Armagedon​—Ania ti Kuna ti Dadduma?

“Ket inurnongda ida amin idiay disso nga iti Hebreo managan Armagedon.”​—APOCALIPSIS 16:16, Ti Biblia.

ANIA ti mapanunotmo no mangngegmo ti sao nga “Armagedon”? Mabalin a mapanunotmo dagiti epekto ti nakaro a didigra. Nupay naminsan laeng a nadakamat iti Biblia, maulit-ulit a dakdakamaten dayta ti media ken dagiti panguluen ti relihion.

Maitunos kadi iti isursuro ti Biblia dagiti nalatak a kapanunotan maipapan iti Armagedon? Apay a napateg a maammuam ti sungbat? Gapu ta no maammuam ti agpayso maipapan iti Armagedon, maliklikam ti awan nakaibatayanna a panagbuteng, sumayaat ti panangmatmatmo iti masanguanan, ken ad-adda a maawatam ti panggep ti Dios.

Usigem ti tallo a saludsod iti sumaganad a panid, ket pagdiligem dagiti opinion ti kaaduan maipapan iti Armagedon ken ti isursuro ti Biblia.

1. TI KADI ARMAGEDON KET DIDIGRA A GAPUANAN TI TAO?

Masansan nga inaig dagiti periodista ken managsirarak ti sao nga “Armagedon” kadagiti didigra a gapuanan ti tao. Kas pagarigan, natukoy kas Armagedon ti Gubat Sangalubongan I ken II. Kalpasan dagitoy a gubat, nagdanag ti sangatauan di la ket ta mausar dagiti bomba atomika no agginnubat ti United States ken ti Soviet Union. Inawagan ti media dayta a posible a dangadang kas “nuklear nga Armagedon.”

Opinion ti kaaduan: Makontrol ti tao ti masanguanan ti daga ken amin a parsua iti dayta. No saan a nainsiriban nga agtignay dagiti gobierno, permanente la ketdi a madadael ti daga.

Pannursuro ti Biblia: Saan nga ipalubos ti Dios a dadaelen ti tao ti daga. Ipasigurado kadatayo ti Biblia a ni Jehovaa saanna a pinarsua ti daga nga “awan kapapay-anna” no di ket binukelna dayta tapno “mapagnaedan.” (Isaias 45:18) Imbes a baybay-anna a naan-anay a dadaelen ti tao ti daga, dadaelento ti Dios “dagidiay mangdaddadael iti daga.”​—Apocalipsis 11:18.

2. TI KADI ARMAGEDON KET NATURAL A DIDIGRA?

No dadduma, aramaten dagiti periodista ti sao nga “Armagedon” kas awag kadagiti nakaro a natural a didigra. Idi 2010 kas pagarigan, maysa a report ti nangaramat iti sasao nga “‘Armagedon’ idiay Haiti.” Tuktukoyenna dagiti napukaw a biag, panagsagaba, ken nadaddadael a sanikua gapu iti napigsa a ginggined a nangdayyeg iti dayta a pagilian. Dagiti reporter ken agar-aramid iti pelikula iyaplikarda ti sao nga “Armagedon” kadagiti didigra a napasamaken ken iti pagbutbutnganda a mapasamakto. Kas pagarigan, inusarda dayta a sao a mangiladawan kadagiti posible a mapasamak no dumungpar iti dagatayo ti dakkel nga asteroid.

Opinion ti kaaduan: Ti Armagedon ket di mapakpakadaan a pasamak ken awan pilpilienna a patayen. Gistay awan maaramidam a mangsalaknib iti bagim.

Pannursuro ti Biblia: Saan nga asino la ditan ti dadaelen ti Armagedon. Dagiti laeng nadangkes a tattao ti pukawenna. Inkari ti Biblia a dandanin mapukaw “daydiay nadangkes . . . ket pudno unay nga imutektekamto ti lugarna, ket isu awanton.”​—Salmo 37:10.

3. DADAELENTO KADI TI DIOS TI DAGA INTON ARMAGEDON?

Patien ti adu a relihioso a tattao nga addanto pinal a panagdangadang ti naimbag ken dakes ket dayta ti mamagpatingga iti planetatayo. Sigun iti panagsirarak ti Princeton Survey Research Associates iti United States, 40 porsiento kadagiti adulto a napagsaludsodan ti mamati nga agpatingganto ti lubong iti “gubat ti Armagedon.”

Opinion ti kaaduan: Saan a nairanta nga agbiag nga agnanayon ti tao ditoy daga, ket saan met a naaramid ti daga nga agtalinaed iti agnanayon. Ti Dios pinarsuana dagiti tattao ngem inkeddengna a mataydanto met laeng.

Pannursuro ti Biblia: Nalawag a kuna ti Biblia a ti Dios “imbangonna ti daga kadagiti naipasdek a dissona; saanto a mapagdiwengdiweng dayta wenno [dinto makuti, Naimbag a Damag Biblia] agingga iti tiempo a di nakedngan, wenno iti agnanayon.” (Salmo 104:5) Kuna pay ti Biblia maipapan kadagiti agnanaed iti daga: “Dagiti nalinteg tagikuaendanto ti daga, ket agtaengdanto nga agnanayon iti dayta.”​—Salmo 37:29.

Nabatad ngarud a saan a maitunos iti Biblia ti opinion ti kaaduan maipapan iti Armagedon. Ania ngarud ti agpayso?

[Footnote]