Ti Pannilud ni Patay

Makapaladingit a topiko ti ipapatay, isu a saan a kayat ti adu a tattao a pagsasaritaan dayta. Ngem mapasamak dayta iti amin a tao. Talaga a nasaem ti pannilud ti ipapatay.

Ditay mapakadaan ti ipapatay ti nagannak, asawa, wenno anak. Mabalin a kellaat a mapagteng ti trahedia wenno mabalin nga agtultuloy iti naunday a panawen. Ngem di maliklikan ti resulta ti ipapatay ken nakasasaem dayta.

Kastoy ti kuna ni Antonio idi natay ni tatangna iti aksidente iti lugan: “Kasla adda nangikandado iti balaymo sa innalana ti tulbek. Saankan a makaawid, uray apagbiit laeng. Lagip laengen ti nabati kenka. Daytan ti realidad. Uray dimo maaklon​—ta kasla di nainkalintegan dayta​—awanen ti maaramidam.”

Idi natay ti asawa ni Dorothy idi agtawen iti 47, kayatna a masungbatan dagiti saludsodna. Kas mannursuro iti Sunday school, dina patien a ni patay ti pagpatinggaan ti amin. Ngem dina ammo ti sungbat, isu nga insaludsodna iti ministro ti Anglicano, “Ania ti mapasamak kadatayo no mataytayo?” Kuna ti ministro, “Awan ti makaammo. Basta aguraytayo laeng.”

Awan kadin ti maaramidantayo no di aguray? Adda kadi pamay-an tapno maammuantayo no ni patay ti pagpatinggaan ti amin?