Ti Panagturpos ti Maika-125 a Klase ti Gilead

Naparegtada a Mangtulad ken Jeremias

“NAISANGSANGAYAN daytoy a klase ti Gilead,” kinuna ni Geoffrey Jackson a kameng ti Bagi a Manarawidwid. Isu ket agpalpalawag iti sanguanan ti 6,156 a nagtataripnong iti panagturpos ti maika-125 a klase ti Watchtower Bible School of Gilead idi Setiembre 13, 2008. No mairaman ti 56 a nagturpos iti daytoy a klase, ti Eskuelaan ti Gilead ket nakaibaonen iti nasurok a 8,000 a misionero “iti kaadaywan a paset ti daga”!​—Ara. 1:8.

Ni Kabsat Jackson, a tserman ti programa, inyimtuodna, “Ti kadi kredibilidad mapagbalinna a mas epektibo ti ministerioyo?” Kalpasanna, imbinsabinsana ti uppat a banag tapno maaddaanda iti kredibilidad: umiso a kababalin, panangipakita iti nasayaat nga ulidan, naan-anay a panangibasar iti Biblia kadagiti amin nga isursuro, ken naipamaysa a panangipakaammo iti nagan ni Jehova.

Ni David Schafer, nga agserserbi iti Teaching Committee, inlawlawagna ti tema a “Matarusanyonto Ngata ti Amin a Banag?” Impasiguradona kadagiti estudiante ti Gilead a kabaelanda a “tarusan ti amin a banag” a kasapulan iti panagmisioneroda no la ket itultuloyda a sapulen ni Jehova ken sipapakumbaba a bigbigenda “ti matalek ken masirib nga adipen.”​—Prov. 28:5; Mat. 24:45.

Simmaganad, ni John E. Barr, a kameng ti Bagi a Manarawidwid, impalawagna ti tema a “Diyo Ipalubos ti Aniaman a Mangisina Kadakayo iti Ayat ti Dios.” Ti naamaan a balakad ni Kabsat Barr pinalag-anna ti aniaman a danag a nalabit narikna dagiti nagturpos ken dagiti nagannakda maipapan iti pakaipasanguan dagiti baro a misionero iti pakaibaonanda. Imbagana a “natalged ken nasaliwanwan ti agtalinaed iti ayat ti Dios.” Awan ti makaisina kadagiti misionero iti ayat ti Dios malaksid no isinada ti bagbagida iti Dios.

Ni Sam Roberson manipud iti Theocratic Schools Department pinaregtana ti tallaong nga ikawesda ti kasayaatan a pagan-anay. No adalenda dagiti naaramidan ni Jesus ken iyaplikarda dagita iti mismo a biagda, dagiti nagturpos ‘maikawesda ni Apo Jesu-Kristo.’ (Roma 13:14) Simmaganad, ni William Samuelson, a manangaywan iti dayta met la a departamento, intampokna no kasano nga agbalin a mararaem ti maysa a tao. Ti panagbalin a mararaem ket saan a maibasar iti panangmatmat ti tao no di ket iti panangmatmat ti Dios.

Ni Michael Burnett, a maysa kadagiti instruktor, ininterbiuna dagiti estudiante maipapan kadagiti kapadasanda iti tay-ak ti serbisio bayat ti panagadalda. Addada latta interesado a nasarakan dagiti estudiante uray no iti masansan a maasak a teritoria ti nangasabaan ti kaaduan kadakuada bayat ti panageskuelada idiay Patterson, New York. Ni Gerald Grizzle manipud iti Convention Office ininterbiuna ti tallo a kakabsat a madama nga agad-adal iti School for Branch Committee Members. Dagiti komentoda ket nakatulong kadagiti nagturpos iti Gilead nga agsagana iti aniaman a pakaipasanguanda kadagiti pakaidestinuanda.

Ti tema a “Tuladenyo ni Jeremias” ket impalawag ni David Splane a kameng ti Bagi a Manarawidwid ken nagturpos iti maika-42 a klase. Nupay maamak idi ni Jeremias a mangitungpal iti annongenna, isu ket pinabileg ni Jehova. (Jer. 1:7, 8) Kasta met ti aramiden ti Dios kadagiti kabbaro a misionero. “No adda dimo makatunosan,” kinuna ni Kabsat Splane, “agtugawka ken mangisuratka iti sangapulo a magusgustuam a kababalin dayta a tao. No awan maisuratmo a sangapulo, kaipapananna nga isu ket dimo pay unay am-ammo.”

Managsakripisio ni Jeremias. Idi kayatna koman ti sumardeng, nagkararag ket sinaranay ni Jehova. (Jer. 20:11) Kinuna ni Kabsat Splane: “No maup-upaykayo, ibagayo dayta ken Jehova. Masdaawkayto no kasano a tulongannakayo.”

Iti panagngudo ti programa, impaganetget ti tserman a dagiti nagturpos naammuanda ti sumagmamano a pamay-an no kasanoda a maaddaan iti kredibilidad. Bayat a mangsaksida iti pakaidestinuanda, mas epektibonto ti mensaheda gapu iti kredibilidadda.​—Isa. 43:8-12.

[Kahon iti panid 22]

ESTADISTIKA TI KLASE

Bilang dagiti pagilian a nairepresentar: 6

Bilang dagiti pagilian a pakaibaonan: 21

Bilang dagiti estudiante: 56

Promedio nga edad: 32.9

Promedio a tawen iti kinapudno: 17.4

Promedio a tawen iti amin-tiempo a ministerio: 13

[Ladawan iti panid 23]

Maika-125 a Klase a Nagturpos iti Watchtower Bible School of Gilead

Iti listaan iti baba, nanumeruan dagiti intar manipud iti sango nga agpalikud, ken iti kada intar, nailista dagiti nagan manipud iti kannigid nga agpakannawan.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.