Usarenyo a Naimbag Dagiti Publikasiontayo
1. Kasano a matuladtayo ti panangapresiar ni Jesus kadagiti probision ni Jehova?
1 Kalpasan ti milagro a panangpakan ni Jesus iti dakkel a bunggoy dagiti tattao, imbilinna a maurnong dagiti natedda a taraon. (Mat. 14:19-21) Ti kasta a di panangsayang ni Jesus kadagiti probision nga inted ni Jehova ket nangipasdek iti nagsayaat nga ulidan tapno ‘ipakitatayo ti panagyaman’ babaen ti panangusartayo a naimbag kadagiti insagana ni Jehova babaen ti “matalek a mayordomo.”—Col. 3:15; Luc. 12:42; Mat. 24:45-47.
2. Ania ti aramidentayo tapno ditay maurnongan iti adu a magasin?
2 Magasin: Maurnongantayo kadagiti magasin no ditay ipaima a dagus dagita. No kanayon nga adda matedda a magasintayo, nasken a kissayantayo ti pedidotayo. Dagiti ngay daan a magasin? Uray no daanen dagita, saan nga agkupas ti mensaheda. No naurnongantayo kadagiti daan a magasin, mabalin a matulongannatayo ti manangaywan iti serbisio wenno ti sabali pay a panglakayen tapno sieepektibo a maipaima dagita.
3, 4. Ania dagiti laglagipentayo no mangalatayo kadagiti literatura iti Kingdom Hall?
3 Dadduma a Literatura: No sabalin ti maitukon a publikasion, kitaenyo nga umuna no addaankayon iti maipaima a publikasion sakbay a mangalakayo iti kanayonan a kopia iti Kingdom Hall. Mangalakayo laeng koma iti umdas a kasapulanyo iti makalawas, ket mangalakayto manen no naipaimayon dagita.
4 No maipapan kadagiti bukodyo a kopia ti publikasion, kiddawenyo laeng ti talaga a kasapulanyo. Isuratyo ti naganyo iti naipaay nga espasio. Dayta ti tumulong kadakayo a mangilasin iti personal a kopiayo. No agus-usarkayo iti Watchtower Library iti CD-ROM ken agur-urnongkayo kadagiti personal a kopia dagiti magasin, saanen a kasapulan nga agkiddawkayo kadagiti bukodyo a tomo ti Pagwanawanan ken Agriingkayo!
5. Ania ti rumbeng a laglagipentayo no ipaimatayo dagiti publikasiontayo?
5 Panangipaima Kadagiti Publikasion: Dagiti laeng mangipakita iti pudpudno nga interes ti paimaantayo kadagiti publikasiontayo. Laglagipenyo a datayo ti nangnangruna a mangibaklay kadagiti nagastos kadagitoy a napateg nga alikamen iti ministeriotayo. No mangipaimakayo iti publikasion kadagiti interesado, dikay bumdeng a mangibaga a mabalinda met ti agdonar kas pangsuporta iti sangalubongan a trabaho.
6. Apay a tagipatgentay unay dagiti publikasiontayo, ken tignayennatayo dayta a mangaramid iti ania?
6 Simimilagro a nangipaay ni Jesus iti material a taraon, ngem masansan a pinakanna dagiti tattao iti naespirituan. Kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mat. 4:4) Dagiti publikasiontayo isuroda dagiti kinapudno a linaon ti Biblia a napateg iti pananggun-od iti biag nga agnanayon. (Juan 17:3) Saan a rumbeng a masayang dagita!