Ti Sabidong ti Kurapsion iti Gobierno

Ti kurapsion iti gobierno ket panangabuso iti pannakabalin agpaay iti bukod a pagimbagan. Nabayagen ti kasta a panangabuso. Kas pagarigan, adda linteg iti Biblia a mangiparit iti panagpasuksok kadagiti hudisial a kaso, a mangipakita a nasaknapen ti kurapsion nasurok a 3,500 a tawen ti napalabas. (Exodo 23:8) Siempre, ti kurapsion ket saan laeng a panangawat iti pasuksok. No dadduma, dagiti nakusit nga opisial takawenda dagiti produkto, gundawayanda dagiti serbisio a saan a para kadakuada, wenno direkta a takawenda dagiti pondo. Mabalin nga usarenda pay ti posisionda tapno paboran dagiti gagayyem ken kakabagianda.

Nupay mabalin nga adda kurapsion iti aniaman nga organisasion ti tao, agparang a ti kurapsion iti gobierno ti kakaruan. Kuna ti 2013 Global Corruption Barometer, nga impablaak ti Transparency International, a pampanunoten dagiti tattao iti intero a lubong a ti lima nga institusion a kakaruan iti kurapsion ket dagiti partido iti politika, polis, opisial ti gobierno, agpampanday iti linteg, ken pangukoman. Kitaem ti dadduma a report maipapan iti daytoy a problema.

• Idi 2013 iti South Africa, 22,000 nga opisial ti gobierno ti naidarum gapu iti kurapsion.

• Idi 2012 iti Brazil, 25 a tattao ti naibalud gapu iti panangusarda kadagiti pondo ti gobierno a manggatang iti butos dagiti tattao. Maysa kadagiti naibalud ket ti dati a chief of staff ti presidente, ti maikadua a kadakkelan ti impluensiana iti pagilian.

• Iti Seoul, South Korea, 502 a tattao ti natay idi narpuog ti maysa a department store idi 1995. Natakuatan dagiti imbestigador a napasuksokan dagiti opisial ti siudad tapno palubosanda dagiti kontraktor nga agusar kadagiti nababa ti klasena a konkreto ken manglabsing kadagiti paglintegan iti kinatalged.

• “Makapadanag ti kinakaro ti problema [kurapsion iti Europa],” kuna ni Cecilia Malmström a komisioner iti European Commission Home Affairs. Kunana pay a “kasla saan a determinado dagiti politiko a mangikkat a naan-anay iti kurapsion.”

Nauneg ti pannakairamut ti kurapsion iti gobierno. Insurat ni Propesor Susan Rose-Ackerman, maysa nga eksperto iti topiko a kontra-kurapsion, nga agkasapulan ti reporma iti “dakkel a panagbalbaliw iti panangipatungpal kadagiti programa ti gobierno.” Nupay kasla awan namnama, ipakita ti Biblia a saan laeng a posible no di pay ket sigurado a mapasamak uray ti daddadakkel a panagbalbaliw.