Saludsod Dagiti Agbasbasa
Apay a Saan a Makigubat Dagiti Saksi ni Jehova?
Dagiti Saksi ni Jehova iti sadinoman a lugar nabayagen a saanda a makipaspaset iti panaggugubat dagiti nasion wenno dagiti mismo nga agkakailian. “Nagtalinaed a naan-anay a neutral ti takder dagiti Saksi ni Jehova kadagiti panawen ti gubat,” kuna ti Australian Encyclopædia 50 a tawenen ti napalabas.
Maysa a kangrunaan a rason a saan a makigubat dagiti Saksi ket gapu ta dida kayat a mamulitan ti konsiensiada kas Kristiano. Nasukog ti konsiensiada kadagiti bilin ken pagwadan ni Apo Jesu-Kristo. Imbilinna kadagiti pasurotna nga ayatenda ti padada a tao. Kinunana pay: “Itultuloyyo nga ayaten dagiti kabusoryo, nga aramiden ti naimbag kadagidiay manggurgura kadakayo.” (Lucas 6:27; Mateo 22:39) Idi pinadas ti maysa kadagiti adalanna nga idepensa ni Jesus babaen iti kampilan, imbagana kenkuana: “Ipulangmo ta kampilanmo iti lugarna, ta amin dagidiay mangaramat iti kampilan mataydanto iti kampilan.” (Mateo 26:52) Iti kasta, babaen ti sao ken aramid, nalawag nga impakitana a dagiti pasurotna saanda nga agusar iti kampilan tapno makigubatda.
Maysa pay a rason no apay a saan a makigubat dagiti Saksi ni Jehova ket gapu ta kameng ida ti maysa a sangalubongan a grupo dagiti manamati. Ti gubat paglalabanenna dagiti agkakabsat, ket maisalungasing dayta iti bilin ni Jesus a maaddaanda iti “ayat iti maysa ken maysa.”—Juan 13:35.
Saan laeng nga agingga iti sao dagiti Saksi ni Jehova no maipapan iti panangannurot kadagita a nadakamat a prinsipio maipapan iti ayat. Kas pagarigan, usigenyo ti takderda idi Gubat Sangalubongan II a napasamak idi 1939-1945. Iti Estados Unidos, nasurok nga 4,300 a Saksi ni Jehova ti naibalud iti nagduduma nga estado gapu ta nagkedkedda nga agserbi iti militar. Idiay Britania, nasurok a 1,500, agraman ti nasurok a 300 a babbai, ti naibalud gapu ta dida kayat nga aramiden dagiti trabaho a mainaig iti gubat. Iti Nazi nga Alemania, nasurok a 270 a Saksi ti imbilin ti gobierno a mapapatay gapu iti panagkedkedda a makigubat. Iti sidong ti rehimen a Nazi, nasurok a 10,000 a Saksi ti naibalud wenno adda kadagiti kampo konsentrasion. Nagsagaba met iti nakaro dagiti Saksi idiay Japan. Asinoman a napukawan iti ay-ayaten kadagiti pagbabakalan gapu iti Gubat Sangalubongan II—wenno iti aniaman a simmaruno a gubat—masiguradoda a saan a pulos a nakiraman dagiti Saksi ni Jehova kadagita a panangpapatay.
Nagsayaat ti panangyebkas dagiti maudi a sasao ni Wolfgang Kusserow iti panangmatmat dagiti Saksi ni Jehova maipapan iti gubat. Idi 1942, pinugotan dagiti Nazi daytoy nga Aleman nga agtawen iti 20 gapu ta dina kayat ti makigubat. (Isaias 2:4) Inyebkasna iti sanguanan ti korte militar: “Napadakkelak kas maysa a Saksi ni Jehova, sigun iti sao ti Dios a linaon ti Nasantuan a Kasuratan. Ti kadakkelan ken kasasantuan a linteg nga intedna iti sangatauan ket: ‘Masapul nga ayatem ti Diosmo a nangnangruna ngem ti asinoman ken ti padam a tao a kas iti bagim.’ Kuna ti dadduma a bilin: ‘Dika mamapatay.’ Impaisurat kadi ti Namarsua daytoy nga agpaay kadagiti kayo?”—Marcos 12:29-31; Exodo 20:13.
Patien dagiti Saksi a ni laeng Jehova, ti mannakabalin-amin a Dios, ti makayeg iti agnanayon a talna ditoy daga. Agtalekda a tungpalenna dagiti karina a pasardengenna “dagiti gubat agingga iti ungto ti daga.”—Salmo 46:9.