Saludsod
◼ Rumbeng kadi ti agpartuat wenno mangadaw manipud iti publikasion ti Sosiedad tapno maiwaras iti sabsabali?
Kadagiti naglabas a tawtawen, ti Sosiedad ket namartuat iti nawadwad a publikasion maipapan ti gistay amin a benneg iti pannakaammo ti Biblia. Tunggal maysa a nakaadal ti kinapudno iti kallabes a tawtawen ti makarikna a naikapisda kadagiti gunggona manipud iti material a naipablaak idi napalabas ngem saanen a maala dagita manipud ti Sosiedad. Adda dagiti inkagumaanda iti napaut bassit a tiempo a nanggun-od kadagiti daan a publikasion, ket adda met dadduma ti namataud kadagitoy manipud iti publikasion ti Sosiedad tapno magun-odan dagitoy iti nagduduma a wagas. Ramanenna daytoy ti aktual a panangimprinta manen kadagitoy a publikasion agraman iti panangpataud babaen ti computer. Iti dadduma a kaso, naaramid daytoy a maipaay iti pinansial a ganansia.
Ti matalek nga “adipen” ket sipupuot maipapan iti espiritual a kasapulantayo ken ipaayna dayta “iti umiso a tiempo.” (Mat. 24:45) No kasapulan ti pannakaimaldit manen dagiti napalabas a naipablaak, iyurnos dayta ti Sosiedad. Kas ehemplo, dagiti tomo ti The Watchtower manipud 1960 aginggat’ 1985 isudat’ naimaldit manen tapno magun-odan. Nupay kasta, no tunggal maysa iti bukodna ket aramidenna dayta a panangpartuat ken panangiwaras kadagita a material, mapataud ti saan a kasapulan a problema.
Rumsua dagiti serioso a parikut no dagitoy a material ket mapataud ken maiwaras a maipaay iti pinansial a ganansia. Ti “Saludsod” iti daydi 1977 a Ti Serbisiotayo iti Pagarian kunaenna: “Kasayaatan a banag no ditay koma pagganansiaan dagiti teokratiko nga asosasion babaen ti panangigay-at wenno panangiwaragawag iti lako ti aniaman a produkto wenno serbisio a maipaay iti nakomersioan a gunggona idiay Kingdom Hall, kadagiti pagadalan ti libro iti kongregasion ken asamblea dagiti tattao ni Jehova. Daytoy ti tumulong kadatayo a mangasikaso iti espiritual a paginteresan a maikari kadakuada ken mailugar iti nakomersioan a trabaho iti umiso a lugarna.” Gapuna, napateg a banag a liklikan ti panagbalin a sipapanunot iti ganansia no maipapan ti pananginegosio iti Sao ti Dios wenno bambanag a naisinggalut iti daytoy.