunaan a mangburburibor ken ni José: “Apay nga impalubos ti Dios a matay ni baketko?” Maysa nga aldaw, nakasaritana ti katrabahuanna a ni Francesc. Insingasing ni Francesc a pagsaritaanda ti kapitulo 11 ti libro nga Isursuro ti Biblia, a napauluan iti “Apay nga Ipalubos ti Dios ti Panagsagaba?” Nagustuan ni José ti Nainkasuratan a panangilawlawag ti libro ken ti ilustrasion maipapan iti mannursuro ken iti estudiantena. Sigagagar a nagadal iti Biblia, tinabunuanna ti asamblea sirkito, ken makigimgimongen iti Kingdom Hall.
21 Ni Roman, nga agtawen iti 40 ken negosiante idiay Poland, raraemenna ti Sao ti Dios. Ngem gapu ta okupado unay iti trabahona, saan unay a rimmang-ay iti panagadalna iti Biblia. Kaskasdi, tinabunuanna ti maysa a kombension distrito a nakagun-odanna iti libro nga Isursuro ti Biblia. Idi agangay, nakadkadlaw ti panagrang-ayna. Kunana: “Babaen daytoy a libro, makitam ti panagtutunos ti amin a pamunganayan a sursuro ti Biblia tapno buklenda ti maysa a nalawag a ladawan.” Regular itan nga agad-adal ni Roman iti Biblia ken nasayaat ti panagrang-ayna.
Itultuloyyo a Parayrayen ti Apresasionyo
22, 23. Kasano nga agtultuloy a maipakitatayo nga ipatpategtayo ti namnama a naituyang kadatayo?
22 Kas nailawlawag iti makapikapik nga “Asidegen ti Pannakaisalakan!” a Kombension Distrito, padpadaanan dagiti pudno a Kristiano ti “agnanayon a pannakaispal” nga inkari ti Dios ken nagbalin a posible babaen ti naiparukpok a dara ni Jesu-Kristo. Awanen ti nasaysayaat pay a pamay-an a maipakitatayo ti naimpusuan a panangapresiartayo iti daytoy a nagpateg a namnama ngem iti panagtultuloytayo a nadalusan “manipud iti natay nga ar-aramid tapno mangipaaytayo iti sagrado a panagserbi iti sibibiag a Dios.”—Hebreo 9:12, 14.
23 Wen, pudno a maysa a milagro nga adda nasurok nga innem a milion a manangiwaragawag iti Pagarian a simamatalek nga agserserbi iti Dios iti laksid ti panawen a maiparparegta ti panangipangpangruna iti bagi. Maysa met a pammaneknek dayta nga ipatpateg unay dagiti adipen ni Jehova ti pribilehio a makapagserbida iti Dios, nga ammoda a ‘saan nga ubbaw ti panagbannogda mainaig iti Apo.’ Sapay koma ta agtultuloy a rumayray dayta nga apresasion!—1 Corinto 15:58; Salmo 110:3.
Ania ti Sungbatyo?
• Ania ti isuro kadatayo ti salmista maipapan iti panangipateg iti Dios ken kadagiti naespirituan a probisionna?
• Kasano a matungtungpal ita ti Haggeo 2:7?
• Kasano a kinabalan ni Jehova dagiti adipenna tapno sieepektibo a makapagserbida?
• Ania ti mabalinyo nga aramiden kas panangipakita iti panangapresiaryo iti kinaimbag ni Jehova?
[Tsart iti panid 27-30]
REPORT ITI 2006 A TAWEN SERBISIO DAGITI SAKSI NI JEHOVA ITI SANGALUBONGAN
(Kitaem ti bound volume)
[Dagiti ladawan iti panid 25]
Naan-anay a kabalannatayo ni Jehova tapno maaramidtayo ti pagayatanna