Naamirisko No Kasano Kapateg ti Biag
AGSAPA IDI TI ABRIL 16, 2007. Bayat a kumkumlebak iti suli ti maysa nga opisina iti maikatlo a kadsaaran ti Norris Hall iti Virginia Polytechnic Institute and State University, wenno Virginia Tech, naipalagip manen kaniak no kasano kapateg ti maysa nga aldaw a panagbiagtayo.
Addaak idi iti opisinak nga agsagsagana a mapan mangala iti suratko iti maikadua a kadsaaran. Maysa a propesor ti nagkiddaw a mapanak iti opisinana tapno tulongak a mangtarimaan iti kompiuterna. Idi sumrekkamin iti opisinana, nangngegmi dagiti kanalbuong iti maikadua a kadsaaran. Gapu ta saanmi nga ammo ti mapaspasamak, nagdardaraskami a simrek iti opisinana, intulbekmi ti ridaw, ket madandanagankami a naguray no ania ti sumaganad a mapasamak. Nagkamangak iti maysa a suli ket nagkararagak ken Jehova a Dios, nga iwanwannak iti aniaman a mapasamak.
Bayat ti panaguraymi, nalagipko ti maysa a pasamak 15 a tawen ti napalabasen. Agtartrabahoak idi kas mekaniko iti pagtarimaanan iti lugan. Simged ti gasolina iti bassit a pagkargaan nga iggem ti padak a trabahador. Gapu iti danagna, aksidente a naipuruakna ti umap-apuy a gasolina iti rupak! Nalang-abko ti asuk ken nakaro ti pannakasinit ti makinngato a paset ti bagik. Maysa a helikopter ti nangipan kaniak iti pagpaagasan kadagiti nauram ket nagtalinaed ken nagpaimbagak iti intensive care iti tallo ket kagudua a bulan. Nakaawidak kalpasan ti lima a bulan a panagpaagas ken panagpaimbagko, ket agyamanak ta sibibiagak. Dayta a kapadasan ti nangisuro kaniak a mangibilang a napateg ti kada aldaw a panagbiagko. Kas maysa a Saksi, pinabileg met dayta a kapadasan ti determinasionko a mangusar iti biagko nga agserbi iti daydiay nangted iti biag, ni Jehova a Dios.—Salmo 90:12; Isaias 43:10.
Agsipud ta saanakon a makapagtrabaho kas mekaniko gapu iti komplikasion dagiti sugatko, nasursurok ti agtarimaan kadagiti kompiuter agingga a nanggedak iti Virginia Tech. Dayta ti makagapu nga addaak iti Norris Hall iti dayta a bigat.
Bayat a nagtultuloy dagiti kanalbuong, dimi impagarup a ti kakaruan a panangpapatay babaen ti paltog iti pakasaritaan ti Estados Unidos ket mapaspasamak iti mismo a kadsaaran iti babami. Simmardeng laeng ti putok idi a ti lalaki pinaltoganna met ti bagina, kalpasan a napapatayna ti 32 nga inosente a biktima. Agarup 20 a minuto kalpasanna, nangngegmi dagiti polis iti pasilio. Inayabanmi ida ket impandakami iti natalged a lugar.
Daytoy a makapakintayeg a kapadasan insuronak nga apagdarikmat ken saan a natalged ti biagtayo. (Santiago 4:14) Anian a nakapatpateg ngarud nga agtalektayo iti Nangted iti biag, ni Jehova a Dios, ken ibilangtayo ti tunggal aldaw kas napateg a sagut manipud kenkuana!—Salmo 23:4; 91:2.
[Picture Credit Line iti panid 30]
AP Photo/The Roanoke Times, Alan Kim